كنا بنلعب.. عريس وعروسة!
يقول البعض أن هذه اللعبة كانت السبب الأول في الوقوع في حب بنت الجيران.. يقول البعض ساخرا أن أي طفل يقرر لعب عريس وعروسة يجب أن يأخذ حذره ولا يقوم بإمضاء أي ورقة عرفي..
31/05/2006
"الأطفال أحباب الله " جملة أعتدنا أن نقولها عندما نري أحد غاضب من طفل ويريد معاقبته فيهدأ في الحال..
وكلما كبر بنا العمر أزداد حنينا لأيام الطفولة ونقول "يا ريتني فضلت صغير"، وعالم الطفولة عالم خاص.. واللعب أيام الطفولة له مذاق خاص.. كنا نلعب مع كل ولاد وبنات الحارة والشارع.. ع السطوح.. في مدخل بيتنا.. في الحضانة.. في المدرسة..
لعبنا وجرينا.. وقعنا وإتجرحنا.. لكن كنا مبسوطين بألعابنا الكتيرة لأنها كانت بتفرحنا وتبسطنا..
لكن فاكرين كنا بنلعب إيه؟
طبعا كانت ألعابنا شعبية بسيطة، لكنها كانت كل دنيتنا..
من واحد لعشرة
(الأستغماية) كانت أشهر لعبة شعبية عن حيل وأساليب الاختباء والهروب من بعضنا، تبدأ بأن يغمض أحد الأطفال عيونه، ويعد الأرقام من 1 لحد 10 بينما يختبئ الآخرون، ثم يبدأ هو في البحث عنهم، واللي يقدر يوصل منهم لـ(الأمة) من غير ما يشوفه حد يبقي كسبان أما لو اتمسك منهم واحد يبقي هو اللي "فيها".
أما أشهر لعبة الآن فهي (عسكر وحرامية) حيث ينقسم الأطفال قسمين، الأول العسكر أو (البوليس) والثاني الحرامية، ومع المطاردة بين الطرفين تدور أحداث اللعبة، ولا تنتهي إلا بالقبض علي الحرامية، وتسألني لماذا أصبح كل الأطفال الآن يتقاتلون علي من سيقوم بدور "الحرامية".. ربما لأن اللي بيسرق اليومين دول بيروح مارينا..
عريس وعروسة
لعبة (عريس وعروسة) من منا لم يلعب تلك اللعبة التي يقوم فيها طفل وطفلة بتمثيل دوري الأب والأم.. العريس يحب العروسة.. والعروسة تبادله الحب، كل هذا من غير أن يعرف الأطفال معني الحب إلا التواجد معا وتربية الأبناء.
يقول البعض أن هذه اللعبة كانت السبب الأول في الوقوع في حب بنت الجيران.. وما المشكلة مالها بنت الجيران، يقول البعض ساخرا أن أي طفل يقرر لعب عريس وعروسة يجب أن يأخذ حذره ولا يقوم بإمضاء أي ورقة عرفي.. خاصة بعد الحكم في قضية هند الحناوي وأحمد الفيشاوي، كما أن الدولة يجب أن تواجه الزواج العرفي في "عريس وعروسة".
أما (الحجلة) أو (نيل) فهي لعبة الأطفال الأشهر في الأفلام والمسلسلات وفيها يرسم الأطفال ستة مربعات على شكل مستطيل، وتبدأ اللعبة برمي قطعة من البلاط أو الحجارة على المربع الأول فالثاني فالثالث دون أن تلامس الخطوط أو أن تخرج من المربعات، ويحجل الطفل برجل واحدة من مربع إلى آخر حتى ينهي جميع المربعات ليبدأ في مرحلة جديدة يعطي فيها ظهره للمربعات ويقوم بقذف القطعة عليها وهكذا.
شد الكوبس
لعبة "كهربا" أحد الألعاب التي شكلت وعينا بالخوف من الكهرباء ونحن صغار، وتلعب بأن يقوم أحد الأطفال بمحاولة للإمساك بالآخرين، لكن إذا قال أحد الأطفال كلمة "كهربا" فعليه أن يتركه ويتجه لآخر وهكذا، حتى يستطيع الإمساك بأحد منهم قبل أن يقول كلمة كهربا وعندها يصبح عليه الدور.
لكي يفك الطفل حالة "الكهربا" اللي هو فيها لابد أن يلمسه أحد أصدقائه من المطاردين ويقول "شد الكوبس"، وبما أن الكهرباء أصبحت الآن شيء عادي فهناك اقتراح بتحويل اسم اللعبة إلي "نووي.. دمر المفاعل" حتى يواكب أطفالنا التكنولوجيا.
أما لعبة "نطة الإنجليز" أو "مليم واحد" فهي تصلح للأطفال الكبار قليلا، حيث يحني أحد الأطفال ظهره كما في وضع الركوع "ويحاول الباقون القفز فوقه وتجاوزه إلى الجهة الأخرى دون أن يلمسوا ظهره إلا بأيديهم فقط، وللعبة عدة مراحل مثل القفز من غير لمس الظهر بالأيدي.
صلَّح..في الرحلات
لعبة" صلَّح" هي لعبة الرحلات الأولي، وتتلخص في أن يغمض أحد الأطفال عينيه ويضع يديه خلف ظهره ويتجمع حوله الباقين، ويحاول واحد فقط منهم لمس يده الموجودة خلف ظهره أو ضربها ضربًا خفيفًا، فإذا عرف الطفل من الذي ضرب يده يأخذ الآخر مكانه وتُعاد من جديد، وإذا لم يعرف وأخطأ في معرفة الذي ضربه يبقى هو نفسه للإعادة حتى يتوصل في أي مرة إلى من قام بضرب يده.
