شكلي وأنا حر فيه!
أنا مش بحب النيولوك ولا اللعب اللي بيحصل بالشكل.. والبنت اللى بتغير شكلها ده عشان الشباب يعاكسها
25/12/2006
إيمان كمال – ولاد البلد:
في الفترة الأخيرة انتشر الـ"نيولوك" ولم يعد للمشاهير فقط، بل انتشر بين الشباب.. يعنى تلاقى البنت شكلها يتبدل كل فترة عشان يتناسب مع اللبس أو مع المكان اللي رايحاه..
زمان كانت البنت تروح الكوافير تخرج واحدة تانية خالص لا يصدق أحد أنها هي.. أما الآن فانتشرت عمليات التجميل.. يعنى نلاقى المشهورين كل كليب أو فيلم بشكل جديد لا علاقة له بالشكل الأساسي للمطرب أو الممثل، أو المطربة والممثلة، من عمليات شفط وتكبير وتصغير وغيره..
إلى أن وصل الأمر أنه حتى لو الإنسان ده مش محتاج عمليات تجميل إلا أنه يعملها بس عشان يطلع بشكل جديد للناسن حتى وصلت هوجة النيولوك إلي الشباب اللي طبيعي أنهم يحبوا يقلدوا النجوم والمشاهير..
عمليات التجميل من أجل "لوك أفضل" تتكلف الكثير، فعمليات تكبير الصدر أو الشفاه تتكلف من 10 آلاف لـ50 ألف جنيه ، وكله حسب المكان اللي هتعمل فيه العملية، أما عمليات شفط الدهون من الجسم فتتكلف حوالي 5 آلاف جنيه، وعملية تقويم الأسنان تتكلف حسب البلد من 2000 لحد 10 آلاف جنيه لأن العمليات دي في ناس بتسافر بره عشان تعملها، فرق الجودة يا سيدي..
محروقة.. أو مشوهة
عن عمليات التجميل قالت رحاب محمد، كلية علوم، "أنا بحب أغير شكلي باللبس أو بالـ"ميكاب" وممكن أفكر أنى أعمل عملية تجميل عشان أغير شكلي.. بس احتمال مش قوى، أنا أصلا فكرت أنى ألبس "لينزس" عشان أغير لون عيني بس محصلش".
وعلي العكس منها قالت مارينا شنودة، كليه آداب، "عمليات التجميل ده المفروض لو واحدة محروقة أو منظرها مشوه لكن لو شكلها مقبول تبقى العملية مرفوضة عشان هي كده بتغير خلقه ربنا، وأنا شايفة أن البنت اللي تعمل كده أكيد فيه حاجة مضايقها وعاوزة تزود ثقتها بنفسها"، وأضافت "أنا بغير شكلي بتغيير "الميكاب" أو تسريحة الشعر بس".
واختلفت معها صديقتها مارى نبيل قائلة "بصراحة لو الممثلة ما غيرتش شكلها وطلعت زى ما هى كل مرة هنقرف منها، مش معقول كل مره بنفس الشكل"، واستدركت قائلة "بس الناس العادية مش محتاجين.. يعنى أنا ممكن أغير شكلي باللبس أو المكياج.. أقص شعري.. لكن البنات اللي عايزة تغير شكلها حالة شاذة والناس بتتفرج عليهم".!!
ترجع تاني إزاي
نهى حسينأ، كلية علوم، قالت "أنا ممكن أغير من طريقة الايشارب أو لبسي أو الميكاب.. وممكن أعمل عمليه بس لو فيه عيب يعنى مناخيرى معوجة أو كبيرة.. لكن أغير شكلي خالص مقدرش أبص وقتها في المرايا وأقول مين ده..، وأنا مينفعش أغير شكلي عشان الإنسان اللي أنا مرتبطة بيه.. طب لو بعد عني هرجع تاني إزاى".
هبه على، طالبة بالفرقة الثانية كلية العلوم، اختلفت عن كل من سبقوها حين قالت "لا يمكن أغير شكلي حتى لو عندي عيب عشان أكيد ربنا خلقني بالعيب ده لحكمه أو سبب، وكمان هاخد عليه حسنات.. بس ممكن أقص شعري بتسريحة مختلفة أو أرفع أوى.. وكل دي حاجات في إيدي، وأنا لو مرتبطة بإنسان هو أكيد معجب بي كده بس استحالة أغير شكلي عشانه على الإطلاق".
أما ليلى محمد ، كلية الحقوق، فتقول "أنا مش بعرف أغير شكلي خالص مش عارفه ليه بس لو في حاجه وحشة لازم اعمل عمليه تجميل عشان أكيد لو أتبدلت تكون أحسن.. لكن أنا مش بحب النيولوك ولا اللعب اللي بيحصل بالشكل.. والبنت اللى بتغير شكلها ده عشان الشباب يعاكسها".!!
