المواصفات القياسية للبنت المصرية..
ساعات الكاتب أو رسام الكاريكاتير مننا, يقلق من موضوع معين قاعد يكتبه ويحس إن الموضوع ده ممكن يعمل له مشاكل لو تجاوز الحدود و الخطوط الحمراء.. هو ده إحساسي وأنا بكتب لكم الموضوع ده بصراحة .. لأنه مش سهل و ممكن يوديني في داهية مع المعجبات عدم المؤاخذة.. وكمان لأنه قد يهدد حياتي بالخطر عشان البنات المصريات موجودين في كل حته، (إنهم بيننا) زى ما يقولوا في أفلام الرعب !!
فها توكل على الله واكتب الموضوع و أمري لله.. كله في سبيل حرية التعبير وإظهار الحقيقة الـ(بلاش نقول العارية عشان محدش يفهمني غلط!)
البنت المصرية تتسم ببعض السمات الغير موجودة في باقي البنات اللي خلقها ربنا.. سبحان الله يعني .. وها نتكلم هنا عن الحاجات دي واحدة واحدة ..
عارف أن التعميم غلط طبعا وإنه من الخطأ نقول: المصريات صفاتهم كذا كذا واللبنانيات بيتصفوا بكيت و كيت.. لأن صوابع اليد مش زي بعضها وكل بني آدم بيعتبر حالة خاصة مختلفة عن غيرة من البني آدمين.. لكن اللي خلاني أكتب الموضوع ده هو إن فيه بعض الصفات المستفزة بصراحة اللي البنت لمصرية مش عارف إنها مستفزة !
- الصفة الأولى: التناكة
مرة كنت في المهندسين رايح لعيادة واحد زميل.. وكنت تايه لأني مش دايس في المهندسين قوي.. أعمل إيه في الحالة دي ؟
رحت راكن على جنب و سائل أي شخص معدي في الشارع.. تصرف بديهي جدا مفيهوش أي حاجه يعني .. لكن لسوء حظي العاثر يشاء القدر إن الشخص ده يكون واحدة بنت..!
بمنتهى التهذيب و الوقار سألتها: "لو سمحتي عيادة الدكتور هشام فين ؟"
وبمنتهى الرقي والتهذيب راحت بصّالي.. وراحت مسمعاني باقة منتقاة -من أروع ما أنتجته قريحة الصيع- من الشتايم !!
أعجبت طبعا بسرعة الأداء ومهارة الإلقاء (الحق يقال يعني !) لكن على إيه ده كله ؟؟
كانت فاكراني بعاكس سيادتها يا جدعان .. تخيلوا المهزلة الإنسانية ؟
وسابتني مذهول وراحت ماشية !!
الصفة الثانية: معجبة بنفسها
البنت المصرية العادية تعتبر أي ولد يحاول التكلم معها,مجرما أثما يحاول التقرب إليها لسبب خبيث حقير شرير ألا وهو التعرف عليها.. إلى أن يثبت العكس!!
لا حول و لا قوة إلا بالله !!
يعنى لو شاء القدر في الكلية عندك (خصوصا طب وهندسة) واضطرتك الظروف إنك تكلم واحدة مش من شلتك أو بينكم صديقة مشتركة, فلا بد أن تكون لك ما يكفي من المبررات والأسباب الكافية جدا, كي تقنع سيادتها إنك لست ذئبا بشريا, وانك لا تسأل عن موعد المحاضرة كمقدمة لسبب آخر لا داع لذكره, عشان العيال الصغيرة اللي بتقرا الموضوع معانا !!
هل لديك زميلة في كليتك من جنسية أخرى؟ لاحظت بتتكلم معاك عادي أزاي كأنك بني آدم خلقه ربنا؟ عادي يعني .. إنما لما تيجي تتعرف على بنت مصرية لازم تتكتك وتخطط وترسم الخطط والاستراتيجيات وكأنك
داخل على موقعة حربية.. فيه إيه يا عم ؟؟ على إيه ده كله يا إكسلانس ؟
الصفة الثالثة: الشياكة
البنت المصرية (بحق ربنا) تتزين وتهتم بمظهرها بشكل لا بأس به إطلاقا (روح سيتي ستارز, مش بتكلم على معهد الصنايع اللي جنب بيتكم يا خفيف !) ..
