عادي.. عادي.. عاااااادي!
هنلاقي إن ده ظابط أمن بيبص في موبايله، أكيد بيبعت sms لخطيبته يقولها إنه مش هيفسحها النهاردة!
12/05/2006
يا ظلمة يا كفرة يا سفلة يا ولاد الكلب..
عارف أنت طبعا مين في بلادنا بيتشتم الشتايم دي
عارفهم ولا أفكرك
تلاقيك منهم يا معارض يا اللي ناكر جميل ريسك وابنه وحزبه وأمنه وعساكره..
تلاقيك منهم..
يااللي مكبر الموضوع وعامل من الحبة قبة
مع إن الموضوع عادي.. عادي.. عادي!
بص معايا يا مواطن.. شوف أنت في وطن كل قياداته بتخاف عليك إزاي
لو استعرضنا مع بعض الصور دي..
هنلاقي إن ده ظابط أمن بيبص في موبايله، أكيد بيبعت sms لخطيبته يقولها إنه مش هيفسحها النهاردة لأنه مشغول بـ"هموم الوطن"..!
والباشا الكبير، اللي ماشي في عز الشمس، نازل الشارع بالبدلة المدني، عشان يبقى شيك، وميخضش الإخوة المعارضين، وميخوفش العيال الصغيرة اللي مش عارفه مصلحتها ونازلة تقف مع شوية قضاة بيتحاكموا، مع إنهم اتعودوا أن القضاة في بلادنا بيحاكموا مش بيتحاكموا.. لكنه نازل بنفسه يقولهم يا ولاد.. دي شيء عادي.. عادي.. عادي!
والأستاذ المحترم، نازل بشيكاته واللاسلكي بتاعه، عمال يكلم زملائه، يا محمد بيه، المتظاهرين كويسيين، حد منهم بيشتكي من حاجة، حد داس لهم على طرف، حد ضايقهم، يا محمد بيه... أنا عارف إنك قرفان منهم، بس معلش.. هما مش عارفين مصلحتهم.. خلينا نستحملهم.. والمظاهرات دي في البلاد الديمقراطية اللي زينا شيء عادي.. والله العظيم يا محمد بيه شيء عادي.. عادي..عادي..!!
والباشا.. بالبدلة برضه، شاف مجند قاسي القلب عديم الرحمة.. بيكلم مواطن متظاهر بقلة زوق.. قعد يشاور عليه ويقولهم.. زميلكم ابن الكلب ده.. خلوه يتعامل باحترام مع اخواته المواطنين.. لأن مش من حقه أن يقل أدبه على المواطن..
صوت من بعيد : لكن يا باشا ده المواطن بيقل أدبه
رد الباشا وقال.. عادي.. إن المواطن يقل أدبه ده شيء عادي .. لكن مش من حقنا نربيه.. يا جماعة قلة أدب المواطن شيء عادي.. عادي .. عادي!
والعربية الخضرا الكبيرة العظيمة الفخمة اللي مش مكيفة وكل اللي جواها حاسين بالصهد والحر واحنا الساعة 2 الضهر وواقفين في الشمس.. تفتكروا واقفة ليه، عشان طبعا تمنع المتظاهرين من شرور أنفسهم وسيئات أعمالهم.. لأن المتظاهرين المتهورين ممكن يتهوروا وتاخدهم الجلالة ويأذوا نفسهم، فالعربية دي موجودة عشان تحميهم وهما بيمارسوا شعائرهم التظاهرية في أمان.. خاصة وإن ممكن مواطن تاني، مسالم برضه، لكنه مختلف معاهم في وقفتهم مع القضاة الوحشيين، فممكن يشتبك معاهم، ساعتها يتدخلوا.. ويفضوا بينهم.. ويفهموهم إن الإختلاف في بلادنا شيء عادي.. عادي.. عادي!
وأبو ضحكة جنان.. الراجل أبو رتبة كبيرة، هو نفسه مش عارفها.. لأنه مشغول عن رتبته بالمتظاهرين المساكين معدومي الضمير، اللي نازلين يعكننوا على إخوانهم المواطنين يوم الخميس.. مع إنه يوم مفترج والناس بتنام فيه بدري..
إيه ده.. إيه الصوت ده.. ده صوت ضمير الباشا. بيقوله.. أصبر يا أخي.. دول برضه مواطنين مش عارفين فين مصلحتهم، ولما يبوظوا عليك يوم الخميس فده شيء عادي.. وبعدين ما أنت الخميس اللي فات الخميس باظ منك برضه من غير مظاهرات.. فعادي يعني.. أهو سبب مقنع برضه قدام الـ.. بلاش قباحة .. المهم إن اللي بيحصل ده شيء عادي !
