الزرافة.. ماتت
وعادات الأقاويل لتختلف من جديد وكل واحد بيفتي.. هناك من قال إنهم هيشتروا زراف جديد من بره.. وأخر يقول أن هناك صفقة لتبادل أسدين بزراف
19/02/2007
محمد عبد العاطي – ولاد البلد:
"زراف أفريقي من الثدييات رتبة زوجية الحافر"
كان ذلك وصف آخر زرافة تمتلكها حديقة الحيوانات بالجيزة.. فقد استيقظت حديقة الحيوان لتجد الزرافة قد ماتت.
أثناء جولة في حديقة الحيوان سألت أحد العاملين عن بيت الزرافة، ففوجئت بإجابة مقتضبة "مفيش زرافة.. خلاص"، تعجبت من رد الفعل وحدثت نفسي لعل بينه وبين بيت الزراف بعض الذكريات السيئة أو المشاكل.. إلا أن إجابات الجميع –وعلي الرغم من اختلاف رد الفعل – كانت واحده "مفيش زرافة في الجنينة". حتى وجدت أحد الشباب استفاض في الحديث ليخبرني بأن الزرافة قد ماتت من قرابة الثلاثة شهور.
تلقيت الخبر في آسى.. كانت آخر زرافة موجودة في حديقة الحيوان، حاولت البحث عن حارسها لأعزيه فلم أجده.. وجدتني أمام قفص الأسود قلت ما أكثركم.. وكيف استقبلت الحيوانات الخبر.. ربما أخذوا واجب العزاء في بيتها ونعاها الثعلب ببعض الأشعار يشيد فيها بخصالها السمحة وسيرتها العطرة وكيف كانت تعطي البهجة مجانا من منا لم يتصور معها.. لم يؤكلها.. حاول أن يشب برأسه لأعلى يطولها حتى يكاد ينقلب على الأرض.. هكذا أنشد الثعلب.
قطعت تلك الخواطر لافتة إرشادية إلى بيت الزرافة تقول: (الاتجاه إلى بيت الزرافا) فتعجبت من بقاء اللافتة لعلها مجرد ذكرى الفقيدة.. حاجة من ريحتها أو ظرفها.. وتوقعت أن أصل لأجد حارس الفقيدة يجلس في حزن جوار بيتها ويأتي كل طفل يحمل زهرة فيضعها أمام بيت الزرافة مع نظرة حزن بريئة..
ولكن المشهد كان غير ما تخيلت تماماً فيبدوا أن الحياة لم تنته عن موت الزرافة نظرت إلى اللافتة التي تحمل بيانات الزرافة علي بيتها الذي تحول إلى بيت النعام.. وهكذا الأيام دول بين من يرفع الرأس ويحني الجبين يشاركه عدد من الغزلان الصغيرة وحارس يضع الطعام في نهاية عصا للطفل حتى يطعم النعامة..
سألته عن الزرافة.. ويبدوا أنه مل السؤال ليجيب بصبر نافذ "ماتت.. بس هنجيب زراف جديد" ورغم عدم رغبته في الكلام عن الزرافة علمت منه أنهم وجدوها ذات صباح ميته فقاموا بنقلها.. ولا يعلم إلى أين، أما عن حراس الزراف فقد تم توزيعهم علي أعمال الحديقة فمنهم من عمل بالنظافة أو جنايني.
شكرته وانصرفت ولم أقابل من يعلم كيف انتقلت الزرافة إلى مثواها الأخير فهناك من يقول إنها في بطن الأسد والبعض يقول إنها دفنت.. ولكن أين قبرها؟ وما هو حجمه؟ وهل كتب علي شاهد قبرها قصة كفاح زرافة في حديقة الحيوان؟..
أحد أفراد الأمن قد أكد إنها حرقت في المحرقة.. الزرافة كان موطنها الأصلي من أفريقيا وليست من الهند فلماذا تحرق.. أم كانت تتبع الديانة الهندوسية فحرصوا علي أن يحترموا عقيدتها الخاصة في جسدها بعد الموت..
