اسمك إيه على الماسينجر؟!

صباح الفل..

أنا اسمي أحمد قطب، في عشرينات بيقولولي يا "قطوب"، وبصراحة شديدة دي أول مرة أكتب فيها موضوع بلغة بسيطة يفهمها العامة والدهماء من الناس، اكمن أنا دايماً لما أكتب أي موضوع بلغة عربية فصحى محكمة يرد عليا بتوع عشرينات، ويقولوا لي: "يا عم إحنا ناس من عينة اللمبي، وما ينفعش معانا الكلام الجامد ده، عايزين موضوعات في اللذيذ.. في السريع البني"..

بيني وبينكم كنت باستتقل دمي قوي لما أكتب بالعامية، لكن نطت في نافوخي فكرة انهاردة قلت لازم أكتبها لعشرينات، وحيث إن جمهور عشرينات من عينة اللمبي على حد زعم الأخ علي عبد المنعم تحتم عليا أني أكتب الموضوع (عدم المؤاخذة) بلغة العامة والدهماء اللي انتوا بتقروها دلوقتي ..!

ما علينا.. إيه بقى الموضوع؟!

الموضوع إن أنا لاحظت إن الماسنجر أصبح قناة مشتركة للتواصل بين معظم الناس اللي بتستخدم النت في العالم، وفي الآونة الأخيرة انتشرت تقليعة جديدة، خصوصاُ بينّا احنا مجتمع عشرينات، وهي استخدام الـNick Names لإطلاق التعليقات والإفيهات المستقاة من واقع الأحداث أو اللي بتعبر عن حالة الواحد وبينفس بيها عن شيء في صدره، وساعات نخش لبعض قافية بالـNick Names فا قلت ابص على الـHistory بتاع الماسنجر بتاعي واطلع أحلى الـNick Names اللي كنت مألفها واللي زمايلي الأفاضل "اللي من عينة اللمبي" كانوا مطلعينها ...

وإليكم بعضاً منها:

- "إذا كان ربّ البيت بالدفِ ضاربٌ".... أكمل المثل فيما لا يزيد على 70 سطر

- قاهر الأسفلت (بمناسبة اشتراء سيارة)

- حد نازل أول الكوبري؟! (بعد شراء السيارة بيومين)

- إذا الشعب يوماً أراد الحياة.. فلا بد أن تستقيل الحكومة..!

- أنــــــــــــــــــا..

- Not Enough Memory..

- اليوم اكتمل اسمي وتمت صورتي وجُبرت سنون حياتي (بمناسبة وصول أول مولود)

- SPACE SHUTTLE "APPOLLO 13" المركوب الفضائي "هُبَل 13"

- ما باحبش اتكلم عن نفسي...

- أحمد نوتردام

- صميدة حسن ماكسويل

- بيقول لي انت شبه فاروق حسني (أو هكذا قالوا!)

- اللي عنده دم عايز يتبرع بيه يفطر كويس، عشان يعرف يتبرع (في غضون حملة للتبرع بالدم في الموقع)

- انت عارف انت بتكلم مين ؟؟

- ست الحُسن والشاطر مخيمر

- عودة مستر كفتة من رحلة استجمامه في ضلمة دي مايوركا

- إذا أقبل البعراط طاح بهمةٍ ** وإن أقرط المحطوش ناء بكلكلِ‎

- يا تبنولهم بيوت.... يا توفرولهم الكلّة...!

- حد فيكو يعرف يقول لي ازاي العلم الأمريكي كان بيرفرف عالقمر؟؟

- والشمس تشرق فوق الناس آخرةً... ولنا بمربضنا الصباحُ الأولُ (من شعري)

- BackSPACE®

- بص قدامك..!

- ضحكت أمواجه مني وقالت..... "اتلهي"

- خليك في نفسك..

- أنت لن تستطيع أن تخدع كل الناس كل الوقت... لكن غيرك يحاولون !

- ذكر النحل

- الشيطان يكفيه عشر ساعات ليخدع رجلاً .. والمرأة يكفيها ساعة واحدة لتخدع عشرة شياطين

- ..بــُطاس الريــــــح...

- لحمة الفراعنة

- انت مورتبت.. (وقصدت بها أنت مرتبط؟)

- حين يملك الكل فعل ما يشاؤون.. لا يملك أحدٌ فعل ما يشاء.. وحيث لا سيد، فالكل سيد، وحيث الكل سيد.. فالكل عبيد (مقولة لجان جاك روسّـو)

- السحابة السوداء تهنئ الحكومة الجديدة وتتمنى لها شتاءً أسوداً سعيداً

- أنا جدع.

- New Lock..!

- شبكة واحدة ... بتقشّـطـنا كلنا.. المصرية للاتصالات

- توني بلير: "على قوات التحالف الصمود ..!"

- عَارَ.. فات

- الحاموراي الأخير

- معارض يهيص في لندن

- هذه رسالةٌ مسجلة

- العندليب الأخضر

- لا يسلم الشرف الرقيع من الأذى

- الأمين العام للقلل المتحدة

- إلا اللطاخة أعيت من يداويها

- مواتن شغيف (Good Citizen)

- عايزها تبقى مراية... اديـــها بني

- تحيا مصر أحياناً

- لقب أفضل ترزي لعام 2004 (في نهاية العام)

- ليس هذا عاماً جديداً.. لقد رأيته من قبل! (على أعتاب 2005)

- سأبقى في منصبي إذا أراد الشعب (مانشيت في جريدة الأخبار)

- الحكومة عبت الشتا في أزايز وصدرته (موجة حارة تخللت شتاء شهر يناير 2005)

- قطوب في أفظع أدواره ..... المارد والفرارجي (بعد أول خناقة اتخانقتها من 15 سنة)

كفاية عليكم كدة انهاردة، اللي عنده نيك نيم Nick name يكتبهولنا.. وقشدة يا رجالة..

* أحمد القطب مصمم موقع عشرينات