هما آه.. إنتا لأ!
يكتفي المصريون بالمديح والدعوات والتعاطف للمعارضين, يقولون ربنا يفك سجن أيمن نور وينصر الإخوان.. المهم تيجي الإنتخابات يخافوا حتى ينزلوا يصوتوا، من التصويت وليس الصويت، مع أول خبر يسمعوه عن وجود الأمن المركزي قرب اللجنة!
31/05/2006
محمد نصر الدين - ولاد البلد:
كان رائعاً هذا البرنامج الوثائقي الذي أعدته الجزيرة عن المدونون المصريون وحركتهم التي أعادت النشاط إلى الحياة السياسية الميتة.. بينما كان الأروع من ذلك هو حظي السعيد الذي أتاح لي الفرصة لمشاهدة البرنامج مع أسرة مصرية بسيطة كانت ردود أفعالها وإنطبعاتها مقاربة لوجهة نظر 99,9% من الشعب المصري، علي طريقة الإستفتاءات الحكومية الشهيرة!
ردود الأفعال لم تخرج عن الإعجاب التام الذي وصل إلي الإنبهار بهؤلاء الشباب.. كان رد الفعل الأولى لهم كلمات من عينة "وأنا اللي كنت فاكر أن البلد دي ماتت والشباب بقى مغيب" و"بصى يا حاجة ده شباب زى الورد في متوسط واحد و عشرين سنة"..
"أيوة أنا دايماً بقول مش هيجى التغيير ولا الحركات دى إلا من الشباب، هوه حد ينسى 18 و19 يناير؟".. "يا قلب أمك يا إبني.. هم بيتحملوا الضرب ده إزاي"...
يعني إيه بلوج
وخلال عرض البرنامج أمطروني بالأسئلة.. "يعنى إيه بلوج؟".. هو أي حد يقدر يعمل مدونة كده؟.. هي مين "بهية" اللي هيكل بجلالة قدره إتكلم عنها دي؟.. مين الواد اللي بيضرب هناك ده؟.. وهكذا إستمرت الأسئلة من كل ناحية علي دماغ العبد لله.
وفي الوقت الذي حاز فيه مالك و براء و عمرو عزت و الشرقاوي وغيرهم على إعجاب هذه الأسرة وإنبهارهم.. ومع كل كلمة إشادة تخرج من أفواهم كنت أضحك في سرى!
فمن قرابتي الشديدة لهذه الأسرة وإبنهم بالتحديد أعلم أنهم وجهوا له كلمة واضحة بمجرد أن إشترك في الـ"دى اس ال": "مالكش دعوة بالسياسية"!!
"يا إبنى أنا عايز أعيش حياتي في سلام وإحنا مش أد الناس دي.. إنتا مبتشوفش بيعملوا فيهم إيه في السجون والمعتقلات"!!
أضعف الإيمان
ألم أقل لكم إنهم يمثلون 99,9% من الشعب المصري.. فالشعب المصري يتعامل مع المنكر من الدرجة الثالثة أو أضعف الإيمان كما وصفها الرسول (ص)..ألا و هي بقلبه.. المصري لا يفكر أبداً أن يغير بيده أو حتى بلسانه.. حتى كلمة الحق يكتمها في قلبه!!
يكتفي المصريون بالمديح والدعوات والتعاطف للمعارضين, يقولون ربنا يفك سجن أيمن نور وينصر الإخوان.. المهم تيجي الإنتخابات يخافوا حتى ينزلوا يصوتوا، من التصويت وليس الصويت، مع أول خبر يسمعوه عن وجود الأمن المركزي قرب اللجنة!
وفي نفس الوقت يعرفون أن الإصلاح و التغيير عمره ما هيجي من منازلهم، وإذا كنت إنتا مشيت طول حياتك جنب الحيط على الأقل سيب إبنك يتجرأ ويتشجع ويطالب بحقه في إصلاح بلده..
لكن لأ..