وعادات الأقاويل لتختلف من جديد وكل واحد بيفتي.. هناك من قال إنهم هيشتروا زراف جديد من بره.. وأخر يقول أن هناك صفقة لتبادل أسدين بزرافة لأن عندهم أسود كثير وعايزين يقللوا فلوس اللحمة طعام الأسود فيستبدلوا أسدين بزرافة.. وأحد النبهاء يعتقد أنهم وضعوا الحيوانات التي سوف يتم استبدلها بالزراف في بيت الزرافة آي النعام والغزالتين..
ولكن النهاية واحدة فقدت حديقة الحيوان زرافتها الأخيرة وانتقلت إلى مكان مجهول وفي انتظار قدوم زراف جديد.. هذا إن جاء.
عدد التعليقات : 31
• شوبير لـ"جوزيه": نشكركم على حسن تعاونكم!!
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
بصراحة انا مش شايف أي داع للموضوع التافه ده
زرافة ايه اللي بيتكلم عنها دي وتستحق انه يفرد لها موضوع.
يا عالم كفاية هرتلة
منجلكش فى زرافة ياعم الزريف
الأخوة اللى فوق اللى قال ان الموضوع ميستاهلش .. واللى نعت الكاتب بأنه "زريف".. واللى قال يخلو الموقع اسمه "ولاد الزرف"..
مصر مش كلها مبارك وجمال وتوريث ولجني سياسات وتزوير انتخابات واخوان اعتقلو واخوان افرج عنهم..
مصر فيها حاجات كثير حلوة.. حاجات تخلي قلبك يتنفض لما تفنكرها.. تمشية علي كورنيش النيل .. قعدة علي البحر في اسكندرية..
بنات وولاد بيجبو بعض.. اطفال بيلعبو حجلة.. واستغماية.. وحتى عريس وعروسة..
الزرافة اللى ماتت ومش عاجبك الموضوع عنها كلن ليها ذكرى حلوة في قلب ناس كثير أوي كان أطفال .. واعتقد انك هتستعجب لو عرفت في كام واحد لسه بيبتسم لما يشوف صورته وهو صغير مع الزرافة
مع كل احترامي
نبكى على الانسان والا
نبكى على الحيوان
يمكن الزرافة كان فية اللى بيهتم بها ويديها الدواء
ولكن ملايين الغلابة اللى مش لاقيين الدواء يعملوا اية غير الموت فى صمت
اعظم حاجة مؤلمة للنفس انك تبقى مريض ومحتاج الدواء ومش قادر
ماتت زرافة ومات الف انسان
رخيص قوى ياانسان فى بلدنا
وبتموت ببلاش
وربنا يرحم الجميع
يعنى وقفه كوميديه عن حدث طريف ؛ ودة امر طبيعى
مهواش هيافه او غيرة
دة جرائد كتييييييير علقت على الامر دة؛ وكركتيرات وبتاع ؛يعنى الصحفى الشاطر هو اللى بيستوعب كل المجالات
في كام مصري بيموت في صمت وتنتهي حياتة من غير ما نحس بيه زي الزرافة
بلاش مصري في كام بني ادم بيموت وميكنش حد موجود يقف جمب اههلة او يكونه لحد ياخد العزا فيه زي الزرافة
كام مرة سمعنا خبر موت حد وعدي علنا زي ما بيعدي خبر موت زرافة
في حيتنا كام واحد ممات ونسينها بعد موته ونسينا البسة اللي قدمها لينا وبقيت كلمة دا مات لو حد سالنا عنه
مشهد موت واحد وبمجرد موته وقبل ما يدفن يكون كلة بيدور از يورثة وهيستفيد ازاي من موته وازاي هحط ايدي علي شقتة وازي همسك مكانة في الشغل وازي هشارك ولادة في المعاش
زي ما حصل في بيت الزرافة
