لو كنت مكانه!
لو كنت مكان هؤلاء.. أسماء كثيرة تدور في ذهني لأجرب معها هذا السؤال.. بداية من السيد الرئيس، ونهاية ببائع الأنابيب وطرقعاته الغبية على أنبوب البوتاجاز الأغبى الساعة 7 صباحا..
19/05/2006
الإفيه القبيح الدارج بين الشباب المصري، هو أن يرد عليك الشاب من دول أول ما تقوله في سياق كلامك وبدون قصد وبشكل عفوي جدا : أنا لو منك..!
يرد عليك لحظتها بسرعة وعلى وجهه ابتسامة خبيثة ونظرة شريرة لا تخلو من القباحة : يا راجل متقولش كدة، تبقى مني إزاي.. إنت من أبوك طبعا..!
لأسباب تتعلق بأنني لا أحب أن أسمع مثل هذه الجملة فقد حرصت أن يكون عنوان المقال بعيدا عن هذه الجملة وإن كنت أقصدها، بمعناها الطبيعي طبعا بعيدا عن القباحة!
المهم، باعتبار أن (لو) تفتح عمل الشيطان، وبما أن عمل البني آدمين مش نافع مع حكومتنا، فقد "خطر" على بالي، أن أفتح باب الشيطان بسؤال يحمل اسم (لو) الشيطانية.. ولسد الباب على الشيطان الماكر.. فهذه "أعوذ بالله من الشيطان الرجيم" قبل البداية.. إذن فأنا في أمان منه..
لو كنت مكان هؤلاء.. أسماء كثيرة تدور في ذهني لأجرب معها هذا السؤال.. بداية من السيد الرئيس، ونهاية ببائع الأنابيب وطرقعاته الغبية على أنبوب البوتاجاز الأغبى الساعة 7 صباحا.. وندائه الشهير.. أنا بيب!
تعالوا أخبركم ماذا فعلت (لو) معي بعد أن جربتها مع هؤلاء..
لو كنت مكان بائع الأنابيب إياه لبعتها في أي توقيت آخر غير الصباح الباكر، ولفكرت قليلا أن لا جدوى لبيع الأنابيب الغاز في منطقة معروف عنها أن كل منازلها ركبت غاز طبيعي منذ ثلاث سنوات على الأقل!
لو كنت مكان بائع الجرائد لرفعت سعر الجريدة نصف جنيه بدلا من الربع جنيه الزهيد الذي يرفعه في السعر يوميا منذ أن وقف على ناصية شارعنا.. والسبب أنه حتى الآن مازال يبيع ويكسب، ومازال كل المشترين ينصاعون له ولغشه وسرقته، فطالما أنهم مستسلمون فما المانع من رفع السعر أكثر.. وأكاد أقسم أنهم سيشترون، ولن يفكروا لحظة في أن يتمشوا دقيقة واحدة للأمام، وشراء الجورنال بسعره الطبيعي من المكتبة القريبة.. لو كنت مكانهم.. لفعلت ذلك!
أشعر بمللك.. أنت لا تريد أن تعرف أفكاري تجاه بائعي الأنابيب والجرائد، أنت تطمح في أن أقول لك ماذا سأفعل لو وضعت نفسي مكان شخصيات أكبر وأعظم وأهم..
طيب..
لو كنت مكان الريس لنزلت للشارع (بجد) وسألت أي عيل صغير عن رأيه (الشخصي) في ذاتي الفقيرة الضعيفة، وبعدها سيكون القرار الحكيم (الأول) الذي أتخذه هو أن أتنحى عن الرئاسة وأتركها.. لأني سأكتشف من كلام العيل الصغير إني أحكم شعب لا يحبني..
ولو كنت مكان السيد النجل نجل الرئيس، لانتهزت فرصة تنحي أبي، وأخذت مكانه، عاملا بصوت الشيطان الرجيم، الذي سيوسوس في أذني لحظتها (هو بيوسوس من زمان على فكرة).. يا عم نط ع الكرسي، الشعب ده مش هيتحرك أبدا!
