شبكة العروسة.. تلبيس ولا تدبيس؟!
عندما تتعالى أغنية الفنانة شادية "يا دبله الخطوبة عقبالنا كلنا ونبني طوبة طوبة في عش حبنا" في الفرح أو الخطوبة طبعا فمعناه أنه قد حانت لحظة "تلبيس" الدبل والشبكة..
طبعا الكل بيبقى فرحان وهات يا تصوير وزغاريط، لكن حد فكر في الشبكة دي جابها العريس إزاي؟ دفع فلوسها منين؟ على ذوقه ولا ذوق مين؟..
اللي دايما كنا بنسمعه أن "الشبكة هدية العريس للعروسة"، لكن للأسف تحولت الشبكة في الزمن ده إلى "هدية بشروط"، يعني تلاقي وقت الاتفاقات أهل العروسة يقولوا للعريس الغلبان: "والشبكة يا بني دي هديتك للعروسة.... وتظل الأقواس مفتوحة لا تقفل والكلام يستمر مش بيخلص.... "بس عايزين نعرف حتجبها بكام؟"... ولو العريس سكت شوية تلاقي الكلام: "إحنا بس عايزين نعرف حدود إمكانياتك".
أو تلاقي أبو العروسة بكل "تناكة" بيقول: "والشبكة دي هديتك للعروسة ... إن شاء الله تكون 15 ألف".. تزيد أو تنقص طبعا حسب كل أسرة، ولو جت من العريس وقال: "أنا ح جيب شبكة بـ 10 آلاف" .. تلاقي الرد: "طيب ما تزودها شوية خليها 12.. وكله ح يبقى في بيتك في الآخر".. ما هي تجارة وفصال!.
أو تلاقي أم العروسة تقول: "الشبكة تكون زي أختها"، ولو معندهاش أخت تقول: "بنت أختي جالها شبكة بكذا"، ولو اعترض العريس تلاقيها تقول بحنان: "عايزين نفرح البنت".. يعني هي البنت كانت زعلانة طول عمرها عندكو ودهب العريس هو اللي ح يفرحها ويطلعها من الحزن؟!
أما اللي يفرس فعلا لما العريس يرضخ لطلبات الحاج والحاجة عشان عيون بنتهم، أن الناس مش تسكت بقى لا تلاقي الحاجة تقول: "والدهب بقى ح نجيبه من الجواهرجي بتاعنا"... ماشي يا أمي أكيد الجواهرجي ح يكرمنا وينزل من المصنعية، بس مش شايفة أن كلمة "بتاعنا" دي تفرس شوية؟!!
ولو وافق العريس على كل الشروط اللي فاتت على "هديته"، وتم تحديد موعد للشراء ممكن يحصل شيء آخر، يلاقي العريس موبايله بيرن قبلها بيوم ويكون المتصل والد أو والدة العروسة: "إحنا بقى ح ننزل يا بني ننقي الشبكة النهاردة.. أصل فلانة قريبتنا ما شاء الله عليها بتفهم في الدهب كويس.. والجواهرجية بيعملوا حسابها.. وكمان عشان وقت الشرا ما نخدش وقت طويل"!
كماااان.. يعني أنتوا اللي بتنقوا الهدية، وح تخترها الست فلانة مش العروسة ومش سايبن حتى العريس يقول رأيه!.
وطبعا يوم الشراء وسط الأسرتين ما على العريس إلا دفع دم قلبه تمن الشبكة ولا يُبدي رأيه، ما هو لو أبداه يعني بيعدل على ذوق الست فلانة الخبيرة وأهل العروسة اللي بيثقوا في ذوقها، ودي معناها أنه بيشتمهم!.
حاجة كمان بتلاحظها يوم شرا الشبكة على الستات اللي جايين من طرف العروسة، كلهم لابسين الدهب اللي عندهم كله، واللي ممكن يكونوا مستلفينه من الجيران، وطبعا ده عشان يبينوا أن عندهم دهب ومجوهرات تلبسهم من ساسهم لراسهم، وأن الدهب اللي العريس ح يجيبه نقطة في بحر!.
