كل هذا البيض!!
ما علينا ..احنا في الموضوع ده هنتكلم على البيض..لأ مش البيض في حد ذاته إنما البيض كمصطلح عبقري أعتقد أن جيلنا له فضل ابتكاره وتأديبه..
25/04/2006
محمد فتحي - ولاد البلد:
شم النسيم بقى...يعني البيض الملون والفسيخ والخلاف الفقهي بتاع هو عيد ولا يوم والمسلمين يحتفلوا بيه أساساً ولا حرام، وهو أصلاً عيد بتاع فراعنة، ولا بتاع يهود واللي ابتدعوه اليهود اللي أيام النبي عليه الصلاة والسلام فرحاً بوفاته لأنهم في هذا اليوم فقط – وكان يوم الاثنين- استطاعوا أخيراً أن يشموا نسيمهم..
ما علينا ..احنا في الموضوع ده هنتكلم على البيض..لأ مش البيض في حد ذاته إنما البيض كمصطلح عبقري أعتقد أن جيلنا له فضل ابتكاره وتأديبه..
البيض يا سادة نطلقها على الحاجة الرخمة التبتة الغلسة التي تحدث لنا بدون ترتيب فنقول عليها بيض..أو " إيه البيض ده"
البيض يا سادة مصطلح نطلقه على الناس الخنيقة والسمجة واللزقة بمعنى أدق.. تقابل الواحد فيهم أو تشوفه أو حتى تتجاب سيرته قدامك فلا تملك سوى أن تقول عليه وأنت متجهم وعلى وجهك علامات القرف: "ده بني آدم بيض"
ولما تسمع مغني بيستظرف وفاكر نفسه صوته حلو أو تشوف ممثل غتيت فاكر نفسه بيعرف يمثل بجد تقول"ده أداؤه بيض"، وحتى في ماتشات الكورة الرخمة اللي اللعب فيها بيبقى أقل من مستويات الحواري واللي شبه ماتشات الأهلي الأخيرة تلاقي نفسك بتقول للي حواليك "حولولنا يا جدعان من على الماتش البيض ده"
المهم أن عبقرية المصطلح نفسه من وجهة نظري نابعة أولاً من تحويره المؤدب لأن الكلمة التي كان يستعملها جيل السبعينات كانت غير مؤدبة وفيها قدر كبير من السوقية والابتذال لكن الكلمة الجديدة (بيض) معبرة وفي الجون بصراحة..، وقد تستمد قوتها من أن معظم البيض بيمشش بسرعة أو ريحته وحشة أو بيسبب ريحة وحشة بعد أكله (والمجد للبيض والكرنب في مسألة الريحة دي) أو إنه بيسبب الفقس للكتكوت فلولا البيضة لكان الكتكوت مصاب بالإسهال لأنه وقتها سيولد في العراء..
عموماً فقس البيض للكتكوت هو أشبه بفقسه لهمومنا وزهقنا..، وفي شم النسيم دعونا نتذكر كل الناس البيض اللي مروا علينا في حياتنا وتعالوا نتشارك..
في السياسة
الرئيس مبارك:
مرة كتبت عنه أنه الرجل البيض.. المشكلة أني كنت بحب مبارك جداً لغاية قبل ما يظهر جمال على السطح وقبل ما الواحد يكتشف ان النظام في مصر عبارة عن كرتونة بيض كبيرة..
كمال الشاذلي:
رجل بيض من نوع خاص.. يجمع في بيضه بين البلدي والمزارع.. لا زلت أذكر يوم أحد الاستفتاءات في أواخر التسعينات يوم ذهب كدابي الزفة في مجلس الشعب إلى الرئيس مبارك في منزله وقد كتبوا عرائض الدم (رغم إنه معدوم عندهم) لكي يحكمنا مبارك فترة كمان..، ويومها راحوا يسلموا عليه ولما كان كمال الشاذلي حد يمد أيده عشان يسلم عليه كان ما يسلمش وكان يزقه عشان يمشي.. في بيض أكتر من كده.. حتى وهو وزير.. كان كمال الشاذلي هو بيض مجلس الشعب بلا منازع.. الحكومة عنده ما بتغلطش خالص...، ويا ويله اللي يختلف معاه.. كان بيخليه يفقس!
