جوامع حكومة صحيح!
ولكن التساؤل الأهم هنا هل هناك أي سند يبرر لأي سلطه في العالم أن تحدد وقت الخطب بمدد معين.. والعشرون دقيقة المحددة للخطبة ماذا يقال فيهم إذا كان الصلاة علي النبي (ص) والدعاء يستغرقون نصف هذه المدة.
22/05/2006
محمد نصر- ولاد البلد:
"لا يا عم ده جامع من بتوع الحكومة من أبو خطبه "تلت" ساعة, شوف لنا أي جمعية شرعية قدام كده"!!
هذه الجملة أصبحنا نسمعها كثيرا هذه الأيام عندما يأتي موعد الصلاة ونكون مع أحد أصدقائنا "الملتزمين" أو أحد كبار السن.
الحقيقة أن هذه الجملة ليست البداية، فالإنسان المصري من يومه ومن أيام الفراعنة وهو عقائدي بطبعه..(مع إني مش عارف يعني إيه عقائدي.. بس الدراسات بتقول كده) يشكل الدين حجر الزاوية في تشكيله النفسي فحاولت النظم الاستبدادية أن تسيطر عليه بمنهاج ديني معين.
الفجر له زوار
انطلقت الحملات الأمنية المكثفة على المساجد كما لو أن كل مسجد قد تحول إلي مكان لتجمع خلية إرهابية، حتى أرهبوا الناس من المساجد ولا أعتقد أن أحداُ يمكن أن ينسى النصائح الأبوية الخالدة من عينة "أوعى تقعد مع حد كده ولا كده وتصلى وترجع على طول" و"محبكتش يعنى تصلى الفجر في المسجد.. يا ابني لو النهار له عيونه فالفجر له زواره" !!
ولكن التساؤل الأهم هنا هل هناك أي سند يبرر لأي سلطه في العالم أن تحدد وقت الخطب بمدد معين.. والعشرون دقيقة المحددة للخطبة ماذا يقال فيهم إذا كان الصلاة علي النبي (ص) والدعاء يستغرقون نصف هذه المدة.
ويا ليتها خطبة مؤثره أو مفيدة بأي حال من الأحوال, إنما كلام معاد ومكرر لا يسمن ولا يغنى من جوع من نوعية ذكرى عطره.. وتزودوا فأن خير الزاد التقوى وطبعاً الحديث عن وجوب طاعة الحاكم.
دين بر الوالدين
وعن سيطرة الـ(تلت) ساعة علي خطب المساجد يقول إسلام الحديدي مهندس برغم أن مسجد القوات المسلحة بأرض الجولف بمصر الجديدة يعتبر أكبر مسجد في القاهرة، وأني أصلي فيه كل الصلوات إلا أني لا أصلي فيه الجمعة لأنهم "بيجيبوا" واحد شيخ من الأزهر تتوفر فيه صفتين.
الأولى أن يتحدث في مواضيع لا توجد أدنى علاقة بينها وبين ما يجري على الساحة الإسلامية أو العربية أو حتى المحلية, وأكثر موضوع يتكلم فيه هو موضوع بر الوالدين وكأن الدين كله عبارة عن بر الوالدين!
أما الثانية فهي من أكثر الأشياء اللي "بتفقعني" فيه إلى جانب أنه غير مفوه وغير طليق اللسان، إنه لما يقرأ القرآن مش بيعطش الجيم ويقرأها بطريقة الجيم المصرية غير المعطشة!
الدين برئ
مها سنة أولى آداب عين شمس : تقريباً كل يوم جمعة بفتكر الموضوع ده، لأن المسجد "الوحيد" اللي في منطقتنا هو زى ما بتقول "مسجد حكومي"، وأخويا يضطر يدب مشوار كبير جدا علشان يصلى صلاة الجمعة في مسجد يسمع منه كلمة تفيده مش كلام زى "لازم تصلى ولازم تصوم و الدين بريء من الإرهابيين".. وعلشان يبعد عن الدعوات اللي تتمنى الشفاء والقوة للريس.
أما أحمد عبد الفتاح فيقول : الحمد لله فمسجد خاتم المرسلين هو أكبر المساجد في العمرانية "حيث أسكن" والخطيب هناك هو الدكتور أحمد عبد العال أستاذ الحديث بجامعة الأزهر، وهو يربط خطبه بالأحداث اليومية والمهمة بطريقة أكثر من رائعة تذكرك بأن الإسلام ليس دين القرون الأولى فقط وإنما دين كل العصور.
بسلامته عيان.. أدعوا له!
أما بكر20 سنة فيقول: إمام مسجد صديقي حكي لي مرة وأقسم أنه عندما كان مبارك في رحلته العلاجية المتكررة الأخيرة لألمانيا طالبوه بالدعاء لمبارك من فوق المنبر، قالي أنه مقدرش يعمل كده..فطالب أحد كبار السن "المتشوقين لصعود المنبر علي حد قوله" بأن يخطب في الناس .. وقاله أن فيه ورقه صغيرة جاءت له من الأوقاف تطالبه بالدعاء للريس!
الراجل سمع الكلام ولم خطب، للصلاة مش للجواز، وجه في الدعاء والناس بتأمن وراه "آمين.. آمين".. قال "اللهم اشف ريسنا" الناس قالت "آآ..." وسكتت ومكملتش.
عفواً.. بيت الله مغلق!
