انتقل إلى المحتوى
أرشيف عشريناتفبراير ٢٠٠٤ – مارس ٢٠١٠

سـؤال ماتسألــوش

حياتناقراءة في ٤ دبقلم دعاء الشامي

"هو أنت مرتبك كام؟" تقولها هبه بكل ثقة وكأنها تسألني أنتي عامله إيه النهارده؟ أخجل من عدم الرد وفي الوقت ذاته أرفض أن تعرف قيمة راتبي.. باستفزاز واضح عليها سردت سلمى ماحدث معها قبل دقائق..

لم تستطع سلمى أن تخرج من المأزق، حاولت البحث عن رد مناسب كي لا تحرج صديقتها أو تكشف قيمة راتبها الحقيقي فاضطرت أن تكذب وتخبرها برقم مغلوط.

محمد لديه المشكلة نفسها ولكن مع أقاربه لوالدته، فهم يصرون على معرفة راتبه، ولا يعرف سبب لذلك. حاول محمد مرات أن يعبر عن ضيقه من السؤال ولكن خاله الأصغر يصر، دائما يسأله أمام العائلة مجتمعة فيضطر للإجابة..وحاول ذات مرة تغيير الرقم بأي كلام والسلام، فتدخل خاله الأكبر ليذكره أنه أخبره برقم مختلف قبل أسبوع وكان موقف محرج للغاية..

مفيش بيبي؟: حاتم، يعتبر أن التكهن بسبب تأخر إنجابه هو السؤال الأسخف على الإطلاق، يتهرب حاتم من الإجابة ليس لأنه يريد إخفاء أسباب مرضية، ولكن لكي يفهم الطرف السائل أنه شيء لا يخصه وبالتالي فليس من حقه أن يعرف من الأساس..

"هو أنتي لسه مخلفتيش، ياترى العيب من مين يا حبيبتي، لازم تكشفي وتطمني على نفسك".. هذه الجملة تثير جنون هيام، لأنها تسمعها بشكل يومي في العمل، وبشكل دوري في زيارات أهل زوجها وأهلها..

تستنكر هيام التي لم تنجب بعد، تلك البساطة التي يلقون بها السؤال ، رافضة أن تصبح مثارا لحديث الآخرين، وتعتبر انه سؤال مهين وفيه اتهام واضح دون وجه حق.

تروح بالسلامة: "إلي أين أنت ذاهب؟" سؤال ربما يكون من المناسب أن تلقيه علي زوجتك أو والدك أو صاحبك الأنتيم ، ولكن هل من المناسب أن تسأله لزميلك في العمل أو جار تقابله على سلم البناية التي تقطنها؟؟

هكذا باستفهام واستنكار تساءل علي عن سر السؤال المتكرر من جاره، الذي كلما يراه يصر على معرفة وجهته ليودعه في النهاية بـ"تروح بالسلامة"..ربما يقصد الرجل الاطمئنان ولكن لماذا تكون مجبراً على الإجابة؟؟..

أين العريس؟: الزواج أيضا، يحمل بعض الأسئلة المرفوضة فمروة تعتبر التفتيش عن سبب تأخر زواجها سؤال مرفوض تماماً، فما الجواب الذي ينتظره السائل بالتأكيد لن أخبره أني معيوبة أو أن والدي ينتظر العريس الثري الذي يمتلك السيارة والشقة والمهر الضخم، فهو في النهاية يعرف أن النصيب لم يأت بعد..كانت هذه إجابة مروة حول السؤال الذي ترفض سماعه..

ويستنكر حسن سؤاله عن توقيت زواجه المؤجل منذ أعوام، معتبراً السؤال في حد ذاته خاصة لو تكرر "تقليل من شأن الشخص أو اتهام له بالتقصير".

يرفض حسن الإجابة عن السؤال الذي يدخله في حالة من الجنون لدرجة أن الجميع انتهوا عن سؤاله ولكن بعد خناقات كثيرة.

أسئلة كثيرة ربما نسألها بعفوية متناسين أنه يجب أن تختفي من قاموسنا الاستفهامي، ولا نشعر بسخافتها واستفزازها إلا إذا كنا المستهدفين من السؤال.

أخرج من المأزق ببساطة

كي تعرف كيف تخرج من مأزق الأسئلة المحرجة اقرأ معنا هذه الخطوات:

- كن محدد مع نفسك، من هو الشخص الذي تسمح له بالتدخل في تفاصيل حياتك، فكل منا لديه مجموعات للناس فهذا صديقي وهذا قريبي وتلك زميلتي في العمل. ولكل فئة من الفئات السابقة درجة معينة من القرب والحقوق.أعرف من يكون وأخبره بقدر ما تريد.