عدد التعليقات : 11
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
هو موضوع لزيز جدا عشان نعرف مدى الفراغ والفضاء الى بقا موجود فى المجتمع بس هو مش موضوع اساسى هو موضوع جانبى اهميته مش ضخمة ومش محتاجنهاها دلوقتى بس اهم حاجة شغل كويس من واحد او واحدة مجتهدة عايز يعرفنا حالة مجتمعنا بس لو حاجة زى ديه تتعمل بالتصويت يبقا احسن يلا اول خطوة صحافة ربنا معاك
هو اساسا تغيير خلق الله حرام
اما اذاكان ذلك لحكمة كاصلاح عيب خلقى مثلا فقد اباحه عدد من الشيوخ
اما التغيير عشان نعمل لوك جديد فهو فرااااااااااغ وحرق دم
لية اللبس والخلط ده ولية الاسمين دول بالذات؟ خلوا بالكم وبلاش فتنة طائفية.
فعلا الموضوع ممتاز وشيق ومناسب جدا فى توقيته , مناسب مع النيولوك الدستورى , برضه مبارك كل يوم بيطلع لينا بلوك جديد للدستور المباركى , كل سنة وانتوا نايمين غفلانين ,,
مش هقولك يا ايمان ان الموضوع توقيته ممتاز ولا هو هايف ولا حاجه ولا انك معملتيش حسابك ان فيه ناس مش لاقيه تاكل ولا حاجه .....
ارحموناالله يرحمكمم وارجعوا لدينكم قبل فوات الاوان
ناس عندها فلوس ومش شايلة هم يعملوا اللى هما عايزين يعملوة
تكبر طيزها تصغر بزازها
وناس مش لاقية تاكل العيش الحاف
ولا عندهم لحاف يدفيهم فى الشتا
وفية اطفال شوارع او اطفال ضالة على وزن الكلاب والقطط الضالة بتلف فى الشوارع جوعانة فى بلد اسمها المحروسة
انتظروا مزيدا من الضنك
هل هؤلاء الناس يدفعون ضرائب
لماذا ياخذون ضرائب على الملاهى ولا ياخذون من هؤلاء الناس اليسوا متخمين بالنقود
يابلدنا بصى لولادك بالعدل
فعلا . أنا مع التنوع فى المضمون مش كله جاد .. بس الخفيف يكون بحدود .. وبصى يا استاذه
أولاً : الموضوع من نوعية قالت منى وأكد أحمد مش صحافة خالص خالص " لكذا سبب : منها أنها صحافة المبتدئين يعنى انا اذكر فى بداية عملى بالصحافة فى موقع " مصر العربية بتاع الاسبوع " كان الديسك يقولنا انزلوا الشارع خدوا رأى المارة فى كذا وكذا .. بس كان فى كام حاجة فارقة اولا.. ان الموضوعات كانت سياسية " آنية " كان مهم فيها رأى الشارع " زى موقف مصر من الحرب على العراق ..مثلاً وثانيا اننا كنا بناخد رأى الشارع " بكل اطيافه " مش الشباب اللى فى الجامعة " ولو قولتيى ان الجمهور المستهدف هنا هو الشباب ها قولك بس المتلقى مش شباب بس يبقى " انتى كده عينتك متحيزة يا استاذه " ماشى .. وبعدين الموضوعات ديه أقرب للعملى اللى كنا بنعلمه فى الكلية فى " صوت الجامعة" عشان الدرجات بس
ثانيا: الموضوع مكرر بلا شك
ثالثا : بغض النظر عن كل اللى فات ده فى نقطة مهمة جدا وهى أن الموضوع مفيهوش رأى موثق يوحد ربنا " يعنى دراسة على التجميل .. حجم ما ينفق على عمليات التجميل جملة وتفصيلاً .. وده متوافر بسهولة لاى صحفى بيدور على المعلومة بس انتى استسهلتى ... وغير كل ده فين راى الدين فى الموضوع وفين رأى اساتذه الاجتماع والنفس يحللوا الظاهرة ديه ..
الموضوع كلن مممكن يكون أحسن من كده لو كنت عملتى شغل فيه .. بس شدى حيلك
رابعا : ممكن يكون كلامة ضايقك ويمكن أنا اكون اصغر فى السن منك بس الفكرة انى اتمرمط فى الصحافة فعشان كده عرفت يعنى ايه اعمل موضوع تمام ويعنى ايه اعمل موضوع عشان اسمى يينزل بس وهاتتأكدى من الكلام ده لو روحتى أى جرنال شديد زى الدستور والفجر والاسبوع .. وارجو مكنش ضايقتك
مش لازم كلنا نقول الموضوع مكرر بالعكس الموضوع جيد واشكر الموقع