معلهش يا عمنا.. امسحها في مصر
ظابط شتم محمد عبد القدوس، وقبل كدة الاستاذ محمد اتضرب قدام النقابة.. الموضوع كبر
10/05/2006
أحمد زين - ولاد البلد:
"مين الجدع أبو دقن ده اللي بيتنطط في كل حتة.. من ساعة ما اتخرجت من كلية الشرطة واشتغلت في أفخم جهاز أمني فيكي يا داخلية.. وأنا بشوفه بينط في كل حتة بميكرفون كدة زي بتوع الروبابيكيا.. والغرابة أني مرة شفته بيجيب الميكروفون من عربية شيك قوي.. هو سواق عند حد كبير؟.. ما داهية لتكون عربيته؟.. طب ولو عربيته مبهدل نفسه ليه كدة.. تلاقيه من اللي اغتنوا فجأة.. تاجر أسمنت ولا مقاول ولا عنده سلسلة محلات كشري.. وسايب شغله وطالع في مظاهرات مع شوية عيال"..
أتخيل أن هذه الأفكار هي التي دارت في ذهن الضابط الشاب وهو يفكر في "عمنا" الأستاذ محمد عبد القدوس، هذا الضابط – والرواية لوائل عباس – الصحفي المستقل والمدون المعروف - قال لعمنا الأستاذ محمد عبد القدوس في إحدى المظاهرات هو الواحد لازم يلطشلك؟..
!!.. بكيت مثلي؟.. أم كنت أجدع واستطعت أن تحبس دمعتك.. وخزتني هذه الكلمة بنت الحرام.. هو الواحد لازم يلطشلك؟.. هو الواحد لازم يلطشلك؟.. هو الواحد لازم يلطشلك؟..
محمد عبد القدوس؟!! .. هل يا ترى هذا الضابط "الشاب" "النابه" "العظيم" يعرف محمد عبد القدوس؟.. أكيد لأ.. أكيد..
معلهش يا عمنا.. اللي ما يعرفك يجهلك.. والشاب ده ما يعرفكشي ولا يعرف أي حد ولا أي حاجة صدقني..
أنا متأكد أنه لا يعرف لماذا تتظاهرون؟... أكيد عمره ما قرأ لك كلمة ولا تابع حوار من حواراتك مع الشباب.. عمره ما شاف رواية لوالدك الله يرحمه ولا يعرف إن اسمه إحسان عبد القدوس، وحتى لو شاف رواياته كأفلام صدقني هيفهمها طشاش..
ولا ممكن يعرف إن جدتك هي الرائدة العظيمة روزاليوسف... وطبعا أكيد عمره ما سمع لحماك كلمتين ولا قراله صفحتين على حجم كتابات العظيم الخالد محمد الغزالي.. يا كابتن ظابط.. محمد عبد القدوس تاريخ بلدك لو بتفهم . أو حتى لو مؤمن إن دي بلدك!
عيل وغلط
معلهش يا محمد يا ابن الناس.. امسحها فيا أنا.. أو في كل الشباب اللي فعلا بيحبوك.. وقفت مرة مع وائل عباس الناشط والمدون المعروف وأميرة الطحاوي الناشطة في تجمع "يد"، والكاتبة بالشرق الأوسط.. تعرف إن أبسط كلمة اتقالت في حقك.. قالتها أميرة.. قالت الراجل ده بني آدم قوي.. ووائل علق: فعلا ده قبل كل مظاهرة بيتصل بينا ويأكد علينا، وبعدها بيطمن علينا تقريبا واحد واحد.. وأنا سرحت بخيالي وقلت: هو الراجل ده إزاي بيشارك في كل المظاهرات والفعاليات والندوات.. ما بيزهقشي؟..
سألت مرة محمد القصاص -واحد صاحبي من الإخوان- هو محمد عبد القدوس بينجح ليه بأكبر عدد من الأصوات مهما كان وضع الإخوان وشعبيتهم بين الصحفيين، قال لي: الصحفيين بينتخبوه علشان هو محمد عبد القدوس.. وأكمل: مرة كنت معاه ولقيته بيتصل بصحفية ابنها نجح في الإعدادية وعرفت منه انه تقريبا بيعمل اتصالات كتير من النوعية دي... !!