- الوضوح والصراحة هما الحل الأفضل في هذه الحالات، فإذا طرح عليك أحدهم سؤال تعتبره خارج عن الطبيعي استأذنه في عدم الرد.

- لا تعتبر انساحبك وعدم ردك كارثة بل هو أمر عادي للغاية، فالطرف الآخر لم يحرج أن يتدخل فيما لا يعنيه وبالتالي لا تشعر بتأنيب الضمير ولا تتراجع عن قرارك.

- إذا قابلك أحد الملحين في السؤال أو تكرر عليك نفس السؤال مرات عديدة من نفس الشخص التزم الصمت واجعله يشعر بجرم ما يفعله حتى يقلع عنه.

- في حال توجيه السؤال من أحد أقاربك، ولا تريد الرد اختر طريقة لبقة للرد مثل" ناسي الحقيقة"، " اعذرني لا أستطيع التذكر"، " لله في ذلك حكم" و"لم يقدر الله بعد" هكذا حسب نوعية السؤال الموجه لك.

- احتفظ لنفسك بقدر من الخصوصية مع الآخرين إذا كنت تتمنى ألا يسألك أحدهم سؤال ترفض الإجابة عنه، فلا تخبر الجميع عن أسرارك طوال الوقت لأنك بذلك تسمح لهم بالتدخل.

- ضع نفسك موضع الشخص الآخر فإذا جال بخاطرك سؤال لا تحب أن يطرحه عليك أحدهم فلا تطلب من الآخرين الإجابة عنه..

- تذكر أن حياتك الخاصة بكل ما فيها ملكك وحدك، ومن حقك أن تحميها دون أن يخل ذلك بمعاملتك الجيدة واللطيفة مع الناس.

الكُتَّاب

الأقسام

تعليقات القرّاء

تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.

