"فيوزك" أخباره إيه قبل الامتحان!
هتفرج هتفرج وكل بإذنه مادمت أنت صابر وحامد وشاكر هيفرجها ربك ده عالم وقادر.. مادمت أنت صابر وحامد وشاكر هيفرجها ربك دة عالم وقادر
10/01/2007
روضة عبد الحميد - ولاد البلد:
أقبل موسم الامتحانات وما يصاحبه من أعراض البكاء والضحك والبرود والكآبة أو.. التناحه.. شعر منكوش، وإضراب عن القفز داخل البانيوهات ورائحة نفاذة وإعلان حالة الطوارئ ورفع شعار "الأكل السليم للعجل السمين"، أو.. المعدة مغلقه للامتحانات.. وكل واحد ومزاجه..
فرض حصار حاد واعتكاف بالغرفة. و"يونيفورم" مخصص لليالي الامتحانات على غرار ليالي التليفزيون.. غير شوية أمراض نفسيه غريبة لا تأتي غير في هذه الأيام المفترجة وكأنها تتبع سياسة سيد درويش "زوروني كل سنه مرة".
كل ذلك جزء من أعراض حالة سيحان "الهارد" بتاع دماغ سعادتك ولسعان الفيوز التي تصيبنا في الامتحانات نتيجة أحساسنا أن الوقت أزف وناقوس الخطر ترن أجراسه، والطريف أن أعراض "اللسعان" تلك قد تكون أحلى ذكريات، وأطرف النوادرالتي مررت بها..
فمن طلب العلى سهر الليالي وقد يرغي في التليفون وقال أنا مالي.. وذاكر تنجح، غش تجيب مجموع.. إلي أخر الإفيهات التي تمطر علي سمائك في مثل هذه الأيام.. في البداية تحكى لنا حبيبه مُحمد 3 تجارة، التي كان للسعانها روقان، فتقول: قبيل الامتحانات كلما أحسست بملل وكرهت المادة أغير مكان مذكرتي الذي كان أصلا "أرض غرفه الصالون" أو السرير.. أصل مكتبي مفروش أرضًا هناك؛ المهم قلت أذاكر خلف باب الشقة.. وما أدراكم ماذا كان حال كل من يطرق الباب والصدمة التي تصيبه..
ثم أجرب "أعلى" ترابيزة السفرة، ولما زهقت ذاكرت على "البوفيه" واخيرا انتقلت لرأس كرسي الأنتريه. حتى أن أبى أكد لي خوفه من أن يكتشف وجودي فوق الثلاجة أو النيش ذات يوم.. وكنت بين كل مسألة رياضية معقدة حيث المسائل عريضة الدعوى قضائية اسمع أغنيه كلمتها تقول "هتفرج هتفرج وكل بإذنه مادمت أنت صابر وحامد وشاكر هيفرجها ربك ده عالم وقادر.. مادمت أنت صابر وحامد وشاكر هيفرجها ربك دة عالم وقادر"..
خرم بالمعدة
أما محمد بدر، 4 تجارة، فعلى الرغم من أنه مش باين عليه كلامه، إلا أن فترة الامتحانات تصيبه بحاله"خرم بالمعدة" الملقبة بـ"الفجع"، وربما يقول له الطبيب النفسي ذات يوم أنها حالة هروب من المذاكرة لا إرادية.
محمد يقول: قبل ما أقعد أذاكر بنزل أجيب بتاع 20 رغيف فينوا مع حبة جبن علي مربة علي حلاوة وزيتون علي حبة شيكولاتة وبسكويت علي كام علبة لبن.. وأحطهم جنبي وطول ما أنا بذاكر بأكل واسحب رغيف فينوا أعمله سندوتش وأكل مع اللبن، واكتشفت أن أسبوع مذاكرة متواصل مكلف بشكل رهيب.
