انتقل إلى المحتوى
أرشيف عشريناتفبراير ٢٠٠٤ – مارس ٢٠١٠

الله أعلم بحاله..

ولاد البلدقراءة في ٤ د

لما قريت خبر سفر المبرمجين المصريين حسيت ان مصر نجار وبتصلح ابواب البلاد التانية.. بس المشكلة ان باب النجار الله اعلم بحاله!

07/12/2006

من مدونة عجبي

سمعت منذ أشهر عن عودة مجموعة من المبرمجين المصريين من أحد الدول الغربية بعد أن قاموا بتحديث قاعدة البيانات والمعلومات هناك، وعادوا بعد أن قبضوا راتبهم أو المبلغ المساوي لما بذلوه من جهد.. وعجبت لشيئين.. أولهما أن مبرمجي مصر مطلوبين في الخارج.. فالظاهر والله أعلم مصر بتطلع مبرمجين عشرة على عشرة "اللهم لاحسد" لدرجة أن يتم طلبهم في الخارج مع أن الكمبيوتر والبرمجة اختراع غربي مائة بالمائة.

الأمر الثاني هو أننا نسافر ونسفّر لتحديث قاعدة البيانات لبلاد أخرى.. طب ما جحا أولى بلحم طوره!!.. مانحدث قاعدة بياناتنا الأول بعدين نبص بره!

قاعدة البيانات بالأساس هي شبكة تحتوي على معلومات يتم برمجتها بشكل منظم جدا.. ففي البلدان المتقدمة تعتمد على تفصيل البيانات والمعلومات تفصيلا سهلا يجعل المعلومات فى متناول اي شخص بالاضافة الى سهولة استخدامها.. فمثلا إذا أراد تاجر ما أن يفتح سوبر ماركت في الشارع الفلاني فبالوصول لقاعدة البيانات من الإنترنت يستطيع معرفة كم سوبر ماركت في الشارع.. وبالتالي يمكنه معرفة انسب مكان لعمله.. وهذا مثال واحد من سلسلة فوائد لقاعدة البيانات!.. طبعا عندنا اصلا هنحتاج نعلم التاجر اساسا يعني ايه كلمة سوبر ماركت ويعني إيه كلمة كمبيوتر!

ويظل السؤال هل نملك بالأساس قاعدة بيانات؟؟ ياترى قاعدة البيانات المصرية دي فين -ده لو موجودة-؟ لو حد يعرف قاعدة البيانات المصرية الواحد يلاقيها فين ياريت يبعتلنا ويقولنا.. واللي يعرف مين ماسك رئيس او مدير -او ايا كانت تسميته- قاعدة البيانات دي يقولنا برضه.. ياريت كمان لو نعرف موقعها.. مش الالكتروني؛ انا مش متفاءله كدة انا بس بقول مكان المكاتب ع الاقل.. ولو ان قاعدة بيانات من غير موقع الكتروني تبقى مش قاعدة!

السؤال الاهم ان لو مفيش قاعدة بيانات مصرية.. طب منين ممكن نبدأ نعملها.. بلاش.. طب ع الأقل نعرف نبعت لوزارة ايه عشان نطلب قاعدة بيانات مصرية؟!

نظرا لموجة الغضب الاخيرة على اننا ماسكين في تفاهات وسايبين اهم مشاكلنا زي البطالة والتلوث .. الى اخر مواضيع التعبير اللى بناخدها في المدرسة؛ فقاعدة البيانات احنا محتاجينها انهاردة قبل بكرة.. وامبارح قبل انهاردة!

اعتقد ان اول ميزة ستكون لقاعدة البيانات في مصر هي استيعاب عدد لا بأس به من خريجي كليات حاسبات ومعلومات.. او استيعاب عدد من المبرمجين المصريين اللى بقو سواقين تاكسي او حاجزين مكان دائم ع القهوة.. لان وجود تلك القاعدة سيحتاج لتحديث متواصل لمعلوماتها!

الحقيقة احنا بنصدر حاجات كتير غريبة وبنستورد حاجات اغرب.. كهربا وصدرناها وبطاطس واستوردناها وحتى البصل اللى احنا اصلا بنزرعه بقينا بنستورده.. احنا صدرنا واستوردنا كل حاجة تقريبا.. الا ان التميز المصري يتجلى في تصدير العمالة!

مصر صدرت طلبة.. تقدر دلوقتي تقف وبكل الاطه وفشخرة تقول احنا صدرنا عمالة لبلاد بره.. وده الجديد بجد!

لما قريت خبر سفر المبرمجين المصريين حسيت ان مصر نجار وبتصلح ابواب البلاد التانية.. بس المشكلة ان باب النجار الله اعلم بحاله! لا عارفين اذا كان خربان ولا مخلع ولا سليم ولا ايه وضعه بالظبط.. ده بفرض ان فيه باب

عدد التعليقات : 25

• دعاء الإمام الأصغر في العيد

• التخصص يكسب.. في المدبح

• شوية بلالين علي حبة زينة

• العيد.. رقص ورهينة في محطة مصر!

