العصفورة.. قالتلي!
العصافير البشرية الآن متوفرة بالأسواق وبأرخص الأسعار، هتلاقيها في كل مكان، في الكلية، في الشغل، في النادي، أو حتى في البيت.
15/05/2006
أميرة قاسم – ولاد البلد:
إذا مرة فكرت تروح تشتري عصفورة وسألك صاحب المحل "إنس ولا طير يا بيه" ساعتها أوعي تستغرب..
العصافير البشرية الآن متوفرة بالأسواق وبأرخص الأسعار، هتلاقيها في كل مكان، في الكلية، في الشغل، في النادي، أو حتى في البيت.
وللتوضيح فلفظ "العصفورة" هو في الأصل مصطلح مخابراتي يطلق على الناس اللي ليهم علاقة بالباب العالي في كل مكان ومهمتهم توصيل الأخبار والمعلومات والذي منه..
ولو رجعت بالزمن لورا، هتلاقي إنك اتحطيت في مواقف كتير مع العاصافير، في البيت والشغل ومع أصحابك.. وتفضل جملة والدتك ترن في ودانك.. لما كنت تسألها مين قالك يا ماما، ترد وتقول.. العصفورة يا حبيبي!
سو سو سو سو
في البيت، ممكن تكتشف إن أخوك الصغير ده مخابراتي قديم وإنه أكبر ودن في البيت، بيسمع كل حاجة وبيقول كل حاجة وزيادة كمان، متخصص في تلميع الاوكر، أي مصيبة تحصلك في البيت هتلاقيه هو أساسها، إما أنه بلغ عنك القيادة العليا عن ميعاد وصولك للييت وش الفجر وأنت بتطوح، أو إنه سمعك بتتكلم بسهوكة في التليفون، أو وصل لوالدك مكان علبة السجاير اللى بتخبيها تحت المخدة كل يوم، فلا بيت يخلو من عصفورة.
عصافير الأمن
عصفورة الجامعة بقى ده بقى واحد أو واحدة (مش هتفرق كتير) متصاحب علي ظابط الأمن اللي في كليتك وبيقدم له تقارير مخابراتية عن كل حاجة وعن أي حد، عامل، طالب، أو حتى دكتور، ممكن تفاجأ لو لقيت دكتور اتمنع من دخول المدرج الجامعي لأنه في مرة خدته الشجاعة حبتين واتكلم بصراحة قدام حبه عيال عن الفساد وحاشية الملك.
أو مثلا ممكن تلاحظ إن في حد من زمايلك الثوريين اتعلم عليه والأمن ماشى وراه في كل مكان وممكن يسأله عن بطاقته كل شوية على سبيل الرخامة والتغتيت، اعرف ساعتها إن فى عصفورة من اياهم راحت صوصوت في ودن ظابط الأمن بتقرير متين عن صاحبنا الغلبان.
فى الشغل هتلاقيه أول واحد يوصل تقولش بيبع لبن!! أمال مين اللى هيبلغ المدير كل يوم بمين جه متأخر ومين ماجاش واتمضى له فى دفتر الحضور، والأسافين إياها، أو ممكن يجيى يسألك ببراءة شديدة (أنت إيه رأيك في المدير بتاعنا؟؟) خد بالك ده سؤال خبيث من حد أخبث سيادتك طبعا بطيبتك هتفضفض معاه وتعد تلعن في سلسفين المدير واللى جابوا المدير، لا تستغرب حينها عند اكتشافك لحرمانك من العلاوات والحوافز والحاجات اللى بتسند المرتب.
عصافيرك مش زى بعضيها
ومع إن العصافير من الطيور ما يقدروش يعيشوا لوحدهم إلا إن العصافير البشرية تتميز بخصائص تختلف تماما عن غيرها من الطيور، فهتلاقيهم مالهمش صحاب معينين ولا حتى شلة تجمعهم.
