زوجة رجل ممل (5)
يا سلام على أيام الخطوبة وحلاوتها، والكلام الحلو المعسول اللي بيقوله الخاطب لخطيبته، الدنيا بتتحول لربيع والجو بيبقى بديع، ولو حد حاول يغير حالاتها السعيدة تقوله على طول قفلي على كل المواضيع "على رأي الفنانة سعاد حسني"...
ويا سلام لو زعلت منه تبقى مصيبة، ويحاول يصلح غلطه بأي طريقة وتنهال عليها الورود محاولة منه لإرضائها...
لكن بعد الزواج يحصل ما يسمى "بالسكتة الزوجية"..حاجة كدة شبيهة بالسكتة الدماغية يفقد الزوج القدرة على الكلام، والورد بالنسبة له معناه بيتغير.. من رمز للرومانسية والحب إلى شيء فقط يرتبط بزيارة المرضى في المستشفيات!!!
متهيألي كفاية كدة كلام عام وتعالوا معايا عشان أشرح عمليا "السكتة الزوجية" في حياتي أنا وهاني...
مش هكذب عليكوا وبرضه مش عايزة أظلم هاني، أول 6 شهور جواز كانوا من أسعد أيام حياتي، كانوا فيهم طبعا شوية خناقات صغيرة لكن عادي كانت بتعدي، لكن المجمل كانت شهور سعيدة وطبقا لقول إحدى صديقاتي "أنا كدة حققت رقم قياسي في الزواج السعيد" لكن الوضع بدأ يتغير شوية بشوية....
في يوم رجع هاني من شغله وأول ما دخل حضرت الأكل على السفرة وجلسنا معا...
- عامل إيه يا حبيبي.. أنت شكلك مجهد
- فعلا
- عملت إيه في الشغل النهاردة؟
- عادي
قلت أحاول أنا أفتح حوار...
- عارف النهاردة كلمت مي... وقبل ما أكمل كلامي
- هدى معلش أنا تعبان ومصدع
فضلت السكوت وافتكرت كلام واحدة صاحبتي "ربنا يكرمها" قالت لي أن بعض الستات الفراغ وشغل البيت بيخليهم مش لاقيين حاجة يعملوها فيتخانقوا مع أزواجهم!
وقام هاني يتفرج على الماتش...
- الماتش هيبدأ أمتى يا هاني؟
- على وشك
- طيب مش عايز مني حاجة ؟
- لأ شكرا
وأثناء الاستراحة بين الشوطين وبدون يأس حاولت مرة أخرى..
- بس على فكرة الأهلي ماكنش بيلعب كويس
- إزاي يا هدى دا بيلعب حلو أوي
- يعني حسيت أن الفريق التاني معاه الكرة أكتر منه
- هدى أنت ما بتعرفيش حاجة في الكورة يا ريت تسكتي أحسن
يا سااااااااتر أنا بحاول أفتح كلام أعمله إيه بس...
وبعد الماتش لقيت فرصة حلوة ترجع لنا الرومانسية اللي هربت...
- هاني أنت عارف النهاردة هيعرضوا الفيلم اللي كنا بنحب نتفرج عليه أيام الخطوبة
- فيلم إيه مش فاكر
- تيتانيك
- أه.. طيب
- إيه رأيك نتفرج عليه سوا
- لأ معلش أنا عندي شغل أتفرجي أنت
قلت مش مشكلة يمكن فعلا عنده شغل، وسيبته يشتغل وقمت أتفرج أنا، والمشاهد الرومانسية قطعت قلبي وافتكرت أيام الخطوبة واتحسرت، وبعد ما خلص الفيلم دخلت أطمن على هاني...
- هاني
- نعم يا هدى أنا بتكلم في التليفون
وبعد رغي كتييييييير مع واحد صاحبه سألته..
- أنت خلصت شغل
- لأ بصراحة ما كنش ليا مزاج أشتغل فكلمت "عمر" صاحبي أرغي معاه
ومع هذه الكلمات حسيت أن البركان أنفجر، يعني عمالة أفتح حديث معاه كان عامل زي الموبايل اللي شحنه خلص، ودلوقتي قاعد يتكلم ويهزر لأاااااااااااااااااااا...
وخلص اليوم وطبعا بدل من إنتهائه نهاية سعيدة على أصوات الموسيقى الهادئة، زي أيام الخطوبة نام كل منا وفي أذنه قنابل ومفرقعات قذفها عليه الطرف الأخر...
فعلا دوام الحال من المحال...تصبحوا على خير!