  1. جيـــمـي كُتب في
    فيه أسئلة بتبقى مستفزة فعلاً جداً .. ومعتقدش أن الأستفزاز بيبقى علشان نوعية السؤال .. ولكنه علشان مين الشخص الى بيسأل وليه ؟ وأنت بتقبله ولا بتبقي عايز تنهى معاه الحوار بأي طريقة .. وزي ما أتقال في الموضوع .. أعرف من يكون وأخبره بما تريد ..
    تلاقى واحد جاي اول مرة اقعد معاه ويقفش ودني .. انت ساكن فين .. لوحدك ولا مع أسرتك .. شغال فين .. وياتري مبسوط.. وبتاخد كام على كدة في شغلك .. نفسي أعرف أنت ليه مش مرتبط لحد دلوقتى .. ناس قدك وفاتحين بيوت .
    دى عينة من أسئلة إستفزازية .. أنا شايف ان الأسئلة كلها عادية بس لما تكون بين أتنين قريبين من بعض … سواء أصدقاء أو في محيط الأسرة الوالد و الوالدة ولكن مش واحد أول مرة أقعد معاه أو حتى بقعد معاه كتير بس العلاقة مش الى هى يعنى تسمحله بانه يسأل أى من تلك الأسئلة .
    الحمد لله ان عندي فوبيا التطفل وإن كنت في بعض الأحيان بسأل أسئلة عفوية نتيجة موقف حصل .. وأعتقد ان كدة أحسن .
  2. أسماء كُتب في
    للأسف اكتشفت أن الكثير من الناس عندها لقافة غير طبيعية
    أسئلة على أي حاجة ..
    وفوق هذا تعيد وتزيد لين تردي وتخلصي نفسك من الإلحاح وبعدين
    تطحيين في مشكلة أكبر بتسأل وبتسأل
    ربك يعين
  3. جمال ابوانشيش كُتب في
    عتاب كبير ياامن اف ام مادم ماتردو علينا ليه نافذة قول شكوتك شو الفائده نقول الشكوه ولا نسمع ايجابه قلت شكوه لقيت صمت عنيف واهمال غريب ماتعودنه من عصام العمري
  4. يمنى كُتب في
    سؤال آخر أضيفه: إنتى هتتحجبى إمتى؟ أو ليه مش محجبة؟
    هذا شأن خاص بين الفتاة وخالقها وليس من حق شخص غريب أن يسمح لنفسه التطرق فى هذا الموضوع الخاص
  5. ميدو كُتب في
    يمنى عندك حق بس ياريت تاخدى السؤال كأنه نصيحه بس اللى بيسأل سؤال زى ده يا ريت يقوله بطريقه احسن عشان ياخد الثواب لو هو بيفكر فى الثواب
  6. النصر لمصر كُتب في
    على فكرة انا لما بتسأل سؤال مش من حق حد يعرفه بقول وبكل وضوح ملكش فيه حتى لو ابويا بقوله ملكش فيه يا حاج
  7. Ahmad كُتب في
    اسف مش شغلك
  8. أجنادين كُتب في
    تسلم إيديك يا دعاء.. الموضوع فعلا مهم وبيتكرر كتير والناس مفيش فايدة في تجاوزها
    رغم إن أهلنا ربونا على إن الأسئلة من النوع دا من الحاجات العيب جدا، لكن الواحد بيفاجأ إن اللي حوليه بسألوها عادي جدا فعلا كأنهم بيسألوه ازيك؟
    عجبني كمان طرحك للحلول في النهاية، وخصوصا: " لا تعتبر انساحبك وعدم ردك كارثة بل هو أمر عادي للغاية، فالطرف الآخر لم يحرج أن يتدخل فيما لا يعنيه وبالتالي لا تشعر بتأنيب الضمير ولا تتراجع عن قرارك." فعلا دي أهم نقطة للناس الذوق جدا الي مبيحبوش يكسفوا حد.. لأ إنت مبتكسفهوش، هو اللي بيكسف نفسو ومفروض يستحي أصلا يسأل عن حاجة بالغة الخصوصية كدا.
    تسلم إيديك كمان مرة يا دعاء
  9. dndona كُتب في
    انا من طبعى بحب الخصوصية ومش بحب اسال على حاجة متخصنيش وهو ده الصح واللى المفروض الناس تربى عليه اولادها هو عدم التدخل فى شئون وخصوصيات الغير لان الشيء ده ميهمنش الا بقا لو هو متطفل وانا اكره هذا النوع وبحرجهم لان مش من حقهم اللى من حقهم يعرفوه بيعرفوه وبس لازم فى حاجات نحتفظ بيها لنفسنا مش لازم حد يعرفها ابدا حاجات خاصة واخيرا اختم بقولى من تدخل فبما لا يعنيه سمع ما لا يرضيه اظن محش فينا يحب يوضع فى هذا الموقف السخيف
  10. عبدالله كُتب في
    انا والله نفسي حد يكلمني على الاميل بتاع الياهو ماسنجر وايميلي اهو/abdooo_esam6000 @yahoo.com
  11. UNKnown! كُتب في
    اقتباس النصر لمصر:
    على فكرة انا لما بتسأل سؤال مش من حق حد يعرفه بقول وبكل وضوح ملكش فيه حتى لو ابويا بقوله ملكش فيه يا حاج
    دى بيسموها عندنا (ونعم التربية) انت ممكن تتهرب من سؤال الأخرين (أقصد يعنى الناس الحشرية) بكل ذوق و نفس الوقت بتقدر تكسفوا وممكن كمان تضحك الناس عليه.
    (على فكرة انا مقصدش أى أهانة وانت كده زى الفل خليك زى مانت)
  12. 422ahmed كُتب في
    الموضوع ده بيوصف مشكلتي ,
  13. مريكا كُتب في
    اقتباس النصر لمصر:
    على فكرة انا لما بتسأل سؤال مش من حق حد يعرفه بقول وبكل وضوح ملكش فيه حتى لو ابويا بقوله ملكش فيه يا حاج
    ههههههههههههههه ههه
    والله ده اللي ينفع معا الناس ديا احييك علي شجاعتك هما ممكن فعلا يقولوا ونعم التربيه زي مافالUNKnown بس والله ماينفع معاهم غير كده بس اظن بابا لاء كان موتني ههههههههه قبل مااقولها
  14. مريكا كُتب في