ثم يضيف: مره قعدت عند واحد صاحبي في هندسة عودته علي نفس النظام بتاعي، دا غير الفطار والغداء والعشاء.. أنا فاكر يوم تعبنا من كتر الأكل يعني لو كنا شفنا علبة زبادي حتى كان أغمي علينا بعد كل الأكل دا، ولكن بعد الغدا نزلنا نجيب ورق من عند الجامعة وأكلنا هناك تاني؛ وبعدها رحنا الهرم عشان أخد ورق من عند زميل فقدم لنا "بسبسوة" غرقانة في السمنة "طحناها"، وإحنا راجعين لقينا محل بتاع تيك اوي جديد قولنا نجربة روحنا البيت مكناش قادرين نتنفس، وطبعاً سكينا علي المذاكرة ونمنا.
ماما.. ذنبها إيه؟
أما رنا أحمد، كلية إعلام، فكان لها طريقه مبتكرة "تجنن البيت كله معاها" فكانت تجلس مامتها أمامها تقشر البطاطس وهى تشرح لها وتسألها كل فترة وتقول لها "فاهمة يا ماما ولا أعيد تانى" لحد ما ماما تنام منها..
أما منار إبراهيم، كلية الآداب، فتقول :كنت بفكر إزاى أخلع من الامتحان بأي طريقه ومنها دعائي أن الميكروباص اللي باروح بيه الجامعة يعمل حادثه ويبقى جات من عند ربنا، وفى أوقات أخرى بأسمع فيروز وبأشرب كابتشيو وبأرقص وأنا بأذاكر ثم فجأة يصبني اكتئاب حاد ومش طايقه كتاب وأسمع جبار ويبقى نفسي أعيط ومش عارفه.. وهو ما يعنى دخولي في المرحلة الخطر من أعراض موسم الامتحانات وهو الاكتئاب ثنائي القطبين على رأى ماما.
حسين محمد، كلية طب، قال: أنا بتقلب معايا ضلمة بس الأعراض مختلفة أحيانا "انشكاح" وأحيانا قرف.. وأسيب ذقني تطول وشعري وألبس ايس كاب وأعتكف في البيت وأبقى خلاص زى اللي وهبوا نفسهم للعلم.
ربطة دماغ المعتصمة
هند أحمد، كلية صيدلية، فيحكي عن "لسعانه" أيام الامتحانات فيقول: أنا مذاكرتي كلها على السرير.. ولا شيء غير السرير.. اشغل التكييف على الدافئ وأفرش الورق كله على السرير وأخد موضعي وأبدأ، ويكافئ نفسي بشيكولاتة لو خلصت جزء معين من المنهج.. وبحب جدا أسمع حاجة وأنا بذاكر والنور بتاع الأوضة بحب يبقى هادي برضه..
ولما بتشد معايا وببقى مزنوقة كل أنوار البيت بتتولع وبربط ربطة معينة كده على دماغي بتحسسني كأني معتصمة أو عاملة إضراب وممنوع الأكل وبقوم وببتدي أذاكر وأنا بمشي وبسمع لنفسي. و ده معناه أن حالة الطوارئ اشتغلت معايا وطبعا النسكافيه يبقي "بلاك".
أما عند منى أحمد، 3هندسة، فاللسعان أزمة عن جد، وذلك لأنها تحلم بعد حل عمليات حسابية المعقدة بالمسائل التي حلتها.. ويا وليها لو المسألة تعقدت منها في الحلم، لدرجة أن والدتها جاءت توقظها مرة فقالت لها وهى مغمضه العينان "أخذتي الآلة ليه.. أنا قربت أخلص" ومرة قالت لها "5 فى 7 بكام؟"؛ وتضيف "طبعا بقوم من النوم عايزة أعمل shut down لدماغي بأي طريقة".
عدد التعليقات : 32
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
ايام المتحانات كان الصراحة ايام هباب انا فاكرها اصلى لسة خريج جديد زى ما بيقولى بس مزاكرة عندى يعنى البس رووب التفكير و رووب التفكير دة للميعرفوش دة روب بتاع ابويا قديم عامل زى بتاع عماد حمدى فى افلامه القديمة اربط الروب الربطة التمام مع اغانى عبد الحليم او فيروز و لو المادة صعبة يبقى شغل نجوم افام بهيفتها و ازاكر و انا برد على كل هايف و هايفة بيتصلو ببرامج الازاعة دى و والله جابت نتيجة كويسة جدا و شدو حيلكو و منجلكوش فى مادة صعبة
نجوم اف ام هايفه!!
