السبوبة لا تزال في جيبي!
اذا كنت من كلية ألسن أو آداب لغة إنجليزية أو حاصل على كورسات جيدة في اللغة الانجليزية فتستطيع التقدم لمكاتب الترجمة.. وترجم بالقطعة.. وتأكد أنك ستحصل على مبلغ جيد.
09/05/2006
لما ربنا يسبب الأسباب يبقى أحنا مندخلش السبابيب في بعضها.. خليك فاكر تلك المقولة لأنها حكمة بحق إذا ما فهمتها..
السبوبة هي العمل المتقطع غير الدائم وجمع سبوبة في معجم الألفاظ العامية اللي بيني وبينك "سبابيب".. وللعلم السبوبة تحقق دخل أعلى من الوظيفة الدائمة – بشرط أن تطبق المقولة السابقة..
في مصر عدة طرق للحصول على السبابيب المختلفة وإليك بعضها:
إذا كنت شاب فتستطيع أن تقدم في المعارض التي يقام أغلبها بأرض المعارض بمدينة نصر ستحصل في نهاية اليوم على 15 جنيه دون السؤال عما إذا ما كنت تخرجت أم لا.. الفكرة كلها كيف تدر عليهم الربح!
اذا كنت من كلية ألسن أو آداب لغة إنجليزية أو حاصل على كورسات جيدة في اللغة الانجليزية فتستطيع التقدم لمكاتب الترجمة.. وترجم بالقطعة.. وتأكد أنك ستحصل على مبلغ جيد.
إذا كان ليك في اللغة برضه وذكي اجتماعيا – أو غبي وبتعمل تحسين- وفي كلية آثار أو إرشاد سياحي.. تواجد في منطقة سياحية مثل الأهرام أو أمام المتحف المصري والزق للسياح هناك وقدم لهم جولة سياحية بعمولة ممتازة.
مع نفس السياح سابقي الذكر خدهم لبازار معين تكون متفق فيه مع صاحب البازار وخد عمولتك منه لأنك جبتله مشترين وطبعا هيفهم السياح إنك عاملهم خصومات.
إذا كنتي فتاة وتجيدي استخدام الخرز أو لا تجيدي مش فارقة.. فاحضري سلك سنارة البكرة بجنية ونص وهاتي الخرز.. وأدخلي الخرز بشكل متناسق وألوان متناسقة داخل سلك السنارة وبيعي العقد بجنيه لأصدقائك.. ستحققي ربح.
إذا كنت فتاة كذلك فانضمي لجمعية خيرية مثل رسالة في قسم الورشة الفنية وستتعلم كيفية عمل الدبابيس ذات الأشكال وتستطيع أن تقوم ببيعها.
تستطيع أن تقدم في شركات التسويق ولن تكلفهم شيء فلك نسبة مما تبيع.. أي أنك إن بعت ستحصل على شيء وان لم تبع.. فبالسلامة.
السبوبة الكبيرة بقى شرط لازم تكون متخرج .. قدم أنك تكون في خدمة العملاء في موبينيل أو فودافون.. ومتقلقش من أنك ترتبط بوظيفة هما أصلا هيشغلوك سنة وخلاص على كدة إلا لو أثبتّ نفسك فيجددوا معاك العقد وأقل مرتب هتاخده في الشهر 1000 جنيه.. وادعيلي.
الجديد في عالم السبابيب بقى.. كورس صيانة موبايل اسأل عليه هتلاقي الموضوع ده منتشر تاخده فى أسبوعين بالضبط بـ 150 جنيه.. ثم أصبحت قادر على تصليح الموبايلات وقدامك حل من أتنين إما انك تصلح الموبايلات بتاعت صحابك وكل موبايل عليه عمولتك أو لو محوش قرشين افتحلك محل متر فى متر.. وبرضه تدعيلي.
وأنت رايح تاخد كورس في صيانة الموبايل هتلاقي جمبه كورس برضه صيانة كمبيوتر أغلى شوية.. خده برضه هينفعك.. وبرضه كمبيوترات صحابك تعدي عليك.. ومش شرط تدعيلي المرة دي.
لو عندك كمبيوتر وأهلك مركبينلك دي أس إل وعندك سي دي رايتر CD writer .. نزل الأفلام على السيديهات وبيعها لصحابك أو قدام المدارس والكليات والجامعات.. ومتطلبش فيها كتير.. اشتري السيديهات بالجملة هتقف عليك الواحدة بجنيه ده لما تكون اشتريت أغلى حاجة.. وبيعها ع الأقل باتنين جنيه هتكسب الضعف وساعتها أحسن لك تدعيلي بقى.