الجبرتي إبراهيم

إعلان عن مدرس خصوصي في مادة التاريخ

الأقسام

تعليقات القرّاء

تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.

  1. المبرمج المصري غير مطلوب من الاساس في الدول العربية وغير مبدع في شغله في مصر ومن هنا ارى ان ادعاء ان مبرمجين مصريين يسافرو دول غربية ومعنا كده انها دول اوروبية أو امريكا لتحديث قواعد بيانات في الدول دي معناه ان الخبر متفبرك ومش صح...لأن المبرمج المصري تعبان وغير مبدع ...ويفضل عليه المبرمج الهندي الاكثر قدرة على العمل الجماعي "الذي لا يجيده المصريون بالمرة" وقدرة على التعامل مع قواعد البيانات باللغة الانجليزية"والتي لا يجيدها المصريون في اغلب الاحيان" والاكثر خبرة "لأن بلاده بتحترم العلم وعندها سوق تكنولوجيا من اكبر الاسواق في العالم" كُتب في
    اظن ان الخبر غير صحيح
    من الآخر الخبر مش صحيح
    يا جماعة دولة لسة محتفلة بإنتاج اول "استيكة" من سنتين هتخرج ازاي مبرمجين لقواعد بيانات إزاي فوقو بقى وبطلوا العنجهية إلي على الفاضي دي !!
    على فكرة :الكلام ده عن تجربة انا عايشها حالياً في الامارات...المصريين بقى حالهم التعليمي سئ للغاية ومش مطلوبين خصوصاً في تقنية المعلومات وقريباً في المجالات الطبية ...لأن مستوى التعليم في مصر زي الزفت !!
  2. صابر المصرى كُتب في
    تاييد على التعليق الاول و لكن بتحفظ
    انا اقف مع التعليق الاول الذى يتحدث عن حالة المبرمجين المصرين و انها تتجه نحو التدهور و هو امر لا يخرج عن السياق العام للدولة المصرية المتجة نحو التدهور فى جميع المجالات لا يمكننا اغفال احد و خاصة فى المجالات التى ترتبط بالتعليم الفاشل المريض الذى انتج الات لا تملك القدرة على التحليل و الربط و الابداع و هى الامور اللازمة لاختراق سوق العمل فى العالم كله و لكن للامانة و ليس احياء للعاطفة الوطنية , يظل المبرمج المصرى الذى تهيأ له الظروف و الامكانيات على القمة دوما لتميزة بالابداع الذى ليس له حدود و هو مالا يتواجد فى اى مبرمج اخر خاصة المبرمج الهندى و على راى مدير البرامج عندنا لما مبرمج هندى يغلط يقولك مشية و اشترى عشرة مكانة يعنى الهندى لم يتوق على المصرى بامكانيات خاصة فيه و لكن لان المصرى بدأ يفقد امكانياتة و يفقد قدراتة التاريخية و هو الامر الذى يجعل الحزن يملأ قلوبنا جميعا و لو اردنا النظر للموضوع بنظرة شاملة كى لا تجرفنا التفاصيل و نتوه فى طياتها فان تدهور حال المبرمج المصرى شأنة شان تدهو حال اى مهنة مصرية اخرى فى الداخل و فى الخارج مرجعها الاساسى التعليم و مرجعها الثانوى الممارسة و اكتساب الخبرة و كلاهما غير متوافر فى مصر و هى شىء اعتقد ان كل الكلام فيه يقال على قفا النظام الحاكم فى مصر فهو الذى بيده الأمر فى مصر فى كل مناحى الحياة و يخطأ كل الخطأ اى انسان مصرى ايا كانت مهنتة اذا اعتقد انه بعيدا عن السياسة و بعيدا عن تقدير الواقع المزرى لمصر حاليا و بعيدا عن الكلام فى حال مصر الحالي لانه اجلا ام عاجلا سوف يطولة ثعبان الفساد و يلتف حولة و يخنقة اهو او اولادة و هذا الفساد لا يستثنى احد سواء كان راكب عبارة مسكين او مبرمج كمبيوتر صرف عليه ابوة تحويشة عمرة فى الكلية لغاية مايت
    اقرأ بقية التعليق ..
  3. المبرمجين المصريين مش في تدهور ياكابتن بتاع التعليق الاول انت كُتب في
    صباحك سكر ياصاحب التعليق الاول
    انت اللى سمعك تقيل انما الخبر صحيح مية فى المية.. ولعلمك المبرمج المصري ازكى من بتاع بره لان اصل البرمجة مهارة وممارسة مش تعليم وحفظ كتب
    بما انك فى الامارات فمعذور انك مسمعتش عن هنا
    ولو المبرمج المصري تعبان زي ما بتقول ماكناش عملنا ع الاقل سايت عشرينات ده او مكناش عملنا اول لعبة الكترونية اللى نزل عنها موضوع بوحة