والراجل المسكين ده.. عمال ينادي على زملاءه.. يا ولاد.. تعالوا شوفوا الإهمال.. بلاعة مفتوحة دي اللي بيشاور عليها ولا إيه.. محدش يعرف.. الكادر الضيق مخلاش المصور يجيب باقي مكونات الصورة.. بس أكيد الراجل ده بيشاور على بلاعة خايف أحد المتظاهرين إخوانه يقع فيها.. وبيقولهم كفاية إهمال بقى وخلوا البلدية يشوفوا شغلهم.. رد واحد وقاله.. يا أخي ما أنت عارف، ما المتظاهرين بيمنعوا البلدية إنها تشوف شغلها، رد بحزم وقاله، لأ.. يتظاهروا آه.. بس إن البلدية تشوف شغلها لازم يعرفوا إن ده شيء عادي.. عادي .. عادي!
الصور خلصت.. كلها بتقول إنه عادي.. بس إحنا مش فاهمين اللي فيها.. إحنا مش فاهمين.. صرااااخ المتظاهرين مانع صوت الحق والعدل والحرية والديمقراطية إنه يوصلنا.. صراخ هذه القلة المندسة من المختلين عقليا وعاطفيا ووطنيا مانعة الحقيقة إنها تبان..
مانعة صوت جمال مبارك والسيد والده، والسيد وزيره الحبيب حبيب العادلي، وأحباءه وأتباعه وأصدقاءه ومجنديه ومن أتبع هديه السقيم بغباء إلى يوم الدين..
مانعة الأصوات كلها.. ومخلاينا نشوف كل حاجة عادي..
يا ولاد بلدنا.. متظاهرين مصر الأفاضل كلهم اتلموا واتجمعوا عشاق في سجن القلعة، يا ولاد بلدنا الحجة ماتت واتسجنت، وكفاية راحت في داهية، والإخوان اتسجنوا واتسحلوا ومحمد عبد القدوس مقرر لجنة الحريات بياخد دورة في الحريات.. وكله عادي.. واحنا قاعدين ..
يا ولاد بلدنا.. لو عايزين تعرفوا سر الصور اللي فوق دوسوا هنا..
دوسوا قوي... كليك جامدة وقوية.. واتفرجوا ومتعوا عنيكم
اللي في الصورة دي أنا معرفهاش.. ولا عايز أعرفها.. كفاية اللي أنا عارفه وساكت عليه.. كفاية علينا نتفرج.. ونقول.. عادي!
عدد التعليقات : 53
• الظابط في السينما.. ملاك بدبورتين!
• احنا بتوع المترو!
• صوما مقبولا.. وعبارة غارقة!
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
بجد أنا مش لاقيه كلام أقوله الحزن مخلينى عاملة زى ميكون عندى 100 سنة مفيش فايده عايزين قياده عايزين قيادة أحنا قلبنا نار وكل المصريين كارهين الأوضاع القذرة إللى موجودة فى مصر إللى مفيش فرق بين الصور دى والصور إللى بتتعرض عن الفلسطينيين ولا العراقيين فى القهر والإعتقال لازم نتحرر من الفاسد هو وإبنه لا زم يدوقوا إللى بيعملوه فى الشعب. البلد وسرقوها الشعب وزلوه عايزين إيه أكثر من كده التوريث وده على حثث المصريين كلهم مش ها نتورث اللهم أرنى فيهم أية من أياتك ياأرحم الراحمين يارب العالمين الله عليك بمبارك وأبنه وزوجته وحاشيته الفاسدة الله أمين أمين أمين يارب العالمين
عايز اشتم مصر شتيمة قبيحة قوي ..
بس بلاش يا عم براء تقلد بلال قضل في قباحته...فاهمني!
نرجو ألا يعمينا الغضب مما حدث أو الانفراد بنشر الصورة ..عن ستر عورات الناس
امرأة ممزقة الملابس .. هذه عورات ناس
أشارك صاحب التعليق الذى يطالب براء بعدم الانزلاق وراء أسلوب بلال فضل
فعلأً أرجو وضع علامة سوداء على وجه المتظاهرة وما بدا من جسدها .. الرسالة وصلت على كل حال .. هؤلاء كفرة والدليل أن كل مصري شمت في العربة الي وقعت من على الكوبري مع إن دول ما لهمش ذنب . كانوا بينفذوا اوامر الباشا الكبير. يوم بعد يوم سيدرك هؤلاء أنهم غلابة مخدوعون زينا ويحدث ما توقعه الخميني وينضموا للناس اللي بيضربوها .. ساعتها كل الطيارات حنطلع على سويسرا ..
بالمناسبة اسرائيل إيه ؟... يا عم ده اسرائيل تيجي تتعلم مننا .. بذمتك عمرك شفت صورة زي دي في الانتفاضة ؟.. على راي واحد من حماس: المفروض الفلسطينيين يتظاهروا من أجل اوضاع المصريين تحت ظل الاحتلال مش العكس ..