أما عن المساجد التي تُفتح قبل الصلاة بنصف ساعة وتغلق بعدها بعشر دقائق اللهم إلا نادراً، وخادم المسجد الذي يظل يستعجل المصلين إذا تباطؤ أحدهم في صلاة السنن مثلاً فحدث ولا حرج، وأذكر أن فضيلة الشيخ نصر فريد واصل المفتى السابق الجريء كان قد أفتى بوضوح أن المساجد مفتوحة أربع و عشرون ساعة لمن أراد التعبد.
وعن هذه النقطة تقول مها بتقول "أنا نفسي أعانى منها.. لأني ببقى عايزة أصلى سواء في الكلية أو في الشارع و معظم المساجد بتكون مغلقة".
وإنت.. إيه حكايتك مع مساجد الحكومة..
عدد التعليقات : 17
• قهوة "بعرة".. ملتقي الكومبارس
• الأمريكان والإخوان والجنان!
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
والله برنس يا عم نصر، المسألة دي فعلا بقت مهزلة، الواحد بيتعب عشان يلاقي جامع يسمع فيه كلمة عدلو ولا يصلي ورا واحد بيعرف يقرا...
انا بقى حكايتى منيلة ومهببة ....
لأنى فى المكان الى انا عايشة فيه كان فيه مسجد فيه مجموعة من الدعاة الجدد ..
كانوا ماشاء اله عليهم بجد ...
ورمضان الى من 3 سنين دا ...
كانتالناس بتجيلهم من حت بعيدة جدا ..
لأنهم بيستمتعوا بالصلاة وارهم والتهجد الى الناس فيه أصلا بتبقى نايمة كانت الشوارع بتتقفل فيه ...
بجد كانت ايام رائعة
خدوهم وحبسوهم ...
وكمان ايه
سفروهم بالعافية .....ربنا يخدهم
"وَمَنْ أَظْلَمُ مِمَّنْ مَنَعَ مَسَاجِدَ اللَّهِ أَنْ يُذْكَرَ فِيهَا اسْمُهُ وَسَعَى فِي خَرَابِهَا أُولَئِكَ مَا كَانَ لَهُمْ أَنْ يَدْخُلُوهَا إِلَّا خَائِفِينَ لَهُمْ فِي الدُّنْيَا خِزْيٌ وَلَهُمْ فِي الْآخِرَةِ عَذَابٌ عَظِيم"
صدق الله العظيم
الجوامع كتير و الائمه مفيش
هى دة المشكله
و الائمه يا جماعه زنبهم ايه ما هما لو اتكلمو خلاص سكه اللىىيروح ميرجعش
مش كده و لا اييييييه
والزاى عزيزتي هى ما اصطلح على تسميته بحرف الزين !
ما علينا
تبادل كيبوردات يا اختي دا كمان ولاه ايه ؟؟
علي العموم السمك بيعرف يعوم " علي راي معرفش مين مش فاكره ؟؟؟"
ولزيزه الصوره دي " غيظه يعني "
يعنى مثلا كان فى شيخ كان بقولكوا كان تحب تسمع له الخطبه كلامه رزين وخطبه جميله لدرجه انه كان اكبر تجمع فيه رمضان للمصليين
مكملشي يا اخويا والراجل اتقلب وبقى حبيب الحكومه ولما يعرف ان حد بيقول عليه كده يبلغ عنه امن الدوله اللهى ربنا ينتقم من كل ظالم فيهم
مدينة نصر من اسبوعين كانت الناس تأتي إليها لتسمع الخطب فيها, اي مسجد كبير ستجد فيه خطبة جيدة. مرة واحدة (من اسبوعين) الخطباء كلهم اتحركوا من اماكنهم بأمر من الأوقاف. الليلة اللي قبلها, تقرر (فجأة) ألا يطلع المنبر أحد غير امام المسجد. فجأة لقيت نفسي حيران أروح فين ؟. أسيب مدينة نصر و اروح لحد برة ؟ و لا أسيب الجمعة بفتوى عدم اللغو؟
انا من الارياف من كفر الشيخ اة والله منها المهم كان عندنا واحد امام وخطيب بارك الله فيه وعشان كان راجل دوغري والناس حباة قامت الحكومه نقلاه بعيدددد
عارفين بعيد فين طبعا
المهم الحكومهجابت واحد من بتوع اليومين دول لا هو عارف الحلال من الحرام وكل كلامه ممكن ويجوز وكلام مبهم ولما يتزنق يقول علينا طاعه ولي الامر علي طول ولما الناس زهقت قالته بلاش تخطب الاسبوع ده من باب التغيير قال لهم لاااااااااا هاطلع غصب عنكم
وجاب الظابط وخلاه يطلع والراجل اللي قله بلاش تطلع رااااااااح في الكزوزة
الخبر ده انا لسه سمعه طازة
تيس العابدين اااسف زين العابدين بتاع تونس عمل الجوامع الالكترونيه وكل واحد هايروح الصلاة ياخد معاه كارت عشان يخش الجامع والكارت للخمس صلوات بس والجمعه ليها تصريح خاص اللي هايكون برة البلد اللي الكارت بتاعه يعني في بلده تانيه جوة تونس مالوش ان يخش الجامع اللي قريب منه ولما سالوا وزير الداخليه قال لازم العمليه تتنظم الدخول والصلاة مش فوضه
وكل الناس لازم تصلي 5 صلوات توفيرا للوقت 0
الموضوع ده بجد وبدا تطبيقه في بعض المدن التونيسيه زي عندنا ما هايبدءو في الاذان الموحد