"بابا أنا رايح ماتش كورة" إتفضل يا حبيبي وإن شاء الله هنكسب، "بابا أنا رايح أحضر حفلة" متتأخرش وإنتا راجع علشان الكين اللي علي الطريق ومتنساش البطاقة وإنتا نازل.
"بابا أنا نازل مظاهرة".. أقعد يا ابن ستين (.....) رايح فين!
وتسألوا ربنا بيعمل فينا كده ليه؟!!
المهم قبل ما أنسى أكتر كلمة كانت هتموتني من الضحك بس الحمد لله مسكت نفسي، في نهاية الحلقة قال الأب "اللي مانع إبنه من السياسة": والله يا سلام لو كل الشباب يبقوا كده! بس نعمل إيه بقى.. شعب جبان!!
لسان حاله بيقول مالك وعمرو وبراء يتظاهروا ويرفعوا اللافتات ويكتبوا المدونات.. وإنتا تقعد في البيت!
ودلوقتي بقى أسألك.. هل أسرتك ماشية معاك على النظام ده بخصوص السياسة؟؟ ولا بيشجعوك ويساندوك.. ولا مكبرين ومالهمش دعوة بيك أصلا..
ولا قالولك.. هما آه.. و إنتا لأ ؟؟.
عدد التعليقات : 20
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
أنا أسرتى تفعل معى المثل بالضبط و كأنهما نسخة بالكربون فعندما قرأت المدونات و أقتنعت بما بها أعلنت لأسرتى فى كل سزاجة و براءة عن رغبتى فى المشاركة فما لقيت منهم إلا كل الرفض و الأستهجان.
نصيحة لكل شاب او بنت ناويين ينخرطوا في العمل السياسي او حتى يعملوا مدونة...اعملوا الحاجات دي من سكااااااااااات، زي ما بنعمل الف حاجة في حياتنا من سكات من غير ما اهلنا يعرفوا. لان انا اهلي حتى فاهمين وربوني على اني ارفض الظلم والكلام ده كله، بس وقت لما ببقى نازل مظاهرة بيركبهم 100 عفريت... فبنزل المظاهرة واتصل بيهم من برة ابلغهم اني في مظاهرة.
ولو اي حد ناوي يعمل مدونة بلاش يقول لأهله، مش عشان حاجة...بس عشان يكتب براحته :)
الموضوع جميل تسلم ايد اللي كتبه
بس انا حسيت ان المدونة مصيبه لا مش كده خالص
المدوننة ابسط من كده بكتييييير
كل الليعايز يعمل مدونة يعمل وميحطش في ياله حاجه خالص ويكتب كل اللي هو عايز يكتبه خلي الواحد يفضفض
يا جدعان اسداجه بادال اللي عليها نقطه يخرب بيت كدا الواحد اتلخبط , بص يا جدعان انا بحب اتفرج من بعيد علي الرغم من كرهي لمبدا البت نوفا " عيش نمله تاكل سكر " وعيش ديناصور تنقرض " خلوه "عيش اسد تاكل لحمه " , ولون يعني جربت مره اعمل بلوووووووووج بس مش سياسي "وحزفته " غتاته , السوال بقي ابويا يرضي يخلني اعمل واتكلم عن السياسه اه اه اه اه اصلوكو مش عارفين ابويا متبرع بيا , بمعني اخر نفسه يشوفني في معتقل " جوا" تناموا" طبعا " فاهمين
هو اساسا خليط علماني علي يساري علي اشتراكي يلا ربنا يخليك يا بويا , كل شويه نتكلم عن السياسه ومختلفين في كل حاجه ولما اتكلم عن مصر او مشكله سياسه يقولي "مش شغلك" ومع" زلك" ولاد البلد مش مخليه في نفسي حاجه و00000000000 علي راي الكابتن شيكــــــــــــــــو.