لو كنت مكان رئيس الوزراء ووزراءه، لوقفت في مجلس الشعب، وطلعت على التليفزيون، وقلت للشعب الحقيقة كلها، من غير أرقام ولا احصائيات ولا دراسات مش مفهومة.. أقولهم على كل حاجة.. عشان يبقوا فاهمين.. ما أنا كل ما أقولهم حاجة يكذبوني.. يبقى أقولهم الحقيقة.. وبرضه مش هيصدقوا.. وأبقى خلصت ضميري قدام ربنا!
لو كنت مكان الإخوة رؤساء تحرير صحفنا القومية، لقفلتها بالضبة والمفتاح، ورجعتها لورثتها وأصحابها الأصليين أولاد مصطفى وعلي أمين، والست فاطمة اليوسف (روزا) وأحفاد بشارة وسليم تقلا.. هما بقى يتصرفوا فيها.. ما هو أصدق حاجة في الجرايد دي حاليا هي صفحة الوفيات.. وهي كمان أحيانا بتكذب.. تكتب أسماء غلط.. ومجاملات على الفاضي.. يبقى نقفلها ونوفر!
أما بقى لو كنت مكان إبراهيم عيسى رئيس تحرير أهم جورنال معارض في مصر (الدستور) كنت هبطل أقول للناس إيه الحاجات اللي بايظة في البلد، وكنت هكتبلهم شوية (صغيرين) عن الأشياء العدلة (أكيد في حاجة واحدة عدلة) اللي في البلد.. الناس زهقت وقربت تنتحر.. يبقى نبث في روحهم شوية أمل!
وطبعا أنا من زمان حاطط نفسي مكان كتاب معارضين كتير، لو كنت مكانهم لنزلت المظاهرات، وعملت حاجة صادقة بجوار الكتابة، أغرب شيء بدأت ألاحظه إن كل اللي اتضربوا في المظاهرات صحفيات بنات.. معنى كدة إن الرجالة مبتنزلش.. أو بتنزل ومش بتضرب.. بصراحة لو كنت مكان أي صحفي معارض في مصر هعمل بالظبط زي ما عمنا محمد القدوس بيعمل..
ولو كنت مكان فرقة وسط البلد وفرقة حبايبنا وعلي الحجار وعمرو دياب ومحمد منير، هقعد أعمل أغاني للقضاة، وأغني لمصر اللي بتتولد من جديد في ساعة ضلمة ما يعلم بيها إلا ربنا.. كنت هغني لزكريا عبد العزيز، وأخفف عن زوجة هشام الباسطويسي المريض بأغنية، وأقول لمصر كلها مين هما محمود مكي والخضيري وأحمد صابر!
أما بقى لو كنت مكان القضاة، لعرفت إن المعركة لسة منتهتش، وإنها يا دوب ابتدت، وعرفت إني قائد معركة تحرير مصر بجد من سنين طويلة (من قبل مبارك حتى) اتحكموا فيها العساكر ورقد النسر فوق العلم ومحدش عرف يزيحه!
لو كنت مرشد الإخوان كنت قلت للشباب كلهم ينزلوا يباتوا في ميدان التحرير، ولعملت دعوات لعصيان مدني حقيقي، وكنت أركز إني أفهم الشباب يبطلوا يرفعوا المصحف في المظاهرات التضامنية مع القضاة، عشان المعركة دي مش معركة الإخوان والمصحف بس.. دي معركة وطن ودولة عايزة حد يحررها..
وكنت قعدت أفكر هو أنا ليه الناس عمالة تتهم الإخوان عمال على بطال باتهامات غريبة وقديمة وملهاش لازمة، وليه أنا مش عارف أغير خطابي وأخليه أكثر عصرية!
وكنت كلفت شوية دكاترة جامعة من اللي في الجماعة يعملوا برنامج سياسي محكم للجماعة.. الناس عمالة تنتقد كلام الإخوان الممطوووووط اللي من غير برنامج منذ فجر التاريخ.. ما نعملهم برنامج عشان نبقى شغالين على نور.