راى غير معتاد فى اوساط الشباب
ولكنى اتفق معه وخصوصا اخينا الاتم ده (والله نسيت اسمه) اللى بيطلع بالليل زى العفاريت ويناقش الشباب فى مشاكلهم ( العاطفيه) و تاكدت من قتامته بعد اطلاله عليها من برنامج البيت بيت ابونا و المتفرجين خدامين اللى جابونا.
همه مين ؟ وكام ؟ وفين؟؟؟
أجلالا لمعاناة الالم و أحزان القهر لدي " هؤلاء " الذين اجبروا علي التجرع من كأس الفقد و الفقدان فقد الناس و فقدان الوطن علي ايدي من لا يدركون قيمة العدل ولا راحة الرحمة
وإحساسا بمعاناة اهاليهم و احبائهم و احياء للامال و الأحلام في عيون ابنائهم بخروج اخر واحد من " هؤلاء " يوم شروق الحرية و ظهور الحق .
تعلن جمعية المساعدة القانونية لحقوق الانسان عن رغبتها في مشاركة كافة قوي المجتمع السياسية والاجتماعية التي تتحرك منذ فترة ليست بالقليلة في سبيل الافراج عن وانصاف المعتقلون بمقار الاعتقال و السجون المصرية وذلك من خلال ايجاد اجابات علي قدر من الوضوح و الشفافية والحقيقة فيما يتعلق باعداد المعتقلون , واماكن و ظروف اعتقالهم كخطوة اولية لابد منها قبل او بالتوازي مع التحرك من اجل انصافهم والافراج عنهم و تعويضهم .
ما يثير الفزع في قضية المعتقلون في مصر خلاف التجاهل التام من قبل المسؤلين و الجهات المعنية , هو غياب اية معلومات رسمية او موثقة عن الاعداد الحقيقية الهائلة من المصريين الذين تعرضوا , ويتعرضون للاعتقال و السجن بمقار الاعتقال و السجون المصرية , او عن اسباب و ظروف و اماكن اعتقالهم .
عشرات الالاف من المصريين قد انتزعوا قسرا من حياتهم وحرموا من حريتهم و من حقهم في الحياة الكريمة ومازال الرأي العام لا يعلم العدد الحقيقي من " هؤلاء" الذين قبعوا
و يقبعون في السجون وامضوا و يمضون اغلي سنين العمر في غياب القهر و اليأس. ومازالت اجهزة الدولة - المنوط بها كشف الحقائق – لا تكترث بالرأي العام تحت ادعاء إن الوضع في مصر يلخص في " حاكم رشيد لشعب في طور النمو " .
وقد جاءت رغبة الجمعية في مشاركة كافة الم
اقرأ بقية التعليق ..