يختلفوا أيضا عن العصافير في أحجامهم، فالعصافير البشرية متوفرة بكافة الأحجام، فتجد الممتلئ ذو الكرش المتين، أو النجيف ذو السيقان المسامير ( على فكرة عندنا عصفور فى الكلية ماشاء الله عليه جته)..
هتلاقى كمان ودانهم كبيرة ومتخصصين في الأسافين والذنب، وممكن تستفيد منهم لو أنت عاوز تعمل إعلان عن حاجة ساعتها مش هتلاقى أحسن منهم يقدروا يوصلوا لأكبر عدد من البشر في أقل وقت.
أحسن حل
وبما إني ليا خبرة عظيمة مع العصافير البشرية فأحب أقولك إن أصلح معامله معاهم هى (المعاملة التنحة) لو سألك على حاجة قوله معرفش ويا سلام لو تبقى رخم وتقوله وأنت مالك؟! خليك بجح معاه وأوعى تفتكر إن دي قلة ذوق، دي طريقة فعالة جدا وأنا شخصيا بستعملها وجابت نتيجة مع العصافير اللى في كليتي.
يا ترى أنت حكاياتك إيه مع العصافير ؟؟!!
عدد التعليقات : 161
• هنا يرقد أجمل المصريين
• السواركة.. مانديلا العرب
• رباعية في المئوية الأهلاوية
• مائة عام.. أهلي!
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
نتمنى قبل كل شئ
ان تصيبهم انفلونزا العصافير
فى مقتل
امين يارب
اما بخصوص قصتى مع العصافير
فلا داعى لانى معبى منهم
وحكايتى كلها هاتبقى سب
وشتيمة
إن التاريخ يعيد نفسه، أزمة انتخابات نادي الضباط عام 1952 والتي عجَّلت بثورة يوليو، وأزمة نادي القضاة في الإسكندرية عام 2006، بعد ما يزيد على نصف قرن. وهناك حنين إلى الستينيات والعودة إلى ذروة انتصارات الثورة المصرية في مواجهة الاستعمار والصهيونية والبناء الاشتراكي لمصر.
تلاعب الملك في انتخابات نادي الضباط ورغبته في انتخاب أحد أنصاره، حسين سري عامر، ضد مرشح الضباط، اللواء محمد نجيب. وهو ما يحدث الآن في الصراع بين مجلس القضاء الأعلى المعين من وزير العدل ممثل الدولة، ونادي القضاة الحر المنتخب من مجموع الهيئة القضائية في مصر، والصراع على قانون السلطة القضائية التي يريدها نادي القضاة، والإشراف على الانتخابات الرئاسية والبرلمانية، وإثبات التزوير في حالة وقوعه، وتصدي نواب محاكم النقض ورئيس نادي القضاة لذلك، الخضيري ومكي وبسطاويسي. أزمة نادي الضباط الأولى في القاهرة، وحصار نادي القضاة الثانية في الإسكندرية، التي أيد معسكرها وأيدت جامعتها الثورة بعد اندلاعها.
والظروف في الحالتين متشابهة. في كلتا الحالتين برز "الإخوان" والشيوعيون، وفشل الحياة الحزبية بين أحزاب القصر، أحزاب الأقلية، وحزب "الوفد"، حزب الأغلبية في الحالة الأولى، وفشل أحزاب الأقلية المعارضة وفشل الحزب الحاكم في استقطاب مجموع الشعب، ووجود حزب المعارضة الرئيسي، "الإخوان"، في الشارع والبرلمان، والصحافة دون أي سند شرعي يحميه بعد حل الجماعة منذ 1954، في الحالة الثانية.
كان هناك الملك والحاشية وأحزاب الأقلية. والكل يمثل سلطة القصر. واليوم هناك الحزب الحاكم ولجنة السياسات للتدخل في الحياة السياسية وفرض الوزراء والنواب والمحافظين ومديري الأمن ورؤساء الجامعات والهيئات العامة. وكان الإنجليز القطب الثان
اقرأ بقية التعليق ..