انت زعلان يا عمنا؟
وبعدين يا أخي أنت زعلان ولا حاجة؟ طيب زعلان ليه؟ ده عيل وغلط.. عادي.. زيه زي كل اللي غلطوا.. اللي غرقوا العبارة.. واللي أهانوا القضاة.. واللي اعتقلوا الآلاف.. واللي عذبوا مئات الآلاف.. واللي منعونا من التصويت في الجامعات والعموديات والنقابات.. واللي موتوا جمال حمدان بالقهر والكمد أو بأنبوبة البوتاجاز (كما قالوا!!) واللي أتحفونا بصفر كأس العالم.. واللي باعوا القطاع العام ، واللي فرطوا في كل كرامتنا.. وكل فرص بلدنا التاريخية في أنها تصبح في مكانها الطبيعي...واللي بيفتخروا أنهم بيصدروا العلماء لكندا (مسئول كبير خطير ذكر مرة بفخر أن فيه 5 آلاف دكتور مصري هاجروا لكندا بيصنعوا حضارتها).. أنت زعلان واحنا بنستورد البرايات والمساطر والأقلام الرصاص والكراسات التسع أسطر؟، انت زعلان وقطر الصعيد اتحرق بالناس اللي فيه؟ انت زعلان من حتة شتيمة صغيرة والطيارة المصرية غرقت بمجموعة ضباط منتقين ولغاية الآن ما عرفوش يجيبوا الصندوق الأسود..
يا عمنا ... قلبت عليا المواجع ولا أنا اللي قلبتها عليك؟.. على العموم ما تزعلشي.. ما دام الشتيمة من عيل.. لأن منطق العيال عبقري في موضوع الشتيمة بيقولوا الشتيمة بتلف تلف وترجع لصاحبها..
امسحها في مصر
بجد بقولك عيل وغلط امسحها فيا ولا أقولك امسحها في كل الشرفاء اللي عارفينك كويس.. وعارفين عشقك لبلدك.. امسحها في كل اللي اتهانوا من عيال بيغلطوا..
امسحها في 25 ألف معتقل سياسي.. امسحها في بدو سينا المحاصرين.. امسحها في الصعايدة اللي اتهانت كرامتهم كتير في التسعينات وما زالوا.. اسمحها في ضحايا العبار... ولا امسحها في عمر أفندي.. امسحها في أي حد.. امسحها في أصدقائك ورفاقك في النضال.. حمدين صباحي.. وعصام العريان.. وعبد المنعم أبو الفتوح.. امسحها في الشباب اللي تعرفهم كويس وهما معتقلين حاليا علاء، ومالك ومحمد الشرقاوي وآخرين..
بقولك يا عمنا امسحها في حبيبتك مصر..
عارف يا أستاذ محمد ... أو – حسب كلمتك الشهيرة - يا "عمنا" اللي عمله الولد ده معاك فضيحة.. لأن نظامنا شغال بطريقة المثل الشعبي.. يا رايح كتر م الفضايح.. والنظام ده رايح..
عدد التعليقات : 176
• حزب الأخوان.. اللي شبكنا يخلصنا
• الأهلي يداعب لقب الدوري
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
والله عندك حقك يا كابتن زين ...
فكرتني بحته كتبها عمنا مصطفي محمود بتقول في روايه اكل عيش نقلا عن واحد قبطي " ولكني الان وانا اتدكر حياتي وحياة الناس واضع الحقائق الي جوار بعضها البعض .. اجد ان الام المسيح كانت شيئا هينا فلم يكن للمسيح ابناء وكان يموت من اجل هدف نبيل تهون من اجله الام اربعه وعشرين ساعه علي الصليب اما امي فقد عاشت علي الصليب ستون عاما وماتت بدون هدف يبرر عدبها" .... "شقاوه استيكه يا ريس "...
بصوا يا جماعه ولاد البلد دي بقي فيها ضرب نار جامد اوي .. بصراحه الواحد مش عارف يعلق فين ولاه فين وبتشيلو المواضيع بسرعه رهيبه ... اه قبل ماانسي احب اقول
لاخ محمد السسسسسسسيد توقيعي اهو اهو اهو
"يعني قهر" Mobark &Gamal @egy.kahr.