الموضوع رائع والتناول جيد مع سخريته ، ياروضه ، وياريت تدربي نفسك علي هذا النوع من الكتابه ، لأنه واضح أنك قلمك حلو في الكتابه الساخره ، وفي إنتظار موضوعات من هذه العينه ، وفققكم الله ، وبارك خطاكم
ياااااااااااااااااااااااااااااااااة
وشهادة كمان منه انى فى منى أمل
لالالا انا كدة اتغر
الاستاذ منير مش بيعاكس(هههههه) الاستاذ منير استاذى
شكرا لكل اللى لسعوا فى موضوعى
ايام الامتحنات حتي الفيوز بيضرب وبيطير ..مش بيكون موجود من اساسة والواحد بيكون في حالة غريبة من التوهان والزهايمر ربنا يخلصنا منها الايام دي
اولا ازيك يا روضه و وحشتيييييينى
ثانيا انا مدعت الامتحانت خلاص مع انى ف اللى اشد منها الا و هو المجستير الله يعمررررر بيته
و عايزه اقول لكل الناس اللى زهقانه من الامتحانات انتو ف نعمه
بكره لما تجربو شغل الدراسات العليا عتهرفو انكو كنتو كتمتعين بنعمه كبيره و انتو مش عارفين
على الاقل انتو لاقيين حاجه تذاكروها مش بتدورو و تبحثو و تطلع عينيكو ف البلد كلها و مكاتبها من شرقها لغربها و ف الاخر الموضوع ميعجبش السيد المشرف بتاعكو و روحو تانى و دورو ا خبطو راسكو ف الحيطه
المهم و الله انا الامتحانات عندى كانت بتساوى الطقوس الاتيه:
قعاد على السفره لان الاوضه يتخلينى انام+كبايه القهوه التمام+الراديو+اى ديوان شعر لزوم الهروب المؤقت من الواقع الاليم+ورق ابيض لزوم الخواطر او اى الهام شعرى صارىء+كتاب الماده و اى ورق متعلق بالماده من بعيد او قريب
عموماابقى اسالى يا روضه
وجدنا ورق الاسئلة فية 200 سؤال يتدرجوا من الاسهل الى الاصعب واحيانا كانت الاجابة كلمة واحدة تكتب تحت السؤال وطبعا الاسئلة مباشرة جدا وتبين ان كنت فهمت المقرر او لا كلام جميل
وطبعا اللى جاوب 50 سؤال واللى 100 سؤال
ونجحنا كلنا
اما المعقدين فبيجيبوا 5 اسئلة كلها الغام وتخمينات وياترى يقصد اية
الامتحانات المصرية مش امتحانات دى نكد
ممكن الاسئلة كلها تيجى من باب واحد
ربنا يسلم
وينجحكوا جميعا
اه الفيوز
الدماغ
ربما يستر انا شخصيا ايام الامتحانات عيني بتكون لا حول لا قوة بها تقريبا لا اري بها
الي جانب الضغط المرتفع و .....
الدنيا كلها امراض
الواحد مشدود والدنيا بيظة
لكن الحمد لله انا حاسس اني حليت احسن من قبل
ادعو لنا
وموضوع رائع يا روضة
مش بنعاكس
هو انت تقدر تعاكس يااخ الهندى...زداحنا كنا...ولابلاش انت عارف(هههههه)
الي الاستاذة المحترمه روضة عبد الحميد برغم عمق موضوعك والرصد الجيد لاراء شباب بيعانوا من المشكله دى بس احب اطمنك ان مدينه المحله كلها بالمدراس بتبقي غش في غش
و الله نسيتها ايام الامتحانات بس الموضوع ذكرني فيها... اصلي متخرجةمن 5 سنين و الحمد لله ما تورطتش بدراسات عليا زيك يا نوفا... شفت صحبتي شو عمل فيها المجستير فاخذت عبرة
اما ايام الامتحانات فتربط بذاكرتي مع روب بابا الشتوي(طبعا اذا كانت اجت بالشتا)اصلي بريدة قوي.. فكنت استولي عليه و احط الدفاية قبالي و اتربع على الارض وهات يا دراسة(مذاكرة بالمصري) وطبعا النفس مفتوحة ديما عالاكل وعشان ما اضيعش وقت كنت بقضيها شرب لبن مخيض(ودا معرفش بالمصري بقلولو ايه)
وكل موسم امتحانات و انتو بخير
بالنسبة للاخت رموز فلسيئه تعم ...رغم كدة ارجوا عدم الجمع