    فعلا حاجه بتضايق جدا لما حد بيسالني هتتجوزي امتي وتكون اصلا ساله السؤال ده ميت مره قبل كده
    بس اقلهم ياعني انتوا اتجوزتوا اخدتو منها ايه هههههههه بكسفهم
    اقولهم فتره الخطوبه احلي كتير وانا عاوزه اعيشها اكتروقت ممكن موضوع جامد وفعلا بيحصل دايما
  15. BODA كُتب في
    هي كلمة اللي بقولة للانسان او الانسانة الرخم ( فستك )
  16. محمد كُتب في
    لا فعلا موضوع جميل اوى .. تسلم ايدك .. انا اكتر سؤال على طول ناس مش صحابى اوى بيسالونى هو انت رايح فين ؟ هههههه بصراحة انا بخرج من الموقف بطريقة كدة يعنى .. بسكت وبعديها اسالة عن اى حاجة وخلاص مثلا اقولة شوفت الماتش امبارح ههههههههههه اهى طريقة بردوا
  17. عبدالله الجندي كُتب في
    ممكن بعض الاسئلة بجاوب عليها بسؤال بتدخل الانسان اللى بيسألك فى متاهه
    زي مثلا لو حد سألك مرتبك كام ؟؟ ممكن تقلو بتسأل لية؟؟ هو نفسو هيلاقى انو مش من حقو يسأل سؤال زي ده لان مش هيلاقي اسباب لسؤالة ويعجز عن الرد…والبعض ممكن يكون رخم يقولك عايز اعرف!! … اطلع انت اذكى منو قلو ايوة تعرف لية يعني؟؟ على هذا المنوال دا اذا كنت انت مش عايز تقطع لغة الحوار بينكم وانت عايزو هو يحاسب نفسو وفي نفس الوقت انت متحرجوش
  18. ما شاء الله كُتب في
    انا بقي محطوط في وسط دفعه .. القواميس بتاعتها مفيهاش كلمة خصوصية دي نهائي
    لدرجة ان ظرف اضطرني اني اجيب مجموعة منهم البيت .. ودا اول ما دخل الاوضه حدف نفسه ع السرير ولا اكنه بايت واكل شارب في بيتي .. وصلت لمرحلة الانفجار .. قولتله انت قاعد في بيتك .. قالي لا .. قولتله طب اتعلم ازاي تحترم بيوت الناس
    ومن دا كتير .. والمشكله اني بحرج كتير .. بس هما واخدين انتي بايوتك تناحه
    ربنا يهدي الجميع
  19. ezzat كُتب في
    هوة انت متجوز؟
    بجد السوال ده بيضايقني جدا
    بس الناس فعلا فضوليه
  20. بلال المصرى كُتب في
    لما حد يسالك انتة جايب دى بكام لو هى غالية يقولك انتة انضحك عاليك لو رخيصة يقولك اى كلام هو انتة مالك انا شارية بكام ؟؟؟؟؟؟ مش دة سؤال بيضايق
  21. bidoo كُتب في
    aw momkiin terood bathreeg wel mawdoo3 da beynfaa3 awyy for example : ( mortabaak kam ya hseen ana ba5ood walahy 12 million gneeh fel shahr bas mosh me2adeyeen 5aliis il yomiin dool )) … ) rayeee7 feeen ya heseeen talee3 3ala canadaa bas mosh hat2a5aar hagyy 3ala il 3'adaaa isA 3ayez 7aga min canada we ana gaay
  22. mounir كُتب في
    da2iman yas2alouna 3an morattab wahal howa morattab kafi
    fayakouno jawabi hakada:morattab 3adi into 3arfiin morattabat ihadihi al2ayam ya3ni il7amdolilllah
  23. صبري كُتب في
    كان فيه واحد صاحبي كل ما يقابلني يقلي انت رايح فين زهقت منه علي الاخر كنت عاوز اشتمه او اضرببه من كتر السؤال بتاعه المهم اخر ما زهقت منه قلت ليه يا اخي انت سواق تاكسي اول ما بشاور ليك بتسالني كل مره انت رايح فين
  24. صبري كُتب في
    اقتباس UNKnown!:
    اقتباس النصر لمصر:
    على فكرة انا لما بتسأل سؤال مش من حق حد يعرفه بقول وبكل وضوح ملكش فيه حتى لو ابويا بقوله ملكش فيه يا حاج
    دى بيسموها عندنا (ونعم التربية) انت ممكن تتهرب من سؤال الأخرين (أقصد يعنى الناس الحشرية) بكل ذوق و نفس الوقت بتقدر تكسفوا وممكن كمان تضحك الناس عليه.
    (على فكرة انا مقصدش أى أهانة وانت كده زى الفل خليك زى مانت)
  25. looooooooool كُتب في
    أفتكر قصة إن واحد من السلف راح يزور صديق فقالوا له نايم قال لهم وده وقت نوم ومشى … بعته وراه عيل صغير عشان يقول له ممكن نصحه ليك .. فالواد اتأخر فـسألوه اتأخرت ليه قالهم أصلي فاضلت ماشي ورا الراجل وكان قاعد طول الطريق يكلم نفسه ويقول ( ومالك انت وقت نوم هذا ام لا لعله مريض لعله كذا لعله …) وظل طول الطريق يلوم نفسه عن سؤاله ده
    أنا نفسي نتعلم من الناس دي حاجة
  26. samsimo كُتب في
    اقتباس مريكا:
    اقتباس النصر لمصر:
    على فكرة انا لما بتسأل سؤال مش من حق حد يعرفه بقول وبكل وضوح ملكش فيه حتى لو ابويا بقوله ملكش فيه يا حاج
    ههههههههههههههه ههه
    والله ده اللي ينفع معا الناس ديا احييك علي شجاعتك هما ممكن فعلا يقولوا ونعم التربيه زي مافالUNKnown بس والله ماينفع معاهم غير كده بس اظن بابا لاء كان موتني ههههههههه قبل مااقولها
    .والله جدع نفسى ابقى زيك كدة يوم بس مش مع ابوى مش للدرجادى بس اكون مع الناس كدة
العودة إلى الأعلى