    صباحك سكر يا استاذ
  4. ممكن يكون في نوابغ من المبرمجين المصريين لكن الموضوع لا يصل ابدا لحد تعميم عبقرية المبرمجين المصريين لأن فعلا مستواهم على ادهم جدا..بالمقارنة بعباقرة الهند ..وده مش كلامي ده كلام أوروبا و امريكا اللي بتستورد العقليات الهندية و بتجيب لهم لبن العصفور لو عايزين لأنهم محتاجين خبراتهم جدا..اما المصري و العربي بشكل عام فقدراته على اده جدا جدا وكفاية عليه يعرف يشتغل على الاوفيس ويدخل على المواقع الاباحية .. كُتب في
    الله يرحم العباقرة
    أما للاخ اللي بيقول ان المبرمجين عباقرة بدليل موقع عشرينات ..يعني انت شايف عشرينات حلو اوي كده؟! يمكن شايفه في المضمون مش في البرمجة ..ده الى الان في لينكات مش بتشتغل ودي اهيف وابسط حاجة في المواقع ,,عموماالله يرحم العباقرة
  5. الاخ إلي كاتب تعليق بعنوان "صباحك سكر ياصاحب التعليق الاول " بالفعل انت حمار ومبتفهمش وعديم الاحساس والشعور...ده اولاً كُتب في
    الاخ صباحك سكر...انت حمار !!
    ثانياً:انا الي كتبت التعليق الاولاني ولسة عند رأيي في ان المبرمجين المصريين في العموم تعبانيين وحالهم لا يسر عدو ولا حبيب وبالنسبة للمبرمجين الهنود هما بالفعل خلال الخمس سنيين إلي فاتو نتيجة للشغل والاجتهاد وتقبلهم للعمل داخل مجموعة واحدة حصل ليهم تطور غير عادي اقرب للإعجاز وللعلم المبرمج الهندي الجيد حالياً مكانه مش في الخليج لأن الكفائات الهندية في مجال البرمجة بتتشتغل في مكانيين ملهمش تالت والاولوية عند المبرمج الهندي انه يشتغل في الهند اولاً وثانياً اوروبا او امريكا والتعبان بيروح الخليج ومعنى انه تعبان لا يقلل من كفائته وخبرته وجودة انتاجه لإننا لو عملنا مقارنة بين مبرمج هندي تعبان ومبرمج مصري "من بتوع السيط ولا الغنى" هنلاقي ان المبرمج الهندي افضل وانتاجة اجود واغزر من عشر مبرمجين مصريين ...
    الكلام ده عن دراسة واحتكاك دائم بالمجال من خلال تواجدي في الامارات من ثلاث سنوات ...
    بالنسبة لموقع عشرينيات ...فلا تعليق لأن الموقع برمجته زي الزفت ويلاحظها أي حد بيشتغل في مجال البرمجة...يا راجل ده موقع اسلام اون لاين حاله لا يسر عدو ولا حبيب وده
    وسلملي على المصري إلي هيفضل طول عمره مصري ..النيل رواه والامن بيجري وراه ...علشان كده لا عارف يفكر ولا يبدع !!!
    وسلملي على عم نظيف ..عمدة القرية الذكية !!
  6. لملذا جلد الذات كُتب في
    المصريين عمالقة
    نحن شعب عملاق والتعليم عندنا راقى جدا ونفس المقررات الت تدرس فى مصر هى نفسها فى بريطانيا
    مع الفارق ان الخريج هناك تتلقفة الشركات وتصقل معلوماتة وتزيدة خبرة وهذا هو الاهم اما عندنا فانة يكون عاطلا لينسى كل شيء
    فى ايام القطاع العام كانت هناك شركات تعلم وتدرب وتخرج وكان هناك المقاولون العرب تفتح مدارس تدريب لحرف البناء المختلفة وكذلك شركات البترول والحديد والصلب والسيارات وغيرها وغيرها000000000000000
    لو نزلت السوق اليوم لتبحث عن لحام ضغط عال لوجدتة نادراوكذلك الحرف الفنية المختلفة كلها انقرضت لانة لا احد يدرب ويصقل ويعطى خبرة عملية
    واصبح المصريين يعملون نادلا فى مقهى يقدم الشيشة للرواد فى فنادق الدول العربية وما رايتة حديثا هو دخول فتياتنا هذا المجال واصبحوا يقدمون الشيشة للزبائن
    الموضوع ليس تعليم انما مرحلة مابعد الشهادة
    لا تجلدوا الذات - بعد ان تخلصتم من القطاع العام وفى انتظار المثتثمرون الذين لن ياتوا ابدا عليكم الانتظار والدخول فى نوم عميق والحلم باحلام سعيدة
    واللة المستعان
  7. إبن بهيه كُتب في
    أعرف شركة مصرية تصنع برامج لأمريكا باستمرار