امتحاني النهاردة .. دعواتكم ... ادعوا لي كلكم ... أنا في أشد الحاجة لدعوة من قلبكم .... توصل ليا دلوقتي
شفتوا نسيت أمضي
برضه مش حاسكت
لا للتمديد ... لا للتوريث ... نعم لتعديل الدستور المصري
mohamedmat@hotmail.com
و الله الموقع منور بيكى يا روضه
بالنسبه للماجستير ربنا يسمع منك
انا نفسى طويل متخافيش عليا
وبحب اقول لريماانتى فين من زمان
من شاعه موضوع القهوه متكلمناش
و الله يا ريما الطموح العلمى دا قدر و احمدى ربنا انه مش قدر عليكى
بالنسبه لمحمد هندعيللك زى ما دعينا ليك كلنا قبل كدا
فاكر امتى
و لا بلاش تفتكر احسن انت ف ايام امتحانات
يعنى انت كدا عليك لينا دعوتين
ربنا يوفق الجميع
هو انت تقدر تعاكس يااخ الهندى...زداحنا كنا...ولابلاش انت عارف(هههههه)
انا هون يا نوفا بس زمانما شفتلك تعليق.. مبارح كان زوجي جنبي و انا بكتب التعليق وحكالي انت بعرفيها لنوفا؟ حكيتلو طبعا من زماااااااااااااااان.. هههه... الا ازيها هبوب؟ غاطة فين البنت دي؟ سلميلي عليها...وموفقة يا حلو و عقبال الدكتوراه
الاخ اللى بيسال عن الترجمه؛مفروض اقولك وانت مالك...لكن انا هجاوب؛ الاخ هندى زميل واعرفه معرفه شخصيه؛عشان كدة بقوله متقدرش تعاكس والا كنا(اى حاجة بقى) بس
ياستي ربنا يخليكي ...
والله فرحت أوي لما طلعت وقريت الكلام اللي كنتم كاتبينه ....
طبعا فاكر يا أفندم وشاليين لكم الدعوة في وقت عوزة ....
واطمني حتوصل لك في الماجيستير ...
بس تصدقي ...؟؟ وحشتني اوي الايام دي ... أصلها كانت في وقت امتحانات برضه ...
وأقولك حاجة في سرك .... أحلي اسبوعين قضيتهم السنة اللي فاتت كانوا الاسبوعين دول ...
اسبوعين في ليمان طرة ...
بس برضه مش حاسكت
لا للتمديد ... لا للتوريث ... نعم لتعديل الدستور المصري
mohamedmat@hotmail.com
ازاى يل ريما انا على طول على عشرينات
انتى اللى بتغيبى
بس بتفكرينى ليه بهبهوب
يا مين يقوللى راحت فين
و الله وحشتنى ووحشت ناس كتير ع الموقع
و بقول لمحمد السيد ذاكر انت بس و ركز اليومين دول
و اذا كان ع الشعارف حاله لو مدخلتش ع الموقع بسبب المذاكره
احنا هنحافظللك عليه لغايه ما ترجع
و اهو يا سيدى لا للتمديد لا لتوريث نعم لتعديل الدستور
بس على راى ابن بهيه هو فين الدستور
الناس كلها له بتتحامل علي الانسة روضة يا ريت الناس تناقش الموضوع بدون كلام عن كاتب الموضوع
الموضوع حلو جدا يا روضة وعلى فكرة انا لسة مغيرة فيوز دماغى لانه ضرب اكتر من مرة دة غير بقى انى جالى حول فى عينى وقربت البس نظارة والحمدلله و قرب يجيلى القلب والسكردة غير انى عندى اصلن الضعط ودة طبعا قبل ماتطلع النتيجة وبعد ماتطلع النتيجة انا بقولكم تقرولى الفاتحة وتحضروا جنازتى فى عمر مكرم"هو اتباع بس يلا الواحد يعمل فيه الجنازة احسن مايعملها فى الشارع".
وربنا معاكم فى الامتحانات وذاكر كويس تنجح وغش تجيب مجموع
نسيت اقولكم انكم تدعولى علشان كل مااجى اذاكر اسمع عمكم عبد الحليم وهو بيقول "وطريقك مسدود مسدود مسدود مسدود يا ولدى"اقوم انا من على المذاكرة وانا فى حالة تشاؤم وفى حالة قرف غير طبيعية وربنا يستر واعرف اذاكر السنة دى وانجح
وفكرتينى بالشيخ وجدى غنيم وهو بيقول"نام وإرتاح يأتيك الكساح"