رجل البنطلون فردة وفردة
تصدق ان اليمين هي اللي طويلة والشمال قصيرة
14/01/2007
من مدونة سمراء النيل
الرجل الشمال يمكن طويلة ولا اليمين قصيرة حبة
ماله البنطلون كاشش ولا الجيوب قبة
ست عيال وامهم وحماتي لوحدها سبة
يا صبر ايووووووووب
يقولك يا بخت من نام مغلوب
طب انام مرة غالب ولا الطريق مكتوب
والغلب بقي غالب
والحياة خد وهات
طبلة ونايات
ضحك واهات
تصدق بالله
الحياة فردة وفردة
هي الرجل الشمال طويلة ولا اليمين قصيرة حبه
اهو قدر مكتوب ومحدش بيستخبي
اهم حاجة تعيش مرتاح
كان ليا واحد صاحبي اسمه عبد الفتاح
عاش اربعين سنة نايم ولما صحي مات
والناس تقولك بص لادام
وكل ما بص لادام الاقي ادام ورا
ههه والله البنطلون دة مسخرة
تصدق الرجل الشمال طويلة واليمين قصيرة
علي كل احسن حاجة تعيش حياتك زي الحمار
مربوط في ساقية وسايبها للاقدار
ولا تتعب نفسك ولا تحتار
كان ليا واحد صاحبي اسمه عبد الستار
باع قيراطين الارض واشتري دار
حبة وباع الدار واشتري ارض
ولا مشيت معاه لا بطول ولا بعرض
مسكين يا عبد الستار
يالله اهو باع الدار والارض وغار
ههههههههه
يا راجل اضحك بلا هم
بلا خوتة وحرقة دم
طب وديني الضحك اهم
لا بجد الشمال طويلة واليمين قصيرة
ياللا مش فارقة ماهي حياتنا كلها متغيرة
يا سيدي انسي ماتفتكرش
دا كيلو اللحمة كان بخمسين قرش
وكان يملا العين قبل الكرش
والحياة كدة كان فيها بركة
والدنيا كات هيصة وحركة
يا خويا هو ايه اللي حصل
زرعنا قمح طلع بصل
هيا الحياة طالعه بينا ولا نازلة
جد معانا ولا هازلة
دة الواد صبحي النقاش
كان ضاربها بوية وعايش ببلاش
وكان يقولك ساعه الحظ ما تستناش
اروح ازوره من يومين الاقيه في الانعاش
صحيح الدنيا صغيرة
والدليل علي كدة
ان الرجل الشمال طويلة واليمين قصيرة
تعرف اهم لحظة في حياتك
هيا لحظة وفاتك
ساعتها طظ في اللي فاتك
وطظ في حماتك
وطظ حتي في ذكرياتك
وساعتها الكل هيفتكرك بالخير
ويقولوا كان طيب ...كان امير
لأ وهتاخد لقب مرحوم
ساعة موتك بس بقيت مرحوم
يعني ضهر حياتك هو وشها
وغروب حياتك هو فجرها
دنيا غريبة
العاقل فيها هو الوحيد اللي مجنون
زي رجل البنطلون
فردة وفردة
يوم دافية ويوم باردة
دايما متغيرة
تصدق ان اليمين هي اللي طويلة والشمال قصيرة
عدد التعليقات : 17
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
طبعا مفيش مزمز غيري وحبيت أكون أول واحد يعلق يا سمرا عشان لما تيجي تقري الموضوع تعرفي إن في وراكي رجالة
ههههه
بس طبعا النص جميييييييل
وانا معلقلك عليه زمااااااان لما نشرتيه
مبروووك
اتشهرتي يا جميييل
عقبالنا يارب
طب والله انا فرحانه اوي بجد شكرا
وشكرا ليك يا مزمز دلوقتي عرفت ان انا ورايا رجالة
عشان احنا هنعيش عيشة رجالة ووقفنا وقفة رجالة
ومش تخاف لما اتشهر مش هنساك
هههههههههه
مبروك يا سمرا تستهلى الخير كله و دايما كلامك ملئ بالشجن على الوضع الحالى و ما يرتبط به
أهل اسكندرية كلهم بيهنوكى
النص جميل و فكرته بجد حلوه
قي الجووووول يا سمرا
بس الصوره مين اللي حاططها؟
أصل ملهاش دعوه بأي حاجه
انت مش واخد بالك ان هي حاطة رجل علي رجل
وبعدين دي الصورة اللي لقيتها يوميها
اعترض بقي
هههههههه
اعترض كدة وقولي
بس انت دقق فيها كدة هتلاقيها حلوة