أما بقى لو كنت مكان الإخوة في اليسار المصري العزيز، كنت فكرت أستغل أدواتي أكثر.. وأقرب من الشارع أكثر.. وأتعلم يبقى عندي قدرة على الحشد زي اللي عند الإخوان، وكنت أتنازل عن كل خلافاتي التاريخية.. على فكرة.. أنا هعمل الموضوع نفسه لو كنت من المرشد..!
الموضوع كبر..
وأنا بكتب الموضوع كنت بهزر.. مكنتش فاكر إني هقعد أتقمص كل الناس دول.. على العموم أهي فرصة الواحد برضه تاخده الجلالة لما يبقى مكان الناس دي.. وإن كان إحساسي بيقول إن الموضوع مش سهل للدرجة دي.. ما هو لو كان سهل كان واحد منهم على الأقل سمع الكلام ده (أكيد بيسمعه من زمان)..
وأنت بقى..
لو كنت مكان أي حد تاني.. كنت هتعمل إيه..
أنا لو كنت مكانك.. كنت أكتب كل أفكاري.. وأبعتها في تعليق!
عدد التعليقات : 30
• عملاق الرواية.. فوق المدفع
• أول قرية مصرية.. على الإنترنت!!
• عندما يتحول لاعب إلى .. افيهات!!
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
لو كنت مكان عصام العريان كنت دعيت لمناظرة مع اتخن راس يساري في البلد
لو كنت مكان فهمي هويدي مكنتش سبت اي كاتب عبيط يشكك في معتقداتي
لو كنت مكان دكاترة الجامعة كنت خليت نص المحاضرة قيم مبادئ ومثل والنص التاني منهج دراسي
لو كنت مكان عبدالله كمال كنت ولعت في نفسي
او رميت نفسي من الشباك لاني مش هطيق نفسي وانا منافق اوي كده
لو كنت مكان عماد متعب كنت بعد كل جول بينت فانله تحت الفانله مكتوب عليها ربنا يكرمك يا بابا ويا ماما
لو كنت مكان تامر حسني كنت اكسفت اوي
كفايه كده لحسن انا طولت
لا للتمديد ...لا للتوريث...نعم لتعديل الدستور
لو كنت مكان القضاه لاضربت عن العمل حتى عزل وزير العدل .
لو كنت مكان اعضاء مجلس الشعب لاحترمت نفسى وموافقش على القوانين سيئة السمعة عمال على بطال زى الاهبل .
لو كنت مكان وزير الداخلية لانكسفت على دمى ده لو عندى دم اصلا من اللى حصل من الامن وضربهم للمتضاهرين بطريقة همجية واستقلت من الحياه كلها .انتحار يعنى
لو كنت مكان حسن صقر لقدمت شوبير وشلتة بتوع تذاكر بطولة افريقيا للنيابة .
لو كنت مكان جودت الملط لاعلنت التقرير السنوى على الهواء فى مؤتمر صحفى عالمى واتقدم باستقالة مسببة حتى يتم تقديم المسئولين عن الفساد للمحاكمة .