الأخوة الأفاضل أصحاب التعليقات السابقة.. بالنسبة لستر جسد السيدة الفاضلةصاحبة الصورة.. فأنا أعتذر بشدة عن فعل ذلك لأكثر من سبب ..
اهم هذه الأسباب أنها بالفعل كما قال المعلق السابق عورة مصر كلها.
وبما أننا أصبنا في الفترة السابقة بعمى مؤقت عن رؤية عورة مصر كلها فما المانع من التذكير بها
خاصة وان الصورة ليست مثيرة ولا جذابة.. وبالتالي فحجة منعها ضعيفة على الاقل من وجهة نظري الضعيفة
الامر الثاني ان مواقع كثيرة اخرى وضعت الصورة نفسها وبالتالي فان تعديلها وتمويهها هنا لن يمنع مستخدم الانترنت من الوصول لها بسهولة
أما بالنسبة لتقليد اسلوب بلال فضل، فللاسف هذه ليست حقيقة
فالاسلوب اسلوبي منذ عرفت وتعلمت الكتابة
اما عن استخدام القباحة التي يتميز بها بلال، فمعلوماتي الشخصية تقول ان بلال لم يحتكر القباحة بعد، وبالتالي فهو نفسه لم يتضايق لو اصبحت استخدم القباحة مثله مع اني ارى ان الافيه القبيح افيه قديم وحمضان ولا يستحق لقب قباحة على الاقل بجوار ما يكتبه استاذنا في الكتابة الساخرة بلال فضل
اشكركم جميعا.. وخلونا في موضوعنا.. ولا هو فعلا بقى عادي
حلو جدا يا براء يسلم قلمك وروحك الغزيرة في الكتابة برافو فعلا
طيب مش هنتفرج طيب نعمل ايه
طيب وبعد مندخل كلنا المعتقلات
عايزين حل عملي نقدر نعمله
طيب احنا مش ساكتين بس نعمل ايييييييييييه؟
لا للتمديد... لا للتوريث... نعم لتعديل الدستور
براء والله انت 100 100...
مع إنى فعلا بحب مصر لكن نفسي أعيط على الخراب و الحال اللى وصيلناله...
حسبنا الله و نعم الوكيل...
انا فى الاول معتقدش ان البراء غلط وحتى لو غلط غلطه ولا حاجه جنب غلط الباشا قلى فى الصوره
بس فيه حاجه كويسه ان قلى نحس انه غلط نقله مش نسيبه نناقشه بالعقل
مشكلتنا اننا سبنا الزفت حسنى مبارك من غير ما نقله حاجه لمده 25 سنه بس ملحوقه
هو بيعتقل ناس ماشى يوم الخميس الجاى حيشوف الناس على حق
انا رحت الخميس قلى فات والحكومه اخدت صاحبى منى وحروح تانى الخميس الجاى
على فكره ظباط مصر بجد مجانين هما دول مجانين الحكومه انا شفت عساكروظباط ورتب كبيره بتضرب فينا بشكل هستيرى
كان يوم ضرب وشتيمه وقله ادب واعتقال دا يوم الحكومه
منهم لله اخدو صاحبى منى
اخى رجع صوتك هز الورا سيبقا شعاعا يضئ الثرا فان غيبوك ليخفت نور فانت بقلبى هنا نيرا
الحريه للمعتقلين الحريه للوطن
لا للتمديد...لا للتوريث... نعم لتعديل الدستور
yehia2784@hotmail.com
كان حتى إكتئاب
فجميع الناس في بلدتنا
بين قتيل ومصاب
والذي ليس على جثته بصمة ظفر
فعلى جثته بصمة ناب
كلنا يحمل ختم الدولة الرسمي
من تحت الثياب
شكرا يا براء
أسلوبك رائع في توصيل الهدف
و........
وحسبي الله ونعم الوكيل
حراااااااااااااااااااااااام
بجد ده كتييييييييييييييييييييييير حنشوف الخميس الجاي حيعملوا ايه.... لولا اني بنت ومش من القاهرة والله لو بايدي هانزل القاهرة الخميس الجاي علشان بس يعرفوا انهم كده مش بيعملوا حاجة غير انهم بيخلونا نشيط اكتر
وحيشوفوا الخميس الجاي الناس حتعمل ايه وحيبقي عددها كام ؟؟
وزي ما الناس اتفقت
لا للتمديد... لا للتوريث... نعم لتعديل الدستور
طبعا عادي... هو عادي وبس؟؟؟
انتوا بس اللي مش بتفهموا ...احنا اللي عقولنا عليها غيامه خلتنا نش فاهمين حاجه..........جتنا نيله ملينا البلد!؟
انا بس ليه سؤال .....الصور دي كلها وكان في تعتيم اعلامي علي الموضوع واتمنع الصحفيين واتضربوا....امال لو كانوا صوروا كل حاجه كان زماننا شفنا ايه وللا ايه؟؟؟؟؟؟؟؟؟؟؟؟.........
