شوية.. كلاب!
فئة وحيدة في مصر هي التي لا تجد في نفسها غضاضة أن تقبل وصف الآخرين لها على أنها شوية كلاب سكك صايعة وكذلك ضايعة
10/12/2006
منى سليم ـ ولاد البلد:
من أدبيات الحياة المصرية أن كل حبة ناس بتعتبر الناس التانيين شوية كلاب صايعة ولا يسووا..
(1)
فهناك دائما كلاب البيه وكذلك كلاب الهانم، وهذا طبعا من باب المساواة، ولكن يبقى أن كلاب الهانم أكثر شياكة ولباقة وناس ذواقة. أما بالنسبة لموضوع السلسلة التي يعايرهم بها البعض فهي لا تضايقهم ولا تحرجهم طالما في نهايتها يد نسائية ناعمة وسخية، طبعا يا سيدي بختك!!.
(2)
والطريف أن من يسارع بمعايرتهم هم كلاب البيه الذين يتباهون أن السلسة ليست في رقبتهم، في حين هي تكلبش ضمائرهم التي بسطت ذراعيها بالوصيد مع أصحاب الكهف نوما لسنين لا تنتهي.
مطمئنون أن أحدا لن يحاسبهم طالما كانت أفعالهم مصحوبة بمقولة دى أوامر البيه الكبير وأنا عبد مأمور ولكنى جبار واستطيع أن أحيل حياة الكثير هلاك وان كنت في نظرهم مجرد مأجور مجبور.
(3)
وتبقى المظاهرات هي المقام الأول والأنسب لأحاديث الكلاب، فمن قلبها تسمع هتافات تقول أنها ضد كلب النظام، وأن أمن الدولة هم كلاب الدولة وعند أعلى المظاهرة تماما داخل الكردون الأسود الخالد تجد العمداء متراصون يتحدثون من أسفل نظارات الشمس بالحديث المعتاد آنت فاكر دى عيال بتفهم دى شوية كلاب سكك صيع ولا لهم لازمة، وعندما يخلد الهتيفة للراحة لا تجد على ألسنتهم إلا مقولة حاسدة وهى أن شوية الكلاب دول لولانا ما كانوا يبقوا بيلمعوا كده من تحت النظارت ولولا مظاهراتنا وكلامنا وتعذبينا ما اتملت جيوبهم من فلوس الناس.
(4)
ونحن نعترف وبكل شجاعة أننا عندما نتقدم ويتعدل حالنا نصبح شعب مسيس مش بتاع سياسة، فسيادة الوالي لا يتعرف علينا إلا من خلال مثل يقول "جوع كلبك يتبعك"، ولأننا من مريدي السيد كيسنجر أصبحت كلماته بالنسبة لنا منهج لذا فالسياسة لعبة (...).
وهكذا تتفنن الصحافة المصرية في اختراع تصنيفات لم تستطع بعد أن تصل إليها مكاتب الداخلية، فكل من يتحدث عن الليبرالية هو بالتأكيد كلب تابع لدول أجنبية تشم عندما تمر من جانبه رائحة الشيكات والحسابات الخفية، وإن كنت ممن يريدون الإسلامية فأنت من كلاب المرشد ومش هتعرف مقامك إلا على أيد الداخلية، وإن خانك عقلك وأدعيت نصرة القومية فويل لك من كوبونات صدام والقذافية.
(5)
ولكن عجب العجاب أنه بالرغم من انشغال الصحف بالحديث عن الجديد في عالم الكلاب تبقى المكانة الأكبر في ذاكرة الشعب المصري للأقلام اللي مابتعرفش تعمل حاجة غير إنها تهبهب أو تكتب قاصدة جيش الكتاب، وهى كلمة ضمت تحتها خليط من الصحفيين والكتاب حرام أن يمزج معا بداية من جريدة الوطني لمصطفى كامل وحتى جريدة مايو بتاعة الحزب الوطني وسمير رجب.
(6)
وطبعا يبقى البيت المصري هو النموذج الأمثل لانفصام الشخصية فيما يخص الحالة الكلابية، فبرغم أن كل أب يمنح نفسه داخل جدران بيته وسام الإنسانية من الدرجة الأولى فهو لا يظلم ولا بيتظلم ولا بيتنى ولا بيتبرم، ولكن هذا لا يمنع أنه لا يرى خلفته على أنهم شوية ولآد كلب، ثم ينظر إلى زوجته حيث تنطلق عينه ويسكن لسانه (هم مش فعلا ولاد كلب!!)
(7)
ولأننا شعب رومانسي، فمع كل طلعة صباح تشرق بالهباب والملل نفتتح كل يوم بفك عشرات الارتباطات العاطفية التي يصبح كل ولد كرف بنت كلب ومش هايطول ظفرك في يوم من الأيام، ولأن حرمة البنت وقعت من زمان في الحياة المصرية لم يعد هناك ما يمنع أنه يقعد على القهوة مع (الرجالة) صحابه ويقولوا عنها أنها حتة كلبة وبانت على أصلها.
(8)
وزى ما أنت عارف أو مجرب فكل واحد بيعدى الشارع هو كلب ويتميز بأنه كمان حمار يعنى مهجن وده معناه أن هو يكونCAULIFIED أو مسرطن وده عشان فاكر انه ماشى في الجنينية ومبلم ومش راضى يعدى.