المشكلة هنا هي نظرة البنت نفسها للمسائل دي ..
البنت دي في الأغلب والأعم بتعمل الشويتين دول لتجذب الشاب الغلبان أللي هايتدبس يا عيني.. و بعد الجواز بقى أنت عارف اللي فيها !!
اسمع القصة دي: يقال أن زوجة كانت كل ما تصحا من النوم تلاقي نفسها غرقانة مية.. فعملت نفسها نايمة في يوم, عشان تعرف المية دي جاية منين.. لقت جوزها جه نام جنبها وفتح التليفزيون .. وكل شوية يقول في حسرة: "هي دي النسوان ولا بلاش.. مش انتي ؟ تفووو !"
على الرغم من كده فيه بعض الخبراء في هذا الموضوع بيأكدوا إن الجيل الصاعد بتاع اليومين دول, فيه أمل كبير قوي وممكن يغير الحته دي.. مين عارف .. مفيش حاجة كبيرة على ربنا !
الصفة الرابعة: احتقار الراجل !!
فيه راجل رحالة قديم جه على مصر في العصور السحيقة ..لاحظ سلوك الستات في مصر وكتب عنه.. بيقول الراجل ده في مذكراته فيما معناه :
"وحين جئت أرض مصر, وجدت فيها أمرا عجيبا مستغربا, ألا وهو تسلط نسائها على رجالها..!! عجبت لهذا الأمر عجبا عظيما, و انتويت سؤال أولى العلم في هذه المسألة الغريبة.. فجاءني رجل بالسبب:
حين خرج فرعون لملاقاة موسى, خرج ومعه كبار القوم وسادتهم, وتركوا النساء و العبيد.. فلما حدث ما حدث وهلك فرعون ومن معه ..اتخذت النساء عبيدهن أزواجا !.. ومن هنا جاء تسلط نساء مصر على رجالها حتى اليوم, فهم يعاملونهم كالعبيد".
شايف القصة المهببه دي ؟ اهو الراجل مش من هنا و قالها بنفسه.. بتعملوا فينا كده ليه يا نساء مصر اتقوا الله فينا مش كده.. دا حتى عشان سمعة الوطن في الخارج.. يرضيكم اللي بيتكتب ده يعني ؟؟
نعمل إيه طيب ؟؟
بعد ما شفنا البنات بيتعاملوا معانا أزاي يا شباب.. لازم نعد العدة ونتعامل معاهم بنفس الأسلوب.. خد الحلول دي وظبط نفسك :
الحل الأول: المساواة ..في الظلم عدل !!
زمان كانت الست المصرية بتحارب عشان حقوقها .. دلوقتي لولا الكسوف بس كان الرجال عملوا جمعية لمناصرة حقوق الراجل.. مش كده ؟؟
لاحظ كده لو كنت بتركب المترو أو الأوتوبيس .. سيب بس أي بنت حلوة لابسة ستوماك بادي تدخل وشوف إيه اللي هايحصل.. هاتلاقي شاب كده هلهولة عامل جنتل مان راح قايم ومقعدها مكانه .. وغالبا البنت هاتنزل آخر الخط و مش هاتقوم , عشان تخليه واقف أطول فترة ممكنة !
النصيحة التي أتحمل مسئوليتها الكاملة هي : لو لقيت بنت حلوة عايشة الدور, داخله المواصلة اللي أنت راكبها إياك تقوم وتقعدها مكانك..
أولا: صحتها أحسن من صحتك ميت مرة ( بطل السجاير و الحشيش بقى عيب انت كبرت!).
ثانيا: هي مش من بقيت أهلك ( لو أختك أو خطيبتك اللي داخلة ماتستهبلش يعني !).
ثالثا: لو عامل كده عشان تبين لها انك واد جنتل يعني وحنين, فاعرف إنها مش هاتخليك تتعرف عليها يا ناصح حتى لو عملت لها قرد..يعني هاتبقى قمت ووجعت رجلك عالفاضي.. و مش هتاخد ثواب كمان عشان نيتك غالبا مش كويسة !