قلبي واجعني...منكم لله قلبتوا عليا المواجع...
مستنياك يا محمد ترجعلنا من عند الناس الحلوين الرائعين دول- بس يا عيني صعبانين عليا اصل احنا اللي فاهمينهم غلط...
اكيد يا محمد هما دلوقتي معيشينك اجمل ايام حياتك ...احلي نومه واحلي اكله واحلي صحبه...يا بختك يا عم متظبطه معاك..بتشوف الناس اللي صورها فوق دول كل دقيقه وكل ثانيه ...مش احنا جتنا القرف وشنا في وش المواطنين العاديين يعني اللي ملهمش لازمه في البلد ولو نطول نلغيهم هنلغيهم....
يللا مش مهم
مستنيينك يا محمد
ولغايه ما ترجع
"لا للتمديد لا للتوريث..نعم لتعديل الدستور"
ايميلك مستنيك تيجي تكتبه
ندائى هذا للاخوة ظباط و جنود الداخلية الشرفاء . ارجوا ان تلاحظوا الفرق بين مشاعر و احساس الشعب فى استشهاد الرائد فى سيناء و مدى تضحيتة فى سبيل هذا الوطن الغالى . و بين الرائد الذى لقى مصرعة فوق كوبرى 6 اكتوبر و هو متوجة لفض المظاهرة و الاعتداء على النساء . الاول يستحق منا الدعاء و الفخر . و الثانى سيكون فى مذبلة التاريخ المصرى . و اقول لضباط الداخلية ان من تعذبوهم و تضربوهم هم اخوانكم و اولادكم . الذين ضحوا بوقتهم و مستقبلهم من اجل حرية و كرامة هذا الوطن الغالى . لقد دارت عجلة الحرية من الظلم و الاستعباد ولن يستطيع احد ان يوقفها . و اللة على كل شئ قدير
سفلة وعارفين حرامية ومتاكدين بلطجية ودي تربيتهم يبقى خلاص عادي كل اللي بيحصل فينابس هيجي اليوم اللي هيكون مش عادي
- أولا كون مواقع أخرى نشرت الصورة ليس مبررا لأن ينشرها موقعكم الذي نعتبره موقعنا جميعا
بل إن النشر فى أكثر من موقع - كما أشرت- دليل أن الصورة لا تمثل انفرادا لـ"ولاد البلد"
- الأمر الآخر أن الذين يطالبون بمعالجة الصورة اعتقد ليس لأنهم يرونها مثيرة أو مغرية إنما هى عورة امرأة يجب أن تستر لا لشيئ إلا لأنها عورة
- اتمنى أن يكون نشر الصورة يتم بأسلوب تراعى فيه الحرفية الصحفية وآدامية الناس فى ذات الوقت
تخيل لو أن هذه المرأة أم أى واحد فينا .. بالتأكيد رد فعله أنه هيروح فى داهية فى هذا الضابط ، ولكنه فى نفس الوقت لن يرضي بنشر صورة أمه بهذا الأسلوب المهين
أضم صوتى لمن يري ضرورة معالجة الصورة حتى لا ننشغل بالحديث عنها وننسي القضية الأساسية وهى الظلم الواقع علينا جميعا
ارجو ان لا يفهم كلامي غلط ولكن هذا الكلام بعد انا زهقت من الي بيحصل في مصر وانا بصراحة متاعطف مع من فجروا دهب وشرم ليس لانهم قتلة ولكن لان الدولة لم تستمع لمطالبهم واخذت القوة الغاشمة هي الوسيلة الوحيدة للتعامل مع اي صوت معارض مما اوصل الحال الي ان يقوم مجموعة من الشباب ان يفجروا انفسهم , وان اظن ان هذه التفجيرات من وجه نظر الارهابيين ليست موجه لمصر اولا ولكن لنظام مبارك القمعي الذي اتخذ من امن الدولة الوسيلة الوحيدة لقمع اي معارضة ويوم الخميس الماضي يشهد علي هذه المهزلة امام دار القضاء العالي
فالظلم يولد الظلم
والعنف يولد العنف
وال ايه يا مبـــارك ويا جيمــي
لا للتمديد لا للتوريث...
يسقط ....يسقط.... حسني مبارك
يا مبارك غـــور مصــر بقـــت بــــور
يا ريتنى كنت معاهم . جملة قالها جندى فى فيلم الطريق الى ايلات . عندما نجحت المهمة و لم يكن هو معهم . . هذة الجملة يقولها الملايين ملايين الشرفاء الذين لم يستطيعوا حضور الاعتصامات و المظاهرات بجانب اخوانهم الشرفء . و سيقولها ملايين الملايين عندما تنول مصر الحرية و الكرامة المنهوبة . . و اللة من قلبى اقولها يا ريتنى كنت معاكم . . و ان شالة حتى اسحل ويقبض على . . مصر تستحق اكثر من هذا .
