أنا مش بكار!
"أدعي على مصر وأكره اللي يقول آمين.. ومصر دايماً ساعات تحتاجلها فمين.. تفتح في بقك يقولوا صوتك وحش.. ويقولوا جميل.. لما نكون ساكتين"
تترات كارتون الأطفال"مصر بنت اختي..واشتمها دايماً براحتي"
مظاهرات واعتصامات.. والبقية تأتي
مهدي عاكف ومبارك
أنا مش بكار!
الأمر لا يتوقف عند اللون، والأسئلة لا تنتهي كذلك فلماذا لا يقتنع أحد أن الناس في أسوان بيوتها ليست كلها من طين
05/04/2006
باسم المجدوب - ولاد البلد:
بالطبع أنت تعرفه، بكار..أبو كف رقيق وصغير.. ابن أسوان البار....ومعزته رشيدة.. بنت أسوان (البارة برضه).
لكن وبرغم تقديري لك ولبكار وللدكتورة منى أبو النصر مبتكرة الشخصية.. أسألك.. هل هذا هو كل ما تعرف عن مدينتي أسوان وأهاليها؟ّ!!
بكار كان لازم يبقى أسواني
بكار فعلا فكرة كويسة ممكن تعرفك شوية بست السمار والجمال "أسوان"، فبكار إلى جانب إنه ولد زكى جدا وبيعمل المعجزات.. بيقبض علي الحراميه وبينمي الصحراء، فهو ومن غير تحيز ينقل لك شيء هام لن تستطيع أن تدركه إلا إذا أصبح صديقك الصدوق واد أسواني مسمر موش بينور في الضلمة.
الأسوانية رغم سمارهم إلا أن ما يرتسم على وجوههم من جمال وهدوء وقلوب طيبة زى الدهب لا بتصدي ولابتكل ..و ابتسامه تشرح قلبك رغم الهم والتعب، أسوان بلد جميله قوي ولذيذه قوي فيها روح الاصاله تحس إنك ماشي في معبد لونه من لون شعبها الأسمر .. لكن وهذه نقطة هامة لدينا ومتوافر الآن في أسوان ذوات البشرة البيضاء.
حط الورد على الشيكولاتة!
هناك أشياء كثيرة يحفظها كل أبناء مصر عن ظهر قلب وليس لديهم فرصة للتفاوض فيها، بوابين الأفلام اللي كلهم اسمهم عبده، أغاني مثل سماره وشيكولاتة، كل هذه أشياء ترسخ أكثر من فكرة إن كلنا في أسوان أسمر من بعض، لكن السؤال لماذا نرفض أن يكون في أسوان ناس بيض؟.
الأمر لا يتوقف عند اللون، والأسئلة لا تنتهي كذلك فلماذا لا يقتنع أحد أن الناس في أسوان بيوتها ليست كلها من طين، وإن المواصلات فيها عادى ومش جمال، وإن الناس بتعرف تلبس كل حاجة من الجلباب وحتى الشورت والفانلة والكاب!
عندنا (والله العظيم) شباب روش يضرب جيل ويلبس ماركات ويسمع راب وغيره، وعايش حياته.. لكن يفضل طول الوقت محتفظ بأصالته وانفراده..محدش غيره بنفع يلبس الطاقية الأسواني.. وإلا يبقى خواجة!
عندنا كل حاجة أكتر من أي حاجة، سمار كثير وجمال كثير ودم خفيف كتير وتريقه من أمة لا إله إلا الله كتير برضه..
أنت جاى من آخر الدنيا
فياريت يا هذا تقولي لماذا كل هذا؟..
وسؤال لماذا ده في منه كتير قوي، والأجوبة قليلة وممكن تقلب بخناق .. سؤال واحد بس نفسي ألاقي بني آدم يجاوبني عليه، أو على الأقل يبطل يسألوه لي.
أكون في القاهرة، وأقابل شباب ونبدأ نتعرف، وينط السؤال في وشي، ياه أنت جاي من أسوان للقاهرة (وكأني قولتله أني من أبوجا )، ويرد علي بحاجه غريبة قوي، إيه إلي جابك هنا ؟ وكأني في بلاد الواق واق موش القاهرة أو إسكندرية.
وكأنه ليس من الطبيعة إن مصري أسواني يكون في ترام إسكندرية المصرية أو يركب المترو في القاهرة المصرية طبعا.
