انتقل إلى المحتوى
أرشيف عشريناتفبراير ٢٠٠٤ – مارس ٢٠١٠

اشمعنى محمد منير..

ولاد البلدقراءة في ٥ د

تسمعه تقريباً في كل قصص الحب على اختلافها، تسمعها من هذا الشاب البسيط وهو يغنى ليلى يا ليلى ولا تعرف هل هو سعيد لأن منير غنى لحبيبته ام لأن اسمها صادف وكان (ليلى)

كما في أغنيته المفضلة.

09/03/2006

بنت البلد ـ منى سليم

سؤال تسمعه كثيراً، ودائماً ما يقترن بمشاهد ولقاءات مختلفة:

ـ تسمعه تقريباً في كل قصص الحب على اختلافها، تسمعها من هذا الشاب البسيط وهو يغنى ليلى يا ليلى ولا تعرف هل هو سعيد لأن منير غنى لحبيبته ام لأن اسمها صادف وكان (ليلى)

كما في أغنيته المفضلة.

ـ وتسمعها في قصة حب برجوازي من نوع عالي راقي أو أي من تلك الأشياء الرفيعة التي يصمم عليها أصحابها والتي تنتهي غالباً بسماع أغنية (شجر الليمون) لمنير أيضا.

ـ وتسمعه في اللقاءات إياها التي تعقد بالصدفة وتنتهي بالصدفة في قطار الإسكندرية، و دائما ما يبدأ الحوار برأي عن أحوال السكة الحديد ويمر بتحليل ظواهر مختلفة تبدأ بصفوف الأمن المركزي وتنتهي بمنظر البادى القصير لفتيات في الجامعة.

يسأل احدهم السؤال الخطير عن منير ومعه تنطلق صفارة البدا لصداقة عميقة عمرها ثلاث ساعات تبدأ مع ضغط زر الهيدفون وتنتهي بتبادل أرقام تليفونات لا ترن ابداً.

ولكن يبقى دائماً في ذاكرة كل منهم وهو يقف مكبوت أمام مديره أو زوجته، أن لديه صديق ثورجى بالتأكيد لأنه يسمع أغنية تحريضية إرهابية تقول (على صوتك بالغنى)

ـ وأحيانا ما يحضر منير في جلسة خاصة جداً مع عدد من الأطفال في ليلة رمضانية ومسلسل بكار، ومع بدأ مقدمة الحلقة، يقف احدهم ويقول أنا عارف مين اللي بيغنى، ده الواد الأسمر اللي يعمل بايده كده ويقعد يضحك كتير.. بابا قالي أن هو بيغنى كده عشان ابنه اسمه (بكار)

ـ وتستحضر صورة منير و تشكره كثيراً حين يتحفك الحظ و تدخل فيلم ليوسف شاهين لا تفهم منه شيء ولا تحب أن تفهم.

ولا يسعفك نهاية إلا أغنية منير وترددها وأنت تتعجب من التركيبة التي تجمع هؤلاء الأشخاص معاً وتقول فعلا هي ده الحدوتة (حدوتة مصرية) .

ـ وإذا داخت في وسط هذه الشلة ستسمع نفس السؤال، فهو الضيف الأساسي للشباب اللي عايز يجرب كل حاجة يقلع هدومه ويرقص .. يروح المظاهرة يهتف، وآخر كل سنة يتلموا سوا في الأوبرا ويغنوا مع منير ( وسط الدايرة).

ـ والأخ الحشاش هتقف تناقشه إن اللي بيعمله حرام وانه بيدمر صحته، هايقولك برغم انك خرجته من المود انه ما بيأذيش حد وبيتقى ربنا والشرب عنده بس مزاج، ولكنه بجد والنعمة بيحب الله ورسوله، وما تعرفش بيحس بإيه لما بيسمع محمد منير وهو بيقول (مدد يا رسول الله) .

ـ تسمعه من احد المواهب الشابة وهو يحاول أن يصف لك نوع الغناء الهادف الذي سيتحفنا به وقد يصيب وقد تصاب إذننا بالطنين، لكنه في كل الأحوال هايقولك (قبل ما تحلم فوق) .