صفوت الشريف:
البيض متجسداً في رجل... أبرع وصف لرجل المخابرات السابق صفوت الشريف الذي ورد اسمه في قضية انحراف جهاز المخابرات العامة أيام صلاح نصر... وهو وزير للإعلام كرف ببيضه على كل البرامج فأصبح إعلامنا بيض بيض بيض..، ولم يكن ينقص نشرة الأخبار في عهده إلا أخبار كنيف سيادة الرئيس!
جمال مبارك:
ياااااااااااااااااااااااااااه ع البيض.. لا عنده كاريزما ولا خفة دم وتحس إنه تقيل كده زي مصطفى فهمي ويمكن ألعن ومخارج ألفاظه بالمناسبة بايظة.. بالذمة مش بيض؟. بالذمة ما حستش بقمة البيض لما خطب (لأسباب نعلمها جميعاً ولا تنتقص بالمناسبة من رجولتنا).. المشكلة إنه بكل أخلاق البيض بينفي أن تكون لديه النية أو الرغبة في إنه يمسك البلد بعد أبوه ..بيض.. أصحابه في لجنة السياسات تحس إنهم بيض..أدي بصة كده على محمد كمال واللا على احمد عز وقارن ما بينهم وبين البيضتين اللي عندك.. اللي عندك في التلاجة يعني وقل لي لقيت اختلاف ولا لأ
أحمد نظيف:
مالوش في السياسة ومسكوه البلد.. ماشي.. إنما يطلع راخر بحكومته بوزارته اللي كلها من رجال الأعمال.. بيض.. حاجة بيض بصراحة!
أحمد فتحي سرور:
يا سلااااااااااااااااااام....البيض أبو صفارين...شرس على المعارضين.. برداً وسلاماً على نواب الوطني..مجرد طلته تعطيك الإحساس بالبيض
مصطفى الفقي:
قولوا كل اللي انتو عايزينو..في الواقع هو كان عنده ميول بيضوية من قبل موضوع تزوير انتخاباته ده..انما تجلت بيضويته في كل أحاديثه التي رد بها على معارضيه..
في الفن
ما تعرفش ليه في التسعينات كان البيض هو المسيطر.. ظهر كده حبة مطربين بيض وجدوا التليفزيون مفتوحلهم والكوسة كانت ساعتها الله ينور إنما كل ما تفتكرهم أو تيجي سيرتهم تلاقي انهم بيض...خد عندك.. حلمي عبد الباقي وشهاب حسني وابراهيم عبد القادر و احمد جوهر والفلتة سامح يسري وحلاوتها ام حسن خالد علي والبيض المودرن شوية عامر منيب ولا ننسى علي حميدة بتاع لولاكي والأخ حسن عبد المجيد اللي كل انجازاته أغنية على إسم مصر بتاعة عمنا صلاح جاهين ومحمد أبو الشيخ بتاع كده كده يا تريللا
الآن تجد زعيم البيض مصطفى كامل وباقي الكرتونة بوسي سمير وأخواتها والواد جاد شويري اللي مشككنا فيه لأسباب بيولوجية بحتة..
طبعاً فيه بيض كلاسيكي لا ننساه وعلى رأس كرتونته هاني شاكر (واللي عايز يعترض ما عنديش مشاكل)..،والأستاذ (محمد ثروت) واللي مش هنسى يوم ما الريس كان بيفتتح مدينة الإنتاج الإعلامي أو بيطلق القمر الصناعي المصري..حاجة كده يعني..،ولما جه محمد ثروت يتكلم راح مبارك قايل " يوووووووووووه..هيقعد بأه يتكلم ويصدعنا" ومن حسن حظنا ومن سوء حظ محمد ثروت ان ميكروفون التليفزيون ساعتها كان مفتوح ليتضح للجميع ان حتى الريس بيعتبر محمد ثروت بيض...آه ..قبل ما انسى..كان فيه مطرب أطفال مطلع عيننا واحنا صغيرين اسمه طلعت عطية ..هو كمان بالنسبة لي بيض
في التمثيل بأه هسيبكم انتم تقولوا لأني حاسس ان اختياراتي مش هتعجبكم..لكن اقولكم كام إسم...عندك مثلاً طارق لطفي.. بيض.محمد رجب ..بيض.نجوى ابراهيم . بيض(حد هيقوللي وهي نجوى ابراهيم بتمثل هاقوله يعني هي كانت مذيعة؟).. منة شلبي..أحياناً بتدي على بيض...أحمد براده..بيض طبعاً..خالد ابو النجا.. مشروع بيض ناجح...أشرف مصيلحي.. شرحه.البيض اللي بجد بأه الواد محمد الخلعي بتاع فيلم ويجا.. إيه ده..تحس كده انه ورث البيض كله لوحده.. حاجة بيض!
