انتقل إلى المحتوى
أرشيف عشريناتفبراير ٢٠٠٤ – مارس ٢٠١٠

تهييس.. قصة قصيرة جدا!

ولاد البلدقراءة في ٥ د

وكان أهل القريه يذهبون فى كل صباح ليجلسوا تحت إحدى شرفات المنزل ـ الشرفه الخلفيه تحديداً ـ من الفجر وحتى طلوع الشمس لينتظروا .. ماذا ينتظرون؟ .. من ينتظرون؟ .. لماذا ينتظرون؟ .. لا أحد يعرف ..

06/05/2006

إيهاب علي -ولاد البلد:

منذ زمن بعيد بعيد.. وفى مكان بعيد.. كان هناك قريه صغيره نائيه يسكنها اناس طيبون؛ تعرف بقريه السعادة، وكانت تلك القريه مشهوره بسعاده أهلها الدائمه؛ فقد كان أهلها دائمى الإبتسام وكان من عاداتهم الغريبه أن يذهبوا فى صباح كل يوم إلى منزل قديم ومهجور يقع فى أطراف القرية؛ تحيط به حديقة كبيرة وقد كان المنزل رغم قدمه تبدو عليه سمات الجمال والعراقه؛ كان له كياناً مهيباً محبباً؛ إذا جاز التعبير!

وكان أهل القريه يذهبون فى كل صباح ليجلسوا تحت إحدى شرفات المنزل ـ الشرفه الخلفيه تحديداً ـ من الفجر وحتى طلوع الشمس لينتظروا .. ماذا ينتظرون؟ .. من ينتظرون؟ .. لماذا ينتظرون؟ .. لا أحد يعرف ..

ولكنهم كانوا فى كل مره يعودوا سعداء ، ويذهبون إلى أعمالهم فى سعادة ونشاط ملحوظين؛ ولم يكن أحد يعلم سر هذا المنزل أو سر تلك السعادة..

وفى بلاد بعيده.. كان هناك ملك عجوز ، وقد كان لهذا الملك إبناً وحيداً؛ وكان سيتولى حكم البلاد عما قريب.. ولكنه مات فى إحدى رحلات الصيد التى كان كثيراً ما يقوم بها..

حزن الملك على ابنه حزناً شديداً إلى ان مرض من شده الحزن؛ فأوصاه أحد الحكماء بالذهاب إلى قريه السعاده لعله يجد هناك ما ينسيه أحزانه و يخفف عنه ألآمه

وسافر الملك العجوز - مش مشكله سافر بإيه رغم إن البلاد بعيده وهو صحته على أده.. أهو سافر وخلاص - إلى قريه السعاده بنائاً على طلب الحكماء..

فى البدايه اندهش الملك بشده لسعادة أهل القريه الدائمه وعلم بحكايه المنزل المهجور الذى يذهبون إليه كل يوم فقرر الذهاب ليعرف سبب سعادتهم..

كان الملك قد قرر أن يراقب أهل القريه من بعيد وهم ذاهبون إلى المنزل المهجور كى لا يثير ريبتهم ولكى يراهم على طبيعتهم و يعرف سر سعادتهم..

كان اليوم التالى شديد البروده وقد أغرقت الأمطار القريه وإمتلأ الجو بالضباب

والغيوم، فقرر الملك العجوز أن يؤجل مهمته لليوم التالى لعل الجو يتحسن - قلت لكم الراجل صاحب عيا وسنّه ما يسمحش بالبهدله -

وفي اليوم التالى كان الجو قد تحسن - يا راجل - وقلت حده الأمطار وإنقشع الضباب -~ شوفت إنقشع دى؟ - فقرر الملك الخروج فى الفجر والذهاب للبيت المهجور

لاحظ الملك عند اقترابه من البيت إزدياد الضباب شيئاً فشيئاً، فأعتقد فى بادئ الأمر أنه واهم ولكنه كان كلما اقترب يزداد الضباب بالفعل، إلى أن وصل إلى البيت وعرف سبب هذا الضباب

لقد كان أهل القريه جميعاً جالسين يدخنون فى سعاده بالغه وقد كان الضباب ما هو إلا سحب الدخان المتصاعده منهم..

ورأى الملك العجوز مجموعه من الشيوخ يجلسون فى حلقه يدخنون فى سعاده فقرر الجلوس معهم لمعرفه سر سعاده أهل القرية..

سأل الملك أحد الشيوخ عن سر سعادتهم الدائمه وسر ذهابهم لهذا المكان كل يوم .. فرد عليه الشيخ قائلاً : " مساء الخييييير " وأعطاه سيجارة؛ وقال له سأحكى لك القصه كاملةً..

