انتقل إلى المحتوى
أرشيف عشريناتفبراير ٢٠٠٤ – مارس ٢٠١٠

Happy birthday.. يا خوفو

ولاد البلدقراءة في ٤ دبقلم دعاء الشامي

"الجيزة تحدد تاريخ بناء هرم خوفو بيوم ٢٣ أغسطس وتختاره عيداً قومياً، كما قرر تغيير شعار المحافظة من زهرة اللوتس، إلى الأهرامات ونهر النيل وجامعة القاهرة وخلفهم قرص الشمس"..ياسيدي ياسيدي.

خبر تصدر الصحف المصرية اليوم، محافظ الجيزة اختار هذا الشهر ويوم قادم بعد أسبوعين تقريباً حتى يستطيع الاحتفال على حق، وقبله اختار جدنا خوفو بالذات ليكون صاحب المولد..ولكن كيف عرف المحافظ أن يوم 23 أغسطس هو يوم بداية البناء؟

جاء في الخبر أن العلماء حددوا أول يوم تم فيه بناء الهرم الكبير وعلى أساسه تم اختيار اليوم، بالطبع لا أشكك في مقدرة علماء الآثار المصريين في معرفة اليوم بل إنهم قادرون على تحديد اليوم الذي حملت فيه السيدة أم خوفو فيه، ولكن لماذا الآن ولماذا جدنا العظيم خوفو؟

فكرت قليلا وتابعت الخبر ربما أجد ما يفسر الموضوع ويثبت غبائي وجهلي بالآثار والأعياد القومية معاً، فوفقا لمعرفتي البسيطة العيد القومي هو حدث جلل مرت به المحافظة، قام أهلها في الغالب بمقاومة محتل أو مشاركة في ثورة وهكذا..

ولم يطل بحثي فمحررة الخبر أعلنت أن المحافظ فكر في اتخاذ هذا اليوم بديلاً عن 21 مارس ، العيد السابق للمحافظة بعد أن خطفت محافظة 6 أكتوبر العيد القومي من الجيزة لأنها ضمت مدينة البدرشين اللي هي صاحبة اليوم أصلا نظراً لكفاحها أيام ثورة 1919 في واقعة الشوبك..

طبعا الموضوع مهم وخطير ولازم نلاقي له حل، مش ممكن الجيزة تفضل من غير عيد قومي هي قليلة يعني، إذا كانت 6 اكتوبر بنت امبارح خدت يوم خطير ومهم يبقى الجيزة لازم تختار يوم مالوش زي ..فكر المحافظ ودبر وفي النهاية قرر أن يكون العيد تاريخي شوبك إيه.. و19 إيه، إحنا ولاد الفراعنة.

وقد كان، أصدر قراره المهيب بتكوين لجنة سرية للبحث والتمحيص في تاريخنا الطويل وخصوصا في تاريخ جدنا الفرعون اللي بنى الهرم الكبير، وطبعا مفيش خافية تخفى ع الحكومة الشديدة ولا لجنة المحافظ السرية التي حلت كل مشاكل المحافظة مش باقي غير معرفة تاريخ بناء الأهرامات باليوم والساعة والثانية.. أنا عارف عارف ياحبيبي..

بعد بحث طويل عرف العلماء أن "خوفو" الله يبشبش الطوبة اللي تحت راسه، قرر أن يبدأ بناء الهرم بتاعه منتصف يوم 23 أغسطس عام ٢٤٧٠ قبل الميلاد..!

الموضوع بقى كده أصبح واضح وضوح البقعة في التي شيرت اللي مش مغسول ببرسيل، ومش محتاج ولا عبلة كامل ولا الست نظيفة علشان تفسره، لكن المخيف في الموضوع أن يحاول غيره من المحافظين تقليده فيبحث كل منهم في تاريخ المحافظة ووقتها ننقسم شوية فرعوني وشوية اسلامي وشوية قبطي..

فمثلاً ماذا سنفعل لو قرر محافظ الأقصر أن يعرف تاريخ فطام حتشبسوت ويعمله عيد قومي، عموما الله يكون في العون، المحافظ من حقه أن يكون له انجازات والمحافظة من حقها يكون لها عيد قومي زي بقية المحافظات..بس خوفو ليه نقلقه في منامه ونحمله فوق طاقته؟؟

هناك صديق خبيث قال ان ما فعله المهندس سيد عبد العزيز محافظ الجيزة وراءه سر كبير لن نعرفه قريباً لأن الرجل مش قليل ده مهندس قد الدنيا وأكيد كلامه سليم خصوصاً أنه خدم في البرازيل وممكن تكون دي خطة أو خطوة لإعادة اكتشاف أسرار الفراعنة بالتعاون مع البرازيل بدلاً من ألمانيا وفرنسا..

