إعلام عربي ولا انجليزي؟
معاك قرش .. تساوى قرش، ولو معكش على قاعة الامتحانات
04/04/2006
"معاك قرش .. تساوى قرش، طيب ولو معكش؟،.. يبقى على قاعة الامتحانات يا حبيبي ومتصدعناش بقى"..
هذا هو الشعار الذي رفعته كلية إعلام بجامعة القاهرة، معاك قرش وهتدفع ألف ونص تبقى إعلام انجليزي وتدخل حاطط رجل على رجل ومحدش قدك.
إنما بقى لو معكش يبقى زى "الأمّور" تاخد كتبك المتصورة وتطلع على قاعة الامتحانات المكان الجديد لمحاضراتك المحترمة، لإن قاعات الكلية الموجودة هاتكون من نصيب دافعي الفلوس على غرار الجامعات الخاصة والأكاديمية الدولية وكده يعني.
القاعات هناك مش وحشه لا سمح الله فهي تتمتع بعدد لا بأس به من مروحة تلاتة ريشة في السقف، وناهيك بالطبع عن وصف تلك المراوح وهي بتطير الورق بتاع الامتحان من قوتها، "تلاتة ريشة بقى مش أي حاجة".
عليك وعلى دار علوم
وممنوع يوزك شيطانك وتفكر تحول من عربي لإنجليزي مفيش كلام من ده إطلاقا، أنت دخلت إعلام عربي من الأول اشرب بقى للآخر، ولو مش عاجباك قاعة الامتحانات أو لقيت كلية ثانية مواعيد محاضراتها في نفس وقتك يبقى برضه تلم حاجتك وتروح على دار علوم هتشيلك وتشيل اللي ...، عامة هتتبسط قوي لو رحت هناك ع الأقل هيتبصلك وتتعامل كأنك أجنبي تمام أو كائن فضائي غريب !!
وكذلك لو كنت دفعة تالتة أو رابعة فبصراحة ملكش مكان عندنا في الكلية.. أديك شايف دفعة أولى وثانية كتير ازاي وبأمانة الكلية مش مستحملة العدد الكبير ده، وأنت ابن الكلية إن مكنتش تضحي عشانها تضحي عشان مين ؟؟
بصراحة بقى لازم تسيب مكان لآخوك المواطن .. أنت هتروح قاعة الامتحانات ويا ريت تسيب لهم المبني .. كفايانا أنانية بقى !
الناس مقامات
للأسف اتضربت في نفوخي وقلت اقعد في الكافيتريا بجوار الكلية أو بمعنى أصح وراها وركزت على شمالي لقيت كافيتريا ثانية أتبنت في شهرين بس، قلت ابص الناحية الثانية لقيت مشروع بناء المكتبة المركزية.
والمشروع ده على فكرة مستمر من أيام اخويا الكبير ما فكر يدخل جامعة يعني من خمس سنين تقريبا، وبقالهم خمس سنين بيبنوا المكتبة المركزية جنب الكلية برضه بتاعة الجامعة مع إن مبنى جمعية جيل المستقبل طلع مباني وتشطيبات وبشر في لمح البصر.
وفجأة أصبح في الجامعة أفخم مقر وأفخم مبنى طبعا الناس مقامات مكتبة إيه وعلم إيه وحتى الشباب نظاف ودايما لابسين بدل ده أمين لجنة السياسات وابن الريس يعني ولا واسطة ولا أي حاجة بس الناس مقامات برضه ..
هم يضحك
ورجعت ثاني أفكر في موضوع الكلية ولقيت حل انه لو أنت بقى متضرر تماما من الموضوع ده فبفلوسك كده ابني لنا مبني على حسابك ونحطك فيه، ومتبصش قدامك يا بابا لان مفيش اى حاجة من اللي بتلمح ليها هتحصل لا تقولى مبني جيل المستقبل الكبير ده ولا مكتبة الجامعة ولا الجنينة اللي قدام الكلية، شوف إحنا نوافق على اى حاجة إنما تغير نظام الجامعة عشان مزاج سعادتك لا طبعا .
