امسح اسمه و غيظه
سنين بيسلمونا لبعض
لعبة وبيلعبوا بيها
ولينا فى كل واحدة وعد
مع الدنيا وبلاويها
ألفين وتسعة فى ديسمبر
وبالتحديد فى يوم تلاتين
وصلنا للمطار نسعى
لحته نقضى فيها يومين
وبالمرة.. نودع عام
ونستقبل سنة جديدة
قلوبناهايمة ف الأحلام
برحلة رايقة وسعيدة
فجأة وإبتدا الموال
وجع فى البطن مع إسهال
وميل للقىء وراس بتدور
فضلنا ننتظر دكتور
يباشرنا ..وجالنا الدور
وجت دكتورة زى البدر
تباشرنا فى قرب الفجر
إديتنى للألم حقنة
قالتلى دا مغص كَلَوى
فى جنبك يهرى وبيلوى
ياريت لو تشربى حاجة
تكون دافية ..ماهيش سخنة
دقايق تبقى عال العال
يُسمح بالسفر فى الحال
وفى الطيارة شفت الويل
وجع بيزيد يهد الحيل
مامرش بيا فى الأيام
وبعد مامرت الساعة
وصلنا مدينة الأحلام
طلبت طبيب بسماعة
يخفف بعض م الآلام
وقام نادِه على الإسعاف
وع المستشفى رحنا خفاف
وقالوا أحسن الموجود
وياريتهم ماوجدوها
عيار الكشف مش مظبوط
دكاترة صغار وفى التوهة (ا)
وقلت مفيش غيرإنى أعود
وأرجع للمطار فى الحال
وهات يامكالمات وردود
تلاقى تذكرة دامحال
وبعد الفحص والتدقيق
ألم بيزيد وصبر يضيق
توصلنا لأغلى مكان
على طيارة من أسوان
ألو…ياأهلى قابلونى
أنا جايالكوا فى السكة
لأقرب مشفى ودونى
فى جنبى غزغزة وشكة
وفعلا أهلى قابلونى
وع المستشفى أخدونى
بدينا رحلة التشخيص
وبعد يومين من الفحوصات
وبعد الكشف والتفعيص
قالولى ..دا ألم زايدة
ولازم تنقطع فى الحال
فقلت ..خلاص.. مفيش فايدة
شيلوها وخلصوا الموال
ومن أوضتى قابلت العام
مافيش لاهتاف ولا أعلام
ولاغنوة سنة جديدة
على الأوجاع بأفوق وبأنام
بحقنة مؤلمة شديدة
ومنها كمان ..أنا بأكتب
وبأعلم كافة الأطراف
لأنه مفيش مجال أكدب
وأقول كان عام جميل الأوصاف
وبروزنا ببراويزه
ومع إنه ثقيل وإنزاح
قطع من بطنى حتة وراح
لكن ح أخرج سعيد مرتاح
وح أمسح
إسمه(و) وأغيظه
ـــــــــــــــــــــــــــــــ
من مدونة "مصراوية".