في الصحافة
الواحد نفسه موعت يا جماعة من كتر البيض اللي اتذكر في الموضوع ده وحاسس اني عايز ارجع.. فلو الموضوع خلص فجأة تعرفوا اني رجعت فعلاً.. في الصحافة بأه الواحد كان فاكر ان سمير رجب و ابراهيم نافع وابراهيم سعده هم آخر بيض الصحافة المصرية لكن فيه بيض بلدي ورور كده باينه هياخد السوكسيه كله...يعني مين يعترض على ممتاز القط أو أسامة سرايا...أو كرم جبر كلهم بيض...لكن بكل أريحية اسمحوا لي أن أعطي وسام البيض لعميد البيض الصحفي وبيض لجنة السياسات في الصحافة المصرية الأستاذ عبد الله كمال..و.. لامؤاخذة يا جماعة عند عبدالله كمال ما بقدرش استحمل..وأوووووعععع.
عدد التعليقات : 18
• آه
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
موضوع عاجبني جدا جدا جدا .. والحق فعلا ان عبد الله كمال على مستوى التعامل الشخصي فعلا يقلب البطن .. في بداية الموضوع حسيت بشوية ملل بس فى الاخر المعالجة جت حلوة .. اتمنى اقرالك تاني
الله ينور يا عم فتحى يا عسل و الله خليت للبيض طعم تانى خالص ... و فعلا أنتا جمعت كل البيض اللى أنا بعتبره أنه أبيض بيض فى البيض ..... و يا ريت كانت كلمة بيض دى كلمة جميلة و إلا كنت قلت إن موضوعك زى البيض ... تعيش و تفقسلنا مواضيع عسل زى دى
حرام عليك يا عم قرفتني
بس بجد عندك حق في كل شخص جبت سيرته لدرجة اني حاولت افتكر واحد انت م جايب سيرته ملقيتش
اه لا نسيت يا راجل حد ينسى حبيبة الكل المزيعة اللامعة (نيرفانا)
بس انا بختلف معاك شوية في اهل الفن والمغنى
حرام عليك يا عم قرفتني
بس بجد عندك حق في كل شخص جبت سيرته لدرجة اني حاولت افتكر واحد انت مش جايب سيرته ملقيتش
اه لا نسيت يا راجل حد ينسى حبيبة الكل المذيعة اللامعة (نيرفانا)
بس انا بختلف معاك شوية في اهل الفن والمغنى
بس انت نسيت بيضة الجماهير (نادية الجندي) و البيضة اللي مش هتقدر بسببها تغمض عينيك - غالبا عشان هتخاف تنام لتطلعلك في كابوس و تسرعك- السيدة الفاضلة (هالة سرحان)
أحنا كلنا بنتغاظ من اللي بيهتفوا للحكومة عمال على بطال وبينوعوا في أساليب النفاق
لكن مش في المقابل نشتم ونهاجم ديما وننوع في أساليب الهجوم والشتيمة
خاصة إننا كلنا عارفين أن كلامنا ده مش بيأثر
اشغل نفسك أنك تكون الراجل اللي بتتمنى تشوفه دلوقتي في شخص المسئولين
لأنهم ماشيين شاء من شاء وأبى من أبى وجيلنا يوم من الأيام إن شاء الله هيبقى عنده 40 50 ولا حتى70 سنة وهيبقى مسئول عن البلد دي
ياللبيييييييييييييييييييض
إنتا راجل بتفهم
This is unbelievable..Extremely funny and in the same time true :)
fe3lan enta ashba3t el taka el bedaweya el 3and nas keteer we 2edert te7ot 20s0s 3elm el bedan el gedeed ,enta 3abqary we ana 207ayeek 3ala mawhebtak fe el ta3beer 3an bedan el sha3b , we ne2ablakk fe el bedan el gay.
boltya2002@yahoo.com
ياسلام عليك رجعتنا لمصطلحات جيلنا اللى لها معنى وخصوصاً البيض والله كل حياتنا بقت بيض × بيض ، يارجاله البيض كتر قوي الأيام دي وبقى مرطرط مع إن الحكومة ماخلتش ولا فرخة تحط البيضة..