صديقة تدخلت في الكلام قائلة أن المحافظ نفسه عمل في القوات المسلحة وهو مهندس مدني وبالتالي سيهتم بكل ما له علاقة بالمنشآت، وأكيد بيعمل أبحاث كثيرة في موضوع الأهرامات وسيستخدمها في القضاء على مشلكة العشوائيات في الجيزة..

الحمد لله، استطاع المحافظ الخروج من المأزق العظيم الذي تم توريطه فيه وتوصل بقدراته الهندسية الانشائية غير المسبوقة إلى عيد قومي جديد لمحافظته الجميلة، برغم تحفظي على اليوم وطريقة اختياره إلا أني موافقة ولكن هل يستطيع السيد المحافظ تكوين عدة لجان سرية كانت أو علنية لوضع خطة لحل مشكلة تعريفة المواصلات في الجيزة؟؟هل يقدر على حل مأساة مواطني المحافظة التي تجعلهم يدفعون دم قلبهم من ميدان الجيزة لنهاية شارع فيصل فبدلا من دفع 50 قرش يصرفون حوالي 3 جنيه ونص؟

ويجعله عامر..

الكُتَّاب

الأقسام

تعليقات القرّاء

تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.

  1. قرفنا من اللواء دكتو كُتب في
    قرفنا من اللواءات السيد اللواء الدكتور المحافظ وزير التضامن
    والسيد اللواء رئيس ادارة شركة المياة
    والسيد اللواء رئيس ادارة شركة المترو
    والسيد اللواء المحافظ
    والسيد اللواء مدير مكتب الوزير
    والسيد اللواء عضو مجلس الشعب
    والسيد اللواء حاكم المدينة
    والسيد اللواء رئيس الحى
    قرفنا
    قرفنا قرفنا
    عايزين ناس بتفهم شوية ولو حتى على مستوى الاعدادية
  2. شريف عزازي كُتب في
    ده لو كان المحافظ اختار يوم طهور ابنه عيد ميلاد المحافظ.. كان يبقى منطقي أكتر..
  3. ملهى - الاريزونا كُتب في
    الاريزونا هي التي تسببت في شهرة مصر وليس الهرم
    السياح اصلا كانوا بيجو مصر علشان خاطر الاريزونا
    فين ايامك يا ملهى الاريزونا
    1) سهير زكي
    2) زيزي مصطفى
    3) سحر حمدي
    هما دول اللش شهروا المحافظه
  4. كازينو الليل اهم كُتب في
    كان المفروض العيد القومي للمحافظة يكون مع بدأ تاريخ بناء كازينو الليل بتاع شريفة فاضل
    او الاريزونا
    لان الكازينوهات دي اللي اللي عملت المنطقة
    ـــــــــــــــ ـــــــــــــــ ـــــــــــــــ ــــــــــــ
    مش شريف الدواخلي ولا البراء اشرف
  5. بقية قرار اللجنة كُتب في
    ومن جانبه أكد الدكتور عبد الحليم نور الدين أنه تم الاستعانة بجميع علماء الآثار المصريين فى الداخل والخارج لتحديد موعد بداية بناء هرم خوفو، وتبين أن الملك خوفو حكم مصر بعد وفاة والده الملك سنفرو عام 2470 ق.م.
    وتابع نور الدين - بحسب "اليوم السابع" - أن بداية البناء تم تحديدها من خلال ظهور نجم الشعرى اليمانية فيما بين 17- 19 يوليو، ويقابل 11 بؤونة من فصل فيضان النيل، وكان أول رصد للظاهرة عام 4241 ق. م.
    واختتم أستاذ المصريات تصريحاته أن مساحة الهرم حوالى 13 فدانا، ويصل ارتفاعه 146 مترًا، وبفعل عوامل التعرية أصبح ارتفاع الهرم 138م.
    واختارت محافظة الجيزة الكشف الأثري الهام لتعلن يوم 23 أغسطس من كل عام عيدا قوميا للمحافظة بدلا من يوم 21 مارس والذي شهد كفاح أهالي الجيزة عام 1919 ضد الإحتلال البريطاني.
  6. اللجنة وقرارها كُتب في
