سيد القصر

ما هو طبعا مرتاح، مين يعيش في القصر ده وميرتاحش، وبعدين ميرتاحش ليه يعني؟؟ أديني سبب واحد بس ممكن يعكنن مزاجه !!.

03/05/2006

مي كامل - ولاد البلد:

"طول عمري مؤمنة إن الجوهر أهم من المظهر.. أصل مظهر إيه اللي أنت جاي تقول عليه؟!.. أنا لا يهمني قصور ولا الكلام ده خالص.."

كانت هذه الجملة هي آخر كلام قلته قبل أن أبدأ مشاهدة القصور بجد.. آخر قصر زرته كان قصر المنيل.. كان فخم جدا ولا تملك عندما تراه إلا الشعور بالدهشة أثناء الزيارة.

ولكن قصر هذه المرة مختلف عن كل القصور، قصر، مش أي حد يشوفه ولا أي حد يفوت بس من جنب السور بتاعه، رغم أنه يطل على شريط المترو حيث يتسع لأكثر من ثلاث محطات مترو، يعني المترو يبقى فيه كم الناس دي كلها ومفعوسين ويموتوا، وسيادته في قصره قاعد في تكيف أو في "الفراندا" ولا على باله.

ولذلك لم أتعجب عندما شاهدت وسمعت تصريحات سيادته في حوار له مع العربية:

- المذيعة : سيدي الرئيس هل أنت مرتاح وراضي عن الشارع المصري؟

- الرئيس في ثقة : طبعا أنا مرتاح .

ثم شبك يديه كعادته وأسند ظهره إلى الكرسي.

ما هو طبعا مرتاح، مين يعيش في القصر ده وميرتاحش، وبعدين ميرتاحش ليه يعني؟؟ أديني سبب واحد بس ممكن يعكنن مزاجه !!.

ده الطبيعي أنه يكون مرتاح في الأيام العادية أما في يوم مفترج زي يوم ميلاده كلنا نتكاتف ونتعاون عشان نمنع أي حاجة صغيرة ممكن تعكنن على مزاج سيادته، يعني تبقى الشرطة والشعب والوطن والقصر والمترو في خدمة الريس.

السؤال الذي يفرض نفسه، يا ترى الريس بيحتفل بعيد ميلاده في أي حجرة من دول؟؟ ويا ترى لما بيزين الاوضة بيزود عليها إيه اكتر من اللى فيها "طبعا ده مش حسد ده "نق بس" وتعالوا اتفرجوا ع القصر لأننا في الغالب ولا هنروح الحفلة ولا هنسمع عنها ولا هنتفرج عليها!!

* شاهد جاليري القصر