ـ وتسمعه من احد مثقفي مقهى ريش، وقد تنازل وخرج للشارع ليقابلك أنت، و يحاول جاهدا أن يبسط لك فن وجيه عزيز وإمام ومنيب ويقول يشبه إلى حد ما أغاني منير .. بتسمعه.. عنده أغنية حلوة أوى اسمها (بره الشبابيك) .

ـ تسمعها من صديق جدك حين يأتي لزيارتكم، ويقولك فين أيام عبد المطلب وشادية وغيرهم، طبعاً انت ما تعرفش حد من الناس القديمة، أقولك في حد كويس الأيام دى اسمه منير بيغنى الاغانى القديمة بس بطريقة غريبة شوية، مش بتعجبنى بس هتعجبك انت ، اسمع (آه يا لالى).

ـ تسمعها في رحلات غريبة لمجموعتنا وشبيهاتها، حين نسافر معا نحن البنات، و تسمعها من محمد دسوقي وشيرين شريف في إحدى تلك الأيام المملة المتكررة التي تجمعهم كل فترة لتجديد ميثاق شلتهم الغريبة وهو ما يحدث في اى شلة أخرى، ودائماً نردد جميعاً نفس الكلمات ونتبادل الاتهامات ثم نشرب فيروز أناناس ونسمع الأخ منير وهو يقول ( الدنيا ريشة في هوا).

ـ تسمعها من تلك الفتاة الساذجة وهى تقصدك وتتمنى أن تغنى لك يوما (آه يا اسمرانى اللون).

ـ وقد تقولها أنت ولا تدرى هل تقصدها هي أم تقصد معشوقة أخرى متيم بها واسمها مصر، ولكنك في النهاية ستجد نفسك ومهما كان لون بشرتها تنادى عليها نداء منير وتقول (يا سمرة) .

ـ وفى عز الفرحة قد تكتئب، فهذه الكلمات البراقة عن غنى منير وصل بها الحال وفقدت اعز ما تملك وهى تتراقص على ألسنة رجال الحزب، فقد كانونا يسمعوا معاً أغنية العبور للمستقيل، و على الجانب الآخر وقف رجال حزب المفروسين يقولوا ليه يا منير؟؟.. هي الحكاية ناقصة.. ولا إحنا لازم وحتى من ناسنا (بننجرح) .

ـ أظن أن النهاية قد تكون مع هذا المشهد المتكرر على طول أرصفة المحروسة، زعلان من صاحب الأغنية أو مبسوط .. مرتاح لإسلوب حياتك أو مكبوت .. هتاخد من الدنيا أجازة وتمشى في الشارع وتقول ( ايديا في جيوبي وقلبي طرب) ... يا بختك!!.

بس خلاص، كفاية سماع لحد كده.

الأقسام

تعليقات القرّاء

تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.

