(أميرة) ترسم علي الكمامات
«مفيش حاجة بتخسّر.. كله بييجى من وراه فايدة».. هكذا يتعامل المصريون مع الأزمات، وهو ما ظهر بوضوح بعد انتشار أنفلونزا الخنازير فى مصر، حيث تفاعلت «أميرة بشادى» مع الحدث بسرعة لم تكن تتخيلها، واستغلت موهبتها ودراستها فى كلية الفنون الجميلة، وحولت الكمامات التى يرتديها المواطنون بهدف الوقاية، إلى أعمال فنية، سواء بتلوينها أو رسمها أو حتى كتابة بعض الجمل التى استوحتها من أغنية محمد منير «وأنا لسه قادر فى الحزن أفرح».
رسم الكمامات بالنسبة لـ«أميرة» مجرد عمل لا ينفصل عن مشروعها الأساسى والذى بدأته قبل عام بكتابة أشعار من رباعيات الخيام وصلاح جاهين فوق «التى شيرتات» وبيعها لأصدقائها، وهو المشروع الذى حقق عائدا دفعها إلى ترك عملها الأصلى كمهندسة ديكور والتفرغ لمشروعها.
ظهور أولى حالات الإصابة بأنفلونزا الخنازير فى منطقة الزمالك، شجع «أميرة» على البدء فى مشروعها لرسم الكمامات، حيث ارتبطت بشوارع الزمالك منذ صغرها وقضت فيها - حسب وصفها - أجمل سنين العمر.
وتروى أميرة: «كل ما أعدى على مبنى سكن طلبة الجامعة الأمريكية فى الزمالك بحس بانبهار، وده اللى خلانى أمسك الكمامات وأكتب عليها الجمل اللى بحبها.. وأفتكر إن أول جملة كتبتها كانت (لسه الكلام مخلصش) واستوحيتها من إحدى رباعيات صلاح جاهين (اتكلموا.. ما أحلى الكلام.. ما أعظمه.. ما ألزمه).
أميرة لم تخفِ سعادتها بإقبال عدد كبير من الشباب والأطفال على ارتداء الكمامة الملونة التى صممتها، وقالت: «الناس كانت كارهة الكمامة ورافضة تلبسها، لكن تلوين الكمامات وتحويلها لعمل فنى، شجع الناس على ارتدائها، بعضهم لبِسها، لأن شكلها بقى أحلى، وبعضهم اعتبرها موضة، وفى الحالتين المواطن مستفيد..
الإقبال ده خلانى أعمل أفكار جديدة على الكمامات، يعنى رسمت علم مصر على كمامة وفانلة أبوتريكة على أخرى، وكتبت على بعضها عبارات زى (مغلق لحين ميسرة) و(أنفلونزا وهتعدى)، لكن أفضل جملة بتعبر عن الأزمة والناس بتحبها هى (ولسه قادر فى الحزن أفرح)».
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
يعنى لازم الفذلكة
ربنا يرحما من شغل الجهلة
لما يبقى عندنا 15 جامعة
و3 ملايين طالب جامعى
ورجال اعمال فى الشيبسى والاستيراد فى القمح المدود والفاسد واحتكار حديد التسليح
ولا نصنع او لا نقدر على صنع هذة الكمامة ونستوردها من بلاد برة
يبقى لزمة الناس دى اية
تبقى منظومة تعليم منهارة وسياسة اقتصادية فاشلة
اصنعوا الكمامة قبل ما ترسموا عليها
يا و[ *** ]تك يا بلد
مش قادرين تصنعوا كمامة
كمامة
كمامة يا بلد وسعرها ارتفع من 8 جنية ل 40 جنية علشان سياسة الاحتكار
غطينى يا صفية وصوتى
وبما انى رجل شوية متعلم رحت للدكتور وكان للاسف دكتور نطاسى واستاذ فى احد كليات الاقاليم الطبية وبيلبس بنطلونة بحملات زى رئيس تحرير الدستور ابراهيم عيسى والدكتور الحقيقة ما قصر - كتب لى مضادات حيوية ومهبط للحرارة وفيتامينات مقوية ودواء لتوسيع الشعب الهوائية وكانت الادوية دى بحسبة 350 جنية بالتمام والكمال
ومر اسبوع والانفلونزا ماسكة فى عظامى وبتهد فى حيلى ومفيش فايدة فى الادوية
رحت البلد ازور الحاجة
الحاجة كان عندها بصل اخضر
وضربت اكلة بصل اخضر مع ليمون ونصف كيلو سردين
وتكرعت
ونمت فى تلك الليلة نوما عميقا وتوقف السيلان من انفى
وانتهت الانفلونزا تماما
عليكم بالبصل الاخضر والليمون والسردين
وهتبقى انفلونزا خيخة قوى وهتعدى وسبيكوا من علاجات الدكاترة والمضادات وكل المواضيع دى
ابداو بالبصل الاخضر والكرات
وهيبقى الموضوع سهل خالص
وبعدين اشتروا علبة اقراص نعناع تضيع ريحة البصل من بقكم وتضيع كل الروائح غير المستحبة