ياااااااااااااه
يا عمنا .... محمد عبد القدوس ...
أنا في حياتي مشفتش راجل زي الراجل ده ..
والله كلمة راجل شوية عليه ...
تعرفوا ؟؟ لو تشوفوه وهو ماسك الميكرفون وعمال يهتف وينادي بحماس ... والله تتكسفوا من نفسكم ...
في يوم كان في مظاهرة و قبل بدايتها لقيته مسك الميكريوفن لوحده و وقف علي سلم نقابة الصحفيين وعمال يهتف وينادي علي الناس تشارك معاه ...
تخيلوا ؟؟ لا حد واقف جنبه ولا معاه .. لا حد يشجعه او يرد عليه ... لا حد أصغر منه يسنده أو يمسك ويهتف بداله وهو الكبير ...
والله حاجة تكسف بجد ..
ساعات كنت بأسأل نفسي ..هو الراجل ده مبيتعبش أو مبيزهقش ...بلاش ... هو الراجل ده مفيش وراه بيت وعيال وحاجات من دي ؟؟؟
لا للتمديد ... لا للتوريث ... نعم لتعديل الدستور المصري
mohamedmat@hotmail.com
لكن الحقيقة .... لو عندنا من الراجل ده كتير كان حالنا اتغير من زمان ...
أقول إيه تاني ؟؟؟
يبهرك بأخلاقه ... كتير كنت بأستغرب في مظاهرات كفايه وغيرها .إن ساعات لسانهم بيفلت وتلاقي ألفاظ متصحش . أو حتي ساعات بيتخانقوا مع بعض وإحنا ماشيين في المظاهرة ....
لكن عمنا ...؟؟ والله العظيم يخليك واقف دايب في نفسك من أدبه وأخلاقه وحلاوة لسانه ... نفس اللسان اللي بيقف يهتف علي السلم يسفط حسني مبارك ولا للديكتاتورية .... هو هو . اللي تلاقيه واقف بيكلمك بمنتهي الذوق والأخلاق والصوت الهادي الوقور ...
والله إنت خسارة فينا . خسارة في شباب كتير نايم كسلان . أو حتي لما بيقوم بيقوم وهو مكسوف يعلي صوته أو يهتف لوحده أو حتي يمسك في إيده علم البلد دي ...
ربنا يخليك ليا يا عمنا ويجمعني بيك في مصر وهي حرة ويجمعني بيك في الجنة
امين
لا للتمديد ... لا للتوريث ... نعم لتعديل الدستور المصري
mohamedmat@hotmail.com
ربنا يبارك فيه ويكثر من أمثاله
يا هل ترى ماذا لو !!!!!!؟
يا هل ترى ماذا لو شباب الإخوان اقتدوا بالأستاذ محمد عبد القدوس ؟ هذا الرجل يعرف أصل المشكلة لذا تراه يهتف يسقط ,,, يسقط ... حسنى مبارك ، يا أستاذ محمد ما تعمل فينا جميل وتطلب من المرشد أن يفرج عن شباب الإخوان فقط لمدة 24 ساعة وتاخدنا جميعا نحو قصر مبارك .. ايه الى هيحصل يعنى !!!؟ هيموت مننا 20000 !!!! وإيه يعنى يموتوا شهداء أحسن ما يموتوا فى العبارات !!! ، عارف يا أستاذ محمد ماذا قال لى صديقى السجين !!!؟ قال هو نفسه يشوف مظاهرة كبيرة يكون هدفها فعلا اسقاط مبارك ، ولو شاف المظاهرة دى هيسيب السجن فورا وهيكون فى الصف الأول !!! يا أستاذ محمد ما تستغربش من الكلام !!! فصديقى ليس سجين فى طرة أو فى أبو زعبل !!! بل هو واحد من سجناء البيوت !!! إنت عارف مين سجناء البيوت !!!! دول شباب زى الورد بعد ما خلصوا الجامعة وخلصوا الجيش راحوا يدوروا على شغل !!! بسى انت عارف !!!! شغل ايه الى انت جى تقول عليه !!!! بعد الياس والإحباط استقر بهم الحال فى البيت !!!! هؤلاء هم سجناء البيوت !!!!! ما تعمل فينا وفيهم معروف وتقودنا على قصر مبارك !!!! بسى انت زى منت عارف احنا جُبَنَا !!! منه لله الى كان السبب !!! المهم بقى عشان احنا جبنا احنا عاوزين ناس جامدة عشان يشجعونا عشان الجبن معشش فى قلوبنا !!! اوعى تقولى كفاية !!!! لأ يا عم دول 50 واحد خدوا حبوب الشجاعة واحنا الحبوب دى متأسرش معانا أصلى الجبن إلى عندنا من أيام ذكى بدر يعنى مى الآخر جبن مستوطن ، احنا عاوزين شباب الإخوان . هم دولا فعلا إلى هيشجعونا ، احنا سألنا واطقسنا وعرفنا انى المرشد خايف عليهم من العين عشان كده حابسهم ، لو خايفين من الموت قولهم هم بس ييجوا يشجعونا وبعد كده يسيبونا احنا هنكمل الباقى ، وصدقنى هنديعلك وهند
اقرأ بقية التعليق ..