  1. انتو متأكدين ان الموقع ده تابع للاخوان؟! كُتب في
    ?????!!!!!!!!!!!!!
    انا اشك ان فى حد من اللى شغالين فيه من الاخوان
  2. محمد السيد كُتب في
    لأنه منير ؟...ممكن يرد علينا
    بجد بأحب أسمعه ....
    وإن كان في الكليبات الأخيرة باستغرب ...
    طالما الأغنية محترمة ولحنها راقي وكل حاجة تمام .... ليه تخرب ده كله بتصوير .... ملوش لازمة أبدا ؟؟؟
    نفسي أوجه السؤال ده ليه ولناس تانية .... لكن أهه فرصة ...
    ياتري ممكن يرد ؟؟؟
    لا للتمديد ... لا للتوريث ... نعم لتعديل الدستور المصري
    mohamdmat@hotmail.com
  3. محمد السيد كُتب في
    ايه اللي جاب سيرة الإخوان دلوئتي؟
    هم الإخوان عمرهم إنهم قالوا إنهم ضد الفن ..
    أبدا ...
    الإخوان - وكل الناس المحترمة - ضد الفن الهابط .. الفن الضايع ... الفن اللي ملوش لازمة ...
    وبعدين يا عشرينات إنتو لازم بعد كده نجيبوا يافطة كبييييييييرة وتكتبوا عليها .......
    "والله العظيم ... إحنا مش الموقع الرسمى للإخوان ولا بنعبر عن رأيهم " و بعدها لينك لأي موقع من مواقع الإخوان .. يمكن الناس تصدق ...
    لا للتمديد ... لا للتوريث ... نعم لتعديل الدستور المصري
    نفسي اغيره .. حد عنده توقيع جديييييييييد؟
    mohamdmat@hotmail.com
  4. طيب يا استاذ محمد السيد كُتب في
    للاستاذ محمد السيد
    رغم ان تعليقاتك بتعجبنى لكن التعليق ده مش قوى
    انا بس عاوزة اعرف فين الفن الراقى اللى فى ليلى ولا مدد يارسول الله
    دى اغنيه فيها نوع من الشرك والعيازو بالله ( المدد والعون من الله وحده)
    واعتقد حضرتك عارف كده كويس فياريت تبقى تراجع كلامك كويس
    بس حلوة حكاية اليافطه دى فكرة برضه
  5. هوووبه او هبهوب كُتب في
    لعمل مركب من ورق علي الميه لرخي وسلامي لاحلي وطن
    فظيعه الاغاني خد بالك من فظيعه دي
    فكرتوني بحارتنا وعم البلبيسسي ياسلاااام
    وانا قاعده برغي مع ولاد عمي وخواتي
    في البلكونه وحرتنا المعفنه , وسما ع
    الادان , وكبايه الشاي, والله ياجماعه لو
    قلتلك بكرها قد ايه وبحبها متستغربش يلا
    يابلد يارب اموت فيكي.
  6. مروة كُتب في
    سؤال مهم بخصوص منير
    شوفوابقى أنا بحب أغانى منير جدا
    لكن عايزة أسأل كام واحد حضر حفلة لمنير والحفلة لم تكمل لأنه لم يكن فى وعيه؟؟ انا بسأل السؤال ده لآن مهما كان منير رائع و جميل لكن ده بيأثر على حب الجمهور ليه أنا حضرت له حفلة فى مصيف مراقيا و لم يظهر أساسا على المسرح رغم ان الناس جت من أماكن بعيدة لدرجة أن واحد قال أصل أحنا جاييين نسمع سباك ( مع الأحترام للسباكين لآنها مهنة شريفة) لكن ده كان نتيجة متوقعة لعدم أحترام الجمهور الى جه للحفلة
  7. whitecat كُتب في
    ملاحظة من عابرة سبيل
    عايزة اقول بس للي اعترض على اغنية مدد يا رسول الله ان كلامه صحيح والعون من ربنا بس لكن رغم كده الاغنية دي كان فيها رسالة سلام وتسامح وحب لكل الاديان في وقت كان العالم كله ثائر على المسلمين وبيحاول يوصمنا بلقب " ارهابين" وياريت حد يقولي اسم اغنية بتدافع عن الرسالات السماوية وبتدعوا لايقاف سفك الدماء حاليا
    نقطة تانية بالنسبة لاغنية ليلى اعتقد انها من الاغاني " العفيفة " والي هي نادرة اوي في الغزل حاليا ولو عندكو شك في كده افتحوا التلفزيون واتفرجوا على العينات المستنسخة الي بتهز كل حاجة فيها عالشاشة الا اخلاقها.
    انا بحيي بنت البلد اوي اوي عالكلام الحلو الي قالته في منير الي انا بعشقه وبحترمه شخصيا وياريت كل الناس الصاحية الي في الدنيا تقدر توقل جملة من الي بيسموه " مسطول" يقدر يقولها او تقدر تقول " ليه تسكتي زمن اتكلمي , ليه تدفعي وحدك التمن اتكلمي"
    انا اتكلمت اكتر من اللازم ياريت تكون فكرتي وصلت واعتذر على التعليق رغم اني غريبة عنكو .
العودة إلى الأعلى