عند وزن الجواهرجي للشبكة تلاقي العريس –يا ولداه- ضربات قلبه بتزيد ومستني كلمة الجواهرجي عن تمن الجرامات كأنه مستني نتيجة الثانوية العامة، وطبعا وأكيد وحتما الشبكة اللي اختاروها تطلع أزيد من التمن المتفق عليه أو اللي العريس عامل حسابه عليه، وهنا تلاقي أبو العروسة بكل دهاء يقول: "خلاص أنا هشيل الزيادة"، لكن العريس من سذاجته ولأنه عارف أنه خلاص "إدبس" ح يقول: "لا لا يا عمي.. خلاص خلاص مفيش مشكلة.. أنا عامل حسابي"، وهو يا عيني مستلف الفلوس وح يدفع اللى وراه واللى قدامه.
ويكتب الجواهرجي الفاتورة ويسأل السؤال المعتاد: "أكتبها بإسم مين؟"، وتبتدي المشكلة بين الأهل "بإسمها".. "لأ بإسمه"، ويعدي الموقف بتسليم العريس لأنه مش عايز مشاكل وفضايح من أولها.
وتتحط الشبكة في علبة شيك، وتظهر المشكلة التانية.. لحد وقت الفرح الشبكة ح تكون عند مين العريس ولا العروسة؟.. "إنتوا مش واثقين فينا ولا إيه"، "لازم أفرج الشبكة لأخواتي وبنات العيلة".. وبرده يرفع العريس الراية البيضا للمرة التانية.
آدي ما يفترض أنه "هدية العريس للعروسة".. لا حول للعريس ولا قوة في اختيارها، وحتى دبلته هو، بتكون على ذوق العروسة..
فعلا: "الراجل مش بس بكلمته.. الراجل بموافقته على شروط هديته"!!.
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
انا باه حسألك سؤال ممتك وبباك عملوا ايه معاه وطلبوا ايه ؟؟؟؟؟؟؟؟
بس كنت خد خبرات بناتى معاك
يقولوا لك ان في بلد زى كفر الشيخ الجواهرجى بيدى العروسه شفشق بلاستك تملاه دهب
اه والله
ولازم يروح مع العروسة ميكروباص كامل
والعريس يلبسها الشبكه عند الجواهرى (بدل حفله للشبكة)
وان الناس اللى بتجيب شبكة ب15 الف والله منهم الفلاحييين ويجيبوه عيار 24
اما الطبعة المتوسطة خريجة المدارس اللغات بس مش من الأثرياء بيجيبوها ب5
والناس بتفتكر ان اللى ب5 ولا 7 دول فقرا مش فاهمين الفوله
تحياتى لك
ياكونتيسه
عيب على فكره كده
هو حر يقول اللى هو عاوزه
انما توصل للتجريح ماينفعش
الدهب دا هيبقى فى بيته بعد كدا يعنى لو حب يتصرف فيه هيجيبلة ضعف التمن اللى دفعه فيه وقتها وفعلا دا حقيقى
والبنات كلها مش كدا
ولو الشاب كويس ومحترم والله الواحد بيراعى فى كلللل حاجة
المهم الشخص بجد
ولو البنت كويسة والشاب كويس واهلهم محترمين
يبقى والله مايفرق اى حاجة لا دهب ولا خطوبة تتعمل بالشئ الفلانى
المهم التقدير
عيد النظره تانى
عشان دا ظلم صعب اوي لكل بنت واهلها
وكمان مش دايما العروسه وحشه اوي كده هي و اهلها
بلاش نعمم الموضوع و في الاخر انا عايزه اعرف استاذ محمد الي كتب الموضوع عمل ايه مع خطيبته و لا هيعمل ايه ان شاء الله
اعتقد ان التفاهم في الموضوع ده احسن حاجه و اكيد العريس مش هيستخسر حاجه في عروسته يعني بس متوصلش ل 15-20 الف برضه حرام…
انا الحمد لله مافيش حاجه من الكلام اللي فوق ده حصل معايا تقريبا
الحمد لله رب العالمين طبعا
الموضوع بيختلف حسب الناس و تفكيرهم و تقديرهم للشخص اللي داخل بيتهم
بس فى ناس كتير بتحط نفسها مكان العريس