    من غير تحيز ولا حسد ولا أ يحاجه من ده .. أنا عندي قصه واقعيه لشركة بسيطه كانت تعمل في البرمجيات من كام سنه وصدفه نسيب صاحب الشركه سافر أمريكا في مهمة علميه غير الحاسبات خالص ولكنه بالصدفه صادف أن البرنامج الذي يعملون عليه ضعيف حبتين فكلمهم على برنامج أحسن في مصر واتصل بقريبه فأرسل له ومن هنا لضم خيط مع الشركه الأمريكية صاحبة البرنامج الخايب الأولاني .. وبقت تشتري من الشركه المصريه برامج كتير ومازالت .. المصري كبير جدا يا ناس حرام عليكم تظلموه .. مش كفايه ظلم مبارك الواطي الماسوني وعصاباته القذره ؟؟؟
    إبن بهيه
    http://shadyforever.blogspot.com/
  8. فارس_fr كُتب في
    بالراحة علينا يا ... صاحب اول تعليق
    الاخ صاحب التعليق الاول ,, انت سفهت من قيمة المبرمج المصري جدا واعتقد انك ذكرت انك تعمل فى الامارات ,, معقولة ان الامارات مفيهاش ولامبرمج مصري .. ؟؟ بالراحة شوية على المصري , واذكرلك موقف بسيط حصللى شخصيا مع مبرمج برازيلى واقسم بالله وانا اعمل فىدولةمن دول الخليج ايضا وهذا البرازيلى يعمل معى ,, هذا البرازيلى حديث العهد بالعمل معنا هذا الشخص يقسم بان المبرمج المصري الذى كان يعمل قبله , والذى فصل من عمله بسبب عدم قبوله للراتب الضئيل ,, يقسم هذا الشخص بانه عبقري وبانه محضر شغل ومجهزة لسنوات قادمة ,,, انا صحيح مجال شغلي بعيد عن البرمجة بس مش لازم نقلل من قيمة المصري اوى كده وده اعتراف من مبرمج برازيلى ,, والله المصري مفيش زيه بس وفرله البيئة المناسبة والامكانيات ,,,
    عايز المصريين يبدعوا فى ظل قانون الطوارئ طب تيجى ازاى ايه ابداع ده ؟؟؟؟ فى السجون والمعتقلات .... يا اخى بدل ماتلوم المبرمج لوم نظامالتعليم الفاشل ولا الحكومة العميلة اللى خربت البلد !!!! مش كده ولا ايه ..
  9. دسوقي كُتب في
    المبرمج المصري أفضل من الهندى
    السلام عليكم,
    الأخ العزيز اللى كتب التعليق الأول.
    أحب أوضح حاجة من خبرتي الشخصية.
    أنا مبرمج مصري إتخرجت و إشتغلت نت 3 سنيين من كلية الحاسبات. إشتغلت سنتين فى مصر و سنة فى السعودية. 90% من البرامج اللى أنتجتها كانت موجهة لدول الخليج و الأردن.
    حاليا في دول الخليج الطلب عالى جدا على المبرمج المصرى. أنا أغرف أكتر من 20 مبرمج مصري هنا. و من تعاملاتى الشخصية وجدت مرمجين مصريين شغالين فى تطبيقات البنوك و البورصةو الطيران و السيارات و غيرها.
    م للعلم إن سعر المبرمج المصرى أكتر بكتير من الهندى. و من واقع خبرتي الشخصية مع المبرمج الهندى, المصري أحسن عنده قدرة على الإبداع أكتر.
    لو حاولت تدور على خريجى حاسبات حتلاقى أنهم كلهم إشتغلو. فى هيئات الدولة أو شركات خاصة كتيير منها يتبع شركات عالمية زى IBM مثل أو إشتغلو برا البلد زى حالتى.
    و فى تقديري إن 75% من إنتاج البرمجيات فى مصر موجه للخارج و مش بس للدول العربية.
    دا مش معناه إن كلو تمام يا ريس. صناعة البرمجة فى مصر محتاجة كتيير. بدءا من قوانين العمل و الضرايب و تطوير التعليم. الى توفير التكنولوجيا (زى الاتصالات و الإنترنت) إلى إحتضان الأفكار الجديدة و المواهب. و الحجات ده هى اللى وصلت الهند و للموقع ده.
  10. صاحب التعليق الأولاني..والخامس كمان !! كُتب في
    بطلو جعجعة ..وحرقة دم !
    الكلام موجه لآخر تعليقين
