زوجة رجل ممل (الأخيرة)
بعد سلسلة حلقات "زوجة رجل ممل" اللي بتكلم فيها عليا أنا وهاني زوجي، كان ضميري يؤنبني إني مخبيه عن هاني اللي بكتبه، فكرت كتير أوي، وبعدين في النهاية قلت لنفسي "ومالوا أنا هجازف وأعرض عليه الفكرة وربنا يستر"...
واخترت الوقت اللي اعتقدت أنه مناسب وحاولت افتح معاه الموضوع بكل أدب ورقة وظرف، دا طبعا بعد ما قررت أفهمه إني مش أنا اللي مختارة اسم الحلقات، وإن اللي اخترها فريق "عشرينات"..
- إزيك يا حبيبي؟
- الحمد لله كويس
- تحب أعملك شاي أو أي حاجة تشربها؟
- لأ شكرا
- طيب أنا كنت عايزة أتكلم معاك في موضوع مهم لو كان وقتك يسمح يعني..
- خير شكلك في مشكلة.. قولي
- أبدا والله أنا مفيش حاجة دي مجرد حكايات... فضفضة بس يعني
وبصراحة بعد اللي قولته حسيت أني بدأت أعك وأتلجلج فحاولت أسترجع هدوئي..
- بص يا حبيبي أصل أنا بكتب حكايات، مشكلات يعني عن العلاقات الزوجية والخلافات كدة يعني...
- أنا مش فاهم حاجة خالص
- أنا بصراحة بكتب عن بعض خلافاتنا بس ما تخافش القراء ما يعرفوش إحنا مين مجرد بس الاسم الأول، وأكيد في ملايين هاني وهدى متجوزين..
وبعد ما خلصت الجملة لقيت هاني ما قالش ولا كلمة وكأن الصدمة أفقدته النطق، وقعد يبحلق فيا...
- هاني..هاني..رد عليا يا حبيبي طيب زعق قول أي حاجة..
لكن تصرفه فاق أي توقع..انفجر في الضحك!!
وحسيت الحمد لله أن ربنا وقف جانبي، وهاني تقبل الموضوع بصدر رحب، وبصراحة وبيني وبينكوا أنا كمان زي ما يكون هم وإنزاح من على قلبي..ربنا ستر
وبعد ما انتهى هاني من الضحك قال لي:
- هو أنتي كنتي فاكرة أن أنا ما كنتش أعرف طول الفترة دي إنك إنتي اللي بتكتبي حتى لو كنتي مغيرة الاسم؟
- أنت كنت عارف؟!
- ايوا طبعا، من تاني حلقة بس سبتك تفضفضي عشان أعرف أكتر، أنت عارفة كمان أن الموضوع دا قرب أكتر من وجهات النظر لأني عرفت مشاكل حياتنا بهدوء بدون أي انفعال بينا، وفهمتك أكتر..
طبعا مش محتاجه أقولكم أنا فرحت أزاي بعد الكلام ده، وازاي ضميري ارتاح..
وطبعا بعد ما هاني طلع عارف كل حاجة، اعتقد إن دي هي النهاية المنطقية لحلقات زوجة رجل ممل.
قرائي الأعزاء..مش عارفه أودعكم في آخر حلقاتي أزاي، بس لازم أشكركم جدا إنكم سمعتوني طول الحلقات اللي فاتت..وبنقل ليكم كمان تحيات هاني..بس ما تنسوش تدعولنا.
أقرأ أيضا:
زوجة رجل ممل (1)
زوجة رجل ممل (2)
زوجة رجل ممل (3)
زوجة رجل ممل (4)
زوجة رجل ممل (5)
زوجة رجل ممل (6)
زوجة رجل ممل (7)
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
هو ده السؤال المهم أعتقد …
معتقدش ان دى نهاية
وسترين فرق خلال اقل من شهرين، لكن إياكي بعد ذلك من التوقف عن الدعاء، ولكن يمكنك بعدها ان تجعلي الدعاء مرتين صباحا ومساء بدل 5 مرات في اليوم.