معلش يا عمنا
انا معرفش الأستاذ محمد عبد القدوس شخصيا لكني بشوفه كتير في كل مرة أروح النقابة أو أي مظاهرة و أحسن وصف ليه ( بغض النظر عن أختلافي الفكري مع الأخوان ) أن الراجل ده أنسان اوي وأبن ناس و ده بيبان من طريقطه في المعاملة معانا طول الوقت
في كل مرة بيرد عليا بيعتبرني واحدة صاحبة مشكلة و بيعرض عليا انو يساعدني في حلها بمنتهى الادب و الودو الاحترام
ولما بعرفه اني صحفية بيساعدني اكتر ..ومرة سألته عن حال الشباب و سلبيتنا و و جهلنا السياسي ..قاللي لا شبابنا فيهم الخير ..متبصوش للقلة الضعيفة احنا عندنا شباب زي الورد ..بساحنا نتخلص من سلطة الفساد ومن الديكتاتور..واحنا نبقى زي الفل
الله يبارك لك يا عمنا
يشتمنى
ويعلن ان سكوتى معلن عن ضعفة!
يلطمنى
ويدعى ان فمى قام بلطم كفة!
يطعننى
ويدعى ان دمة لوث حد سيفة!
فاخرج القانون من متحفة
وامسح الغيار عن جبينة
اطلب بعض عطفة
لكنة يهرب نحو قاتلى
وينحنى فى صفة!
يقول حبرى و دمى :
لاتندهش
من يملك " القانون " فى اوطاننا
هو الذى يملك حق عزفة!!!!!!!!
متلموش الظابط دا تربيه الحكومه المباركه
متوقعين حكومه مبارك تطلع ظباط عملين ازاى
yehia2784@hotmail.com
والله لا أدرى كيف واتت هذا الضابط الجرأة أن يضرب وجها بسماحة وجه عمناالأستاذ محمد عبد القدوس ؟!
حتى وإن كان هذا الضابط جاهلا به وبمكانته وبكتاباته و بعائلته ..ألم ينظر إلى ذلك الوجه الوضاء؟!
إن كان جاهلا .. فهل كان أعمى البصر والبصيرة أيضا؟!
شلت تلك اليد التى تمتد لرجل كان وما زال بذله وعطاؤه لوطنه بلا حدود
فضل أن يشارك المقهورين والمستضعفين ما يعانون ، وتحمل معهم الظلم ، وهو الذى كان باستطاعته أن يبيع كما باع الآخرون ويتقرب من مراكز صنع القرار ولديه المؤهلات لذلك.. إلا أنه أبى إلا أن ينحاز للشعب ضد السلطان الجائر
كان باستطاعته على الأقل العيش فى بيئته الاستقراطية بعيدا عن المظاهرات والاعتصامات ووجع القلب ، إلا أنه فضل درجات سلم النقابة على شاليهات مارينا والساحل الشمالى !!
