راجل عجوز..ابتسم

الوحده ف كراسى الترام.. مش حقيقيه للدرجه ..كلنا ف لحظه ممكن نبتسم.. لراجل عجوز.

14/03/2006

مدونة (تياترو صاحب السعادة:

راجل عجوز..ابتسم ..على كرسى ف ترام.. راجل حقيقى.. يشبه كلمة كبار السن..

الوحده ف كراسى الترام.. مش حقيقيه للدرجه ..كلنا ف لحظه ممكن نبتسم.. لراجل عجوز.. أو عليه.. مش فاكر كنت ساعتها بعمل إيه.. يمكن كنت بطرد الوقت بالجرنان.. أو بفتكر قد إيه ف لحظه ممكن يكون قلبى حاضر ويعرف يوصل بالوقت بالورد بالحنان برمان العواطف وذكريات الناس و راجل عجوز..ابتسم..

وحكى عن أمير على طرف سلطانه وعرشه الكبير..بنوتة ..مش جنية.. ومش طالعة من قلب حدوتة.. لكنها كل ليلة بدر تنزف دموعها على حبيبها الفقير..اللى على طرف دكانه وحيرته.. تتقلب الأيام من غير ماتعرف تنام..الأميرعلى طرف سلطانه وعرشه الكبير لو نام ..هتخونه أحلامه لو يوم من الأيام.. مات الأمير..هتطير دموع الجنيات والحمام اللى ف جنينة قصره ويعيطوا.. ويا بنوتة.. على حبيبها الفقير.. سمعت منه الحكاية وابتسمت.. مع أنه عيط.. وقال معلش أصلى افتكرت أم سعد.. كان حنانها شيال هموم وعيال وأكتر كتير م الوعداللى شقيان بينا.. قالك رسولك اتوصوا بيهم خير لو تجور..إلا الولايا.. منهم تكون أمك.. منهم تكون أختك ..منهم تكون أم سعد..بيها احتملت الصبح لما ماجاش.. مع انهم ف الاذاعة والجرايد قالوا أنه حتما جاى..

أنا أصلى ربيت العيال على أنه دايما جاى ..وقلتلهم كمان.. الحيطة تحيى الفقير..وتداريه من عين أمير..على طرف سلطانه وعرشه الكبير ما بينامش الفقير أبدا...ودى سنة الدايم.. تحيى الحياة وتموت.. ولا حد دايم ..ولا حتى.. إمام جامع.. الحاج اشرف إمام جامع الملكوت.. ما كان يقدر يرفع آدان من غيرى.. مع إن من غيرنا الحياة بتحيى والحياة بتموت.. مع بعض طفنا بيت الله وعرفنا.. يعنى إيه القلب ..يكفر بأشواقه ..ويوحد بشوق الله.. اذكر المولى ..الحاج أشرف.. كان يخاف الله وكنت معاه ..ساعات ..بحس.. انى مادقتش أمان.. غير ف بيت الله.. لكن ف بيتى.. كنت بحسب حسبة الخايف من عباد الله ..على كتافى كان يتنطط.. ابنى سعد.. من سن خمسة.. وهو أشقى اخواته.. كان عفريت ..ولا كان بينفع معاه.. تخوفه بعفريت.. أو حتى غضب الله.. لكنه كان يشوف العسكرى من قمة الشارع يموت م الخوف.. يجرى على أمه.. أم سعد.. فتحكيله حدوتة الأمير..اللى فيه بنوتة على طرف سلطانه وعرشه الكبير..فينام.. على طرف فستان أم سعد....مع إن ف كراسى الترام.. حنية واستخفاف وضحك ومشاعر ناعمة..بس ف الواقع صوته الجهير..وطريقته ف القعدة..والايقاع البطىء للترام ..كانوا أسباب أهم.. عشان تفضل كراسى الترام.. تسمعه..

ف لحظة انسجم غنى "يا ورد مين يشتريك.. ده القلب عايش بيك ..الذكرى مهما تموت.. تلاقيها فيك حواليك.. إمتى الزمان يسمح يا جميل.. نفرح سوا ويطيب فؤادى العليل ..العمر موال ابتديه ما افتكرش باقيه.. مع أنه كان خيّال يطوى صبح وليل"فات اللى فات يا ولاد.. وماشلت كذبة ف قلبى غير إنى ما كذبتش.. لكن بما إنى راجل عجوزمن حقى أوصف زمانى.. إنه كان أجمل... يااااه الناس ف راس البر وحشونى خالص.. يا سلام يا حاج.. اذكر المولى.. واالنبى المختار..اللى استجار ف محبته حمام القلب ..ما كنت أقبل يومية أقل من ميت جنيه.. أيام ما كان الحيل ده حيل والناس دى ناس.. ولاعدى يوم من غير ما اقابل ملايكة..على كل ناصية فجر.. وحشونى خالص.. انقطعت مجيتهم من يوم مات ابنى سعد من يومين جانى واحد منهم.. رمى السلام ماعرفت اميز ده ملاك ده ولا شيطان.. ياااه حتى الملايكة ف أيامكوا دى بقوا شكل تانى.. بس اللى حيرنى.. أزاى ف عز الليل ولا وانتوا مروحين من صلاة الفجر..بتعرفوا السكة.. وانتوا مش عارفين مين اللى واخد بايدكوا.. ملاك يكون..ولاشيطان ملعون.. ياااه السكة خلصت بسرعة.. والنبى المختار.. يا ريت القطر ده كان أصله رايح مصر..ريحة الونس حلوة...نزلت .. كراسى الترام كانت راجعة تانى ويا راجل عجوز ابتسم..