لو كنت مكان حسنى مبارك اعمل حاجة من اتنين اما استقيل واريح الشعب منى او أأمر باعدام 90% من الشعب المصرى اللى واجع قلبى ومسبب لى الصداع علشان ارتاح واسيب الحكم لابنى وانا مطمئن عليه هو واولاده من بعدى لانى لو معملتش كده الشعب هيبهدل اللى جابونى انا وعيلتى علشان كده لازم اختار الحل التانى وهو اعدام الشعب المصرى علشان الدنيا تبقى رايقة وهاديةومفيش مشاكل واولهم البراء اشرف هو وبتوع ولاد البلد علشان بيقولوا عليا كلام مش مريحنى وبيفتحوا عين الشعب على كل اللى بعملة انا والمدام وعيالى
لو كنت مكان حبيب العدل كنت قرأت قرأن علشان أعرف إللى مثلى ها يكون عقابهم أيه على دعوة المظلومين عليه
لو كنت مكان حسنى مبارك كنت إستكفيت بهذا القدر من الحكم المخزى والنهب والتهريب وكراهية الشعب ليه وعرفت إيه إللى إتعمل فى فرعون لما طغى وكنت سبت البلد وأخذت الحرمه معايا والعيال علشان أريح مصر كلها من أى أثر ليه
لو كنت مكان جمال مبارك كنت إستكفيت بإللى نهبوا أبوية ليا وإللى أنا نهبته والعز والجاه إللى أنا عايش فيه وسبت مصر إللى أصلاً ليس لك أى ولاء لها أو لشعبها وعشت فى بلد أمى إنجلترا
لو كنت مكان رئيس مجلس الشعب كنت إنتحرت من تأنيب ضميرى على القوانين الفاسدة إللى بيمررها والتجاوزات والنصب على الشعب
لو كنت مكان نفسى كنت هارفض كل هذا الفساد بكل الطرق وأطلب العون من الله أن يريح مصر ويطهرها من فسادهم اللهم أمين آمين يارب
لو كنت مكان حسنى مبارك كنت هابطل أصبغ شعرى وأشد وشى وكنت هاعتبر أحلى شد وش أنى أرى مشاكل شعبى وأحلها وأعمل مشاريع للشباب وأتقى الله فى شعبى وساعتها ها شوف مدى حب شعبى ليه وإللى يشوفنى هايلاقينى أحلى واحد ساعتها وها يتمنى أنى أكون شباب علشان أحكمه أكثر وعلى فكرة كمان مكنتش ها أخلى إبنى يحكم علشان أدى فرصة للشعب إنه يختار إيلى هوه عايزه
انحيازك للاخوان باين اوى في المقال
مقال ذاتي بالدرجة الاولى
فيقوم به ليبرأ ذمته أمام الله سبحانه وتعالى والآخرين يحاسب كل منهم عن دوره في مكانه
لو كنت مكان الريس : كنت طبعا حنكسف من نفسي علي الي عملته في البلد من خراب وضياع , وكنت هطلب من مجلس الشعب ومجلس الشوري الانعقاد لاعلن امام 73 مليون مصري اني اتقدم بالاستقالة الفورية والغير قابلة للطعن فيها او العدول عنها, لاني كبرت خلاص واصبحت غير قادر لاتولي دفة السفينة المصرية التي اوشكت الي الغرق الي قاع البحور المظلمة , وحتي اتيح الفرصة العادلة والديموقراطية لرئيس يخلفني انتخبه الشعب وبدون ادني تزوير سواء كان الرئيس القادم من الوفد او الناصري او الغد , او حتي تيار الاخوان او حتي رئيس قبطي المهم يكون اولا عادل,ثانيا ديموقراطي واخيرا يرعي مصالح الشعب المصري بموجب الدستور والقانون.
لو كنت مكان الريس ,, كنت هاموت من الخوف كل ما افكر ازاى هاقف قدام ربنا و هو بيساله عن كل بنى ادم فى البلد دى
و يبقى يقابلنى بقى هايعمل ايه !!!!
لو كنت مكانه اول ما افتكر الكلا ده
هأرقع بالصوت ؟.؟؟
لكن موضوعه جيـد بشكل عام
لو كنت رئسه الموقع دا اشيل " اسرار البنات يتكم القرف المعلقين طبعا " مع احترامي لبوبي
لو كنت مكان حسني اوعي تحوشني كنت قتلتكم يا ولاد " البلد طبعا "ازاي تتكلومو علي ابني جيمي كدا ها انتو ماكلو يخطب اللي يخطبوه
لو كنت خديجه المحروسه مراته كنت ولعت في نفسي بجاز
لو كنت حاكم دوله عربيه الحمار اللي قالي يا عربي اشيله فوق راسي
ولو لم اكن مصريا لوددت ان اكون بنيما " علي راي" واحد معدي "غير "واحد تاني "
لو كنتي تدرين ما القاه من شجن لكنتي ارفق ما اسي ومن صفح
لو كنت طهقان من الموقع دا اضغط " X"
لو كنت مكان محمد السيد كنت كتبت م>كرات عن " الحلاوه اللي اكلها ".