عموما هذا هو دأب أصحاب المبادئ والرسالات .. بارك الله فى جهادك يا أستاذنا
على فكرة يا زين الصندوق الأسود بتاع الطيارة وجدوه، و وجدوا بداخله مفاجأة
لقيوا كل الصندوق "نعم لمبارك"
إذا أتتك مذمتي من ناقص .....
فهي شهادة لي بأني كامل ...
مبارك شتمنا وقال مافيش حد يصلح للحكم غيره..
نظيف قال الشعب مابيفهمش سياسة ..
وغيرهم كتييييرررر..........
افهم انت بقي ...
بحبك يا مصر
بعيد عن كل شيء خلو صمر في عينيكو
خلو بالكم منها دى ما فيش كمها
ربما يخليها لنا يارب
ومات رحمناش منها يارب
ادعوها يا جماعة
مصر محتاجة لكم
تحياتي
اكون او لا أكون
المقال رائع زي متعودنا من احمد زين
حسسنا فعلا اد ايه الظابط اللي مش محترم
غلطغلطة كبيرة
اه يا بلد صاحب الضمير فيكي مهان ..
واللي بيسرقك بيضرب له تعظيم سلام
حسبي الله ونعم والوكيل
يا وطنـي ..كــل العصافيـر لها منـازل
إلا العصافيـر التي تحتـرف الحريّـة
فهي تمــوت خـارج الأوطــان
دي بلدنا احنا هما ميعرفهواش ولا يعرفوا تاريخها ولا ناسها انت معجون بنبض البشر بهمومهم - بتعرف تلمهم انا مش عايزه ابان كما لو كنت بحكي عن بطل شعبي بس عبد القدوس فعلا كده انسان شديد الحرص على العلاقات الانسانية بينه وبين الصحفيين مع كل مناسبة في كروت بتتبعت منه على الجرايد باسم الصحفي الصغير قبل الكبير بيعرف يلم الناس وده شئ صعب في زمن انتشر فيه التوحد والانانية والافاقين معلش لازم كل ده يستفزهم قلوبنا كلنا معاك يا استاذ
عندك حق يا استاذ أحمد...أستاذنا محمد عبد القدوس جزء من تاريخ بلدنا...ومن أهانوه سيموتون ولن يسمع عنهم أحد، أما هو فسيبقي مهما ذهب عمره وذهبت حياته...
أبكي ياعين لعلك تغسلي العار أبكي لعل دمعك يكون دافع لأن نستيقذ و نفيق من هذا الكابوس .
ياعمنا و عم أهلنا لا تغضب من هذا الصعلوك فهو تربية الجلاد الأعظم.
و لأحبائك و لنفسي أقول أعلموا أن الديكتاتور قد ربى أتباعة ليتبعو مثل هذا الصعلوك ربما طال حكمة .
ولذلك فهم لن يستسلمو ولن يغيرو سلوكهم فهم تربو على ذلك وهم يعلمو ان لو تغير الحال فسيكون مكانهم اسفل السافلين.
محتلينا أستمرئو الفساد
وعلينا أن نكون أقوياء و لاتحزنو ولاتهنو و أنتم الأعلون
أنتم مولاكم الله و هم لا مولى لهم
يا عم إنتا إيه ....إنتا جبت أسلوب كتابتك دا منين؟؟ أنا مقدرتش أنط كلمة واحدة...
و الله إن الكتابه ليها ناسها ..الله يفتح عليك و يزيد من أمثالك و على فكرة عمنا أكبر من كدا و على رأي إخوانا الخليجيين يا جبل ما يهزك ريح ...ووالله عمنا دا جبل و رمز لينا
امسحها فيى مصر
امسحها ف عشرينات امسحها ف 70 مليون
امسحها فيا
هقول ايه
لا عزاء للشرفاء
و على رايك يا زين يا رايح كتر م الفضايح
ولا يهمك يا أستاذ .. و على رأى المثل إن طلع العيب من أهل العيب مايبقاش عيب ..
و عمار يا مصر مادام فيها رجال أمثالك يا عمنا ..