    1- انا مقلتش ان الامارات او الخليج مفهوش مبرمجين مصرين انا قلت ان المبرمج المصري مش عليه الاقبال إلي على المبرمج الهندي في الخليج ولو استعانو بيه بيكون في بعض المهام للمساعدة في القواعد إلي باللغة العربية وللأسف خلال الفترة إلي فاتت لاحظت إن الشركات ابتدت تستعين بمرمجين من الاردن ولبنان وبالنسنبة للعبقرية من عدمه الموضوع مش موضوع ععبقرية وسلوك فردي حالياً في حاجة او اختراع اسمه العمل الجماعي "الذي لا يجيده المصريون بالمرة" وبالنسبة لزميلك البرازيلي اعتقد ان رأيه مبدني وفقاً لأنه اصلاً تعبان والمثل بيقول "الاعور وسط العمي سلطان" ...الموضوع مش موضوع تحامل وكره وعواطف كدابة بعيدة كل البعد عن الواقع والحقائق خريطة العمل في مجال البرمجة في العالم كله لأن بالفعل مصر حالياً غير مؤهلة لتخريج مبرمج قوي "تقول قهر سياسي ولا تدهور التعليم ولا وضع اجتماعي سئ او بنية تحتية متهالكة" كل ده لا يساعد ولا يساهم في في تواجد انسان متميز مبدع في اي مجال مش مبرمجين بس ...وانتاجنا من البرمجيات دليل على كده كماً وكيفاً بمعنى اننا في مصر معملناش حاجة محترمة نقدمها للعالم "في واحد اهبل في تعليق فوق بيتكلم عن موقع عشرينيات ولعبة اللنمبي" والنبي ده كلام ...بقول حاجة نقدمها للعالم مش كلام خايب كله بيدور في اطار محلي بحت ...ده حتى الحاجات إلي بنصدرها للدول العربية بينفعش نصدرها لأوروبا...
    وبالنسبة للأخ خريج حاسبات ومعلومات أقوله..متخليش تعصبك لمهنتك يطغى على موضوعيتك للنظرة للأشياء ...كلامي عن الهنود مش اعجاباً بيهم ولا كرهاً في المصريين لأن الموضوع مش عواطف وتعصب ..وللعلم انا شخصياً مبحبش الهنود ...المصري نعم اعلى اجراً ولكن مش عشان الكفائة علشان فرق العملة والهندي اقل اجر علشان
    اقرأ بقية التعليق ..
  11. فارس_fr كُتب في
    اسلوبك محترم فى الحوار
    اظن برازيلى يعمل فى شركة ارامكو السعودية ,, ليس باعور فى وسط العميان ,, واسال عن ارامكوان كنت لا تدرى عنها ,,,,
    احترامى لكل مصري شريف محترم يدلى برايه مع احترام لراى الاخرين "وان لم نوافق على راية فاننا نجعجع" , ياريت نبتدى الموضوع من بدايته
    متحملش العيب على المبرمجين اللى مستواهم ضعيف ولكن شوف ايه السبب فى ضعف مستواهم ؟؟؟؟؟
  12. دسوقى كُتب في
    الى ميعرفش يقول عدس
    يا أخ,
    من سوء حظى إنى مكنتش شوفت ردك "الموضوعى" (اللى شتمت فيه الأخ صباحك سكر) ماكنتش حشترك فى الحوار.
    و أعتقد إن إسلوب المناقشة "الموضوعى" اللى إحنا شايفينه ده هو عامل أساسى فى التدهور اللى عايشين فيه.
    و اعقد إنك ماحاولتش تدور كويس على صحة كلامك.
    و ده ينطبق عليه المثل و لامؤاخذة:
    الى ميعرفش يقول عدس
  13. اهم امراض مجتمعنا اننا لا نعرف ان نعمل فى جماعة -كلة يحب العمل الفردى - حتى فى الكرة كل واحد من الفريق عيز هو اللى يسجل هدف بس لكن يتعاون مع الاخر لتسديد هدف -لا كُتب في
    العمل الجماعى
    انا ومن بعدى الطوفان
    العمل الفردى لا يجدى فى العصر الذى نعيش فية سواء فى الطب او الصناعة او فى الابحاث ويجب غرس عملية TEAM WORK
    كيف نعلم الطفل المصرى العمل فى فريق يتم ذلك من خلال حصة الالعاب المهملة التى ننظر اليها باستخفاف ويحترمها العالم كلة
    نعلم ابنائنا العمل فى فريق لتحقيق الاهداف والشاذ عن العمل فى فريق هو شخص فاشل لا يمكن ان يحقق اى نجاح الا بالصدفة
    نبدأ بالاطفال اذا اردنا ان نتقدم بعد عشرين سنة
    ففى الدول العربية الذى كان يذهب الى مصر ليشاهد التقدم اصبح يأتى من هناك وعلى شفتية علامات الازدراء مما وصلنا اية
    هل ننتهى من اعنجهية الكذابة ونعرف الى اى مستوى انحدرنا
    ليس عيبا ولكن لنحاول ان ننهض
    واللة المستعان
  14. صاحب التعليق الاول والخامس..والعاشر كمان ! كُتب في
    ولو...المبرمج المصري تعبان !!!