(9)
أما شوية الكلاب الصايعة اللي أهاليهم جابولهم عربيات بعرق جبين الغلابة اللي زينا فهي قاعدة عامة اخرى تسرى سريان الحقد في الدم المصري.
(10)
فئة وحيدة في مصر هي التي لا تجد في نفسها غضاضة أن تقبل وصف الآخرين لها على أنها شوية كلاب سكك صايعة وكذلك ضايعة، لا اعرف لهم اسم ولا نقابة ولكن فتش عنهم في ما حولك وغالبا ستجد نفسك تقف منهم في المنتصف.
بين هؤلاء ممن تتشتت بهم أحلامهم ولم يجدوا في هذه البلد سكة أو مخرج أو حتى مقلب يتكوموا فيه حتى النهاية، فقرروا أن يأخذوا السنكحة منهج.
فهم وحدهم ممكن يقوموا في يوم ويلعنوا أبو الشغل ويطلعوا على إسكندرية، وبعد أن يصلوا إلى هناك ممكن يطلعوا كل اللي في جيوبهم ويدوه للواد الفقري بتاع المناديل ويقضوا يومهم مشى على الكورنيش لغاية محطة مصر عشان يصلطحوا على سطح قطر الصحافة اللي راجع بهم للهم.
وهم وحدهم ومن غير معرفة ولا مصلحة ممكن يمروا عليك في فرحك ويدخلوا ويقوموا بالواجب وأنت تصدق وتحضن فيهم وتقولهم أنك عمرك ما هي تنسى لهم الوقفة دى وإنهم طلعوا رجالة بجد وصانوا الـ.. عشرة.
وهم وحدهم أيضا ممكن أن يقعدوا جنبك وأنت بتبكى على النيل يغنوا لك لغاية ما تقوم متنرفذ منهم وتعذمهم على ذرة.
وهم وحدهم من لا يجدوا مشكلة في كتب كتابهم على محطة الأتوبيس وماعندهومش مشاكل إنهم يصاحبوا المخبر اللي ماشى وراهم بأوامر الزفت البوليس.
ولهم وحدهم نهدى كلمات احمد زكى في فيلم هيستريا:
"وازى حالك مش لسه برضه زى حالي
لسه ضماك الشوارع لسه كرهاك البيوت
لسه قادر ع السكوت
لسه حي؟
الله يعينك على الجاى"
ولك وحدك الآن حق سماع أغنية منير ايديا في جيوبي وقلبي طرب وعلي الطرب لازم تهدي لكل كلب تعليق.
• التخصص يكسب.. في المدبح
• شوية بلالين علي حبة زينة
• العيد.. رقص ورهينة في محطة مصر!
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
إيه الحملة السعرانه دي ؟؟؟ فيه إيه ؟؟؟ كل المواضيع مكلبه ليه كده ؟؟؟ كل ما افتح صفحه تهوهو في وشي ؟؟؟ يكونش يوم الكلب العالمي النهارده بمناسبة الجوله الأوروبيه لكبير السرب ؟؟؟ عموماً يا ولاد البلد نطه جريئه منكم دي اللي ملت الدنيا صويت .. وأهنيء منى سليم على الموضوع الجميل ده .. صحيح الكلاب داخت معانا .. في الشتم والسب واللعن وحتى في الهزار .. أيام ما كنا لسه بنهزر .. مره صديقي سأل صديقنا الثالث عن إبنه قائلا .. إلا صحيح عامل إيه إبن الكلب ده ؟ فما كان من صديقي الفكهي إلا أن هوهو وقام يعضه استكمالا للحالة الكلابية التي وصفه بها .. وضحكنا لما كنا لسه بنضحك .. وكنا لسه فاكرين أن الحال ممكن يتعدل والكلب يطلع صادق ولو مره .. ومرت السنين ورا السنين واتفرقوا الصحاب .. قصدي الكلاب .. ولسه الكلب على حاله .. لا صدق مره في هوهوه احده ولا طبعا ديله ممكن يتعدل ولو ربطوله فيه أبو الهول واللي حواليه .. مصمم ما يتعدلش غير في الصندوق .. أيوه عليك نور يا فاهمني انته يا عسل .. ربك يسهل ويرجع في السندوء .. الله يكون في عون الخشب ؟؟؟
إبن بهيه
http://ibnbahya.blogspot.com
بجد يا منى الموضوع جميل جدا
و صياغتك له كانت عبقرية
و حلو اختيار صورة ان كلب يكون واقف على نجمة داود العنصرية
موضوعك اكثرمن رائع يا منى ,, بس الكلب الكبير والبوبي الصغنن نعمل فيهم ايه ؟؟؟؟ مش دول كلاب برده ولا دول معاهم السلسلة !!!!!!
ارجو من كاتب الموضوع اختيار الفاظه بدقه و انه يحترم نفسه لان زي منتى بتقول عليهم كلاب و عندهم كلاب ممكن انا اقولك انك كلب و عندك كلاب تابع لهم و بتاخذ منهم فلوس بس مش من دم الغلابه في الشعب المصري لالالا من الي في الشعب الامريكي