رابعا: البنت دي مش كبيرة في السن و شابة زيادة عن اللزوم زي مانت شايف.. تقوم ليه بقى ؟؟ طيب لو هي اللي قاعدة وأنت اللي داخل كانت هاتقوم لك ؟؟
المفروض تقوم و تقعد البنت اللي واقفة في الحالات دي :
لو لاقيتها بنت غلبانه أو بنت محترمة أو فتاه عاملة أو ست كبيرة, يبقى لازم تقوم لها طبعا مش عايزة كلام.. لكن لو بنت من اياهم, تبقى شاب لا مؤاخذة, لو قعدتها مكانك !
الحل الثاني: ولا تعبرهم !
سألت مرة بنت: "أنت بتلبسي ليه كده ؟"
أجابت: "عشان كده أشيك !"
ألحّيت في السؤال تاني عشان اعرف الإجابة الحقيقية ( رزالة بقى !) فقالت في النهاية بصراحة: "عشان الناس تبص عليا وأحس إن أنا حلوة !"
شفت بقى يا معلم؟ يعني البنت من دول عامله اللي هي عاملاه ده عشان كل ما أنت تهتم بيها, سيادتها هاتتكيف وتنبسط أكتر.. ومش هاتعبرك برضه يا عم الدون جوان..!
أقول لك حاجه ؟
ولا تعبرها .. لو زميلتك عاملة كده يبقى احلقلها ميري يا معلم.. نفضلها وسيبها .. يعني لو بتكلمك وموبايلك رن, رد عليه وسيبها وامشي… لو واحدة ماشية في الشارع كده, لا تبصلها ولا تعبرها … كأنها هوا معدّي.. كأنها لا شئ عابر !
لعلمك الحركة دي بتجننهم جدا جدا فوق ما تتخيل .. لأن البنت من دول متعودة أن الناس بتطلب رضاها ومعجبة بيها طول الوقت.. خلي كرامتك بقى تنقح عليك ونفضلها وش ..ولا تبصلها يا شقيق.. بيّن أن أنت مش عبيط زى الناس التانية وان الحركات دي ماتخيلش عليك..
هاتلاقيها اشتعلت نارا واتفحمت.. أحسن .. تستاهل!
و أي خدمة .. وفي انتظار رد البنت المصرية.. هانشعللها نار هنا عدم المؤاخذة بقى.
و ربنا يستر !!
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
واما على الموضوع هو اوفر شويه وده وجهة نظر تحترم اما رد عليه مش كل البنات كده وفلى موضوع على هذا الموقع اسمه(اعرفي حقيقة الرجل)
خصوصا انه غلط و بلا فايده
معلش كنت عايز اتكلم كتير بس معلش رايح اصلى المغرب وياريت اللى نقصه فرد النهارده يقوم يصلى احسن من اى حاجه
ثانيه مش قولنا بلاش تعميم
يعنى لو الحلول اللى حضرتك كاتبها للحالات الخاصه دى يبقى اوك ماشى لكن لو تعميم يبقى خلى بالك من نفسك ومش تمشى فى شارع بالليل لوحدك بقى ههههههههههههههه هههه
بصراحه بالنسبه ليا لو شاب كلمنى فى الكليه بصراحه بيبقى سوء الظن هو الاول نتيجه لحاجات كتير اولها انى لازم بردو اخاف على نفسى
فى جمله سمعتها وعجبتنى فى فيلم italian job
ثق فى كل الناس لكن لا تثق بالشر داخلهم
اعتقد لو طبقناها هيبقى شئ كويس
متهيئلى فى الاخر الاسلم نستنى من حضرتك مقال تانى عن الشباب
شكرا
خليك شغال ف بص و طل اهى شبهك و متجيش بنات عشرينات تانى
انا عن نفسى لما بحب اسأل عن حاجة بسأل راجل زيي او بسأل ست كبيرة مش اوقف بنت فى الشارع دا انتا قليل الذوق.
الصفة التانية:معجبة بنفسها>>> و بعدين حتة معجبة بنفسها دى , انا عايز اقولك يا تافه انها بتعمل كدا علشان هيا محترمه و اتربت تربيه شرقية و الحمد لله ان لسه فيه بنات كدا علشان الشباب يلاقى بنات محترمه يتجوزوهم , مش بنات هئ و مئ زى اللى انتا بتعرفهم يا برنس
الصفة الثالثة:الشياكة >>>و بعدين انتا لسه رابط حتة الشياكة بإن البنت تكون لابس لبس كله عرى.؟ فيه بنات محترمه كتير و فى نفس الوقت شيك و لبسها محترم يعنى من الاخر البنت مش لازم تبقى شيخ غفر علشان تبقى محترمه يا تافه!