    من أخطر مشاكل المصرين في تفكرهم "أغلبهم في الحقيقة" هي عدم تقدير الامور بمقدرها...يعني الاخ فارس ساب كل إلي انا قلته ومسك في "الاعور وسط العمي" ..طيب يا سيدي أنا آسف ..ولكن بالفعل المبرمج المصري تعبان والمشكلة الاكبر من ده إن المصريين مش مصدقين لحد دلوقت إنهم في بعيد كل البعد عن صناعة برمجيات محترمة وده تقرره الاحصائيات وواقع الحال ...ولو كانو بيستعينو بمصريين في الخليج فده فقط علشان مهام مساعدة محددة في تأسيس قواعد البيانات العربية أما تأسيس شركة برمجة ما على مصريين فده اتحدى اي حد إنه يجيب نموذج واحد لحاجة زي كده...
    وللعلم حالياً وفي مصر كتير من شركات البرمجة المحترمة ابتدت تستعين بهنود "الكلام ده في مصر مش في الخليج" وبأعداد كبيرة كمان ...
    المشكلة بقى والكارثة الكبرى إننا لسه عايشين في وهم الريادة ...
    بالنسبة لدسوقي ...بقولك يا بني آدم انا عايش في الامارات بقالي 3 سنين وشغال في شركة برمجة ليها فروع في الامارات وعُمان وقطر...وعايش مأساة وهم المبرمج المصري الذي لا يقهر!
  15. أولا أنا سعيد جدا لأن أخيرا هذا الموضوع طلع للنور وبدأ الحديث عنه علي الملأ! كُتب في
    أخيرا !
    موضوع البرمجة والمبرمجين غاية في الأهمية وتنبع هذه الأهمية من التالي:
    1- بعض الدول الفقيرة في العالم الأن أصبحت تعتمد علي مصدر الدخل القادم من البرمجيات كمصدر رئيسي جدا للتمويل
    2- ان تكنولوجيا المعلومات رخيصة التكلفة جدا مقارنة بتكنلوجيات أخري من المستحيل أن ننافس فبهاوبالتالي هي فرصة للمصريين لأثبات ابداعهم وقوتهم من غير عذر (مافيش امكانيات!)
    3- مجال خصب جدا جدا ودائما فيه نقص في جميع دول العالم للحصول علي مبرمجين كفاءات أو حتي أنصاف كفاءات
    علي العموم بعد ذكر كل ما سبق يتضح لي الاتي:
    - نقد كفاءة المصريين في هذا المجال في محلها تماما وبعيدين تمام البعد عن المنافسة مع الهند أو غيرها
    وبصراحة أنا لا انتقد المصريين لأنهم غير أكفاء! ولكن لأننا أصبحنا غير أسوياء بصورة فائقة!
    المشكلة في الشخصية المصرية التي أصبحت لا تبالي ولا يتحرك لها ساكن ولا تنتمي لأي شيء! وبالتالي تقدير المسؤلية والجدية في العمل والابداع لا يمكن تصور وجودهم في مثل هذا الشخصية التي تركت نفسها في مهب ريح الفوضي والمعاناة السياسية التي تمر بها البلاد منذ أكثر من 30 عاما....
    أنا أعمل في هذا المجال منذ أكثر من 10 سنوات.. عملت في الغرب أكثر من مصر والخليج. والأن في مصر.... أتعجب!! وأصاب بالذهول كل يوم فيما أري....
    أنصاف المبدعين يتركون البلد في أول فرصة!
    والمبدعين في حقيقة الأمر تركوها قبل الميلاد!
    والبقية الباقية شخصيات عجيبة تعمل ولا تعمل! علما بأنهم أكثر المصريين رواتب الأن! ولكن لا مبالاة! والعمل الجماعي غير موجود بالفعل علي الاطلاق... والادارة كادارة مصانع السكر والزيت! والمبرمجين دائميين الشكوي في ان النظ
    اقرأ بقية التعليق ..
  16. فارس_fr كُتب في
    .انا مش ضد رايك ولكن ضد انك تفرض على رايك
    اخى العزيز "اللى مش عارف اسمه " انا ضربت لك مثل بمبرمج مصري واحد انا كنت معاصر له فى عملى وشهد له الجميع بالكفاءة , ومش معنىكلامىان كل المبرمجين المصريين حالتهم جيدة ولكن انا كان هدفى انك , واعتقد ان العمل فى البرمجة عمل ابداعى يحتاج الى اجواء مريحة على كافة النواحى السياسية والاقتصادية والاجتماعية والتعليمية ....... من اين للمبرمج المصري ان يبدع فى ظل الظروف المشينة التى تمر بها مصر منذ 25 سنة ,, يا اخى الكريم ده احتمال يطلع المبرمج من بنجلاديش ده اذا مكنش طلع ويتفوق برده على المصري ,, هل الاجواء فى مصردلوقتى تقدر تخرج مبدعين فى اى مجال ,او مجال ,, الا اذا واحد او اتنين كملواتعليمهم فى الخارج ,,, انما فىهذه الاجواء مستحيل .......
  17. دسوقى كُتب في
    الشخصية ام النظام
    تعليقى على "أخيرا"
    أنا معك فى النقاط الثلاث الذى تتحدث على أهمية صناعة البرمجة.
