حلق حوش تكسب قروش!!!
25/02/2007
إبراهيم فايق - ولاد البلد:
لأن وصلة الدش قد قطعت فجأة ولم أتمكن من ملاحقة الراجل بتاع البتاع اللي تقريبا فك بالقرشينات وفلوس الاشتركات وزوغ على البدرشين بجواز سفر مضروب، بعدما قفشته المصنفات وقطعت الأسلاك أربا أربا أمام أعين المنطقة التي كانت دموعها كفيلة بعمل عين جديدة ولا عين الصيرة!!..
فقد اضطررت تحت دعوى الملل وضغط السأم أن أزيح التراب الراقد خلف أزرار التليفزيون لأشاهد القنوات الأرضية مع سبق الإصرار والترصد وعلمي التام بما قد ينجم على هذا التصرف الغاشم والفعل الأرعن المتسرع.!!
كنت في قمة سعادتي بالفعل عندما ضغطت زر الـON فلم أشاهد شيئا وكان صوت الـ"وشششششش" قد أخترق أذني لأتأكد تماما أن السلك الأبيض الذي كان ممرمغا ومجرورا في الأرض مع باقي الأسلاك كان سلك الأريال بتعانا بعدما ضيعت المصنفات أمله وأخدته -عاطل مع باطل- مع بقية الأسلاك السارقة.
ما طولش عليكم بالعافية مفيش غير القناة الثالثة اللي كانت شغاله راديو وشوية خيالات.. وانطلق صوت "محمود معروف "أعزائي المشاهدين معانا النهاردة الكابتن (فاروق جعفر) و(مصطفى يونس).
لم أكن أدري مدى النعمة التي وفرتها لنا الوصلة فمن زمن لم أشاهد برنامجا رياضيا على القنوات الأرضية.. وكنت أظن أن الدنيا بتتقدم والشكل أتغير لكن ولا حاجة.. سيبك بقى من الديكورات والألوان والرفاهيات والكماليات الفارغة بتاعة الفضائيات.. لأني أصلا ماكنتش شايف حاجة وخلينا في المضمون.
بعد كهكهات عنيفة وأصوات متداخلة، توجه الأستاذ "محمود معروف" بسؤال للكابتن "فاروق جعفر" مفاده تفتكر الزمالك ممكن يلعب إزاي في مباراة أهلي بوعريج الجزائري في الجزائر؟؟.. وكانت إجابة جعفر تخترق كل حواجز الصوت والصورة لتسجل رقما قياسيا وشهادة وخبرة سنوات تدريب طويلة في غزل المحلة و بلدية المحلة والسويس والمصري والأوليمبي والاسماعيلي والزمالك ومؤخرا الترسانة..
فقال "أهلي بوعريريج عمل نتيجة إيجابية مع الزمالك هنا في القاهرة يبقى لازم الزمالك يعمل معاه نتيجة سلبية هناك!!! –شوفت بقى يا جاهل أنت وهو-.
يعني يقفل ملعبه كويس.. ويلعب على أنه ما يدخلش فيه جون.. ويلعب بـ"عمرو زكي" و"مصطفى جعفر" (واحد قوي وواحد سريع) ولازم بقى المدير الفني مايقعش في غلطة انه يلعب بـ"عبد الحليم" بس وتحته "جونيور" لأ يلعب بـ"جعفر" و"زكي" ويديلهم مهام دفاعية.. يعني يقفلوا المساحات ويضيقوها من دائرة المنتصف.
طول عمرنا بنعمل كده من السبعينات وبنكسب بطولات إفريقيا وهي دي الطريقة اللي اتعودنا عليها وبنعملها دائما.. نكسب هنا ونتعادل هناك بأي شكل ونقفل الملعب..!
المهم لو دخل جون في الزمالك.. برضه ما ينفعش يكون في إندفاع هجومي يمكن يدخل الهدف الثاني ويبقى صعب التعويض.. لأ.. لازم يكون في حذر ولعب سريع على الهجمة المرتدة!!
إلى هنا وانتهى كلام الكابتن فاروق جعفر.. ولا تسألوني لماذا أصررت على استكمال البرنامج لأنني تقريبا تخيلت نفسي بحلم أو في غيبوبة مؤقتة ولا أدري ما سر هيستريا الضحك التي انتباتني بعدما شعرت أننا أصبحنا مثل أثيوبيا في عام 1999 ولم ندخل الألفية الثالثة وحتى لو ده حقيقي والزمن رجع بينا فإحنا على الأقل مش السبيعنات..
الغريب في الأمر أن الكابتن "فاروق" كان سعيد ومنتشي بنفسه وحاسس أنه فيلسوف زمانه وبيقول كلام حصري –وهو فعلا كده-، ده مش كده وبس لأ ده كمان كان مصر على أن ده هو اللي هيخلي الزمالك يصعد..
وبما أن الموضوع كده يبقى النادي الأهلي من المفترض طبقا للقواعد والبرتوكلات "الجعفرية" فريق ندل ومعندوش التزام وأقل ما يمكن أن يفعله "حسن حمدي" أن يلف كأس إفريقيا في كيس "نايلون" ويروح يديه لـ"صلاح الزحاف" رئيس نادي الصفاقسي مع كارت لطيف "أدركنا خطانا.. ونرغب في إصلاح الأمور"..
وبما أن الكابتن فاروق جعفر كان بيتكلم عن نادي الزمالك ببطولاته وصولاته وجولاته الإفريقية والعربية اللي من المفترض أنه هيلاعب أخر الدوري الجزائري.. وبما أنه كان في يوم من الأيام المدير الفني للزمالك.. فيتهيلئي كده الرؤية اتضحت..