سعات بيكون في شخص طول عمرة في مكانتة ومركزة راسة مرفوعه لفوق زي الزرافة ولما يموت يجبوا حد تاني مكانة يحب الانبطاح ويدفن راسة في اطين زي النعامة
يعني قصة موت الزرافة بتمثل حقائق كتيير في حيتنا احنا البني ادمين
على فكره يا محمد عبد العاطى مش قصدى من اعنوان اتعليق لنى اسخر لان فعلا موضوعك حلو
و انا مع روضه ..ازيك يا روضه وحشتينى
انا مع روضه ان مفيش اجه اسمها الموضوع هايف
الكاتب الشاطر يكتب ف اى حاجه
مثلا انا درست قصيده لشاعر انجليزى اسمها the flee يعنى البرغوت
المهم موضوع الزرافه جه قبل كدا ف القاهره اليوم
و الدليل ان الموضوع يستحق الكلام ان بلد عريقه زى مصر معهاش فلوس تشترى زافه بدل اللى ماتت
و جه واحد مسئول محترم قال انهم عايزين يعقدو لجان علشان يعملو ميزانيه لشراء زرافه جديده
دا غير ان فعلا كام واحد يحب يشوف صوره ليه مع زرافه و هو طفل و دى حاجه تتعلق بالمشاعر يعنى مش حاجه هايفه
ها يبقى الموضوع هايف
كنت بحب الزرافة بجد, وزعلت اما قريت الموضوع عشان ما كنتش اعرف انها ماتت.
الانسان اللي بيلفت نظرة حاجة مش بتلفت نظر اغلب الناس هوانسان حساس .
تحياتي لكاتب الموضوع وتمنياتي بمزيد من التوفيق، ووالله عجبني الموضوع ولو الناس المعترضة شايفاه تافه كملوه للآخر ليه؟ وكمان كلفوا نفسهم انهم يردوا عليه
يبقى الموضوع اثر فيهم واستفزهم انه يردوا عليه
السلام عليكم..
انا مش شايفه سبب لكل الهجوم ده على الكاتب لانه من الاخر انا شايفاه متفق عليه من كذا حد ممكن اللى مش عاجبه الموضوع يعلق بهدوء بدون تجريح فى حدانما الاسلوب اللى انتوا علقتوا بيه ده غير لائق بشباب مثقفين كبار
فى ناس بتحب تهاجم و تنقد و تبهدل عمال على بطال بدون موضوعية أو تفكير هو عبارة عن ماكينة نقد و تقطيع بسبب و بدون
عادى إيه يعنى لما يكون فى مواضيع ترفيهية أو أخبار خفيفة أو حاجات متنوعة
ماحدش ينسى إن معظم رواد الموقع عايشين الواقع المؤلم و طلعان عينهم (نفسيا أو ماديا) أو كلااهما من الحياة فى مصر فمن الطبيعى بل من الجيد أن يكتب موضوعات تتكلم عن أشياء من الزمن الجميل زمن كلنا نتمنى أن نعود له و نتخلص من هذا العصر المباركلى الذى أزكم أنوف الجميع و أفسد عقول الكثير و قضى على مستقبل و حاضر الكثيربن من أبناء مصر و الوطن العربى
انا مسافر انا وابولمعة نصطاد زرافة للحديقة
بجد بجد يا محمد شكراخااااااالص على الموضوع واتمنالك المزيد من التوفيق و العمده اللى بيقول كفايه هرتله بدل ما تعد تتكلم و رينا انت اى حاجه و لا انت من الناس اللى بيهاجموا و بس
والله الموضوع زى السكر ومكتوب حلو وسيبك منهم هما اصلهم لسه مزهقوش فى الشيتمه والراخمه على مبارك رغم ان عندهم حق بس كفايه شتيمه وبس وقاعدين يشجبوا بدل ما يبدأوا بنفسهم ويغيروا اللى جواهم
اسلوب حضرتك المرة دي بجد رائع.. حاسه فيه بتحسن و تقدم شديد.. الاسلوب جميل و لذيذ و يشد القارئ انه يقراها للنهاية..