    في كشف أثري كبير .. نجح فريق من الباحثين المصريين المختصين فى التاريخ الفرعونى والفلك في تحديد تاريخ بداية بناء الهرم الأكبر، معلنين أن منتصف يوم 23 أغسطس 2470 ق.م هو تشييد هرم خوفو فوق هضبة الجيزة.
    وأوضح الفريق الأثرى المكون من الدكتور عبد الحليم نور الدين أستاذ المصريات بكلية الآثار جامعة القاهرة، والدكتور مسلم شلتوت عالم الفلك البارز والدكتور أيمن وزيرى استاذ قياس الزمن، والدكتور محمد جلال والدكتور علاء شاهين اساتذة في التاريخ الفرعوني علماء آثار وتاريخ فرعونى، أنه تم تحديد بداية بناء الهرم من خلال نجم الشعري.
    وأشار الفريق البحثي وفقا لصحيفة "اليوم السابع" المصرية فى دراسة أعدها أنه توصل الي بداية بناء الهرم الأكبر من خلال ظهور نجم الشعرى اليمانية spdt""، والذي خلصوا اليه بعد دراسة ظهور نجم الشعرى اليمانية فيما بين 17 - 19 يوليو "يقابل 11 بؤونة من فصل الفيضان" وعلى أساسه تم تحديد تاريخ البناء.
  7. محافظ مسطول كُتب في
    مرة محافظ مسطول قابل محافظ مسطول تانى فقال لة :
    تصدق ان اجدادنا الفراعنة قعدوا يبنوا فى الهرم 5000 سنة
    رد علية التانى
    من حقهم ما هو كل ما يرصوا حجر تكبس عليهم الحكومة
  8. سلمى كُتب في
    ماهو اللي غيظك أنه مبررش موضوع الشهر ده يعني شهر اغسطس بالصلاة على النبي كان موافق شعر ايه عند الفراعنة وعلى فكرة هو محدد السنة وقايل سنة 2470 قبل الميلاد
  9. 23 اغسطس كُتب في
    يا جماعة انتم مكبرين العملية لية
    سيادة اللواء شكل لجنة حضرت روح الفرعون وروح الفرعون قالت انة فى تاريخ 23 اغسطس لكن سنة كام ما يعرفش واوضحت روح الفرعون ان نتائج الحائط لم تكن عرفت بعد وان الفراعنة كانوا بيعرفوا الشهور الفرعونية ابيب وامشير وطوبة وبرمهات وان اغسطس دة خواجة لم تكن دولتة ظهرت الى الوجود بعد ولا احد سمع عن الرومان دول
  10. االى ابو محسن كُتب في
    فى المحاكم المدنية فية حيثيات وعند المدنيين لكل قرار اسبابة
    انما عند العسكريين الامر امر عسكرى بدون لية ولا اسباب ولا مناقشة ولا اعتراض والا هتبقى متمرد
    دة امر عسكرى يا سيد يا اما تنفذ يا اما تدخل السجن
    سلام
  11. ابومحسن غربة 28 سنه كُتب في
    يا جماعة بلاش الهجوم غير منطقي وغير مبرر على قرار اللجنة
    فيه حاجه اسمها اسباب وحيثيات
    يعني مثلا سعادة القاضي المحمدي قنصوه حكم على السكري وطلعت مصطفى بالاعدام
    حكم الاعدام كان سطر واحد
    من اجل هذا السطر فيه حاجه اسمها اسباب وحيثيات
    الاسباب والحيثيات دي كانت 225 ورقة
    علشان خاطر يقول حكمت المحكمة باعدام طلعت والسكري القاضي كتب 225 ورقة
    وكذلك اللجنة لما حددت يوم 23 اغسطس موعد بناء الهرم اكيد استندت على وقائع وقرائن مهمه
    فبعيدا عن السخرية والاستهزاء نطالب اللجنة بالاسباب والحيثيات التي استندت عليها لتحديد موعد بناء الهرم
  12. مصطفى كباره كُتب في
    لا تعريفه الموصلات ديه كلام فارغ ولا مقالب الزباله ولا المخدرات الى يتتباع فى الشوارع العموميه فيصل والهرم…
    يا بنتى انتى وراكى عيله صغير بتجرى عليها انتى كيدا دخلتى فى منطقه الاعراض.
  13. بامبر الفرعون كُتب في
    23 اغسطس هو اليوم اللى قلع فية الفرعون البامبر وحط فى بقة البزازة ومسك المسطرين وكان معاة خرشوف وحولوا مجرى النيل ووضعوا حجر الاثاث