قال الشيخ :

"منذ زمن بعيد كان هذا البيت ملكاً لأحد الأغنياء وقد كان صاحبه رجلاً شديد الثراء والنفوذ، وكان لهذا الرجل إبنه وحيده بارعه الجمال، وكان والدها يحبها بشده فكان لا يتركها تخرج كثيراً من البيت خوفاً عليها، كان يتركها فقط تذهب فى نزهات قصيره حول المنزل، وفى أحد المرات رأت الأبنه شاباً وسيماً يافعاً ولم تكن الأبنه ترى كثيراً من الناس بسبب قله خروجها من البيت، فتعلقت الأبنه بهذا الشاب وأحبته حباً شديداً وبادلها الشاب نفس الحب..

وقد كان هذا الشاب من أسره فقيره ومتواضعه - طبعاً، شئ طبيعى ومتوقع - وعندما علم الرجل الثرى بحب إبنته لهذا الفتى غضب و ثار ثورة عارمه - ده العادى - وأعلن عن رفضه لعلاقتها بهذا الشاب رفضاً تاماً - عادى برضه - وقرر منع إبنته من رؤيه هذا الشاب أو الخروج من البيت - بتحصل كتير !!

فامتنعت الأبنه عن الطعام كى ترغم والدها على الموافقه على الزواج ممن تحب - حركات بنات - ولكن والدها كان قاسى القلب ورفض الخضوع لرغبه إبنته - لأ راجل ياض!

وفى تلك الأثناء كان الفتى يذهب كل يوم ـ عند الفجر ـ ليجلس تحت شرفه حبيبته لعله يراها مصادفهً أو يسمع صوتها ؛ ولكن بلا فائده!! إلى أن ماتت الفتاه نتيجه لإمتناعها عن الطعام - أيه ده ؟! - ثم تبعها والدها حزناً عليها - ألللللله - لكن الفتى لم يصدق موت حبيبته ودأب على الذهاب إلى بيتها كعادته ليجلس تحت الشرفه لعله يراها !!

وفى إحدى المرات ـ فى إحدى الليالى البارده تحديداً ـ قام الفتى فى أثناء إنتظاره بإشعال النيران فى بعض الحشائش الجافه الموجوده فى الحديقه كى تمنحه بعض الدفء، ولكن بعد فتره أحس الفتى بسعاده بالغه ونسى السبب الذى جاء من أجله - أتارى الراجل الغنى كان تاجر مخدرات ـ طبعاً ، امّال هيجيب الفلوس دى كلها منين ـ وكان زارع الأرض بانجو - ومن يومها اعتاد الفتى الذهاب للمنزل المهجور لا ليرى حبيبته - خلاص بقى الله يرحمها - ولكن ليشعل فى الحشائش ويعود سعيداً!!

وعندما لاحظ أهل القريه تبدل حال الفتى من حزن شديد على حبيبته إلى سعاده غامره، قرروا سؤاله عما ألمّ به ، فحكى لهم الفتى قصته ، ومنذ ذلك الحين أصبح اهل القريه يذهبون إلى المنزل المهجور من الفجر وحتى طلوع الشمس - يعملوا إصطباحه - ويعودوا فى غايه السعادة!

انتهى الشيخ من سرد قصته على الملك العجوز لاحظ أن الملك لا يبدى أى رد فعل؛ وقام بتحريكه، فإكتشف أنه قد مات - مش قلت إنه راجل صاحب عيا وصحته على أدّه، طبعاً مستحملش الهباب ده و راح فيها - الله يرحمه!

عدد التعليقات : 21

• كباريكي.. يا مصر!

• النظام الحاكم بين البلادة السياسية وسياسة الإزدراء

• اللمبي يواجه رونالدو

• على جدران (الأتوبيس)!

الأقسام

تعليقات القرّاء

تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.

