عيد الميلاد.. كلاكيت 78 مرة

ولكن الموضوع فيه أقاويل يعني فيه مجموعة من الناس شايفين أنه بما إن الزعيم كان أصله مواطن عادي ولم يصل إلى منصبه بواسطة!! أو توصية – الله يكون في عونه -

يوم ميلاد أي إنسان هو بالطبع مختلف عن أي يوم أخر في حياته، فما بالك لما يكون عيد ميلاد الزعيم الكبير بتاعنا كلنا، طبعا وحتما ولابد ولاازم يكون مختلف عن عيد ميلاد أي واحد من عامة الشعب.

ولكن الموضوع فيه أقاويل يعني فيه مجموعة من الناس شايفين أنه بما إن الزعيم كان أصله مواطن عادي ولم يصل إلى منصبه بواسطة!! أو توصية – الله يكون في عونه - فإنه سيقضي يوم عيد ميلاده مثل أي مواطن يقضي عيد ميلاده!

وطبعا هذه الشرذمة القليلة (حلوة الشرذمة دي) يجب أن نرد عليها بحزم وقوة، مواطن عادي إيه، وعيد ميلاد طبيعي إزاي يعني يا أخ أنت وهو.. ده الزعيم ولازم طبعا عيد ميلاده يكون مختلف، وحتى نخرج من الاختلافات الطفيفة دي تعالوا نتخيل يوم عيد ميلاد الزعيم...!

المشهد الأول

الزعيم في مقر إقامته ليلة عيد ميلاده الساعة 11,30 قبل منتصف الليل يصرخ في صف الخدامين على الصفين "فين الموبايل بتاعي" يهرع الخادم الأكبر لإحضار الموبايل المعتبر على صينية ذهبية، فيشخط فيه الحاكم يلا امشي جتك الارف مليتوا البلد.

يأخذ الزعيم الموبايل ويبحث عن غرفة فاضيه في القصر المحندق (يا دوب 200-300 فدان) اللي هو عايش فيه يعرف يأخذ فيها راحته ويفكر بصوت عالي يا تري مين أول واحد هيبعتلي رسالة بمناسبة عيد ميلادي؟

ينتظر الزعيم صوت الرسالة أو سماع رنة موبايله وهي أغنية فنان الشعب شعبان عبد الرحيم "مابخافش وأنت عارف أنا ممكن اعمل إيه"، طبعا عنده حق، هيخاف من مين ما هو الزعيم، المهم الساعة لفت إلى أن وصلت 11.59 ومفيش ولا رنة ولا أغنية ليلتكم سودة وأيامكم أسود من قرن الخروب بإذن الله صبركم عليه!

وفجأة وقبل ما يكمل الزعيم جملته السابقة وبالتحديد بين حرف الكاف في صبركم والعين في عليه، ومع وصول عقارب الساعة إلى الساعة الثانية عشر بالتمام والكمال تبدأ الأغنية في الانطلاق ويلعلع صوت شعبولا ويطنش الريس إلى أن يصل المطرب الشعبي إلى ايييييييييييييييييييييه وتنتهي الأغنية ويكون لسان حال الريس" سيبهم يجربوا تاني لازم يحسوا بأهمية الوصول والاتصال".

وتنهال الرسائل كالمطر، على الموبايل منها على سبيل المثال لا الحصر"100 مسا و100 فل نقول كل سنة وأنت طيب يا سيد الكل قبل الكل" الزعيم مكشر وزعلان عشان الرسائل مافيهاش جديد وكلها زى بتاعت السنة اللي فاتت، فجأة تتغير نغمة الرسائل ويظهر رقم من خارج البلاد اقترن في ذهن الزعيم بست وحشة اعتادت على الضغط علي الزعيم وأعصابه وكل شوية تقرفه بكلام إصلاح وديمقراطية!

يتردد الزعيم وفي النهاية يفتح الرسالة ""we wish u get what u wish' ومصحوبة بالترجمة العربية "نتمنى أن تحصل على ما تتمني" فينطق وجهه بالفرح وفي نفس اللحظة ينطلق شعبولا من جديد ولكن هذه المرة يرد الزعيم من أول "مابخافش" لأنه مسجل الرقم وعارف إنه حبيبه ووزير أمنه ويقول له يا حبيبي الإشارة الخضراء وصلت اعتقل المعارضة والإخوان وارمي القضاة وراء القضبان واسحلهم كمان، يرن الموبايل مرة أخري فتسمع صوت زوجة الزعيم المصونة من الغرفة المجاورة تقول أقفل الزفت ده مش عارفة أنام.

المشهد الثاني

صباح عيد ميلاد الزعيم في مقر العمل، الزعيم نايم علي المكتب مش قادر يفتح عينيه عنده حق سهران طول الليل، يدخل عليه ساعي المكتب يخبره بإن في ناس كثير بره عايزة تقابله عشان تهنيه بعيد ميلاده، ويرد الزعيم وهو بين الحلم واليقظة" قول لهم نايم يا ابني والله معرفتش أنام طوال الليل من الرسائل، خليهم يعدوا بعد 12"

ويجلس الزعيم يفكر بين اليقظة والحلم "حد برضه يشتغل يوم عيد ميلاده" ويتساءل كيف لم يقرر علي مدار الربع قرن أن يقنع الشعب بأن يكون يوم عيد ميلاده يوم أجازة رسمية في البلاد!

بعد طول تفكير تلمع عين الزعيم ويتوصل إلى فكرة جهنمية تتيح له أن يقضي أعياد ميلاده القادمة في البيت، ويصيح بسرعة مثل فيثاغورس مرددا وجدتها وجدتها، لازم نختار اليوم ده ونعمل له أي عيد، نخليه عيد الجلوس على العرش بس ده مكنش يوميها، خلاص نأخر عيد العمال 3 أيام مش ها تفرق يعني خلاص هو ده عيد العمال، ويبقى يوميها أجازة ويبقى أجازة رسمي في البلد كلها واهي فرصة برضه تبقى الخطبة خطبتين أصل موضوع الخطبة ده حلو وزى الفل.

المشهد الثالث

يوم عيد ميلاد الزعيم مساءا في مقر إقامته بالقصر الجمهوري، تورتة كبيرة جدا عشان تشيل 78 شمعة بعدد سنوات عمر الزعيم يدخل الزعيم غرفة السفرة حيث الجاتوه والتورته والفاكهة والبوفيه المفتوح والطباخين ع الصفين والمدعوين من كبار رجالات الدولة والوزراء والمحافظين وجهاز الطرد المركزي.

ومع دخول الزعيم محمولا على الأعناق ينطلقوا جميعا في التصفيق، يقترب من أذن ابنه الكبير البعيد عن الأضواء ويقوله "هي خوخة مبعتتليش رسالة أمبارح ليه مكانش معاها رصيد ولا إيه"، يضطرب الابن ويقوله يمكن كان موبايلها فاصل شحن وهنا وتنقذه أغنية "يلا حالا بالا بالا غنوا لأبو الفصاد ..هيكون عيد ميلاده الليلة أجمل الأعياد" التي بدأت في نفس اللحظة ويردد كل الموجودين كلمات الأغنية بانشراح وفرح!

وينتهي الاحتفال التصفيق والبالونات وتبدأ حفلة الهدايا وكل سنة وأنت طيب يا.. ريس!

عدد التعليقات : 53

• دعاء الإمام الأصغر في العيد

• التخصص يكسب.. في المدبح

• شوية بلالين علي حبة زينة

• العيد.. رقص ورهينة في محطة مصر!

الجبرتي إبراهيم

إعلان عن مدرس خصوصي في مادة التاريخ