ولست أنا الوحيدة المشاركة في التفكير والبحث عن أسباب لأن فيه مجموعة كبيرة من البشرية فكرت، وكانت النتيجة مجموعة كبيرة من النكات في بهو الكلية الكبير الواسع النظيف بشاشة التلفزيون الملون المضبوط على الأخبار إعلام بقه.
تلاقي واحد يقول "نعمل قمصان مكتوب عليها من ورا عربي وقمصان مكتوب عليها انجليزي عشان كل واحد يعرف مقامه " ثم تسمع نياهاهاهااهاهاهاها .. دليل على انفجاره في الضحك لست ادري من سخرية القدر أم من تهييس نزل عليه !!
الاحتلال دخل إعلام
أما عن ردود أفعال الطلاب عشوائيا على ما سمعناه سواء كان إشاعة أو فعلا سيحدث فكان كالأتي :
قاضي : يعععععععع .. ده احتلال
سحر : ونبي إيه .. وإحنا ولاد البطة السودة ولا إيه؟؟
وائل : للصبر حدووووووووووووووووود .. أكيد مش هحضر
أميرة : طبعا تخلف .. الجديد يتبنيله مبنى جديد
نهى : صمت تام بذهول شديد وفتح عينين ع الآخر .. ثم .. "بس القاعات حر أوى و مفيش "اير كونديشن" هناك"
قولوا انتوا بذمتكم كده لو انتوا في مكاننا ها تعملوا إيه في موقف زى ده؟
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
انا كان نفسي ادخل اعلام ..
لكن مكتب التنسيق الله يعمر بيته هو اللي وداني فسلفه ...
وانا بقول الله يعمر بيته عشان انا اللي لو كنت في الموقف دا ..
كنت هتجنن عليهم ..
واقلع جومتي وانسرها على دماغ اتخن تخين ...ومش مهم اروح حافيه ..
انا بحمد ربنا اني اترحمت بجد لان دي مش اول شكوى اسيمعها من طلبة اعلام ...
وعموما كلنا قرفانين والله في دراستنا ...
لكن هنقول ايه بقى .. ربنا ينتعنا بالسلامه ..
عشان البنات يقعدوا في البيت يستنوا بيت العدل ..
الشباب ياخدوا دورات في الطاوله والدومينو ... واهو كله تعليم ..
الحمد لله العيال صحابي خلصوا الكلية قبل الفكيرة دي ما تطلع والله لو انا كنت مكانكم كنت اخدت مجموعة من كفاية ورحنا في مكتب العميدة الحلوة بتاعتكم دي وعملنا اعتصام يعني ولا اكل ولا شرب ولا محاضرات ولا مرواح لحد ما يبان لنا صاحب
انا خلصت اعلام من بدري لكن اقسم برب العزة ان ده لو حضل ايامنا ما كنا سكتنا اساسا ، ول حتي وصلت للاعتصام والامتناع عن الحضور وحملة في التليفزيون والجرائد ..
يا جماعة موضوع يتنشر كدة وخلاض مش كلام لازم بجد تعملوا حاجة ده تهريج واسستعباط.. انت يا جماعة المفروض انكم اعلامي المستقبل وبتوع الكلام والتغيير .
انا مش فاهم ساكتين ليه واية لازمة الاسر واتحاد الطلاب جاتكم نيلة فيكم وفي جبنكم .
وسلبيتكم
يا جماعه متزعلوش قوى كدة و استحملوا شوية و اهو كلة تدريب عشان اما تخلصوا و تطلعوا للحياة تبقوا اخدتم تدريب عملى على اللى انتوا هتشوفوة و الله انتوا المفروض تشكروهم و تترجوهم انهم يكتروا المقالب. على فكرة دى مش هستيريا دا بجد لان و الله الفساد وصل لكل مكان لكل جحر فى البلد دى. حتى اسالوا الناس بتوع البحث العلمى اللى انا واحد منهم ( مفيش حاجة اسمها بحث علمى فى مصر ) بعد ما كنت اتمنى طول عمرى انى انضم للبحث العملمى يا ريتنى ما انضميت لهم وادينى كنت بكرامتى فى القطاع الخاص. معلشى طولت عليكوا بس بجد لا تعملوا حاجة تغيروا بيها الواقع ياما تخرصوا خالص و متهللوش ع الفاضى.