وأخيرا إذا كنت تكتب جيدا ونستطيع القول انك صحفي فتستطيع أن تأتي إلينا أو أن تذهب إلى أي جريدة لتعمل بالقطعة.
وأخيرا لا تنسى.. أهم حاجة السبابيب متدخلش في بعضها .. ربك بيسبب الأسباب وأكيد فيه سبب إن ربنا خلاك تقرا الموضوع ده !! ولو عندك سبابيب منعرفش عنها حاجة قولنا وأهو كله عشان السبابيب.
عدد التعليقات : 17
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
إنما الأمم السبابيب ما بقيت .. فإن هم ذهبت سبابيبهم ذهبوا!
ربنا يخليكو تجيبولى اى حاجه اتسبب بيها عشان انا طفح كيلى
بصوا
انا مخلصة كلية تربية و معايا لغتين انجليزى و فرنساوى او كان معايا لانى درست و خلصت وكل فترة ادرس حاجة معرفش اتسبب فيها اقوم اركنهاوافكر فى حاجة تانية
معايا كمبيوتر اوفيس كامل وصيانة وانترنت ودلوقت بدرس منحة جرافيك
عندكو حاجة اتسبب بيهاولا منها ؟
يا نهار أبيض معاكى ده كله و مش عارفة تتسببى !! ده إذا كان بلية اللى معاه يا دوب شهادة الميلاد و بيكسبله عشرة جنيه لو كان شغال فى ورشة و خمسة جنيه لو شغال منادى على ميكروباص ... هأقول إيه ربنا يعينك و يساعدنا
ولا يهمك لا تتسببي دلوقتي استني لغايه متوصلي وابقي تسببي
ويا سلام لو يبقى عندنا صحفيه منتقبه دي امنيه انا عايزها تتحق يا ريت تحققيلي الامنيه دي
صحفيه منتقبه
ارجو ان يقراء هذا الموضوع السيد الرئيس و السادة الوزراء و رجال الحزب الوطنى و لجنة السياسات . يعرفوا ماذا وصل الية حال الشباب و مدى الياس و الهوان الذى وصلوا الية . انى اتساءل هل هذة مصر الثورة . مصر الحضارة . مصر القوية بشعبها و شبابها . هل اصبح هذا هو الحاضر البائس الذى نعيشة .ليتنى مت قبل ان ارى هذا. و اللة على كل شئ قدير .
بالنسبة لباعتي انا بحب شغل الخرز و بحاول اتعلم حاجات جديدة و هحاول اسوق لمحلات لاني بعتمد على اصحابي حاليا او اني ابيع حاجة لحد و اخد نسبة و جنيه على جنيه تحوش
من واقع علمي بعلم السبابيب المصري فقد يكاد يكون اندثر هذا الفظ الى حد ما وبدانا نسمع عن كلامات مثل نفحة او مرمة او غيرها من الكلمات الدالة ع العمل الاضافي
بارك الله لنا في الزملاء الصحفيين الاشاوسة المغاوير في استراج كل ما هو جديد
احنا اما مؤسسات بتاعت حبيب الشعب الى كلنا عرفينه وانا على فكره كليتى تبع واحده من هذه المؤسسات الكبيره الى انا بكرها دى يا اما مؤسسه نظيفه لكن مش عاوزه حد يعارضها فى الكلام
عم حسني مزبط شعبه ما فيش بطالة ولا فقر ولا فساد, والشعب ميت فل وعشرة كمان
وبس شوية شله منحلة مواليه لاسرئيل همه الي عملين المظاهرات علي الفاضي ويجب القضاء عليهم
وعموما كام واحد اشتغل من 5و4 مليون فرصة عمل يا عم حسني يا مزبطنا
والله كداب من يومك يا عم حسني
اذا اردتمأأن تدبرو فدبرو ان لا تدبرو لأن للكون مدبر الا وهوا اللة
ربنا يجعللك فى كل خطوبة سبوبة وميحرمكيش من انك تكونى سبب سبابيب للغلابة اللى مش متسبببين ودمتم ويجعلة عامر هههههههههه
والله انا خايف امشى وراء كلامك بدل ما تبقى سبوبة اكل عيش تطلع سبوبة اكل ضرب والواحد خايف احسن تبقى سنانة بيضة اوى تعرفو لية علشان لو عمل زى ما بتقولى ممكن ياكل مش على سنانة لا هياكل على قفاة وربنا يستر