ولا انت معترض
طارق بجد شكرا ليك
واهل القاهرة بيحبوا اهل اسكندرية
الله الله يا سمرا الله ماشاء الله صيتيك وصل اهو عقبالنا بالتوفيق يارب و طبعا مش هقدر اقول اي حاجه علي الموضوع ده اكتر من الي انتي قلتيه كلاميك ملوش حل
بصراحة ياسمرا الموضوع جميل والكلمات لطيفة وسلسة .... بالتوفيق دايما
سمراءيا سمراء يا حبى انا
يلى بأشارة بتوة كام سنة
تعالى حبيبتى نعيش الهنا ونبنى بحروفنا طريق المنى
تملى يا عمرى عنيكى فى سمايا و شعرك يدفى حنينى وهوايا
ولمسة ايديكى دى حلمى ومنايا وقلبك ليلاتى وشوقك معايا
دوايا وهوايا فى عمرك كتبتة وشوقى وحنينى فى حبك رسمتة
وقلبك ناد يتة وردك حسبتة بحبك يا روحى وقلبك اخدتة
يا اجمل جميلة فى بستان ورود هكونلك فراشة رحيقها الخدود
ولو مرة غبتى وصبنى الشرود عينيا تقولى فى قلبى موجود (حاجة صغيرة منى ليكى )جميل اللى انتى كتباة جدااا اتمنى نكون اصدقاء
لالالالالالالا
دة انا بقالي معجبين كمان
انا كدة عديت بقي
بس ما تيجي تكتب بدالي احسن يا كوكو
بس المشكلة اني مش اعرفك
عامة والله اتبسط بكلامك دة ولو انك هتخلي الناس تفهم غلط ههههههههه
احساسك الشعري عالي فعلا .. بغض النظر عن الوزن و التفعيلات فإن موسيقي المعنى تطغى على كلماتك و تكسبها روحا خاصة بها ..
و مبروك على النشر يا إنجي :)
ماتشترى بنطلون غيروا
بجد جميل اوي و رشيق ...
مبروك يا سمرا ...
هو علي فكره طلع قميص مش بنطلون... :)
طبعا مدونة عزيزتنا سمرا النيل
تستحق كل النجاح .. بالتوفيق يا سمورتي
ارق تحياتي لكل المدونين
شكرا يا احمد علي مشركتك
غلبنان
ماهما لو كان معاهم فلوس كانوا اشتروا بنطلون غيروا
بس تقول ايه بقي للفقر الله يقطعوا
القهوجي
ربنا يخليك يارب
بس انت دقق كدة هتلاقيه بنطلون بس الموضوع اختلف معاك شوية
ههههههه
لزعيمة
ربنا يخليكي يارب
يارافعه من معنوايتي علي طول
بجدكتير حلو... اسلوبك رائع يا سمراء
بس مش تكتفي فيها و منرجعش نقرالك اشي تاني
مستنين جديدك
مبروك
مبروك يا انجى
يعنى انتى تزعلى من البث المباشر من الماسنجر
وانتى هنا شغالة بث على كبير
ماشى
وانا عموما ورا البنطلون ده ومعايا مقص
من أول يوم قرأت لكى وانا من المعجبين بكتاباتك وتنبأت لكى بالتفوق وكنتى فعلا
عند توقعات الكثيرين وقدعلقت من قبل على هذا الموضوع فى مدونتك
الى الأمام دائما ياسمراء
لكى تحياتى
جميلة جدا !
مش عارف اقول ايه
بس لما الواحد يلاقى حاجة جميلة جدا
ضرورى هيقول : جميلة جدا
حسستينى بأيام ماقبل ثورة يوليو والستات المنقبات نقاب ابيض ف اسود وريحة البخور يوم الجمعة والجرايد اللى فيها كاركايتير فاضح والطربوش !! آآآآه
على فكرة : فى عالم امريكى شغال على آلة زمن وناوى يخلصها كمان 4 سنين تقريبا. ربنا يوفقه وياريت ميطلعش بنطلونه هو كمان فردة وفردة
ما عندنا ماء.. ولا سدود
ما عندنا لحم.. ولا جلود
ما عندنا نقود
كيف تعيشون إذن؟!
نعيش في حب الوطن!
الوطن الماضي الذي يحتله اليهود
والوطن الباقي الذي
يحتله اليهود!
أين تعيشون إذن؟
نعيش خارج الزمن!
الزمن الماضي الذي راح
ولن يعود
والزمن الآتي الذي
ليس له وجود!
فيم بقاؤكم إذن؟
بقاؤنا من أجل أن نعطي التصدي حقنة،
وننعش الصمود لكي يظلا شوكة
في مقلة الحسود