هههههه
اولا يابنانيت يا قمامير انتو ليه مزعلين نفسكم اوى كده اولا ده رأى فردى مش رأى جماعى يعنى راى الشخص اللى كتبه وده معناه انه عن تجربه شخصيه فرديه
وده مش معناه اننا منسمعهوش من حق كل واحد يعبر عن رأيه صح ولا ؟؟
ثانيا ومتزعلوش منى طبيعى ان الشباب يخدوا عننا فكره غلط لأن فى كتير مننا أساؤا لينا لأنهم بقوا الواجهه الكبرى والبنات التانيه بقوا فى الخلفيه فطبيعى ان ديه تبقى فكره الشباب عننا
ثالثا وده الأهم احب اوجه كلامى للى كتب الموضوع الدنيا فيها حاجات مهمه كتيره جدا واهم جدا من ازاى البنت تعامل الولد وازاى الولد يعامل البنت انا طبعا مش مع اى حد تفه كلامك بس الحياه فيها حاجات اهم بكتير من النصايح العظيمه اللى انت وجهتها للشباب
واخيرا هقولك ان البنت اللى انت بتتكلمها عنها ديه هى اولا واخيرا اختك وزوجتك وامك بمعنى اخر هى النص التانى فى المجتمع ده وهى اللى رسولك الحبيب وصاك عليها فى أخر خطبه ليه قبل وفاته
وده ميمنعش انى اشكرك على موضوعك
بس انا رأيى كان المفروض تسال نفسك سؤال مهم اهم حتى من انك تنزل المقالة ده انا ليه انجذبت لهذا النوع من البنات؟ و اطلقت على مواصفاتهم المواصفات القياسية فى مصر للبنات؟ بمعنى اخر ليه مركز اوى كدة مع النوع ده و محللتش الانواع التانية من البنات ؟ هل لان انا فيا شبه منهم و لا انا النقيض بتاعهم ؟ و ما اظنش انها الاخرانية لانك حطيت عنوان مقالتك المواصفات القياسية للبنات فى مصر كما لو كان هما دول اهم و احسن نوع للبنات فى مصر بس كل مشكلتهم شوية العيوب دى.
الحل الأول >>> واضح فعلا انك جنتل وتفهم في الأصول !!!!
هي دي الرجولة فعلا .. انك تنصح الشباب انهم مايخفوش على بنات الناس من الذئاب اللي بقوا أكتر من الهم عالقلب لو طالوا ينهشوا في عرضهم لنهشوا !!!!!! اخص على كدة
الحل التاني >>> مش من حقك أصلا انك تسأل حد على لبسه سواء ولد أو بنت .. دة مش من الزوق ولا الاتيكيت أصلا !!!
كل واحد حر يلبس اللي عايزه .. ولو مضايق قوي كدة بتبص ليه !!!!!!!!!
للأسف .. انا مش هاعمم .. بس الظاهر كدة انكو كلكو كشباب دماغكو بقت قطعية واحدة
حسبي الله ونعم الوكيل
الصفة الأولى: التناكة >>> طبيعي جدا اللي عملته البنت وأي واحدة مكانها كانت عملت كدة .. لأن ببساطة هي عملت كدة لانك أول ماسألتها أول حاجة جت في دماغها انك ليه لو تايه ماروحتش تسأل واحد راجل؟!! و بعدين مادام انت فاهم قوي كدة شخصية و خبايا وطريقة تفكير الستات رايح تسأل واحدة ست ليه؟؟!!!!!!!
الصفة التانية:معجبة بنفسها>>> طبيعي في ظل اللي احنا بنشوفه بيبقى وضع طبيعي جدا ان البنت تغلب سوء النية . هي ماتعرفش حضرتك عشان تقول عليك انك حسن النية .. سوء النية من حسن الفطن يا أستاذ
الصفة الثالثة:الشياكة >>>اذا كان رأيك في ان البنت اللي تنزل واخدة بالها من لبسها وبلبس شيك انها بتعمل كدة قصد انها تلفت الأنظار يبقى يوم ماتتجوز ابقى اتجوز "قرد" عشان تضمن عالأقل انها بنت مؤدبة ومحدش قال عليها اللي انت بتقوله على بنات الناس !!