    وقد صرح الشاويش عبد ربة والصول قناوى من مكتب اللواء المحافظ ان الحفريات خلف الهرم اوجدت حفرة مغطاة بحجر كبير وجد تحتها البامبر الفرعونى وفية اخر شخة وكذلك البزازة للفرعون واورنيك ذنب بطابورين زيادة وكل ذلك محرر بتاريخ 23 اغسطس سنة 2009 قبل الميلاد
  14. الفقر الدكر كُتب في
    عرفتم احنا لية فى فقر دكر
    علشان اشباة اللواء المحافظ الذى ترك اركان الحرب وراح يشتغل عالم اثار ضليع وحدد تاريخ البدء فى بناء الهرم وكان البلد ناقصة علماء اثار او فقيرة فى الخبراء الاثريين
    اللواء اركان حرب بيفتى فى مياة الشرب لغاية مالبلد نامت فى المستشفيات تيفوئيد وفشل كلوى وتليف كبدى وفيروس سى ودى
    واللواء اركان حرب بيفتى فى السكك الحديدية والطرق والمواصلات ورغيف العيش ومزارع العجول والبدنجان والصلصة والطماطم والزراعة
    اما شغلتهم الاصلية اركان الحرب فالواد بلية السباك بتاع درب شكمبة هيبقى يروح يخطط للحروب
    عرفتم لية احنا عندنا فقر دكر
    كل واحد بيشتغل شغلة التانى
  15. هرم خوليو كُتب في
    زمان ايام حكم السادات وجيهان
    استضافت جيهان المطرب العالمى [ *** ]يو ليغنى فى حفل ضخم عالمى تحت سفح الهرم
    اى واللة
    وكانت دعاية ضخمة جدا لحفل [ *** ]يو وتمت اذاعة مقاطع منة فى التليفزيون وكان حفلا مبهرا
    واجاب الاطفال عندما سال احد المدرسين عن الاهرامات الثلاثة
    فقال احد الاطفال
    بناة الاهرام الثلاثة هم [ *** ]يو وخفرع ومنقرع
  16. شارع الهرم كُتب في
    اى عرباوى من الخليج او من ليبيا او الشام تقول لة مصر يقول لك اة شارع الهرم
    زى شارع الحمراء فى بيروت
    وزى الشارع اللاتينى فى باريس
    شارع فية اللعب للركب وتتزحلق وانت ماشى من كتر الصابون
    هرم ال
  17. خوفو وخفرع ومنقرع كُتب في
    خوفو … خفرع … منقرع
    مبارك … جمال …؟؟؟؟؟؟؟
    يا خسارة منقرع مات
  18. محافظة العار كُتب في
    محافظ معندوش ريحة الدم
    انتم عارفين ان اكبر محافظة بتتاجر فى البشر فى الشرق الاوسط هى الجيزة
    العرباوى بييجى من السعودية او الخليج وينزل قرى البدرشين وامبابة والكيت كات والعياط العرباوى من دول ينزل يصيف شهرين يروح يدفع لاهل البنت عشرين الف جنية وياخدها يضيع مستقبلها ويرميها لاهلها حامل فى نهاية الصيف ويرجع لبلدة والصيف اللى بعدة تتزوج عرفى من عرباوى تانى
    المحافظ حل مشاكل الفقر
    هى الحياة وقفت على العيد الوطنى للمحافظة
    عيد وطنى اية وعيد قومى اية
    بلاش قرف
    بلاش قرف
  19. لجنة الاثار كُتب في
    اللجنة العالمية حللت الهواء الموجود حول الهرم فطلع التالى
    نسبة الاوكسجين 3 %
    ونسبة الفساد 97 %
    احنا بنتنفس فساد ونفاق وكذب
    ونفترض يا محافظ يا ابن البلغة ان 23 اغسطس دة صح
    هل محافظة الجيزة بس هى اللى بنت الهرم علشان تعملة عيد للمحافظة
    والا مصر كلها سخرت من النوبة للدلتا لبناء الهرم
    يلعن ابوكم
    كنت فاكر انك هتفتخر بان الجيزة صنعت اول سيارة مصرية حديثة
    او ان الجيزة احتفلت بموت اخر شخص امى على ارضها
    او ان الجيزة صنعت عربات ترام او مترو طوكيو
    او ان الجيزة احتفلت بالاكتفاء الذاتى من انتاج القمح
    او ان الايجارات للبيوت فى الجيزة بقت رخيصة
