ياسمين محسن: الحجاب مش بيأخر
"ياسمين محسن".. عمرها لا يتجاوز 26 عاما، حلمت منذ الصغر بأن تكون عارضة أزياء وتخيلت نفسها وهي تمشى على "الكات ووك" ولكن بشكل مختلف لأنها ترتدي الحجاب.. أصرت على حلمها حتى أصبحت أشهر موديل محجبة في مصر وأول من أدخلت المحجبات في هذا المجال، وأنشأت رابطة تسمى رابطة عارضات الأزياء المحجبات فيها تجمع البنات اللائي يردن العمل بالمودلينج وتعلمهم وتوفر لهم العمل..
أنتِ أول موديل محجبة في مصر، من أين جاءت لك هذه الفكرة؟
أنا أصلا كنت عايزه أشتغل في المودلينج والتقديم قبل الحجاب لكن ملقيتش ولا فرصة، وجت الفكرة لما اتحجبت في 2003 ومكنش ساعاتها في أي شغل للمحجبات ولا حتى الإعلانات الخليجية بتقبل محجبات.
إذن كيف وصلتِ لهدفك ؟
اللي حصل إن كان في إعلان في الجرنال عن شركة كاستنج طالبة موديلز، فذهبت عشان أقدم وكنت محجبة قالوا لي إنتي جايه هنا تعملى إيه؟ قلتلهم أنا جايه أعمل "تست" كاميرا وكان في وقتها بينزل إعلأنات عن طرح المحجبات وكان حلمي وحلم والدي أنى أعمل الإعلأنات دي لأن البنت كانت شبهي رغم أنها روسية، فده ضايقني جدا، وقدمت وفعلا عملت الإعلان ومن هنا بدأ الشغل ييجى، وبعدين عرفت إن في شركة بتعمل عروض أزياء قلت أروح وأجرب لأني أصلا نفسي أبقى عارضة أزياء وفعلا رحت وابتدوا يعلموني "الكات ووك".
وماذا قالوا لك وأنت محجبة؟
أنا كنت جريئة شوية رحت قلتلهم أنا عايزه اشتغل أنا عارفة إن في حاجات كتير ممكن تتصور محجبات، فأخبرني المسئول أنهم سوف ينظمون عروض أزياء في 7 محلات لملابس المحجبات، وفعلا عملت العرض وكان كويس واتعرفت شويه ولقيت صحفيين كتير ووكالات أنباء عالمية بتصور معايا على أنى حاجة غريبة وأبتديت أتعرف أكتر وأعمل شغل كتير.
وماذا عن الرابطة؟
عملتها من سنتين، والفكرة جت لما أبتدت أتعرف على البنات المحجبات غيري اللي في المجال وبقينا أصحاب، فقلت نعمل حاجة خاصة بينا بما إننا قليلين في المجال فعملنا الرابطة على الفيس بوك وعملنا أول "فاشون شو" كان كله شغلي وكان عرض للمحجبات بس ونجح جدا فبقيت عن طريقها أبعت أقولهم على أماكن محتاجه موديلز، وساعات بتجيلي أوردرات بتركب على بعض فأروح مكلمة أي زميلة تانية تروح مكاني وكده.
مجال المودلينج يحمل الكثير من الأقاويل معه فالبنت تتأخر ليلا وتقابل الكثير من الرجال.. فما رأيك في هذا؟
كل الناس بتتكلم في موضوع التأخير في الليل، لكن مفيش الكلام ده خالص، وبعدين كل المجالات فيها الحلو والوحش.
ماذا تقولين للفتاة المحجبة؟
لو عندك طموح في حاجة خليكي مصرة عليها حطيها قدام عنيكي ولازم توصلى.. حجابك مش حيأخرك.
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.