لو كنت مكان الإخوان المسلمين كنت عرفت أنهم الوحيدين إللى أنتخبوا من قبل الشعب بحب الشعب ليهم وبدون تزوير ولولا تزوير الإنتخابات لصالح الحزب الوطنى كانوا إكتسحوا كل مقاعد مجلس الشعب وكنت عرفت إن ثقة الشعب فيهم كبيرة علشان يخرج من فساد الحاكم وحكومته وإنهم لا زم ميخزلوش الشعب فيهم أبداً ويكونوا أقوى من كده فى أدائهم فهم صوت الشعب كله وأمله والشعب كله ملتف حولهم ولا يخشوا إلا الله
ولو كنت مكان حسنى مبارك كنت هادعو ربنا ليل نهار إنه يغفر لى كل إللى أنا عملته فى شعبى وهاترك الحكم فوراً وأرجع كل إللى نهبته من ثروة مصر وأقضى باقى عمرى فى الإستغفار والعبادة لعل الله يغفر ذنوبى
ولو كنت مكان عمر موسى ما كنتش سبت مصر كده وكنت سمعت صوت الفساد إللى موجود فى مصر للعالم كله علشان يعرفوا إيه إللى بيحصل فى مصر من فساد
ولو كنت مكان كل عالم دينى وشيخ كنت طلبت مساحة فى التليفزيون علشان أعرف الناس كلها تعاليم الإسلام السمحة ليهتدوا جميعاً
اولا الله عليك يا براء
لو كنت من مذيعات التليفزيون اللى من ايام الهجره كنت اعتزلت و سبت فرصه للوجوه الجديده(الحلوه)
لو كنت من اساتذه الجامعه المساعدين كنت اتقيت ربنا ف طلبه الدراسات العليا"(خصوصا المششتير)
لو كنت بشتغل ف قناه الجزيره كنت فجرتها و ريحت الناس منها
لو كنت مكان البيج بوس كنت انتحرت على مراى و مسمع من الشعب كتكفير عن سنين الحرمان
لو كنت مكان جمال مبارك كنت اتبيريت من ابويا و وقفت فى التحرير و قلت هذا ما جناه على ابى و ما جنيت على احد
لو كنت من نواب مجلس الشعب كنت انام ف بيتنا بدا ما انام ف الجلسات
لو كنت زملكاوىلوددت ان اكون اهلاوى(الاهلى حديد)
لو كنت بدال الظابط(المحترممممممممم)اللى هزق محمد عبد القدوس كنت قلت له الشوز بتاعتك على راسى يا استاذ
لو كنت من البراء اشرف كنت اخاف على نفسى(اهللك عايزينك يا ابنى)
و اخيرا
لو كنت منك يا مش شغللك مكنتش اجرح ف حياه الناس
يا بنتى ميصحش نشتم حد ملوش دعوه بالموضوع
مالها خديجه يا مش شغللك علشان تشتميها
مش قلنا بلاش خصوصيات الناس
لو كنت مكان تامر أمين كنت سبت برنامج البيت بيتك علشان مقرفش الناس فى عيشتها أكثر وأكثر بمنظرة المستفز
لو كنت مكان سوزان مبارك كنت بطلبت أظهر فى أى مكان علشان شكلها عاملة زى الساحرة الشريرة
لو كنت مكان مديرى فى العمل كنت مسرقتش زيه
لو كنت مكان حسنى مبارك كنت عشت زى الشعب وفى نفس مستواه علشان أشعر بيه
لو كنت مكان الشعب كله كنت أتمنيت الخير لمصر كلها علشان أنا بحبها
اولا يا بت شوفي راس العنوان "لو كنت مكان " يعني مش انا بطلي بقي "عيش نمله تاكل سكر " سلام يا سكر .
وبعدين هو انا شتمتها دا انا مدحت فيها يا باي ..دي هيدي .
اه لو كنت نوفا كنت اتقرعت من المششتير .