    يلعن ابو شكلكم لواءات متخلفين
  20. لجنة سياسات الوطنى كُتب في
    يا جماعة الخير انتم شاغلين روحكم لية
    اللى بنى الهرم مثتثمر اجنبى اجتذبتة الجو الاثتثمارى الرائع اللى وفرة ابن الفرعون هو ورجال الاثتثمار وباعوا صكوك بناء الهرم للاجيال القادمة واظن ان الحزب الوطنى بتاع الفرعون خوفو كان مش السبب وراء لعنة الفراعنة والفساد اللى حل فى البلد
    23 اغسطس تاريخ وضع المثتثمر الاجنبى ايام الفرعون خوفو الطوبة الاولى
  21. ابومحسن غربة 28 سنه كُتب في
    وأوضح الفريق الأثرى المكون من
    اللي حسبته لقيته وجبتلكم قرار اللجنة اللي استندت عليها في تحديد بدء بناء الهرم في التعليق 11 و12 شوفوا اللجنة مكونة من مين
    1 - الدكتور عبد الحليم نور الدين أستاذ المصريات بكلية الآثار جامعة القاهرة،
    2 - والدكتور مسلم شلتوت عالم الفلك البارز
    3 - والدكتور أيمن وزيرى استاذ قياس الزمن،
    4 - والدكتور محمد جلال والدكتور علاء شاهين اساتذة في التاريخ الفرعوني علماء آثار وتاريخ فرعونى،
    أنه تم تحديد بداية بناء الهرم من خلال نجم الشعري
    اللطيف في الموضوع ان فيهم استاذ لمادة اسمها قياس الزمن
    عمركم سمعتكم عن مادة اسمها قياس الزمن
    يلا بقا بدل الكلام الفارغ كل واحد يكتب على محرر بحث جوجل كلمة قياس الزمن ويشوف يعني ايه قياس الزمن
    سلام
  22. الى المعلق رقم 18 كُتب في
    ايوه صح
    اليهود هما اللي بنو الهرم
    بنو اسرائيل هما بناة الهرم
    لان فرعون كان بيضطهدهم وبيكلفهم بالاعمال الشاقة
    وخلي بالك اليهود ما بيقولوش حاجه غلط كل كلامهم صح
    اليهود دول هما بنو اسرائيل من اول سيدنا ابراهيم الى سيدنا المسيح
    كل كلامهم صح
    ولكن الشيخ الشعراوي حل المشكلة في تفسير قوله تعالى سبحان الذي اسرى بعبده من المسجد الحرام الى المسجد الاقصى
    يعني الله سبحانه وتعالى قرر مصادرة ارض اليهود وبلاد اليهود وتاريخ اليهود الى الدين الاسلامي والغاء الديانة اليهودية والنصرانيه وعليهم الد[ *** ] في الاسلام تنفيذا للقرار الرباني
    انما كلام اليهود صح وهما اللي بنو الهرم كعمال وليسوا مهندسين
    اليهود بنو الهرم كعمال
    تماما زي المصريين حفروا قناة السويس كعمال ولكن المهندسين اجانب
  23. خوفو حيحصل رمسيس كُتب في
    يا اخوانا انا سمعت طراطيش كلام كده والله اعلم والكلام بيني وبينكم مش عايز حد يعرف ان هرم خوفوا حيحصل تمثال رمسيس
    ما هو اصل البلد ما ينفعش فيها غير فرعون واحد فلما ميدان رمسيس بقا اسمه ميدان مبارك وفيه محطة مترو الانفاق بتاعة مبارك ومحطة مبارك الدولية قالوا بقا شيلو اللزقه دي اللي اسمها تمثال رمسيس شوفولوا اي داهية تاخده او اي مصيبة او حتى قضية امن دولة
    ولما لقوا ان مبارك حل محل رمسيس العيون اتجهم لخوفو قالوا ليه ما يبقاش هرم مبارك بدل حرم خوفوا
    والمشروع هو نقل الهرم خوفوا من هذا المكان ليحل محله هرم مبارك
    والمشروع لسه كلام بس كده وحيدخل في طور التنفيذ قريب بس دا سر بيني وبينكم ما حدش يفتن علينا
    سلام يا اصحابي
    ـــــــــــــــ ـــــــــــــــ ـــــــــــــــ ـــــــــــــــ ـــــــــــــــ ــــــــــ
    مش شريف الدواخلي ولا البراء اشرف
