خارطة التهييس.. لأيام التدبيس

قررت أنا الموقعة أعلاه أن أقدم خريطة جديدة لحل أزمة الإمتحانات قد ترى سعادتك فيها تهديد لمستقبلك أو مستقبل كل من يراها، إذا كنت شايف أن في مستقبل أصلا..

30/05/2006

أميرة قاسم- ولاد البلد:

يعني أيه إمتحانات.. طبعا كلنا عارفين أن إمتحانات يعنى شعور بالأزمات.. حالة نفسية تقدر تقول كده "زي الزفت"، كم كبير عمره ما يخلص من الإحباطات، ده غير المزاج اللي مش رايق والإحساس السريع بالملل حتى من قبل ما تعمل أي حاجة...

ده غير التدبيس.. أشي تدبيس ورق علشان المذاكرة.. وأشي تدبيس ورق لزوم البرشام.. وأشي تدبيس ورق علشان مذاكرة حبيبة القلب وبنت الجيران.. ده غير أصلا أن الإمتحانات نفسها عبارة عن تدبيس، بمعني ان الإنسان إتدبس في التعليم من غير حول له ولا قوة.

ورغم أن الفترة دي الواحد بيكون محتاج فيها صفاء نفسي، مش صفاء صاحبتك، وروقان وهدوء الأعصاب، إلا أنها أكتر فترة بنكون معرضين فيها للكلاكيع النفسية اللي بتظهر من غير قصد.

خارطة التهييس

وبما أن الإمتحانات أزمات ولكل أزمة خريطة لحلها، حسب توجيهات ماما أمريكا، وبما أني زهقت من الخرائط التقليدية بتاعت الإمتحانات علي طريقة كيف تنظم وقتك وتذاكر مش عارف كام ساعة وتنام كام ساعة، ومش عارف إيه اللي يتاكل وإيه اللي ما يتاكلش....!

فقد قررت أنا الموقعة أعلاه أن أقدم خريطة جديدة لحل أزمة الإمتحانات قد ترى سعادتك فيها تهديد لمستقبلك أو مستقبل كل من يراها، إذا كنت شايف أن في مستقبل أصلا..

إلا إني وبكل إخلاص وممنونية أقدمها إلي كل من زهق من الإمتحانات وسنينها وعايز خطة جديدة ينسي بيها الإمتحانات، وأرجو ألا تفهمني بطريقة كده ولا كده وتقول أني عايزة أضيع مستقبلك وأنجح أنا.

كلام قديم

أول البنود في خارطة التهييس للأسف قديمة وغير مبتكرة ولكن مفيش حل غير أني أذكرها علشان إخواني أعداء الحداثة وأنصار "الجسم السليم في العقل السليم" وطبعا البند ده هو "المشي والرياضة"، حيث يقول الأطباء:" أن المشي من أنجح الوسائل التي تخرجك من مود الكآبة والملل، لأنك تحرك كل عضلات جسمك." يا سلام شوف إزاي...!

فأنت وبكل بساطة ممكن تاخد بعضك وتنزل تتمشى مع حد من صحابك أو حتى لوحدك ساعتها تأكد أنك هتخرج تماما من مود المذاكرة،مش عارف مش مقتنعة ليه بالحتة دي، لأنك ببساطة شديدة هتتفرج علي نوعيات من البشر هتخليك بدل ما تعمل دماغ قهوة تعمل دماغ ناس فهتنسيك الدنيا وما فيها.

طفي النور

ما أجمل ذلك الإختراع الذي يدعوه الفرنجة بـ"السينما"، وأنا مضطر ان أنضم للفرنجة في تسميتهم لهذا الإخترع لأني بكل بساطة معرفش أسمه أيه باللغة العربية بس متأكد أنه هيطلع حاجة مكلكعة، هذا الإختراع الجبار الذي تستلزم مشاهدته اطفاء النور(ولو سمحت متفهمنييش غلط تاني).

وما أمتع السينما وقت الامتحانات، والله ليها طعم تاني، وطبعا إختيار الفيلم هسيبة لذوق سعادتك وطبيعة أفلامك المفضلة، وعلى فكرة أوعا تفتكر إنك لما تسيب المذاكرة وتروح السينما تبقى كدا فاشل لا سمح الله. ده حتى وزير التربية والتعليم الأسبق حسين كامل بهاء الدين شخصيا كان بيدخل السينما كل ليلة امتحان، هه ولا تقدر تتكلم وزير والتعليم مش أي حاجة.

الفرنجة تاني

"ميوزيك" أو موسيقى مش عارفة أيه الكلمة اللي ظهرت قبل التانية وهل العرب هما اللي ترجموها كده من "الفرنجة" ولا الفرنجة كعادتهم سرقوها من العرب، ولكن بما أن النبي عربي فخلينا نقول الموسيقى.

والموسيقي الهادية مع كوباية نعناع محترمة يعتبروا وسيلة فعالة جدا لتهدئة أعصاب سعادتك ونقلك إلي عالم تاني خالص، ويا سلام بقى لو تطفي نور الحجرة اللي أنت قاعد فيها وتسترخي تماما،مش عارفة إيه حكاية طفي النور.

ولو قلت "ايه الرومانسية دي" هيكون الرد أنك طول السنة عمال تسمع خبط وترزيع فأيه المانع تدي لنفسك فرصة في فترة الإمتحانات وتسمع حالة جديدة من الموسيقى أو الأغاني الهادية، وعلى فكرة أغاني فيروز من الأغاني اللي فعلا ممكن تغير حالتك المزاجية وبشكل سريع، وتأكد أن المود ده هيرضي حبيبة القلب عنك.. وبشدة.

جزيرة القطن

في ناس تحب تقضي وقت راحتها ع النت زى ما حضرتك عامل دلوقتى، وأكيد هتلاقي صحابك والناس اللي أنتا بترتاح لهم online ممكن تقعدوا تتكلموا في أي حاجة، طبقا لنظرية الشات الرهيبة، بعيدا عن المذاكرة والامتحانات. واللي يكتب كلمة "exam" إعمله "بلوك" في السريع.

أو لو سعادتك من هواة الـ"games" ممكن تقعد علي الجهاز تعلب لعبتك المفضلة وتطلع فيها كل طاقتك المكبوتة والغير مكبوتة وثق تماما إنه هيقضي علي كل الوقت اللي سعادتك محتاج تضيعه وزيادة كمان.

أما لو كنت من ذوي الأدمغة المصفحة ولم تفلح معك هذه الأساليب فعليك وعلي جزيرة القطن الخالدة المسماة خطأ بـ"السرير"، قلة مندسة من الناس تقولك إن النوم هروب من الواقع.. لكن أنت لا بتهرب ولا حاجة أنتا داخل تريح أعصابك، صح ولا أيه؟

وما تفكرش لا في إمتحان ولا غيره، فكر أنك هتستريح قد أيه لما تنام..

، فكر وأنت رايح تنام أنت عاوز تحلم بإيه؟، تحلم بإيه مش بمين.. ؟واخد بالك أنتا..

إلى هنا خلصت الخريطة وعليك إنك تختار أقرب خط طول أو حتى عرض مش فارقه كثير وتمسكه من أوله وتدوس، وربنا معانا كلنا وياريت يلغوا الامتحانات من على خريطة وزارة التربية والتعليم..لأن أكيد الحياة مش امتحانات بس

• دافوس.. للمرأة غير المصرية!!