لو كان بإيدى كنت منحت كل شاب فرصة عمل علشان أقدر أوفر له دخل وكنت شعرت أن الشباب ثروت مصر ولا زم أحافظ عليها وكنت أعطيت الصحراء كلها للشباب علشان يزرعوها ويبنوا بيوت ليهم يعيشوا فيها بقروض ميسرة بعد توفير الإمكانيات ليهم
لو كان بإيدى كنت أعدمت كل واحد حاول فى يوم من الأيام يهمش الشعب ويزور الإنتخابات لأنه ده قتل لآراء الشعب كله لمصلحة قله فاسدة
لو كان بإيدى كنت أقلت كل العواجيز الذين شاخوا وكانوا سبب فى فساد مصر
لو كان بإيدى كنت عقدت إجتماع شهرى فى مكان عام مع الشعب علشان أسمع منه من غير أى وسيط وأشعر بمشاكله وأحلها
لو كان يإيدى كنت سبت مصر كلها علشان مش هاقدر أعمل حاجة من الحاجات دى فى الوقت الحالى ومش طايقة الحياة بالصورة دى فى مصر
سيدي الرئيس .. أنت جبان
أراك تلتصق الآن في مقعدك الوثير، وتثبّت عينيك على الشاشة الصغيرة، وترتعش يداك وهما تتعّرقان حول سمّاعة الهاتف، وقد جاءك صوتٌ من أحد كبار الكبار يطمئنك بأن كل الأمور على ما يرام، وتمام يا أفندم، فقواتك الباسلة، يا صاحب الضربة الجوية الأولى، اخترقت بشجاعة منقطعة النظير جيشاً عرمرم من شباب صغير ومرهَق من السهر استعدادا للامتحانات، ثم لبى نداء قضاته الشرفاء.
كانوا عشرة على الرصيف، وجنودك الأبطال أكثر من تسعمئة يحاصرونهم. القانون يقول بأنه يتم القبض على مخالفيه، ثم يُعْرَضون على النيابة. أما قانون الجبان فيطلب من كل ثلاثين أو أربعين كلبا محاصرة مواطن واحد، ثم القائه أرضا، وركله بشدة في كل أنحاء جسده حتى يتورم، وتنفجر من مساماته دماء حمراء قانية.
أراك هاربا في ايطاليا أو ألمانيا أو المغرب أو شرم الشيخ، وأتحداك أن تخرج في موكب مخترقا شوارع العاصمة ولو كنت في حماية أمريكا واسرائيل وكل كلابك الذئبية المفترسة.
أقدم اعتذاري الشديد لكل الطيارين الأبطال الوطنيين الذين رعتهم سماء مصر في السادس من أكتوبر عام 1973، وأقول لهم بأن هذا الرجل ليس منكم وليس مِنّا.
لعلك كنت تستلقي من الضحك على غضروفك الذي آلمك عندما بلغك نبأ تحرش ضباطك وجنودك بفتيات مناضلات أصغرهن أكثر منك شجاعة، وأعمق حبا للوطن، وأقرب لروح السماء منها لتراب الأرض.
انتقدتك كثيرا، وكتبت عنك ما ظننت أنه يفجر الماء من الصخر، ولكنني هذه المرة أحمل لك رسالة من سبعين مليونا من المصريين، ومعهم ستة ملايين مغترب منعهم ظلمك أن يدلوا بأصواتهم في الانتخابات الأخيرة خشية أن يكون الوعي قد أصابهم، والخوف من زائر الفجر قد زال عنهم في الغربة.
الرسالة التي أستطيع أن أختصر لك فيها ربع قرن من حكمك العفن والت
اقرأ بقية التعليق ..