ولاد البلد موجودين ربنا يخليهم بس قولى هيه فين البلد محدش الق انهم باعوها ولمين ياتره محدش يعرف عليه العوض ومنه العوض
دلوقتى اصلا بقى الام والاب بيختلفوا مع بعض وكمان كل واحد فيهم عاملوا حزب لوحده واحنا توهنا وسطهم ما بقيناش عارفين الصح من الغلط
كثرت الاحزاب واشتدالفقر
لو فى الف متظاهر من كفاية فى وسط البلد فاعلم انة يوجد مائة مليون مصرى يريدون التظاهر ضد الجوع والظلم والفساد ولكن اجهزة امن الفرعون تسبب لهم الرعب حتى انهم يخشون التظاهر وهم نائمون
من قرأ منكم رسالة الشرقاوي من سجن طره هيعرف ان احنا مش هنتحرر طول ما في واحد بيضحي بنفسه و احنا في بيوتنا نايمين متهنيين
فعلا صدق عمرو بن العاص : فلا نامت اعين الجبناء
هو صحيح دي مقولة عمرو بن العاص و لا خالد بن الوليد
إت الامم الحرة لم تنل حريتها الا بشلالات من الدماء ، والاف من الضحايا من الذين ارخصوا أنفسهم ؛ لتعيش أممهم حرة أبية.
ومن ظن أن الظالم السارق المتقلب في خيرات البلاد ، سيترك كل هذا اختيارا ، فقد أوهم نفسه بالاباطيل.
أخي الكريم ، هل تريد الاصلاح ، وبناء دولة الحق والعدل ؟ إذن عليك:
1. أرد التغيير.
2. اعمل من أجل التغيير.
3. ضحي من أجل التغيير
فى عيون الشر دمعه خايفه من يوم الحساب يوم ماكل الشعب يصحه يخوض التحدى بجد وايمان بدون محسوبيه بدون امتهان بدون المعارضه لحقك يابلدى يا ام السلام
الموضوع فكرته جميلة جدا، وفعلا إن حالة الرعب العائلي من السياسة تصل للإنترنت مأساة...
للامام دائما أيها المحرر الموهوب
دقــــة ساعة صــوت الحق
ودق النبض معــاها تمـام
وادى الأرض اتشقــت شـــق
نــار وحجارة فـوق بركان
وف صوت واحـــد هنقـول لأ
كفاية ظلـم وأستـــــسلام
بس يا صحبى عايـــز الحق
الأيجابية مش بس كــــلام!!!
مش عارفه ليه اول ما قريت المقال افتمكرت حاجه حصلتلي في ثانوي ........كانت مدراس الثانوي وقتها بتخرج مظاهرات ...( الشهيد محمد الدرة ) ...كانت مظاهرات علي خفيف كده بس اهو الواحد كان بيتدرب برضه ..المهم مدرسه جميله كده دخلتلنا بتقنعنا قال يعني وقعدت تشتم في المظاهرات وتقول ايه الهبل ده ...حرقتلتي دمي ....قمت اناقشها وارد عليها.. .بصتلي بثقه وقالتلي يعني اهلك لو هنا دلوقتي هيرضوا انك تطلعي مظاهرة ؟؟؟؟؟؟؟؟؟؟؟.....كان متهيالها انها كده بتسكتني ....