  1. فادي كُتب في
    قرف
    اية القرف ده
  2. sara كُتب في
    يا استاذ فادى
    يا استاذ فادى انا طبعا بحترم رايك بس انا شايفة انى القصة حلوة وحسيت انها بتتكلم علينا واننا احنا اهل قرية الساعدة لانهم بيتهربوا من مشاكلهم عن طريق البانجو والحشيش والمخدرات دة راى فى القصة وانا شايفاها حلوة بعدين حضرتك لو إنسان متحضرالمفروض تعبر عن رأيك بأسلوب متحضر شوية يعنى مثلا كنت تقول انى هى مش عجباك واى حد هيحترم رأيك لكن مش القصة مقرفة
  3. ياء كُتب في
    جامده
    بجد جامده والله ضحكتنى جدا
  4. موللي كُتب في
    سؤال
    الموضوع جميل ولكن السؤال هو هل الكانب هو محمد فاروق رئيس يحرير اضحك للدنيا الله يرحمها
  5. واحدة وخلاص. كُتب في
    مش وحشة
    عاجبني الأسلوب جدا بس عندي سؤال
    هو ايه دخل الملك في الموضوع؟
    معلش اصل فهمي على قدي
  6. محمد بتاع الصاعقة كُتب في
    بجد ضحكت !
    دمك خفيف يامضروب!!
    فعلا قصتك ادرت ترسم ضحكة تلقائية خرجت مني.
  7. طارق حسن كُتب في
    ادينى
    ممكن لو سمحت يا صاحب القصه تعرفنى فين القريه دى وتابعه محافظه ايه
  8. محمد ابراهيم ممتاز كُتب في
    مسسسسسا الخيييييييير
    احلا اصطباحة لكل المصرين والمعنى واضح الشعب الذيذ هيفضل وكل الحكام الزبالة هيروحو ومش هيفهمو احنا بندحك ازاى مع كل البيعملوة فينا
  9. تاخد نفس كُتب في
    تاخد نفس
    تسلم يا باشا على القصه الجميله ..
    صبح صبح يا عم الحاج
    تاخد نفس
  10. منسي زيّهم كُتب في
    حلوة يا إيهاب
    يا جماعة الموضوع باين م العنوان .. تهييييس !!!
    بس انا متهيأ لي ان القصة دي لها بقية يا عم إيهاب ... ياريت تقعد كده مع نفسك وتحاول (تقدح زناد فكرك) وتجيب لنا التكملة لأني عجبتني جدا تعليقاتك الجانبية اللي بالعامية ... وما تنساش تملاها اسقاطات سياسية وتحبيشات والذي منه ... مش ح اوصيك .. أه ؟؟
  11. واحدة وخلاص كُتب في
    عبقري والله
    ممتاز يا محمد يا ابراهيم يا ممتاز..عبقري والله
    حللتها وفسرتها....الله يفتح عليك
    مش قولتلكم الشعب المصري ده عبقري .. بس خلي بالك من (الشعرة) اللي بين العبقرية والجنون.
    ....وخلي الدماغ صاحي.....سلام...
  12. حمادة كُتب في
    قلة قيمه
    دى قلة قيمة بقى بعد كل الحكى والسرد دة طلع الموضوع قلة قيمة وكلام فاضى
  13. أحمد رحال كُتب في
    جميل جمال ملكش مثال .. هيهيهي
    يا عيني عالقصة جابت من الآخر و جامدة آخر حاجة .. ماللّي مافهمهش الاسقاطات اللّي فيها بكرة يكبر و يعرف .. هعهع
  14. مزارعه مصريه كُتب في
    زرعينه سوا
    ايه الخضار ده أقصد الجمال ده...
    القصه هايله والاسلوب عجبنى ،بس اللى مضيقنى إزاى الولدده يحرق البتاع ده من ورايا،هو مش عارف ان اناوالراجل الغنى الله يجحمه أقصد يرحمه زرعينه سواا
  15. ابو جعفر كُتب في
    يسلم فمك
    والله لنا من زمان وانا نفسي ااعد مع شباب مصريين ومتخفش يا عم ايهاب الكيف علين..ا
  16. ميدو كُتب في
    ممكن نتعرف
    مساء الخييييييررر.اصلي قاعد تحت الشرفه اياها ما تيجوا تقعدوا شويه معايا
  17. انا كُتب في
    مش عارف
    نعم؟؟؟؟؟؟؟؟؟؟
  18. mido farouk كُتب في
    قصة هادفة
    اناشخصيا شايف ان القصة هادفة جدا , هو ده فعلا حال الكتير من شباب اليومين دول كله بقى بيدور على الكيف والمخدرات فهى بتحكى واقع فعلا وارجو ان الشباب يفوق من الوضع اللى هو فيه
  19. noha كُتب في
    رأيك حلو أوى يا ميدو
    بصراحة ميدو فاروق رأيه حلو أوى فهى فعلا قصة هادفة , أنا معجبة برأيه اوى وشكرا لكاتب الراوية وانت بجد يا ميدو يا فاروق شاب كويس جدا
  20. مشمش العصفور كُتب في
    شغل عيال
    انا بس مش فاهم لية كل الإعتراض دة على ناس عايشة في سلام وهدوء و دماغ عالية انا شايف اننا لازم نتعلم منهم ازاي نعيش في سعادة و سلام و خيييييير ...
  21. حوده كُتب في
    والله دماغك متكلفة
    و الله دماغك عالية الله ينور عليك القصة سياسية بحتة واللى مايشوفش من الغربال يبقى.....
  22. تامر كُتب في
    ما بين السطور
    بعيدا عن خفة دم القصة وانها قدرت تضحكني جامد جدا لكن انا شايف فعلا انا القصة وراها فكرة عالية جداوقيمتها كبيرةومليلنة اسقاطات على حالنا وواقعنا اللى بنعيشه( بانجو ، قصص حب فاشلة، توريث حكم وخلافه .....
    تحية كبيرة لمؤلف القصة
العودة إلى الأعلى