    بينما السبب الرئيسى فى أن يترك انصاف المبدعين مصر أنهم لا يستطيعون توفير حياة كريمة فى مصر مع أنهم من اعلى الرواتب فى مصر. (لو فرضنا إن المتوسط فى الراتب 3000 جنية و الشقة المتوسطة ب 70000 و عربية متوسطة ب 80000 و كيلو البصل ب 5 جنية).
    و مش بس المبرمجين فى مصر هما اللى بيسيبوها, كل المهن أول ما بيلاقى فرصة سفر بيخلع.
    و المبدعين مابيلاقوش اللى يحتضن إبداعهم و ده اللى قلت ان صناعة البرمجة محتاجاه فى اول تعليق.
    لكنى ارفض القاء كل المشكلة على المبرمج. البرمجة زى أي صناعة محتاجة عوامل كتير عشان تنهض.
    و أرفض تعميم إن الشخصية المصرية عندها لا مبالاة و عدم إنتماء ده كلام مش صحيح.
    و بالنسبة للإدارة صحيح إن فى شركات الإدارة بتاعتها مش كويسة, لكن ده بيختفى فى صناعة البرمجه دلوقتى. الشركات المتوسطة و الكبيرة أدركت أن علم الإدارة من الأساسيات اللى تقوم عليها الصناعة و لذلك كتيير منهم بدأ يدى للناس عندة management training, software engineering. و الدولة فرضت قانون إن الشركات المصدرة للبرامج لازم تبقى CMMI certified.
    و أعتقد إن المبرمج المصرى لو تعبان ماكانش فى شركات عالمية استثمرت فى مصر زى IBM, EDS, ITWorx و الشركات التلاتة دول شغال فيهم أكتر من 1500 مبرمج مصرى.
    لو عايزين ننهض بصناعة البرمجة سوء المرمج أو إنه كويس مش هية المشكلة.
  18. بالنسبة لقائل "و أرفض تعميم إن الشخصية المصرية عندها لا مبالاة و عدم إنتماء ده كلام مش صحيح" كُتب في
    أخيرا
    أولا من المستحيل التعميم... ولكن الأغلبية أصبحت هكذا.
    بالنسبة للأدارة و CMMI أمور شكلية مستخدمة في مصر علي طريقة الفهلوة المشهورة. مستخدمة بلا ايمان بقوتها ... مجرد استخدام شكلي للحصول علي سمعة أفضل أو أسبقية... لا يختلف كثيرا عن طبيب خريج كلية الطب الذي هو شكلا طبيب ولكن في واقع الأمر أساسا فهلوي!
    بالنسبة للأبداع؟؟ هو فين الابداع ده بالظبط؟؟؟ حتي لو موجود فين الاقيه؟؟ ومين بيحكم ده ابداع ولا لأ!
    بالنسبة للنسبة والتناسب بين المرتب وسعر الشقة؟؟؟!!! ياأخي الفاضل والعزيز .. في أمريكا الراتب 3000$ وسعر الشقة لا يقل عن 200000$... أنا لم أفهم بعد هذه العلاقة النسبية
    بالنسبة لقائل : واحد أو اثنين هما اللي كويسين واتعلموا بره!! ده رأي غير موضوع علي الاطلاق... أنا اتعلمت بره ولكني قابلت ناس لم يسافروا للخارج علي الاطلاق ولكن لأنهم مازالو يحترمون ذاتهم وعندهم انتماء والله مستواهم فائق
    وأخيرا وليس أخرا.... الابداع لا يمكن أن يدخل في معادلة فيها كلمة "بكام"!!! ولكن بكام تأتي دائما بعد وجود الابداع في الأصل
  19. فارس_fr كُتب في
    رادا على اخيرا
    اسالك سؤال واحد وارجواالرد :
    هل خريجى الجامعات فى شتى المجالات فى الوقت الحالى ,, مش فى زمنك اوزمنى , هل هم على مستوىالكفاءة للبدئ فى اى اعمل ام انهم ومش هقولك كلهم 99% يحتاج لاعادة تاهيل وتدريب ,, هلى التعليم فىمصرحاليا يخرج مبدعين او متميزين فى اىمجال ؟؟؟؟
    ايه اعلى الكليات فى مصر دلوقتى ,, مثلا طب وهندسة وحاسبات , هلى خريجى هذه الكليات لا يحتاجوا لاعادةتاهيل ؟؟؟؟
  20. ردي لفارس كُتب في
    أخيرا
    هذا الجيل يحتاج الي الوعي وروح الانتماء قبل اعاده تأهيله علميا!
  21. احمد عز كُتب في
    تحياتى لصاحب التعليق الاول
    تحياتى ياكابتن يبتاع التعليق الاول
    فعلا كلامة مضبوط 100% انا بشتغل هنا فى دبى مهندس دعم فنى فى احدى كبرى شركات الاتصال هنا من 5 سنوات لم ارى مصريا فالح فى مجال البرمجة اصلا
    فى القسم الذى اعمل بة كل رؤساءى هنود واردنيين
    كلنا هنا كالاتى 4 مصريين 70 هندى 20 باكستانى 30 اردنى وتلاتة مصريين غلابة