  24. كريم نيفيا هو الحل كُتب في
    بما ان كريم نيفيا بيزحلق كويس
    فالمفروض السيد المحافظ يزحلق المعلومات ويوزع علب كريم نيفيا علشان الناس تفهم
    هو فية واحد عارف ان اسم خوفو دة اسم صح
    دة منطوق كدة اطلقة الاثريون باجتهاد
    وفية تفسيرات كتير
    والاستاذ الكاتب الشهير انيس منصور كتب كتاب اسمة الذين هبطوا من السماء بيدعى فية ان مخلوقات هبطت من الفضاء الخارجى وبنوا الاهرامات اذ كيف يتخيل انسان كيف تم رفع حجر وزنة 80 طن الى ارتفاع 60 متر
    اما حبايبنا فى اسرائيل فبيقولوا وسبق لبيجن صديق السادات وجيهان ان اخبر السادات بان اجدادة اليهود قبل خروجهم من مصر قد استعبدهم الفرعون وانهم هم من بنوا الهرم
  25. االهرم الاكبر كُتب في
    لو درست هندسة بناء الهرم الاكبر سوف تجد اشياءا تحتار فيها
    مثلا تم عمل حساب تمدد الاضلاع بالحرارة وانكماشها بالبرودة بتصميم اخر حجر فى الضلع فى قاعدة الهرم يتحرك فى غنفارى يسمح بالتمدد والانكماش صيفا وشتاءا
    تم عمل حساب الزلازل الارضية بتسوية ارض القاعدة بطريقة معينة تجعلها تمتص اى زلزال
  26. عشرين سنة كُتب في
    من عشرين سنة وانا اشترى اى كتاب ينشر عن الهرم الاكبر فى مصر واقرا كل ما يكتب عن الهرم فى النت
    كيف تم بناء الهرم ؟
    هناك 32 رسالة دكتوراة على مستوى العالم فى نظريات كيف تم بناء الهرم فى جامعات اوروبا وامريكا
    ولكن السؤال الذى كان يدور فى عقلى كيف رفع البنائون الفراعنة الفلاحون احجار سقف غرفة دفن الملك ووزن الحجر الواحد 60 طنا وعلى ارتفاع 65 مترا
    هل يمكن جر حجر وزنة 60 طنا بواسطة الحبال كما ينشر دائما فى الابحاث
    مستحيل
    حتى ولو كان المئات يجرون حجرا بهذا الثقل فسوف لا يتحرك ولا مسنتميتر واحد
    كيف رفع الفلاح المصرى الحجر الذى وزنة 60 طنا الى هذا الارتفاع ؟
  27. زخارى انطرد كُتب في
    تم سحب كارنية العضوية من الحزب الوطنى للسيد المحامى ممدوح زخارى جرجس بتاع اسكندرية من الحزب الوطنى كما جاء بجريدة المصريون نظرا لعلاقتة باقباط المهجر
  28. وحملناهم على ذات الو كُتب في
    بسم اللة الرحمن الرحيم
    (وحملناهم على ذات الواح ودسر )
    بجوار الهرام الاكبر عثر قسم الاثار على ثلاث غرف تحت الارض سليمة وفتحوا غرفة منها كان ذلك سنة 1954
    كانت قطع الخشب مرتبة على حسب الاطوال والخشب سليم وليس فيى تاكل وكان هناك لفات كثيرة من الحبال
    بعد فحص الخشب ومن شكل المجاديف تبين انها لسفينة مفككة ومحفوظة فى الحفرة
    كان الاثرى الذى عهد الية بتجميع المركب رجل متدين اسمة احمد ولا اذكر اسمة كاملا
    عندما قالوا انها اخشاب مركب قرا الاية
    وحملناهم على ذات الواح ودسر
    اين الالواح
    واين الدسر
    والحبال
    ونجح الرجل بعد مجهود رائع فى تجميع اولى السفن الموجودة فى بيت زجاجى الان بجوار الهرم واسمها سفن الشمس
    لم يستخدم ولا مسمار واحد فى التجميع لالواح المركب لان المسامير لم تكن تعرف فى الزمن القديم
    وحملناهم على ذات الواح ودسر
    كانت كل السفن تصنع من الالواح والدسر وليس الواح ومسامير
  29. احجار الهرم كُتب في
    طيب انتو مستغربين ازاي رفعوا الاحجار اللي وزنها 80 طن
    مش هي دي المشكلة