الصفة الرابعة:احتقار الرجال>>>صدقني يعني انتو كل اللي مضايقكوا كرجالة هو نجاح الستات وقدرتهم على اثبات نفسهم في أي مجال .. ودة بيخوفكوا لأنكوا دايما عايزين تفضلوا قهرينها وحبسينها عشان ترضوا غروركوا كرجالة !!
هذا مجرد اطراء ايه الي يزعل في كدة وعلي رائ دكتور ابراهيم الفقي ركز علي الرسالة مش علي السلوك
تقبلوا الرائ الاخر بكل ترحيب ورائ استاذنا في الاخر مش حياكل مننا حتة ولا ده يهز ثقتكم في نفسكم بالعكس ده يضيف بالايجاب لاي بنت وعلي رائ المثل خد الثمار وارمي العود في النار
خدوا الخلاصة من الموضوع وطبقوا الي يناسبكوا واتركوا الباقي مش حنخسر حاجة.
بس اسمحلي ياستاذ شريف ياريت تهتم بمعالي الامور شويتين ياعني كلمنا في موضع اقوي من كدة علي الرغم من وجود نقاط مظبوطة وده بيحصل فعلا عند بعض البنات بس ده رايي في الاخر ياريت تاخد اراء الشباب في مواضيع اثقل من كدة وشكرا لطرحك
تقبلوا الرائ الاخر بكل ترحيب ورائ استاذنا في الاخر مش حياكل مننا حتة ولا ده يهز ثقتكم في نفسكم بالعكس ده يضيف بالايجاب لاي بنت وعلي رائ المثل خد الثمار وارمي العود في النار
خدوا الخلاصة من الموضوع وطبقوا الي يناسبكوا واتركوا الباقي مش حنخسر حاجة.
واضح كده من الردود العنيفة والعصبية من الاخوة البنات ان الراجل لمس وتر حساس عندهم ، دمتم بخير
و برده لمس وتر حساس عند الرجالة القليلة اللى ما ماتوش فى الحرب؟؟؟؟؟؟
ههههههههههههههه ه
الرجل ده بيقول كلام زى الفل والله
ولازم نستفيد من الموضوع ده
وعايزة اقولك انا ليه بتكلم كده عن البنات وممكن تفهم لو قولتلك ان معظم زمايلي في الكلية كانوا ومازالوا اصدقاء شباب لاني دايما بحس ان في نوعية من البنات في الصداقة بتغير من بعض وبينافقوا بعض وانتقادتهم لبعض سخيفة
لكن الحق يقال انا لاقيت صداقة الصبيان فعلا صداقة حقيقية
حتي ان ليا صديق ظابط بحري حاليا لكن صداقتنا لم تنقطع بيقول انه ناقص يحط ايده علي كتفي ويوقوللي منور يا اخ
لكن في كثير من الاحيان بكون بنوتة رقيقة وفي الوقت ده طبعا اصدقائي بيكونوا بيشوفوني لاول مرة بنت
انا ساعات برفض كوني بنت لان الاتهامات اللي حضرتك قولتها دي بتمشي ع الكل لكن فعلا في بنات بترفض تصرفات البنات اللي بتحكي عنهم, انا حتي بحس انهم شووهوا مفهوم الانوثة بالمعني اللي كانت الناس تعرفه. بس صدقني مش كلهم كده لكن انت معاك حق في معظم اللي قولته
enta law kont sa2lt nafsak le elbent elly enta sa2ltaha 3la el3enwan eftakaretak be3akesha makansh da b2a 7alak ,, w kaman methai2ly enak law sa2lt nafsak aslan msh hatla2y raaaaaaad … loool
اولا.هو ممكن يسال اى واحد ليه يعنى اختار واحده
مافى رجاله ماشيه فى الشارع كتير زى ماانا لما بكون عايزه اسال ع مكان بسال واحده مش واحد
عشان فى ولاد كتير اوى بيعملو نفسهم انهم بيسالو وتكون عشان حاجه تانيه
وده حصل معايا بالفعل من وقتها مش برد ع ولاد فى الشارع
وكمان اغلب الولاد معندهمش امااااااااااااا ااااااااااان خاااااااااااااا اااااااااااالص
ايه يا بنات الراجل بيهزر …مش يقصد يشتمنا…تصدقوا ان ردود أفعالكو دي بتثبت صحة كلامه عنا ؟
هههههه
مش كده بس ..