هم فى الأول و ألاخر بنى أدمين
هيتحاسبوا يوم القيامه
جميل يا مرمر ..
اول مرة اقرالك بالاسلوب ده
مفيش عصافير دلوقت خلاص الناس بقت بتشتغل فى الشارع على الملا من3 سنين الورق فى الجامعه كان بتوزع فى هدوء عشان العصافير متخدش بالها داوقت خلاص معظم الناس بطلت خوف وهما كمان بقو فى الشارع كده تشوفه تعرف انه امن بطل يستخبا
الصراع الان على المكشوف
منهم لله اخدو صاحبى منى
اخى رجع صوتك هز الورا سيبقا شعاعا يضئ الثرا فان غيبوك ليخفت نور فانت بقلبى هنا نيرا
الحريه للمعتقلين الحريه للوطن
لا للتمديد...لا للتوريث... نعم لتعديل الدستور
yehia2784@hotmail.com
يوم الخميس قلى فات على الطريق الصحراوى الظابط كان بيوقف العربيه وبقول قلى رايح يحضر مع القضاه ينزل يروح احسن كده على العلن اه والله
وانت نسيت عصافير الشغل وهم انواع في عصافير من العمال للموظفين وعصافير من الموظفين للمدريين واشهر عصافير عصافير امن الدولة الي في الشركات
يا جماعه انتو مستعجلين ليه , برررررراحه كلها شويه وانفلونزا الطيور تخطفهم وسعتها نغني تبكي الطيور ...
وعصفوره شجن كمان ....
على فكرة.. ممكن نقول بالفم المليان ان مفيش حاجة اسمها عصفورة، وممكن نثبت ده بالدليل، لأن فيه حالتين:
الحالة الأولى: إن العصفور هيكون ذكى وهينقل الأخبار للى مشغله فى سرية تامة ومحدش هيعرفه، وبالتالى محدش هيعرف ان فلان ده عصفورة، وبالتالى يبقى كأنه ملوش وجود.
الحالة التانية: إن العصفور هيطلع غبى وهيتفقس، وفى الحالة ده كل الناس هتعرف انه عصفور، ومحدش هيتكلم قدامه عن حاجة، وغالبا هيخرج من العصفورية، يعنى كإنه برضه مش موجود.
وفى كلا الحالتين.. مفيش عصفور، بمزاجه أو غصب عنه!!
عصفير مصر للأسف الأيام دي بتكتر وتزيد
بس شباب مصر أدها لازم نعمل حاجة نإضي بيها عليهم وأعتقد إن الموضوع وضح بعض الحجات إل ممكن نعملها بس أنا عندي شوية شعرات ممكن نضفها
زي إديلو صبونة ،هويه ، نفض ، طنش ، بلع و ممكن إديلو ملخية ،زحلأ ....بسإزا الشعب مشي على الوضع دة على الأأل هنتخلص من كمية أليلة منهم
mlake_el7ob2010@hotmail.com
ما اسخف هؤلاء الاشخاص
بجد نفسي اعرف هو ده بيبقى مرض عندهم
ولا هما بيعملوا كدة ليه
وازاي الناس اللي بيشغلوهم في العصفورية بيعرفوا ان دول ينفعوا يبقوا عصافير
انا شخصيا جربت عصافير الكلية
وعصافير الشغل (في الصيف اللي فات)
وما اسخفهم من اشخاص
والمصيبة ان في ناس منهم اتفقسوا
بس لسه مصريين يشتغلوا نفس الشغلانة بمنتهى البرود
ربنا ياخدهم كلهم همه وعصافيرهم وغربانهم وحداياتهم فى يوم واحدقولوا آآآآآآآآآآآآآآآمين
هما للاسف معظمهم مش قابل اللي هو بيعمله.. معظمهم مجبر على كدا .. يعني من الاخر ممسوك عليهم ذلة