وناهيك عن الموضوع وتعالى على الديالوج المعتاد والمتكرر دايما ولأني مليت منه هاسيبك تقراه :
ـ أنت منين ؟
ـ أنا من أسوان ؟
ـ لا والله أمال فين رشيدة ؟
البلوة مازالت مستمرة
والحقيقة إن بكار ليس الوحيد الذي ساهم في تكريس صورة معينة عن أهالي أسوان، عندنا مثلا مأسوفة الذكر القناة الثامنة .. واليك المشهد التالي:
أم تقول لأطفالها : حتقعدوا ساكتين ولا أشغل قناة القرود (تقصد القناة الثامنة).
القناة فعلا عاملة للصعيد كله مشكلة، وبتعمل برامج غريبة، ما تعرفش عن مين فتحدثك عن التنمية المحلية والسياحة الشعبية وكلام أكل عليه الزمن وشرب كمان.
وبالطبع لا أخفيك سراً .. لأننا إتفضحنا على الهوا وكأن الأسوانيين لا يعرفوا شيء عن التقديم و الإخراج والمونتاج والجرافيك .
وكله كوم والتترات كوم تاني تحس انك بتشوف القناة الأولي سنه 75 ويقولك الجديد والحديث. .حرام عليكوا هي أسوان ناقصة.
نصائح تهمك
سمعت أغنية شمس الاصيل .. حاول تسمعها وآنت واخد مركب ع السريع في نيل أسوان، ولما نقول نيل أسوان يبقى نيل أسوان.. لأنه يفرق كثير جدا عن نيل القاهرة رغم إن الإتنين واحد.
هنا في أسوان لن تنسى ابدأ شكل الكورنيش ورائحته .. نعم رائحته .. لما الهوا ع النيل يميل ع الطين.
خلينا في الأغنية.. بتقول: إن كنت مصري دوًر ع الحتة اللي جواك اللي اسمها ست السمر والدلال .. "أسوان".
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
اما القناة التامنة فهي فعلا قناة القرود مش عشان سود وبتاع اطلاقا .. لان مفيش بني ادم طبيعي يعمل قناة زي دي .. فاللى عملها قرود بحق
موضوعك رقيق ع القلب ونيسمه حلو
اتمنى اقرالك تاني يا باسم
الحديث ذو شجون :) شكرًا لك
يا جدعان .. دول عالم اسمره اسسسسسمره
عني لوني المفضل ... يعني البت ام ضفاير اللي
كانت في فيلم مافيا
يعني سيا سيا واه سيا
يعني الارض تتكلم نوبي ومهما كان توبها امن توبي .
انا من اسوان لكنى من الناس اللى هاجروا من زمان من سنه 60
لكن عائلتنا مكانتش منفصله ابدا عن الصعيد وخصوصا ان امى مازالت ثقافتها اسوانيه 100%
وصحيح ان الشباب الصعيد دلوقتى بقوا يلبسوا الحلو كله والبنات بقت اخر موضه"طيبين اوى"
بس الحقيقه لسه فيه الحمار بجانب العربيات ولسه نسبه الاميه كبيره وكمان لسه عاده الزواج من القبيله او العيله
الحقيقه الناس فى اسوان مبقتش زى زمان انفتاح كتيييييييييييييير ودين قليل هى دى الحقيقه
اللى فى جزيرتنا والبلاد اللى حوالينا ومش بعمم
بس اجمل حاجه فى اسوان البيئه النظيفه والخضراااااااا والضفاير
واجمل حاجه لغتنا اللى من الصعب على المصراويه او "الفلاحين" زى ما بنقول فى اسوان يفهموها
وعلى العموم اتوحشتنى البلد جوى والملتوت والاجراص مع السخينه والجبنه الجديمه
اللهم اتنا فى الدنيا حسنه وفى الاخرة حسنه وقنا عذاب النار
السلام عليكم و رحمة الله و بركاته
الله يسامحك يا عم باسم أنت قلبت علينا المواجع
واحشتينى أوى يا بلدى والله انا مقصر فى حقك
تعرف يا باسم انا النوبه عندى هى ما قبل السد و على الرغم ان انا و انت و جيلنا كله ما شافهاش بس كان نفسى اعيش فيها
انا جدتى أسال الله ان يسكنها فسيح جناته كانت بتحكيلى عنها و ازاى الناس كانت بتموت من الحسره لما خرجوا منها كانت بتحكيلى عن ليلها و نخيلها والفيضان وعن اعتزاز النوبى بأنه نوبى
و للأسف فعلا نظرة الناس للنوبى لسه ضيقه اوى يمكن الاعلام ساعد فى كده و لم يبرز مثلا دور اللغه النوبيه فى انتصار أكتوبر العظيم و لما بتيجى السيره ديه بتكون على استحياء