لو لم اكن مصريا لوددت ان اكون مواطنا لاي دولة اخري
ايه اللي بيحصل ولسة بيحصل البلد ولعت يا جدعان ومفيش ميه وربنا يهدها عليه
اهرب ياللى فى بالى قبل ماتدخل المحمصة قبل مايصحى الشعب يفوق ويقولك خلاص فات الوقت مافيش فلفصه
شكلك خايف شكلك مرعوب بس عامل لسه عايش فى عهد المصمصه خلاص فاق الشب ا لبقره اتحلبت مع السلامه ياملطشه
قانون الطوارىء هوه السبب
أمن الدولة كلاب الدولة أمن الدولة كلاب الدولة أمن الدولة كلاب الدولة أمن الدولة كلاب الدولة أمن الدولة كلاب الدولة أمن الدولة كلاب الدولة أمن الدولة كلاب الدولة أمن الدولة كلاب الدولة أمن الدولة كلاب الدولة أمن الدولة كلاب الدولة أمن الدولة كلاب الدولة أمن الدولة كلاب الدولة أمن الدولة كلاب الدولة أمن الدولة كلاب الدولة أمن الدولة كلاب الدولة أمن الدولة كلاب الدولة أمن الدولة كلاب الدولة أمن الدولة كلاب الدولة أمن الدولة كلاب الدولة أمن الدولة كلاب الدولة أمن الدولة كلاب الدولة أمن الدولة كلاب الدولة أمن الدولة كلاب الدولة
تحيه إجلال وإكبار .. لشباب الإخوان المسلمين ....
والله بجد رجاااااله ...
على فكره انا مش من الإخوان ... بس والله لولا شباب الاخوان ما كان الموضوع نجح كده ..
دول والله كانوا بيدفعونا بكل قوه وحمااااس ..
ربنا يفك اسرهم ..
وتحيه لأجدع نااااااس ... شباب الاسكندري
لسه شويه يا رجاله على ما الفجر يطلع. بس هوه طالع غصب عن عين امه ....وابوة كمان
يا اخونا اللى حصل يوم الخميس اكتر من كده بكتير و انا شفت المناظر و اللى يحب يشوف يدخل على موقع كفاية ..و هتشوفوا
لكن مع احترامى ..الصوةر باين اوى انها متفبركة رغم انها بتقول اللى حصل بس برضه خلينا كده رقباء على انفسنا ..
نقطة تانية .. اللى بيشتموا مصر ..يا اخونا فيه فرق كبير اوى بين مصر وولاد مصر و حكام مصر
اتقوا الله ..مصر ذكرت فى القرأن .
العيب مش فى مصر . العيب فى اهلها الساكتين و حكمها المفتريين
يا اخونا
العيب فى الجتة مش الجاكته
يا ناس الحكومة عيزانا نعيش إإزي عشان تلعب .........بس والله الشعب فهمها كويس وهوه أدها وإدود ....ومصر هترجع لنا زي مكانة
الحق فوق القوة ...و الأمة فوق الحكومة (الإسلام هوه الحل )
mlake_el7ob2010@hotmail.com
احنا ناويين نعمل ايه غير الغضب الداخلي و ياريت نتفق علي حاجه نعملها كلنا بدل الكلام (السكوت)و خلاص
و لغايه محمد ما يرجع
لا للتمديد... لا للتوريث... نعم لتعديل الدستور
غلط يا براء
أخبرك وأوعدك إن الوصف الصح لكل ما يحدث وما سيحدث فى الشهور القليلة القادمة هو "مش عادى".. كان عادى إنهم يزوروا الإنتخابات لكن مش عادى القضاة يرفضوا ويقولوا ده تزوير.. كان عادى يسجنوا ويعذبوا لكن مش عادى الناس تحاصرلهم الأقسام وتقفلهم الطريق.. كان عادى يقمعوا المظاهرات فى الجامعة .. لكن مش عادى المظاهرات تخرجلهم فى الشارع .. كان عادى يضربوا الإخوان باليسار واليسار بالإخوان والمثقفين ببعضهم .. لكن مش عادى الإخوان يبقوا مع القضاة مع المهندسين وأساتذة الجامعات وكفاية والغد وكل مصرى بجد.. مش العادى إن مصرى غير منتمى لأى تنظيم يأخد أجازة عشان ينزل يدافع عن القضاة ومش عادى أمهات القضاة يقفوا يساندوا ولادهم من على الرصيف ومش عادى يفضوا المظاهرة النهارده يلاقوها جت بكره بناس تانية وفى مكان تانى .. نهى الزينى مش عادى.. والخضيرى ومكى والغريانى ودربالة مش عادى.