ما بلاش سيرة العصافير وخلوها فى حالها
على فكرة فى عصافير جديدة نزلت السوق خلوا بالكم منها كويس وهى عصافير الحزب الوثنىودول مجموعة من المنتفعين من الحزب تلقيهم فىكل قريةاو مدينةودول بقى شغلهم جديدقوى مشبيوصلوا الأخبار للحزب دول بينشروا الأخبار الى عاوز ينشرها الحزب ودول اخطرلأنهم بيضحكوا على الناس فى القرى وشوفتها فى انتخابات الرئاسةكانوا بيقولوا للناس ان حسنى بيه حميهم من الحرب
وانه هيعين الشباب وان ايمن نور عميل لأمريكاوقدروا انهم يكسبوا بكدة أصوات الغلابةوانصاف المتعلمين وبعد كدة ظهرت عليهم نعمة الأنتخابات اشى محمول واشى عربيات وهام جراااا يا رب يخدهم هما والحزب فى ساعة واحدة
ابو اسامه والله كلامك كله صحيح 100%..نفس الكلام سمعته من بواب عمارتنا وهومن الشرقية ..تتصور ان عملاءه من الحزب الوطنى ..يقولواللناس هناك ..بالحرف الواحد...( ان مبارك حايش عنكم بلاوى ولولاه اسرائيل حتدخل بلدكم ويقتلوا فيكم ويطردوكم..وكويس انكم لاقيين مكان يأويكم ..انشالله تاكلم لقمه واحده فى اليوم او حتى متلاقوهاش أحمدوا ربنا انكم لسه عايشين..وكل الناس اللى مرشحه نفسها معاه خونه عاوزين يشيلوه عشان هو بيحب المصريين )..تتصور نفس الكلام سمعته صديقه لى من الشغاله وهى من المنوفيه..وطبعا عملنا المستحيل عشان نصحح أفكارهم..والآن هم ينتقدوا أبناء بلدهم...اللى يبقى مش لاقى لاشغل ولاحتى ياكل ويقول ربنا يخلى الريس هوه اللى آوينا...شفت الكارثه..يضللوا الغلابه الجهله..بنشر عملائهم فى كل الكفور والنجوع ... آآآآآآآآآآآ ياوطنى طالتك يد الفساد ..وكثر فى سمائك نباح الكلاب لالالالالالالالالالالالالالالا للقرصان وسلالته وعصابته..ونعم..نعم..نعم..لثورة الجيش والشعب على الظلم والفساد..اللهم اجعله يوما قريبا..آآآآآآآآآآآآآآمين
والله الواحد مش عارف يقول في الناس دي .. نفسي اقراالافكار عشان اعرف هم بيعملوا كده ليه ... يعني لو الموضوع مغري ماديا ولا اجتماعيا ولا اي حاجة .. بالعكس الناس اللي بتعرفهم دايما بيكون في شيء من الاحتقار للنفوس الضعيفة دي ... اكيد الناس مش زي ففيلم احمد زكي في البرئ لما كان معتقد انه بيحارب اعداء الله والوطن اللي ممكن يقتل في سبيل حاجة زي كده ...
طب ده راجل مزنوق في القرية مش لاقي حتي العيش فضلا عن الجرنال ولا الراديو واول جزمة لبسها كانت البيادة وله حق انه ميعرفش اي حاجة في اي حاجة ... لكن الناس دي مش حاسه باللي اناس عايشاه .. كمان بيحسابونا علي راينا اللي بنفضفض بيه بينا وبين بعض ...
يعني من الاخر المواطن المصري لازم يتحول لسلك كهربا .. مش في انه رفيع ومزنوق جوه غلافه لا لانه ماشي جوه الحيطة لان في الزمن ده حتي اللي جنب الحيط بيداس ..
بجد لا حول ولا قوة الا بالله
سلام