    المشكلة هما جابوها منين اصلا
    اي مكان في مصر ممكن تلاقي فيه حجاره 80 طن
    ـــــــــــــــ ـــــــــــــــ ـــــــــــــــ ـــــــ
    مش دعاء الشامي ولا دعاء حسن
  30. الى المعلق السابق كُتب في
    يا اخي الكريم منذ ثلاثة الاف سنه كان الناس جسمهم كبير مش زي جسمنا دلوقتي
    كانت اجسامهم كبيرةواحجامهم كبيرة واقوياء جدا
    واكيد كان عندهم اجهزة ساعدتهم في هذا البناء الضخم
    يعني دلوقتي فيه ونش
    ليه زمان ما يكنش كان فيه اجهزة مثل الونش
    ايه اللي يمنع
  31. حجارة الهرم الاكبر 2 كُتب في
    فهل
    يعقل أن كل ذلك تم بدون أية أجهزة متقدمة أو آلات تكنولوجية أو معدات
    متفوقة، وإنما كما يزعم علماء المصريات بالحبال والثيران والعمالة
    اليدوية للفراعنة الذين يماثلونا في الحجم !! ( لو كانوا هم حقا البناة
    ) والأغلبية تريح نفسها عناء التفكر في ذلك اللغز القابع أمامنا جميعا،
    فالبعض يرى أن الفراعنة كانوا معجزين !! والبعض الآخر يتساهل ويزعم أنه
    ربما كان لديهم آلات وأجهزة وأدوات أخفوها ولا ندري عنها شيئا !!
    والأكثرية تريح نفسها وتقر بألا دخل لها !! وكأن الموضوع بسيط وغير
    هام، رغم أنه آية أمامنا ولغز حقيقي من وراءه دلائل عديدة هامة
  32. حجارة الهرم الاكبر كُتب في
    الحجر المستخدم في تشييد تلك المباني يصل في بعض الأحيان إلى عشرات الأمتار المكعبة !! حجم
    العدد التقريبي لحجارة الهرم الأكبر وحده هو 2.3 مليون صخرة !! ولضخامة
    العدد، لو تم استخدام صخور الهرم الأكبر وحده لبنت سور يحيط بالعالم
    بارتفاع 30 سنتيمتر، أو يحيط بكامل فرنسا بارتفاع 3 أمتار، أو بحدود
    مصر حاليا بارتفاع 1.5 متر
    متوسط وزن الحجر بالهرم الأكبر هو 2.5 طن ( ألفين وخمسمائة كيلوجرام !! )
    سقف hلحجرة الرئيسية بالهرم الأكبر ( والتي يزعمونو أنها تخص خوفو ) يقدر
    وزنه ما بين 15 حتى 35 طن !!
    أثقل حجر هو رأس أبو الهول المنحوت من صخرة واحدة ويقدر وزنه بألف طن
    مليون كيلوجرام
    وهو يحتاج لسبعة طائرات جامبو لتحريكه !!
    المسافات بين موقع تقطيع الحجارة وأماكن التشييد تبدأ من 35 كيلومتر
    بالمعادي ووصلت في بعض الأحيان إلى 650 كيلومتر من أسوان !!
    [center]ارتفاع البناء وصل إلى 163 متر !!
  33. الى المعلق السابق كُتب في
    دا خبر قديم اوي وانا نشرته هنا في التعليقات منذ حوالي سنه
    وياليتها اقباط المهجر فقط
    دا فيه مستوطنه اسمها زخاريا في اسرائيل وزخاريا دي تبقى عمته
    بس الشهادة لله الراجل دا مثقف وعنده افكار كويسه
  34. الانسان العارى كُتب في
    هى دى عبقرية الفلاح المصرى
    عريان وحافى وقالوا لة ابنى الهرم وارفع الصخرة الكبيرة دى بدون اى الات او معدات
    لانة لم يكن بعد قد صنع المسمار
    ولم يكن بعد قد قد عرف تشكيل المعادن والحديد وكان اقصى معداتهم بلطة من الحجر يقطع بها الصخور
    وهل تم جر الصخور بالثيران ؟ وكم ثور كافى لجر مليونين ونصف من الاحجار
    مستحيل توفير طعام لهؤلاء الثيران
    اذن هناك قوة العقل
    قف امام ماذنة السلطان حسن مثلا او ماذنة جامع ابن طولون
    كيف رفع الفلاح الحجر الى اعلى نقطة فى الماذنة
    هناك البساطة العقلية