أصل العادى كتر قوى والعادى لما يكتر بيفتح باب كل ما هو ليس عاديا.. لو بصينا على الصورة من بعيد يا براء حنبتسم نصف إبتسامة.. مش بسببهم ولا لهم فضل فيها لكن ببساطة لأن حالنا ده نتيجة الخوف والوهم ولما المسألة بتزيد الدم بيغلى والصورة بتتكشف ووالوهم والخوف بيروحوا ونكتشف إننا كنا خايفين من خيال مآتة لو بس كل واحد مننا نفخ فيه نفخة حيطير.
شكرا لك على إسلوبك المتميز وقراءتك العميقة للصورة وتحليلها بهذا الشكل الجميل اللى يجبر أى حد يوصل للنهاية من غير ملل. وإذا كان على الصورة فأنا أحسن الظن بمن أبدى ملاحظات على الأجزاء المكشوفة من جسد هذه السيدة البطلة أيا كان إتجاهها، ولكنى أرى أن الصورة هكذا ضرورية جدا لإحداث الصدمة ووزرها يقع مع وزر الفعل على من قام به وهى بمثابة دليل إدانة ليعرف الجميع أى نوع من البشر هؤلاء اللذين جع
اقرأ بقية التعليق ..
عادى ان ده يحصل علشان صدقتوا الوعود علشان من سنه بالضبط سكتوا على هتك اعراض بناتكم فى وسط شوارع القاهره اديتوا صوتكم له بعد ما بناتكم اتبهدلت فى الشوارع وياعالم ايه اللى حيحصل لسه
غطيها يا براء الله يخليك...انا قعدت للحظة اتخيل لو دي امي ...يا نهااااااااااااار
و بعدين الست دي اكيد ليها اولاد او اقارب ما يصحش نكافئها على شجاعتها بكشف عورتها بالطريقة دي ...كاننا بنشارك مع الكلاب في نهشها
غطيها الله يخليك..احنا اتحرق دمنا كفاية و مش محتاجين نشوف حاجة زي دي عشان تحركنا ...اللي بيحصل فينا كل يوم يذل الجبال
مصر حبلى و اللى ف بطنها ولد
ولد طول بعرض بحلاوة
في عينيه بريق
وف دمه خفه
مخلوطة بحبة شقاوة
مصر حبلى
ومش هبله
واللى ف بطنها
واد ع الفرازة متنقي
دمه زي العسل
وخالي م الغباوة !!!
منقول
منهم لله اخدو صاحبى منى
اخى رجع صوتك هز الورا سيبقا شعاعا يضئ الثرا فان غيبوك ليخفت نور فانت بقلبى هنا نيرا
الحريه للمعتقلين الحريه للوطن
لا للتمديد...لا للتوريث... نعم لتعديل الدستور
yehia2784@hotmail.com
مفيش فايدة
que cera cera
الي هيحصل هيحصل
وسلام
Dabdoob
لا بد أن يعاقب الرئيس حسنى مبارك على أفعاله إن ما يفعله هو إبادة جماعية للشعب المصرى وإغتيال لوجوده فمنذ أن إستولى عن الحكم بدون إنتخابات وهو يعلم عدم شرعية وجوده مما دفعه للإستيلاء على كل مقدرات البلد وثرواته وتزويره الإنتخابات به وتهميش الشعب وهذه نفس سياسة أى مستعمر فى إحتلال أى دوله إبادة الشعب وقهره حتى لا يكون هناك أى قوى تقف فى وجهه ونحن نطالب بمحاكمة دولية لحسنى مبارك على إبادته للشعب المصرى من تهميش وفقر وبطالة ومرض وإستيلاء على كل مقدراته وتزوير كل الإنتخابات لابد أن نقدم جميعاً عريضة محاكمة له على إتفاقية الكويز التى اضرت بإقتصاد مصر وعلى تصدير البترول لأمريكا لمدة عشرين سنة بنصف التمن وتصدير الغاز لأسرائيل وتصدير الأسمنت لها لبناء الجدار العازل وبيع الشركات والمصانع وهى من أملاك الشعب وليست من أملاكه وتهريب الأموال للخارج وإنتشار الفساد أنه مجرم ولا بد من عقابة كمجرمى إبادة الشعوب ولابد من نداء كامل من الشعب كله على ذلك فكيف سينظر العالم للمصريين بعد كل هذه الإهانات التى يتلقاها الشعب من حاكمه والفسدة من حوله العالم الذى كرم المصريين بأرفع الجوائز العالمين كيف سيتعامل اليوم مع المصريين