أنا بأقول آهو لاسرائين .. العين بالعين والسن بالسن واللابالم باللابالم..والعالم كله سامعيني .أنا الإجز بتاعي مفقوع من زمان .. يعني من الآخر نفيش حد فيك ياعالم هايصيع علينا إحنا المصريين ..إحنا اللي راضعين لبن الحزن والسواد الاسود من يومنا فكل شعب يحترم نفسه ويلزم داره .. أنا بأقول أهوه... كانت هذه فقرةمن خطاب السيد الرئيس أحمد فؤاد الفاجومي .. وحيث اهتمت وكالات "الأمباء" العربية والعالمية وأذاعت فقرات مطوله منه.. بينما استنكر رئيس الوزراء الاسرائيلي عامير شارون تصريحات الرئيس المصري الفاجومي واعتبرها تحريض على كراهية اسرائين وانها بمثابة تهديد بالحرب .. وفي تعليق على الخطاب صرح السيد / بلال فضل رئيس الوزراء بأن الحكومة ستضع خطاب الرئيس الفاجومي على حجرها وتعتبره خطة للمرحلة القادمة في صفحة قلمين اللي لو مضحكتش فيها على الحكومة مش هاتضحك عليك.. هذا وقد أشاد الأستاذ/ بوتاجاز القط رئيس تحرير صحيفةالخيار بحلاوة بيان وجمال سنان الرئيس الفاجومي وكشف سر الخطاب أن الرئيس الفاجومي دعاه إلى القصر الجمهوري في المقطم وطلب منه أن يمسك له السلم الخشب " أي والله حصل" علشان الرئيس يطلع عليه إلى سطح الأحداث الساخنة وأنه كان مرافقا لسياته وشاهدا على كتابته الخطاب بعد ما رزع طبق البامية المقمعة وحبس بسيجارة محشية ووراها كوباية شاي مغلي والجلالة نزلت عليه ونتش الخطاب بعدها...وحيث قارن الأستاذ/ عبدالله السروال رئيس تحرير مجلة بربسكول بأن الله كان رحيما بالبلد حينما أزاح عنها الكابوس الذي ظل جاثما على وركها وانكشح الحزب البطني ولم عزاله بعد طول معركة كفاح قاده وحده وسط الزلازل والأعاصر والعصير هو وزملاء الكفاح المشلح بوتاجاز القط وابوفاضلة والرعيل الأول ابو الأنفاع وأبو الأرجاب وابو الأسعاد من قبل
اقرأ بقية التعليق ..
اعتقد ان كل انسان محطوط في مكانه الصحيح
ومحدش يقدر يكون مكان حد
يعني انت لو مكانه واسمك حسني ومولود في المنوفية وعندك79سنة حتعمل زيه بالظبط
ولو اسمك نظيف وماسك الحكومة من سنتين وورئيسك اسمه حسني والوزراء بتوعك هم ....و.....و...
حتعمل زيه برضوا
الاحسن من كدة ان كل واحد يحاول يصلح نفسه ويغير نفسه .....
لأن محدش يقدر يجيي مكانك دلوقتي او يصلح اللي انت بتعمله...
انت اقدر واحد على تصليح وضعك...
ولو ده حصل ...الدنيا كلها حتتصلح
ملحوظة :
انا معرفش الاخت اللي كتبت فوق ان اسمها "واحدة وخلاص" ....
"" ويا ريت تغير اسمها""
هوة فيه حد من الشعب المصري ينفع يكون مكان البهوات اللي فوق ولا الناس باين عاليها اتجننه عشان واحد زى يحلم يكون مكان المبارك !!!!ليه هوة انا مجنون طب والله لو اتعرضت الوزاره لالالالالا الوزارة ايه لو الرياسه كلها ما هاوافق ده وجع دماغ يابا اوعه حد يفتكر الرياسه بتاعه المبارك لالالالالالالاوالف لالالالا ده غير قابل للتحقبق اساسا ولا حتي للحلم اقصد رياسه الكتاكيت ما اصل انا حاطط نفسي مكان ديك رزل ورخم علي الكتاكيت والفرخه بتاعتي عايزة ابني يمسك مكاني
اصل انا واخد مكان ديك عايز كل اللي حواليه فراخ من غير انفلونزة الطيور والفرخه العتقييه مراتي يعني عايزة الكتكوت جي ده ابني الرخم التاني ما هو اصل انا الاول وبعدين هوة التاني وفيه التالت والله لو ما الكتاكيت اتلمت وخلو ابني جي التاني ياخد مكاني لاكون مخلف كتكوت تالت علي كبر وياخد الرياسه من بعد التاني وبكده يكون عيله الكتاكيت والديك الاكبر المبارك فازوا بالعشه كلها بس من غير كتاكيت ولا فراخ عشان كلهم ماتو فداء للكتكوت جي ونجله الكتكوت 0000 اي حاجه واللخ ما اجعله خير
يا عم مافيش حد ممكن يكون مكان حد كل واحد بيمثل مصالحة فقط. النظام كدا مافيش قواعد ولا قوانين تحكم العلاقات بين الناس. قانون انا ومن بعدى الطوفان هو السائد.
