الكوسه في بلادي
للكوسه ف بلادي شئون.. لو تعرف واحد ف الشرطه.. راح تخرج من أجدع ورطه .. والراجل اللي انت ظلمته.. تلاقيه متلقح مسجون..
01/04/2006
من مدونة (نهى وأخواتها):
للكوسه ف بلادي شئون
بتخلي المسنود فرعون
يتفرعن فين مهما يكون
وتخلي الجاهل أستاذ
والأعرج لاعب جمباز
وتخلي الأحول هداف
والكوره الآوت ف الجون
للكوسه ف بلادي شئون
لو تعرف واحد ف الشرطه
راح تخرج من أجدع ورطه
والراجل اللي انت ظلمته
تلاقيه متلقح مسجون
أو تعرف شخصيه كبيره
شغاله ف البنك مديره
راح تاخد من غير ضمانات
كام قرض بمليون مليون
وهروبك طبعا مضمون
ويا عيني لو تعرف نايب
ف المجلس مش نايب خايب
راح تبني أبراج وهميه
أوراقها مظبوطه أكيد
وفلوس الناس المهريه
حتجيلك م الجيب للإيد
بعديها تروح المستشفى
وتقيد نفسك مجنون
أحكامك تسقط ف ساعتها
بعديها ترجع موزون
ويا عيني لو تعرف شيخ
فجنابك طاهر علطول
وصيامك طبعا مقبول
وإذا فرضا حبيت تتجوز
تتجوز من غير مأذون
وإذا ساكن ف عماره جديده
وحبيبك راجل مسئول
فسيادتك من غير ما تقول
يركب لك فورا تليفون
ولو انت عندك عربيه
ونمرها سوده بنسرين
حتعدي أجدعها كمين
وحتكسر أوضحها إشاره
ماهو نمرك سوده جباره
ولا تعرف أيتها قانون
ولو انت بتعرف فران
أو واحد بياع جرنان
راح تاخد طلبك وحتمشي
من غير ولا دوشه ولا دور
والناس الغلبانه حتاخد
طلباتها بعدك وتغور
ماهو كله غيرك بيهون
ولو انت زميل الحلاق
راح تحلق اولها زبون
وإذا كنت بتعرف دكتور
حتعيش متطمن مسرور
وحتسلك ف لجان الشفوي
ومجال تعيينك موفور
وحتطلع فالتليفزيون
بالبدله وفيها الببيون
تتكلم وبكل بساطه
عن شرف المهنه المدفون
لكن لو شاعر غلبان
قلت اللي ف نفسك علطول
حيقولو مين قال لك قول
ويهاجمك مليون إنسان
والتهمه أنك فنان
مش برضه كلامي يا جدعان
حسينه.. ولا أنا غلطان
مش معنى كلامي يا أحبابنا
إن إحنا خلاص اتغربنا
فيه فينا أشراف وكتير
إتربوا على حب الخير
وإحترموا ولادهم والغير
والناس إحترمتهم ولله
الفاتحه على روحهم يلله
يرجو وزير الخارجية من جميع المختصين أن يسمحوا لحامل هذا الجواز بالمرور وأن يبذلوا له العون والرعاية عند الاقتضاء..
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
عظمه على عظمه يا ست
"يا بلدنا يا عجيبه فيكى حاجه محيرانى نزرع القمح فى سنين تطلع الكوسه فى ثوانى"
المقوله التانيه:
" لو نهر النيل اتقلب صلصه مش هيكفى الكوسه اللى فى البلد"
كان مفروض علي الاقل تبلغني قبل ما تاخد القرار بنشرها لان مش انا صاحبت القصيدة .. كمان المفروض تذكر اسم كاتبها احقاقا للحق ... مش انا الي كتبت الكلام ده لان معنديش موهبة الشعر لكن زنجولا صاحب القصيدة و علي الاقل لازم تذكر في العنوان كأقل اعتذار له
انا عارفه انك اتصرفت بحسن نية و بجد شكرا انك اهتميت تقرا في مدونتي و كمان تهتم تنقل منها لكن اعطي كل ذي حق حقه .. زنجولا صاحبها مش انا
امبارح ف القاهره اليوم طلع علينا عمرو اديب بالخبر التالى
اثبت تحليل الصندوق الاسود ان السبب وراء غرق العباره السلام هو القبطان(اللى مات)لانه مبعتش اشارات استغاثه
ملحوظه 1:ملحوظه 2 :المركب السلام دى كانت هتتكهن كمان شهر تقريبا
ملحوظه 3:لا تعليق
ملحوظه 4:ااااااااااااااااااااااه يا بلد
ملحوظه 1:نداءات الاستغاثه اللى بعتها القبطان الله يرحمه اللى شيلوه الليله اتلقطت فى موانى اسكتلندا
جئنا نزرعها بطيخ طلعت كوسة
سيادة محافظ الفيوم فى زياره لجامعة الفيوم عندما راى الفتيات يرتدين الحجاب تكرم سيادته وقال ايه ده ده منظر مش حضارىابداامال فين البنطلونات والجيبات والبلوزات العريانه والمهم ان سيادته اسمه محمدنفسى اعرف بس الراجل ده اتعين محافظ للفيوم ليهمع انه من يوم تعيينه ولم يفعل شيئاللبلدالطرقات الداخليه والخارجيه وكله حديقولى مين توسط لتعيينه محافظ للفيوم ولما هو مش هيشتغل يروح يروح بيتهم بقى احسن
bravo .........!!