    طبعا دا الحال فى مجالى شبكات الكمبيوتر فقط
    اما باقى مجالات الكمبيوتر فلا اعتقد انها تختلف كتيرا عن ذلك
    المصرى لما بيجى هنا بيفتكر نفسة بيل جيتس وانة الدنيا كلها هاتجرى وراة لكن للاسف الواقع غير ذلك
    اتمنى طبعا ان يتفوفق المصرى فى هذا المجال لكن الموضوع يحتاج وقت
    الموضوع عمرة ما كان ام سى اس ايي ولا سيسكو. ولا بكالريوس هندسة الحكاية ان اللى عايز يتفوق يبدأ من الصفرمن غيرما يعيش فالدور
    كتير مصريين هنا بيجو معاهم بكالرويسات حاسبات وهندسة وشهادات مايكروسوفت وبلاوى سودا لكنهم للاسف بيرجعو تانى من غير نتيجة لانهم غير مدربين التدريب الكافى للعمل مع فريق محترف
  22. نصر مصر كُتب في
    مبرمج مصري ناشئ
    مش معنى ان البرمجه علم انشاء في الدول الغربية ان المصريين مينفعش يبرمجوا، الغرب تقدم بسبب الحضارة الاسلامية، والحضارة الاسلامية تطورت بفضل الحضارة الاغريقيه، والحضاره الاغريقيه تطورت على اسس الحضاره المصرية القديمه، وهتفضل الموجه تلف على الناس حتى النهاية، وده مش لتوفر العقول المبدعة في الحضارات المختلفة، ولكن بتوافر نظام إداره جيد، مصر فيها عقول مبدعة كتير، وليها عقول مهاجرة أكتر بتفيد أعدائنا ومبتفدناش، وده سببه قانون الطوارئ والاستأثار بالسلطة (اللي بتحكم مش السلطة اللي بتتاكل)، فاذا اراد المبرمجون انشاء قاعدة بيانات مهما كانت موهبتهم لن يستطيعوا ببساطة لان الدولة لم تطلب انشاء قاعدة بيانات، لان المسؤليين مشغولين بالسرقة والاستجمام بشرم الشيخ وتوفير عرش امن لابنائهم...
    كمان التعليم مش مشكلة، انا بادرس برمجه في مصر بس برده بتعلم في أكبر الجامعات الامريكية والاوروبية وانا قاعد على جهازي في البيت، اللي عايز يتعلم كويس هيتعلم، الانترنت لغت كل الحدود..
    اللي مضايقني من التعليقات دي والكلام ده بلاقية في حتت تانية كتيير، الكلام بصيغة الجمع، المبرمجين المصريين كخه والمبرمجين الهنود جامديين، ياعني اللي قال الكلام ده قابل كل المبرمجين المصريين أو الهنود علشان يجمع، في كل مكان فيه السيئ والجيد، ده شيئ طبيعي، هي بس الاداره.
    nasrmisr.blogspot.com
  23. الطفشان كُتب في
    باب النجار مخلع
    سيدى الفاضل أحنااحسن ناس فى الدنياوبنعرف نعمل كل حاجة لكن دولتنا العزيزة والقائمين عليها يعملون بسياسة الشيخ البعيد سره باتع انا مقيم باالسعوديه توجد هنااشارات مروررقمية تعمل عن طريق الكمبيوتر ولا يوجد عسكرى مرور يقف فى شارع تحت اشعة الشمس الطاحنة ولا يوجد امين شرطة يمارس البلطجة على خلق الله وياخد فردة وأتاوة من سائقى الميكروباص والتكسى والله انا حزين على نفسى وعلى ولاد بلدى
  24. مصري كُتب في
    قاعدة بدون بيانات
    قاعدة وعارفينها
    لكن البيانات دي هتيجي منين ان شاء الله
    مصر مافيهاش بيانات معروفة اصلا
    اثولكم حاجة لذيذة
    فاكرين قضية سلسبيل بتاعت الإخوان ( خيرت الشاطر بأه الناس دي )
    كان ايه مشكلة مركز سلسبيل ده ؟؟
    كان المشكلة انه لما الحكومة صادرت الملفات من المركز .. لقت فيها بيانات عن حال الصحة و التعليم وما الى ذالك في مصر .. تفوق اللي عند وزارة الصحة و التعليم نفسها !!
    الخلاصة ... لما نبقى نعرف بيانات دقيقة عن المصابين بفيرس سي ... ولا عن نسبة الأمية الحقيقية ... ولا حتى نسبة الأقباط في مصر
    ساعتها نبقى نعمل قاعدة بيانات
    ولا ايه؟
  25. احمد كُتب في
    مأساااه
    الحكايه ببساطه ان الحكومات - اللى المبرمجين المصريين سافروا علشان يعملولها قاعدة بيانات - حكومات بتعمل لصالح مواطنيها اما عندنا فالحكومه تعمل لبقاء الفرعون و ابن الفرعون - فمن مصلحة الفرعون ان الشعب ميعرفش اى بيانات
العودة إلى الأعلى