لكن رديت وقلت ....اهلي لو هنا كان زمانهم طالعين معايا في المظاهرة ...الست معرفتش ترد
المهم......كانت اول مرة وقتها احس بنعمه ان اهلي ليهم نفس الافكار الثورجيه بلغتنا
بصراحه بافرح اوي وانا رايحه معاهم مؤتمر وللا اعتصام وللا مظاهرة .........ياه مقولكمش احساس تاني خالص واحنا ماشيين باعمارنا المختلفه من ماما وبابا ...مرورا بيا انا واخواتي اللي في جامعه ...انتهاءا باخويا الصغير اللي في ابتدائي .والله بييجي معانا
باحمد ربنا صبح وليل علي النعمه دي
الفرد في بلادنا مواطن او سلطان ليس لدينا انسان ....احمد مطر
لا للتمديد لا للتوريث .نعم لتعديل الدستور
موقف بيتكرر كل مرة بحذافيره
انا: انا رايحه المظاهرة جاية معايا
صاحبتي :لا يا ماما.. ..الحاجات دي ممنوعه عندنا ...باوامر عليا من بابا وماما ....انا مش عارفة اهلك سايبينك تعملي الحاجات دي ازاي ....ازاي سامحينلك بكده
بصراحه نفسي اسالهم ...هو انا باعمل حاجه غلط ...هو ايه اللي ازاي سامحينلك ....حسسوني اني باعمل حاجه عيب وللا غلط ...لا والجميل ان كلهم بلا استثناء بعد الكلام ده يقولولي والله بجد كان نفسي اكون معاكي بس اعمل ايه بقي
معني الكلام ده ان مش بس الاهل اللي يقولوا اه لاولاد غيرهم لكن ولادهم هما لا ...
كمان نص شبابنا بيبقي نفسه ويؤيدك في وقوفك ويتمني يكون معاك لكن عند الجد .ميقدرش يقف..جايز باختيارة لانه خايف ....اوبسبب ضغط اهله ...او جايز لانه مجربش
المهم ان العدد اللي واقف في كل مظاهرة بيبقي واقف حواليه وفي نفس المكان اضعاف عدد المظاهرة ناس بتتفرج واحيانا بتردد نفس الهتاف بس من بعيد يعني مش جوه المظاهرة ....منهم لله اللي خلوا الناس تبقي واقفه وبتردد وبتعمل نفس اللي بيعمله المتظاهر لكن من بعيد لانها خايفه
الفرد في بلادنا مواطن او سلطان ......ليس لدينا انسان.احمد مطر
يا هبهوب مش معنى انى قلته فى حكايه يبقى دا مبداى بالعكس انا مبداى الصراحه و الشجاعه
بس دا كلن سمعته و ذكرته مره بس
اللى يعيش نمله ينداس
بالنسبه لحلقه المدونون انا زعلانه موووووووووووت علشان مشفتهاش
متحسرونيش بقى
انا بقه ابويا مش عارف هوة مع مين بالظبط بيدافع عن الحكومه بكل قوة ولما اقوله يا با با ايه الكلام ده يقولي هيا بلادنا كده وهاتفضل كده
الكبير بيالكل الصغير وهكذا000000
ولما تيجي سيرة عبد الناصر يتغير ويتنرفز ع الاخر من غير اي حاجه ويقول كلام من عينه ده برقبه حسني وابنه 00000
وبعدين اقوله يابابا عبد الناصر ده هو اللي غير نظام بلد بغض النظر عن ان فيه اخطاء ولا لاء بس هوة غير النظام اللي كان ماشي
والله يا جماعه انا مش عارف اعمل ايه ف الراجل ده00000 هايجنني
المهم سيبكم من ابويا انا عايز اعرف ليه كلنا كده مانتقابلش في يوم معين لتعارف والنقاش بس لنعارف والنقاش وبعد كده نفكر نطور من الاسلوب الحالي ان شالله نوزع منشورات ضد الفاسدين اللي ف البلد
ونرجع الناس ايام الملكيه اللي انا مصر علي اننا رجعنا ليها وسيبنه الجمهوريه اللي حاول يعملها عبد الناصر
ويكون اللقاء كلا في المحافظه بتاعته عشان انا من كفر الشيخ يعني فلاح اصيل والله
ومن المحافظه نخرج للمحافظه اللي جنبنا وكده يعني
لازم نكون فاعلين ومش مفعول بينا
كله بيقول مش دلوقتى مش احنا الى هنغير
لو فضل التفكير ده يبقى سلملى على البلد
وسلملى على الاصلاح
نبدأ بفسنا ونفكر فى الاية