اللهم أنشر رحمتك على العباد و عجل بالفرج يا أرحم الراحمين
ان لم تخنى لمعلومه فان الكاتب محمد عبد القدوس زوج ابن الشيخ الفاضل العلامة محمد الغزالى ترى لو لم يكن يستحقها كان زوجها له الاخيار للاخيار
انا هاحكي عن تجربه الراجل ده انا حضرته مظاهره لكفايه في عابدين وكان بيهتف ويقاوم الامن المركزي ولاشاب في العشرين اللي حصل مش غريب ع الامن المصري وياما شفنا ناس محترمه بتتهان من جمال بدوي لعبدالحليم قنديل ياقلبي لا تحزن بس هي ي ضريبه الناس المحترمه ودفاعهم عن المباديء وقيم الحق والعدل
عمنا محمد عبد القدوس لمن لا يغلم سقفه هو الخروج للشارع وإزالة هذا الركام الأمنى من أمام سلم النقابة وتشعر وهو يقود حشود المتظاهرين فى أى مكان وكأنه يريد إزاحتهم من كل مكان غير مفرق بين إسلامى أو يسارى أو ناصرى او حتى وطنى الكل سواء أمام عمنا , يقول البعض إن آخره الميكروفون والشارع ولكنى أعتقد أن الميكروفون والشارع وبخاصة فى شارع عبد الخالق ثروت او شارع ثروت كما هو الدارج عند سائقى التاكسى له أثره الكبير وأنا كمثال أتت وقفات الشارع التى كان يقودها عمنا ومن على دربه فى الأفراج عنى وعن آخرين من زملاء كل ما وزروه هو حب الوطن والسعى إلى حرية ورثناها من أمهاتنا اللواتى ولدتنا أحرارا, وعاش عمنا بطل الميكروفون والشارع.
معلش يا استاذى الغالى محمد عبد القدوس ...سبحان الله فى هذا النظام الذى يرفع قوم ويخفض اخرون..عنده مزاج فى ازلاال اولاد الناس وتكعهم ولكن مزاجه الاخر هو رفع شئن اولاد الكلاب اتباعه وكمان بيحميهم ..كل من يدافع عن هذا الشعب يضرب بلجذمه..وكل من ينكل ويزل الناس يرفع من شئنه ..غريبه الدنيا ..صحبنا بلله اللى قتل الزعيم السادات..ولم يصب وهو قاعد بجوارة ..تزوج من امرة يهوديه طبعا كلن عرفنها سوزىىىى ام اويءبرطانيه الاصل ويهوديه العقيده ...اصل حسونه باع البلد من زمان وباع نسها ...استاذى لايوجد عندى الا ان اقول لك صبرا جميلا فقد حان وقط الوداع فهو الان ام يورثها لجمى ام يبعها لليهود وفى كلتا الحالتين نحن ضحايا الجهل ...واحد زى اللى قلك الكلام ده طبعا ابوه مربهوش رباه حسنى باشا وطبعا تربيه وسخه زيه تمام...الى كل الشرفاء فيكى يا مصر تجمعو واتحدو يوم الخميس القادم امام القضاء العالى ولا تخفو منهم انهم قله امامنا لو تجمعنا كلن فى شعب واحد امه واحده تدافع عن حقها اما الظلم والفساد..اما بيع مصر امام اعيناواخيرا..بيت شعر ..الضرب فينا مقوله واسجن بقى لينا طوله ..دى عصابه واسمها دوله
سوف يذكرك التاريخ بفخر انك احببت مصر وتدفع لها مهرها فوالله مصر تستحق وتستحق
ان يدفع لها الشرفاء من امثالك ياعمنا مهرهافهي تاج علي مفرق الشرق برغم كل سرقات اللصوص وتجار المغشوش وماجورين الوحوش قابله للنهوض اذا استلم قيادها المخلصون والعالمون باصول النماء.
لا محاله سوف تطير رؤس الحاكم الظالم وبطانة السوء قريبا واسرع مما تتوقع وساعتها لكل حادث حديث ومصر تستاهل الكل يتعب علشائها.
طيب الموضوع على المستوى الإنساني و السياسي أكتر ... و ده شيء جديد و جميل
لكن لي تعليق على المقال نفسه إن الجزئية بتاعت " انت زعلان يا عمنا؟ " مباشرة قوي ، و كإنها مفتعلة و داخلة في الموضوع بالعافية ... مع إن كان ممكن الاكتفاء بـ " إمسحها في مصر "