د شريف عفه ده يا أهل الخير الي عمالين تشتموا فيه رجل معروف جدا وكركاتير شهير
ويمكن عمله هو الي خلاه يدي الإنطباع ده ..
معلش يا أهل الخير متخدوش الموضوع على نفسكم أوي كده المفروض كل واحده لا ينطبق عليها الكلام متردش بتعليقات سيئه خاصه وهيه عافه نفسها وواثقه فيها ..
ومش لازم أيا كان نوع الكاتب إنه يعرف إن في ناس غير كده ..
سبوه هو يكتشف لوحده زي ما إكتشف لوحده شخصيات تانيه
لو انت لقيت بنت لذيذه وبتتكلم مع دا و دا وبترد على دا انت نفسك ها تقول عليها ايه
انت عارف انا بشتغل في مكان فيه شباب وكمان ناس كبيره قد بابا واكبر انا كنت بتعامل بحرص مع الشباب علشان كلام الناس وبتعامل مع الرجاله الكبيره زي بابا دا انا حتى كنت بقولهم يا (عمو فلان) لقيت عمو فلان دا بيمد يده عايز يسلم وكمان طريقة كلامه مش مريحه فقولت انا ها اتعامل مع كل الرجاله كبار شباب زي بعض
لكن بالنسبه للبنت اللي سالتها دي انتو الاتنين غلطانين
انت غلط لما سالت بنت ولو بررنالك وقولنا اي حد جه معاك ومكزتش مين وسالت علشان تعرف بس . فا انا بقولك التمسلها العزر هي ما تعرفش نيتك
وهي غلطانه انها طولت لسانها وجرحت فيك مالهاش لزمه كل الكلام دا ممكن لو كانت تعرف تقول في المكان الفلاني وتمشي
ولو هي مش عايزه ترد عليك تمشي ومن غير ما تجرح في حد
بس بجد انتو بترجمو تصرفات البنات غلط جدا
لانها بتتصرف كده علي اساس نظره المجتمع المصري ليها
اللي هي اصلا نظره متناقضه
يعني لو روحت تتعرف علي بنت مصريه في الجامعه وعادي يعني واتعرفت عليك يبقي دي بنت سهله ومش تمام ومش عارف ايه
علشان كده انت مطالب باعداد الخطط
وبعدين البنت اللي افتكرتك بتعاكسها دي
انت مش فكرت ليه كام حد عكسها بالطريقه دي
فده مش سوء ظن بالعكس
ده زي مبيقولو اللي اتلسع من الشربه بينفخ في الذبادي
فغيرو من نفسكم تتغير ردات فعلنا
اولا طريقه السؤال مش حلوه ثانيا ليها حق تعمل كده واكتر من كده من المعاكسات اللى بتشوفهاااا
واصلا ميصحش ولد يسال بنت فى الشارع من قله الرجاله يعنى استنى لما راجل يعدى واساله ولا مصر الرجاله ماتواا فيهااا
يعنى من الاخر حضرتك يا دكتور .. عممت على كل البنات … وشايف ان الولاد هما الصح … انا عن نفسى مش بآمن لاى ولد ف الشارع .. علشان لو البنت محترمه بيعكسوها برضو طب ليه البنت تعمل ايه بقى تلبس اسود ف اسود ورأسها حتى رجلها …
فا اكيد الكلام دا كلو مشوه لصورة البنات المصريات … بس دا ميمنعش ان فى بعض البنات كدا
بس انا زعلانة جدا جدا من التعميم على كل البنات ..
ولك تقدير على رأيك يا دكتور شريف .. لكن ارجو النظر فيه مره اخرى وقرائة التعليقات المقاله على الموضوع
وتشكر
ana hamoot men el da7k …bs 3ayza 2a2olk 3ala 7aga fa3ln momken yakon fe banat bt3ml keda " zay manta 2olt asb3 el yad mosh zay ba3dha " bs bardo fe welaad homa el bydf3o el banat en homa ya3mlo keda …3ashn de fa3ln tor2 el weld fe el ta3roof w el banat 7afztha fa 5alas ba2a ba2eet bt5od balha men el 2wl 3ashn fahmat 5alas