عشت 4 سنين من حياتى بجد فى الخارج عمرى ما حسيت بالغربة...انا هنا غريب جدا...
لو رجعت الأيام مرجعش تانى ابدا....
كنت سكنت فى بلد تانية غير البلد اللى ساكنة جوايا....
على فكرة الحل مش فى تغيير المسؤليين بس الحل فى تغيير طريقة ادارة البلد كلها....
يااااااااااااااااااااااااة
داحنا عبط عبط وهبل هبل
تخيلوا يا جماعه انى قطعت يوم الخميس مسافه600كم هى المسافه من بلدنا للقاهره رايح جاى علشان اشارك واشاهد ذلك اليوم المفصلى فى تاريخ مصر
ذلك اليومالذى دعت اليه جميع قوى المعارضه فى مصر
وكان عزائى الوحيد لما وصلت التحرير انى لقيت هبل كتير زيى صدقوا كلام الجماعه الجورنالجيه اللى شنفوا اذانا عن اتحاد وتلاحم جميع قوى الشعب فى هذا اليوم المهم لا انكر انى خرجت من هذا اليوم بمجموعه حقائق كانت هى عزائى الوحيد ولازم تعرفوها مع القسم بالله العظيم ان كلامى بامانه يا جماعه
1-الاخوان المسلمين عبارة عن كارت بتلعب بيه الحكومه فى الوقت المناسب انما ليس لهم اى دور فى واقعنا السياسى فى البلد وهما عارفين كدة كويس وللاسف مش عاوزين اكتر من انهم يكونوا كارت
2-الجماعه الجورنالجيه بتوع جرايد المعارضه ناس شغلتهم الحقيقيه انهم يبيعوا هموم الناس للناس بس ويكسبوا منها ولا يهمهم اى شيىء اخر والدليل انى رايت بنفسى اطول اقصر مسافه فى العالم وهى مسافه ال15م الفاصله بين سلم نقابه الصحفيين(حيث مظاهرة الهبل اللى انا كنت منهم ) وقاعه الاجتماعات حيث اجتماع الصحفيين تلك المسافه كانت اكبر بكتير من المسافه بين القاهرة وبلدى
3-الشعب دة شعب غلبان اوى ونفسه يعيش دونما اى استعداد للتضحيه علشان كدة اللى بيحب الشعب دة يسيبه يعيش من غير ما ينغص عليه حياته
4-محمد حسنين هيكل اول كاتب محترم فى مصر والوحيد اللى قال الحقيقه فى الفترة السابقه وان لم يشارك فى اى خطوة بنفسه
5- الف الف مبروك للوريث القادم وربنا يبارك لنا فيه ويحنن قلبه علينا
سلمولى على كل قوى المعارضه فى مصر
مهما سطعت الشمس فسوف تغيب.
مهما طال الليل فالفجر قريب.
لن أقول لو كنت مكان فلان كنت عملت كده أو معملتش كده.
معلهش إننى سأتوجه الى الله الحى الذى لا يموت أدعوه أن ينشر رحمته على العباد و يعجل بالفرج اللهم آمين يا رب العالمين...
لو كنت مكان اى مذيع بيقابل الريس كنت بجد سألته يا سيادة الرئيس تسمح لى احرجك واسألك انت بيجيلك نوم ازاى وشعبك جعان وعريان وزهقان وطهقان وقرفان وعيان ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
او كنت اعرفك كنت ضربتك وبعدين حبيتك
ghfjghjfh hfjghfjhg fjhghskghfs lkdgf h testetetetetetetetete test test test
ghfjghjfh hfjghfjhg fjhghskghfs lkdgf h testetetetetetetetete test test test