موضوع جميل
بيضة الظهور الاعلامى:
1-عبد الله كمال
2-كرم جبر
3-جهاد عوده
4-تامر أمين
5-مش عارف ايه الليثى بس هو راجل بيتكلم فى السيننما
6-صفوت الشريف
7-نيرفانا
البرامج التلفزيونية:
1-البيض بيضك (البيت بيتك)
2-جميع زيارات واحاديث وجولات الرئيس
3-حديث المدينة
4-حالة خوار(حوار)
5-اعلانات وزارة الصحة بتاعة تحديد النسل
6-البرامج التعليمية
7-نشرة أخبار التليفزيون المصرى
هذا ونظرا للاقبال الهائل على الترشيح تم قفل الباب واقتصرت التصفيات على 7 مرشحين فى كل فئة
ابتدي الطبخ بالبيض ومكوناته وامانشوف حتدي علي ابيض ولاه اسوود
"حسسسسني اوعي تحوشني" بمناسبه عيد ميلاده سعاته اللي تجاوز عمره اكتر من اقدم فرعوني عرفه التاريخ حجبلك بيض ملون امال يا ملون انت " احمر " اللي هو مفروض علم مصر من فوق لونته بحرق دم شعب وام لضناها في عباره او قطر صعيد او قصر ثقافه , ابيض مفيش الاحمر بهت علي الابيض , الاسود لك الابداع يا ريس لوووووونك المفضل" حتي لوني اسود لون نيلك يا مصر " شرحه مع االاحمر باضافه كل الناس اللي حصله حاجه وكانت نتيجتها حزن وكابه فحتلبس اسود بس مش اكتر, شوفت انت بقي البيض زعل وطلع ريحتك اللي هي H2Sاللي هي ريحه البيض المعفن
اتفضل ياريسسس" بالهنا والقفا " ..
نيرفانا"" روح قلبي من جوا شكلها عايزه هااتوووووووووه اقصد جاتوووووووه اتفضلي يا ست نريفي" يعني عصبي " وبالهنا والقفا ومنتظرين نشوفك بتقدمي برنامج ترفيهي جامد كدا في الغالب عن الطبخ واوعدك اني اول واحده حتتصل وتقفل السكه , وحبعت لك" البيض "كمان امال بس غالي اوي اشمعني انتي تخدي كام ملطوش علي كلام ملطوش وهو حد لاقي بيض دلوقتي يلا خير فيكي مش اكتر ,
" مبيد فوررررري " تسمحلي اغتت علي سعادتك واحرجك وازنقك وادخللك الحمام أقصد المطبخ بتاعي المتواضع في العباره الجامده دي , بس انا قبل ما اخش يا انسه لابد لابد لابد اعمل برنامج جديد وتتفضل السيده
نورفونه " بتقديمه معاياه وسوف يتكلم عن مشكله شم النسيم وعلاقاتها بالانفلونزا الطيور والطيور علي اشكالها تقع تقع من العشه علي الارض وارض الله واسعه في الغرب والشرق وتتخلص مشكله الشمال
اقرأ بقية التعليق ..
كمال الشاذلي دا مش بس بيض دا كرتونة بيض فيها سته وتلاتين بيضه وكل بيضه فيها بيضتين من جوا ..وكل بيضه من البيضتين الموجودين في البيضه اللي موجوده في كرتونة السته وتلاتين بيضه فيها بياض من غير صفار يعني مليانه بياض .. واحده مهم مسلوقه والتانيه مقليه..المسلوقه فيها كتكوت ميت من سنه والمقليه ممششه...بالذمه في ابيض من كدا؟
لا يا سادة أعتقد فيه خطأ في تعريف البيض..
البيض هو تشبيه الشخص بكون يشبه جزء من الجهاز التناسلي الذكري..
وهو الجزء الذي لا يشارك بشكل مباشر في العملية الجنسية فلا تتحقق له -من وجهة نظر عملية- أي متعة أو فائدة مباشرة.. لكنه يبقي يحتوي على الحيوانات المنوية طول الوقت..
فيقال في المثل المعروف.. انه لا "يشارك في العملية الجنسية" ولا يخلو من النجاسة.
هكذا هو البيض.. لا بيـ... ولا بيخلو من النجاسة.
فى ناس كتير بيض فعلا وكان عندك حق انك توصفهم بانهم بيض لكن برضوا فى ناس متستهالش الكلام ده مالكش حق فعلا لكن برضوا ارجع واقول ان كل واحد ليه رايه الخاص بيه وشكرا يا سيدى على المقال