اما بالمنسبة للموضوع نفسه.. اتفق مع اختنا ان الكاتب الشاطر يكتب في كل حاجة.. و حضرتك ليك كتابات في كذا موضوع اخر و كذا حدث اخر.. ان حضرتك تكتب عن حاجة شايفها البعض "تافهة" ده لا يقلل ابداً من قيمة حضرتك ككاتب..
بالنسبة للاخوة المعترضين.. فيه نوعين من النقد.. نقد يخلي الي قدامك يسمعه للاخر (حتى و ان كان نقد شديد) و نقد يخلي الي قدامك مش عاوز يسمع اي حاجة ولا يعرف اي حاجة جاية منك ، لغلظة اسلوبها (حتى و إن كان عندك حق)
هدانا الله و إياكم للتعاملات الصحيحة السليمة..
و ادعو لك اخر الكريم بمزيد من التفوق و التميز:)
انا شايفاها مقالة طريفة جدا وزي ما قال اخ لينا ممكن ناخدها قصة رمزية على شعب مصر اللي بموت من غير ماحد يحس بيه
او حتى الشعوب العربية كلها !!
الزرافة دي كانت رمز لاطفال كتير ماتت ومكانها اتاخد من غير ولا همسة
والادهى من كدة ان العمال يتذمرون من الاجابة على اسئلتنا يعني ماتت وماتسألوش ازاي وخلاص !!!
الله يكرمك يا اخ محمد اسلوبك جميل :)
انا استغربت جدا من الموضوع ومن افراد ليه صفحة ومقالة ...........
ولكن
لما قريته قلت لحد امتة مش هنفضل نقرا الا عن الاعتقالات والعبارات واكياس الدم
نخفف شوية ونقرة عن الزرافة لان فعلا انا حاسس انها قيمة كبيرة جدا في حديقة من اقدم حدائق العالم وكانت تعد من افضل حدائق الحيوانات في العالم
وبجد لازم نحزن على وصول الحديقة لهذا المستوى من الاهمال وعدم الاستطاعة على شراء زرافة جدية
وبجد كنت بحب اروح اتفرج ليها اوي
مش قادر هموت من كتر الضحك
الزرافة ماتت
ازي
المشكله مش في ان الظرافه ماتت ولا عايشة بس هما له خلو النعامة بدل من الزرافة
النعامه الي بتحط راسها في الارض بدل \
من الظرافه الي راسها
مرفوعه
والموضوع مش منقول ولا حاجة
لان موضوع الدستور كان موضوع تاني غير ده
وتجربه صحفيه ظريفة يا استاذ محمد
الكل مش مصدق ان الدنيا فيها حاجة تانية غير مصايب الشعب المصرى
انتوا عارفين ان نص شعوب الكرة الارضية ميعرفوش فين مصر دى اصلا
رفقا بنفسكم الحياة حلوة؟
انا مش عارف ايه الغباء اللى انتوا فيه داه
مش قادرين تقروا الموضع من زاوية تانيه وتاخدوا بالكوا من الاسقاطات اللى فيه..!!!!؟
بلاش السطحية دى غبى ومش فاهم ماتعلنشى غبائك
على الملأ
لا تتصور يا محمد يا أخويا قد إيه زعلت من الموضوع دا.... أصلها قصة كفاح مش صغيرة آه والله....
يا طحكت صغيرين وكبار....
وزي لم تتكلم وهي علي قيد الحياة....
ماتت في هدوء.....
و يلا مش مهم...
يلا معلش يامحمد البقاء لله بس اللى مزعلني هما ليه ماجبوش وحاده تاني الى الان
ولا جابوا؟