تعرف ان المجتمع النوبى اتغير اوى و شهد أول جريمة قتل بعد بناء السد و تهجير بلاد ما جنوب السد لشماله اتغيرت الناس و ضاعت الاخلاق ولكن يفضل النوبى هو النوبى
عامة تشكر يا عم باسم انك فكرتنا بريحة النوبه و بلدى أبو سمبل
روح اى مكان فى الدنيا وقابل كل سكان الارض , مش هتلاقى اجمل من اسوان وساعة الغروب على نيل اسوان والجبل الشرقى , واهل اسوان يخلوك تحب كل البشر وتتغاضى عن افعالهم , مادام فى ناس فى طيبة وامانة اهل اسوان
ايه يا جماعة انتو مش عارفين ان الحضارة النوبية اقدم من الحضارة المصريةوان النوبيين اساس مصر .يعنى لينا حضارتنا وثقافتنا وهاتولى اى واحد مصرى مائه فى المائة مش حتلاقوا للاسف الشديدوده تعريف يسيط عن النوبة
اكيد انتا مش اسوانى انتا عنصرى
اجبلك بوش قريب اصبر
صباحاتكم بالورود
يا حسين شلالى وينك فى منتدى النوبى العالمى انا سمل ود الولياب
انا محمد من مصر واسم عائلتى بكار واحنا من عائله محترمه ومحافظه على التقليد ونحن نعيش فى الصعيد من اسيوط حتى اسوان واسم بكار اسم عائله حقيقه سلام الى كل المصرين محمد بكار
النوبه يا جماعه اتطلمت جغرافيا و تاريخ !
ظلم الجغرافياواضح .. فيه ايه بعد الغرق !
ظلم التاريخ لو كان بس فى تجاهل الحضاره النوبيه ممكن نبلعه انما الغلط مايتبلعش !
أنا درست و ولادى النهارده بيدرسوا ان الفرعون الفلانى أرسل حمله شرقا لصد غزوات الحثيين أو الهكسوس .. أو أرسل حمله لصد غزوات مش عارف ايه ... كويس بعد كده تلاقى فى نفس المقرر أن الفرعون الفلانى أرسل حمله جنوبا لتأديب قبائل النوبه !! ايه شعورك و انت قاعد وسط زمايلك بترس ان المرحوم جدك كان راجل قليل الأدب ؟ و الدروس دى ما وضحتش ايه نوع قلة الأدب اللى كان بيعمله .. كان بيحدف طوب على التجار اللى رايحين يعملوا تجاره ويا بلاد بونت .. ولا كانوا بيعاكسوا بنات الفراعنه .
انا والله بحب النوبيين بس انا مش نوبى وانا اتشادى بس النوبين ذى العسل والبشره السمره
عبدادريسعثمان او بكار هما اللي صنعوا التاريخ هما سبب نصر الكتوبر 73هما اللي ضحوا عشان السد العالي ينور مصر كلها ولاتنسوا ان فيه علماء نوبين زي نصر جمال و مجدي دهب وغيرهم كتير وعندنا محمد منير وكمان اسامه عرابي و احمد الكاس وفاروق جعفر وغيرهم وكفايه كوش ونفيرتاري كليوبترا
عائلة بكار من أعرق العائلات في مصر وقد دخلت مصر أيام فتح مصر مع عمرو بن العاص وهي من ضمن 77 عائلة من الاشراف وهي منتشرة في جميع محافظات الجمهورية من أسوان حتي اسكندرية وإيضا لها فروع في جميع انحاء الوطن العربي أقرءو التاريخ ( الجبرتي في تاريخ العائلات في مصر )،
ولكم جزيل الشكر
جمال بكار/ الجيزة
رئيس الوحدة المحلية بسقارة
عائلة بكار من أعرق العائلات في مصر وقد دخلت مصر أيام فتح مصر مع عمرو بن العاص وهي من ضمن 77 عائلة من الاشراف وهي منتشرة في جميع محافظات الجمهورية من أسوان حتي اسكندرية وإيضا لها
روح اى مكان فى الدنيا وقابل كل سكان الارض , مش هتلاقى اجمل من اسوان وساعة الغروب على نيل اسوان والجبل الشرقى , واهل اسوان يخلوك تحب كل البشر وتتغاضى عن افعالهم , وامانة اهل اسوان
انا من درو بنبان بحري
احنا كده فى الصعيد نعمل بالمثل القائل
الشيخ البعيد سره باتع لعلم الجميع القناةالثامنة افضل قناة اقليمية فى مصر والدليل على ذللك الجوائز الخمسةمن مهرجان الاذاعة والتلفزيون المصرى وما يكتبه النقاد عنها وانها افضل قناة مصرية
اسلام عليكم ورحمت الله وبركاته
انا بحب اسوان الان بحبهاجداويارت تكلمنى غلى الميل