شكرا لك يابلال على هذا الموضوع الذي زادنا ألما على ألم وحزنا على حزن.. وزاد في ألمي أنه بدلا من أن يفكر بعض كتاب التعليقات في مايجب عمله للإحتجاج على مهزلة مثل هذه وكارثة مثل هذه لو وقعت في بلد محترم لسقطت فيها الحكومة.. لكن لأننا مجتمع مريض متناقض نفكر في القباحة.. سواء كانت قباحة الصورة أو قباحة بلال فضل حسب رأي بعض المعلقين.. أما قباحة الفعل وقباحة الواقع فهي لاتشغلهم بنفس القدر.. لاأدري كيف يمكن لانسان يقرأ ويشاهد هذه الصور ثم يكون له نفس لكي يتحدث عن اسلوب فلان أو علان وينحرف عن صلب الموضوع.. كأنه كان يشاهد صورة في فقرة صورة وتعليق.. شيئ محزن في الحقيقة.. كنت أتمنى أن نفكر فيما يجب أن نفعله للاحتجاج على صورة كهذه.. بدلا من أن نكتفي بوصف اسلوب الكاتب ومقارنته باسلوب غيره.. هذا هو مايجب أن نفعله جميعا ويجب أن ندرك أننا سنسأل يوم القيامة على مافعلناه بعد أن شاهدنا عرضا يهتك وكرامة تنتهك بالصورة البشعة التي رأيناها بها.. شكرا لك يابراء على كتابتك التي تقطر ألما وأتمنى أن تقود قراء عشرينات نحو مجهود عملي فعلي للغضب على ماحدث مثل حملة توقيعات دولية أو أي تحرك مثمر.. أشكر محمد فتحي الذي أرسل لي لينك لهذا الموضوع.. وأتمنى أن يزيح الله عن مصر قباحة حكامهاويهدي الجميع لإدراك القباحة الفعلية التي تستحق الرفض والتنديد
بصراحة لا تعليق ... لأن مفيش تعليق أقدر أكتبه ... ربنا يسترها على مصر ...
معلش لكل مخاض آلام ... ولكل معركة خسائر ... والابتلاء سنة المصلحين
لا اله الا الله ربنا يرحمنا
انا كنت موجود يوم الخميس 27 /4 /2006 وكنت موجود يوم الخميس 11/5/2006 وهكون موجود ان شاء الله يوم الخميس 18/5/2006، لانى شوفت اللي عمري ما شوفته الاعتقالات على ودنه اول مرة كنت رايح عشان كان عندي شغل تغطية صحفي لاني شغال صحفي وتانى مرة كانت لمتابعة الحدث لكن ان تصل السفالة إلي درجة أن الامن المركزي يطاردنا فده معناه اننا في دولة يحكمها كلاب الشرطة انهم يسحلوا المواطنيين والصحفيين ويكسروا الكاميرات دة معناه انهم مرعوبين مننا اكيد مرعوبين وعشان رعبهم يزيد لازم عددنا يزيد
اللي عجبني بجد اني شوفت مواطنين عاديين كانوا بيهتفوا ضد النظام الفاشى الفاشل
لن أعلق علي صورة المرأة ولكني سأعلق علي وكستنا وخيبتنا ...
يا شعب مصر العيب فيكم وليس في النظام
العيب فينا نحن المسلمين وليس في أمريكا
العيب فينا نحن البشر وليس في الشيطان
فالنظام المصري نظام ظالم وحسني مبارك عايز يتقطع من جسمه نسايل نسايل علشان بس المنظر ده أنا عارف إنه حيشفي غليل شباب مصر العطلانين وبنات مصر إللي فاتهم القطر
وأمريكا مركزة في مشروعها وتسعي له بكل ما تملك
والشيطان دي وظيفته إللي علشانها خلقه ربنا عز وجل
السؤال : إحنا دورنا إيه مع مبارك وأمريكا والشيطان ؟؟؟؟؟
أرجوالإجابة لأن مرارتي قربت تنفجر من الهم
أخ من الأخوان المسلمين
اللى حصل دة بيفكرنى
بفيلم احنـــــــــــا بتـــــوع الاوتوبـــيــــس والناس اللى اتشدت هيحصل فيـــــهم ذى كـــــدة ذى الفيلم
هوا مش اداكوا حريه افرحوا بيها بقى ادنوا فى مالطه براحتكوا هوا اداكوا حريه
هوا مش الوزارء فاتحين مكاتبهم عشان يستقبلوا الناس خليهم بقى يستقبلوا الناس بس ما فيش فايدة ادنوا فى مالطة براحتكوااااااااااااااااااااااااااااااااااااااااااااا
احنا بتوع الاتوبيس
الكرنك
بالله عليكم يا مسلمين تذكروا ان المسلم ليس بسباب ولا لعان فبلاش الألفاظ الغريبة دي
ياريت أولا نصلح من نفسنا قبل ما ننزل نطالب بالاصلاح في البلد
كل واحد يفكر ويسأل نفسه ياتري بينزل يصلي الفجر كل يووووووم ولا بتروح عليه نومة؟!!!!