يعنى انا مثلا يوم خطوبتى روحت اشترى الشبكة وهى بسيطة جدا بابا مش رضى يروح معانا
وكمان اتصل بيا يعرف الاسعار ولما قولت له قالى ارجعى مش تشترى حاجة
يعنى فى بيقدر وفى لا
وكمان العريس بيقدر كدا ان الاهل والعروسة فعلا شرينه مش بيبيعو بنتهم
ماما قالت اوك قولتها انا اساليها عن الدبل قالتلها مامه ها تجبهم معاها قالتلها طيب خدو العروسه اللي هي انا علشان تعرفو مقاسها قالت لا ها نقيس على يد اختي وفعلا لبسوني الدبله وتونز وخاتم بس بجد الدبله كانت مش حلوه خالص ورضيت وسكت علشان دي هديه
ما سكتوش اكتشفت انهم جابو الانتريه وغرفة النوم قبل الخطوبه سكت
واكتشفت انهم بيدهنو الشقه اللي مفروض تكون شقتي ومن ما يخدو رايي سكت
وفي الاخر جابو السفره من غير ماياخدو رايي ولا راي العريس وكمان فهمت انه ضعيف الشخصيه وفسخت
انا رايي لما العريس والعروسه يكونو متفاهمين مالهمش دعوه الاهل هم اللي يختارو ويجيبوا علشان دي حياتهم هما
ع فكرة بعض الكلام صح وحصل مع اصحابى ان الاهل يشطرتوا ان لو بنت الخالة جالها مثلا شبكة ب10البنت الى تتخطب بعديها تكون اكتر والله ده حرام لان ظروف كل واحد مش ذى التانى والله انا مخطوبه واهلى قالوا لخطيبى دى هديتك ليها ومحدش حدد مبلغ هو الى قال التمن واهلى قالولوا يابنى التمن الى انت محدده مش هيزيد عليه جنيه واحدو ويوم شراء الشبكة انا وهو بس الى نقينا الشبكة دون تدخل حد من اهلى او اهله وع فكرة والله مش بالدهب ولا العفش ولا اى حاجة من دى كفايه انه يكون بنى ادم محترم يراعى ربنا فى الواحدة وموضوع الشبكة تكون عند مين اعتقد انها تكون عنده وهديته دى تتقدم يوم الخطوبة انا حصل معايا كده
وكمان احنا ادينهالهم وهم ماشين وكانت على زوقه
بس لما فركشنا انا اللى اخدتها
تهنئه منى ليك ع الكلام الجامد ده يا اخى انتا قولت كل اللى ف قلبى وعلى فكره انا من اسكندريه واخدت خطيبتى الحسين واشتريت الشبكه انا وهى من هناك وعلى زوقى وزوقها وكلام ف سركو كده اقل من ماكنت عامل حسابى عشان هى اللى يخليهالى قالتلى لا ياخطيبى —- كفايه كده وباباها قاللى انتا تعبت نفسك ليه كفايه اننا بنشوفك ومامتها قالتلى تعيش وتجيب بس والله مكنش له لازمه التكاليف دى واخوها قاللى عاوز فلوس واخواتى الاولاد والبنات جمعو من بعض وجابو شبكه تانيه وعملنا حفله عائليه كان فيها 7 اشخاص بس ف البيت عندهم ودلوقت انا متجوز من شهرين وعندى عمر ومريم زى القمر هههههههههههه سامحنى يارب
هههههههه ولحقت ما شاء الله تجيب عمر و مريم في شهرين 2 بس
ربنا يخليهملك وتفرح بيهم ان شاء الله
معلش انت بس نسيت حاجة ان نظرا للظروف الاقتصادية المهب… والد العريس هو اللي بدفع تمنها ومامته علشان عاوزة تتباها قدام صحباتها هي كمان مش بتتنازل
وربنا يكون في عون كل اللي عاوز يتجوز
ياجماعه مش بمقدار الهدايه والله
ياما ناس اغنيه بيدفعوا شىء وشويات
ويطلعوا فاالخر مش بنى ادميت اصلا والعكس
ياللى واخد القرد على ماله يروح المال ويفضل القرد على حاله
يااهل يابشرى جوز بنتك بما يرضى الله المهم الدين والاخلاق