    زمان وانا مهندس صغير كان فى مكان عملى رجل صعيدى امى لا يعرف القراءة ولا الكتابة اسمة الحاج منصور ووظيفتة ريس مثقلات
    ريس المثقلات هذا حينما يطلب رفع اوزان ثقيلة بالاطنان من مكانها يستدعون الحاج صميدة وبطرقة البلدية يقوم بالعمل خير قيام وبدون كتب ولا كتالوجات ولا تعليمات الشركة المصنعة
    امثال او اجداد ريس المثقلات هم الذين رفعوا صخور الهرم وهم الذين بنوا ماذن المساجد فى القاهرة المحروسة بالاحجار البيضاء
  35. وابطال ايضا كُتب في
    فى العاشر من رمضان 6 اكتوبر 73 كان هذا المشهد الصعب
    سارت الدبابة فوق احدى معابر قناة السويس لتعبر الى الضفة الاخر
    سارت الى مسافة 3 كيلومتر شرق القناة وبناءا على الاوامر توقفوا
    طلب القائد من الاطقم خندقة الدبابات بمعنى ان يحفر كل طاقم مكون من 4 افراد حفرة تحت الارض لتنزل اليها الدبابة
    وما لم ينسى ان هؤلاء الاربعة القادمين من قرى الدلتا ونجوع الصعيد امسكوا اطباق طعامهم ووقفوا كل واحد فى ركن ليحفر بطبق الاكل فى الرمال ليصنعوا حفرة تسع دبابة
    كان شياطين الارض كانت تتلبسهم
    ومن الغريب انة بعد ساعتين بالضبط كانت الدبابة مخفية تحت الارض فقد حفروا الرمال باظافرهم وكانوا يجلسون بداخلها استعدادا لاى اوامر
    قدرة عملاقة جدا يحفرون باظافرهم بينما الجيوش الاخرى تستخدم اللوادر فى الحفر لجيوشها
    وكانت شادية العظيمة تغنى
    ما شفش الرجال السمر الشداد وصبايا البلد
    هنا السر
    الرجال السمر الشداد
    حافرى قناة السويس
    وبناة السد
    ورافعى احجار الهرم
  36. حفر قناة السويس ايضا كُتب في
    بعد بناء الهرم وبناء السد العالي ايضا حفر المصريون قناة السويس
    عليه فقد تم استخراج 74 مليون متر مكعب من الرمال و التكاليف 369 مليون فرنك فرنسى و عدد العمال مليون. و يبلغ عدد الذين ماتوا أثناء الحفر 125 ألف عامل و يبلغ طول القناة 165 كم وعرضها 190 م غاطسها 58 قدم.
    عظيمة يا مصر
    بس يا خسارة حظك وحش مع حكام الثورة
  37. بناة السد العالى كُتب في
    احفاد بناة الاهرام بنوا السد العالى
    هنا تظهر الصلادة والقوة المصرية
    فى اجتماع تنفيذى لمهندسى تنفيذ بناء السد العالى جلس المهندسون الروس وامامهم الخرائط مع المهندسين المصريين لمناقشة كيفية التنفيذ
    ويؤشر المهندس الروسى على الخريطة انة مطلوب فى النقطة الفلانية عدد اثنين كراكة وثلاثة حفارات ميكانيكية
    ويكتب المهندس المصرى بالعربى مكان كل كراكة ولانة لا يوجد كراكات ولا فلوس لشراء الكراكات يكتب المصرى بدل عن الكراكة 6 صعايدة وبدلا من الحفار الميكانيكى 5 صعايدة
    ويشرح للروسى الممتعض والمستهجن
    وفى التنفيذ كان فعلا 6 صعايدة يقومون بالعمل بدل الكراكة وخمسة صعايدة بدلا من الحفار الميكانيكى وانبهر الخواجات الروس من قوة المصريين وجلدهم وصلادتهم
    وحينما غنى عبد الحليم حافظ كنا هنبنى ودى احنا بنينا السد العالى يا استعمار بنيناة بايدينا السد العالى
    كان يعبر عن هؤلاء الصعايدة العمالقة الذين حلوا مكان الكراكات والحفارات
    نحن شعب عندة ملكات خارقة تظهر وقت الشدة وتظهر فى ايام التحدى
    نعم تم رفع احجار الاهرام بهؤلاء الصعايدة
    ازاى
    تلك قصة اخرى
العودة إلى الأعلى