ياتري بيتقي ربنا في ألفاظه وفي نظراته وفي كلامه ؟؟
ان الله لا يغير ما بقوم حتي يغيروا ما بانفسهم
والقضاة اللي قاموا واتنفضوا واللي مشي معاهم في المظاهرة عشان الانتخابات المزورة ليه متهزوش كده واتحركوا واتظاهروا من أجل الحكم بشريعة الله بدل الدستوووور والقانون
بلاش تخلوا فكر حركة كفاية يسيطر عليكم
ويبقي الهدف كفاية خلاص لاه يا الحكم بشرع الله يا بلااااااااش
3azema ya masr 3azema ya baldy, huh..
Rabina ye3awad 3ala el balad de... we ye3awad ahlaha!
wala win maba2ash yenfa3
wa a7'eran ta7ya MASR MASR MASR.. hehehe
عندما يحكم الناس حثالة الناس
خلينا ياجماعه نركز قوى فى الدعاء اكيد باذن الله يوجد من ال 76مليون مصرى على الأقل مليون دعوتهم مستجابه..لالالالالالالاللفساد.....لالالالالالاللتوريث ...لالالالالالالمبارك وسلالته..و..نعم..نعم..نعم لتعديل الدستور وربنا يخلصنا من اللصوص والحرامية والفاسدين وقولوا آآآآآآآآآآآآآآمين
الأخ الذي يطلب من الشباب ألا يتأثروا بحركة كفاية وأن يركزوا أكثر في صلاة الفجر أحب أن أذكره بحديث الرسول صلى الله عليه وسلم الذي روى قصة عابد من بني اسرائيل كان من اكثر الناس عبادة لله وعندما نزل العقاب على قومه قال الملك المكلف بإنزال العقاب لرب العزة لكن فيهم فلانالايتوقف عن العبادة.. فقال له الله عزوجل به فابدأ لأنه لم يكن ينكر المنكر.. يمكنك أن ترجع الى نص الحديث في كتب الصحاح لكي تعرف أنك عندما تطلب من الشباب ألا ينكروا المنكر فأنت ترتكب إثما.. وكان أولى بك أن تشجعهم على إنكار المنكر بما استطاعوا.. وهو مالايتعارض مع صلاة الفجر.. أما إذا ظننت أنت وغيرك بأن الله سيكون راضيا عنكم لو اكتفيتم بالصلاة والدعاء فأنتم واهمون واهمون واهمون وغدا ستكتشفون ذلك يوم الحساب
شخصيا بشوف ان لا الحكومه غلطانه ولا اللى حكمها وحكمنا غلطان اانا راييي ان الغلط دايما مننا احنا سكتنا كتير اوى اوى يوم ورا شهر ولا سنه ورا عشره ولا قروون والسبب الخوف على النفس ولا على الاولاد ولا على المرتب ولا على الوظيفه ولا حتى الخوف الالهم من الضرب والاهانه والتعذيب افتكر انه ان الاوان منخافش شويه نتحرك يمين وشمال نتحرر زى كل الدنيا ما اتحررت الا الشعوب العربيه اللى بعتبرها شعوب محتله حتى هذه اللحظه
وتتطلبون احتارم المصرى خارج بلده احترموه فى بلده الاول كل ظالم وليه نهايه وازى كان جيلنا مش هيقدر هيجى جيل يقدر اكيد هيجى الجيل ده واتمنى اكون واحد منهم للاسف معدش فيه كلام ينفع يتقال بقى دمنا ميه الواحد حاسس كان رجولته انتزعت منه مع ان البلد مش ملك حد والله ماهى ملك حد دى بتاعتى وبتاعتك وبتاعت اختى واختك بتاعتنا لاهى بتاعت اى حد غير المصريين اللهم فاعفو عنا وارحمنا انت موالنا ونعم الناصريين
لازم هيجي يوم انشاء الله وربنا هياخد لنا حقنا من الناس دى
زعلانه
بجد أنا مش لاقيه كلام أقوله الحزن مخلينى عاملة زى ميكون عندى 100 سنة مفيش فايده عايزين قياده عايزين قيادة أحنا قلبنا نار وكل المصريين كارهين الأوضاع القذرة إللى موجودة فى مصر إللى مفيش فرق بين الصور دى والصور إللى بتتعرض عن الفلسطينيين ولا العراقيين فى القهر والإعتقال لازم نتحرر من الفاسد هو وإبنه لا زم يدوقوا إللى بيعملوه فى الشعب. البلد وسرقوها الشعب وزلوه عايزين إيه أكثر من كده التوريث وده على حثث المصريين كلهم مش ها نتورث اللهم أرنى فيهم أية من أياتك ياأرحم الراحمين يارب العالمين الله عليك بمبارك وأبنه وزوجته وحاشيته الفاسدة الله أمين أمين أمين يارب العالمين