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
و بنا انك ديما بتختم بشعارك الشهير حختم بشعار الفلسطنية الدائم
تصبحون على وطن
وللأسف … أوقع حاجة …
موبايل … شحنه خالص ومش بيكلم حد خالص …
لكن تعرفي ؟؟؟ الموبايل ساعات بيعمل نفسه شحنه خالص لأنه مش بيلاقي يتصل بيه … ولا يكلمه …
في البيت عندنا … كانوا أي حاجة تعطل … يقولوا السبب هو الركنة وقلة الاستخدام
ساعات الموبايل برضه ممكن يعمل نفس الحركة …
لأنه … محدش بيكلمه …
نفسي … في حياة زوجية ميكنش فيها الغلطات اللي بأشوفها دلوقتي …
نفسي في حياة يكون كل واحد فيها بيفكر في الحاجت الصغيرة اللي ممكن تفرح التاني …
نفسي في حياة أكون فيها الأول والأحير … وتكون هي فيها …برضه الأولي والأخيرة …
نفسي … أول ما نيجي نشد مع بعض … واحد فينا ينهي الكلام …أو ممكن نتفق علي حاجة نعملها أول ما نشد … عشان نبطل شد … ونسكت ساعتها …
نفسي …لما نتضايق من بعض … أكون أول واحد يصالح … وتكون هي برضه أول مين يبدأ بالكلام …
نفسي …لما نقعد نفتكر في ايام الخطوبة وكتب الكتاب و الفرح والأيام دي …ونقول ياااااااااااااا ااه …عشنا من ساعتها في لغاية دلوقتي في السعادة دي …
نفسي قدام عيالنا …صوتنا مش يعلي علي بعض أو يحسوا ..بأن في أي حاجة غلط بينا …
نفسي … أبوس إيديها قدامهم … وكده يتعلموا يبوسوا إيديا وإيديها كمان …
نفسي … تقولهم علي طول استنوا بابا لما ييجي من الشغل عشان نبقي كلنا مع بعض …
نفسي أسيبهم مع حمايا أو حماها في البيت ويكون لينا يوم في الاسبوع ننزل فيه مع بعض … بس .. من غير حد تاني …
نفسي قدام أهلها أقولها ربنا يخليكي ليا … وهي قدام أهلي تقول ده أحسن راجل في الدنيا …
نفسي لما أقعد مع صحابي يقعدوا يقسموا عليا وعلي بيتي وعلي الهنا و الدلع اللي معيشاني فيه …
ونفسي قدام صحابها ..أفضل اشكر وأشكر وأشكر فيها …لغاية ماتبقي طايرة من الفرحة …
أقولكم باختصار!! … نفسي معملش الحاجات الوحشة اللي بيعملنا الناس الكبار دلوقتي …
ادعوا لي … وإن كان فيها الخير …ادعوا لي أكون معاها … ملكة اليمن السعيد ..
مش قلت لكم ؟؟؟مش عايز أسكت …؟
إن شاء الله مش حاسكت
لا للتمديد … لا للتوريث … نعم لتعديل الدستور المصري
mohamedmat@hotm ail.com
ادعوا لي بجد
مش عارفة ليه بعد ما قريت الموضوع و سرحت في مشكلة الشحن اللي خلاص ..وبعدها قريت تعليق اخويا ..لقيت نفسي باقول زيه نفسي (امال يعني هو يقول وانا لا )
نفسي اللي حارتبط بيه يكون نفسه في حياة بجد ..زيك يا محمد
يكون نفسه في الحاجات اللي انت نفسك فيها دي
لانه زي ما قالت ريما في تعليقها …الناحية دي وتحقيق الحلم ده بالذات في ايد الرجل …
موضوعك جميل يا هدي …محبط حبتين اه …لكنه للاسف واقعي
اما بقي بالنسبة للواد اخويا …متقلقش يا محمد مش حاسيحلك وابعت لينك الصفحة دي لملكة اليمن السعيد طول ما انت كويس معايا ..
اقول زي محمد
مش حاسكت
لا للتمديد … لا للتوريث … نعم لتعديل الدستور المصري
يا محمد واضح انك مصري وعلشان أنا كمان مصريه وأعرف معنى حق المواطنة واجبى أنبهك أنك عايش في وهم كبييييييييير ولازم تفوق منه قبل ميفوقك بصفعة يكون ألمها كبيييييير قوي ، كن واقعى مفيش الكلام دة دلوقتى واذا كنت بتغنى فالنوع ده من المغنى بطل خلاص وبقى مستهلك ، وطالما انت بتأيد الدستور يبقى يا أخى خليك مع المو جة الجديدة ،
يا محمد واضح انك مصري وعلشان أنا كمان مصريه وأعرف معنى حق المواطنة واجبى أنبهك أنك عايش في وهم كبييييييييير ولازم تفوق منه قبل ميفوقك بصفعة يكون ألمها كبيييييير قوي ، كن واقعى مفيش الكلام دة دلوقتى واذا كنت بتغنى فالنوع ده من المغنى بطل خلاص وبقى مستهلك ، وطالما انت بتأيد الدستور يبقى يا أخى خليك مع المو جة الجديدة ،