وهذه اللعبة لم تقتصر علي الأطفال فقط وأصبحت الآن اللعبة الأكثر شيوعا بين طلبة الجامعات، يمارسونها في كل مكان.. في الحرم الجامعي.. في رحلة القناطر وإسكندرية.. ووصل الأمر أخيرا إلي عربات مترو الأنفاق..
أما "السيجة " فتعتبر الشطرنج الشعبي، حيث ترسم 9 مربعات على الأرض، ويستخدم الزلط أو الطوب ليتحرك على هذه المربعات ومن ينجح في ترتيب الطوب في شكل رأسي أو أفقي أو قطري يكون هو الكسبان.
وبالطوب أيضا كنا نلعب "الجبة"، وهي تلعب بخمس طوبات أو زلطات، يرمي اللاعب الطوبة الأولى لأعلى ثم يحاول إلتقاطها مع الأخرى من الأرض، بعدها يرمي الإثنين، ويحاول إلتقاطهما مع الثالثة من الأرض، وهكذا دون أن تقع واحدة منها على الأرض.
أما أطفال الآن.. وألعاب أطفال هذا الزمان فحدث ولا حرج من البلاي ستيشن إلي الكمبيوتر، وأخيرا لا تستغرب عندما تري أخوك "المفعوص" يقولك "هي الرجالة فين علشان عايزين نلعب بولة إستيميشن".. فهذا هو الجيل الجديد وألعابه.
الصور التالية نقلا عن جريدة الدستور :
عدد التعليقات : 45
• قناة الأمة.. نقبل أموال الربا!
• فسافس الأمور!
• في ذكري انتصار بورسعيد
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
انا عمري ما لعبت عروسه وعريس دي
كان على يمينا بنت سوريه وعلى شمالنا بنت بكستانيه كنا بنلعب استغمايه وعجل وسباق
وبس والولاد كانوا معانا بردو ياااااااه ايام
والله يا جدعان لسه بلعب صلح مع اختي وبتتريق عليا , بحب اغتت عليها فعلا بالعبه دي ممتعه جدا , ياسلام يا عم عجم " انت بتتكلم عربي الاول "لما ترجعني صغننه , استغمايه وصلح وسيجه والحاجات الكميله بردو دي , استغمايه دي كنت بلعب مع صبيان وبنات الحته نفر نفر وماما كانت تزعقلي متلعبش مع الصبيان معرفش ليه؟؟ وكنت بحب اغشهم واعمل نفسي قال ايه مش شايفاهم وبعدين نروح علي "الامه " كنت بجري بسسسسسسرعه اوي عشان الامه دي , وكمان شد الكوبس وازاي واحد يساعد التاني ويفك بلمسه باين ويقي فك اسره ويقدر يتحرك ,وكهرررررررربا , ايه تاني يا بت امممممممم في لعب بالايدين كدا ولاغنيه بتاعتها شيوكلاته شوكلاته شوكلاته يوه اي لف يو قناه السويس بناها اجددنا عيسي وعويس جاه البرنس قالنا هوس انتو النص وحنا النص وجاء مستر كاجو كاجو في وسط البناتو ناتو يا بنت الحسيني سيني هاتيلي قبلتين قبله علي اليمين مين وقبله علي اليسار سار دات الوجنتين " وايه تاني يا بت ايه ايه امممم يا طالع الشجره هاتي معاك بقره بقره صعيديه حلابه النيه تحلب وتسقيني بالمعلقه الصيني المعلقه انكسرت اي مين يداويني يارتني كنت زرته عن النبي وزرته والحج سبع مرات .. واحد اتنين ... تلاته ..اربعه .. خمسه.. سته ..."سبعه" وكل الوجوه تتلتف عشان تشوف السبعه حتيجي علي مين . "سيجه " كنت بلعبها علي الارض مبوظه الارض طباشير
وياما خدت علقه سخنه بسبب الموضوع دا اولا عشان اخواتي طيبين وانااللي بستهبلهم وبجيب رجلهم ونشترك في الجريمه سوا بس المعفين بيفتنو عليا , لن انسي لهم هدا الموقف .ياجدعان محدش عنده اللعب تاني ويبعتهالي في اميل انا دلوقتي عندي رغبه فظيعه في اشغل اغنيه فيرز يا" ليالي العمر ارجعلي".
معلش يا جدعان الاغنيه الاساسيه اهيه " كان في واحد نجار حب يصلح باب الدار كام مسمار يلزمه في تصليح باب الدار " وكل كلمه من الاغنيه يعني شخص , واللي شخص اللي تيجيه عليه كلمه "الدار" يختار عدد المسامير , عشره سبعه ,......ويتكرر العدد علي الاشخاص لغايه مايجيه عليه الرقم عشره ,سبعه , سته ,......... ويبقي هو اللي فيها . ومشفكوش فيها.
أنا بقى عمرلاي ما لعبت اللعب دي خالص غير يمكن الحجله عشان كنت عايش في الغربه ومفيش الألعاب دي في الغربه مش منتشره زي هنا في مصر
أوقات كتير بحن للطفوله والمعيله وأقعد ألعب مع صحابي بس بتكون من النوااااااااارد
بالحق هووووووبه أنتي زي العسل وحافظي على روح الطفوله الي عندك دي وأوعي تضيعيها مهما حصلل
فكرتني بايام جميلة..انا كنت بحب العب كهربا اوي وكمان لستغمايه...
بس بجد ليه الواحد مايرجعش يلعب تاني ويفرح دقايق وسط حياه طولها بعرضها مشاكل وهم وقلق
ليه بس كده .الواحد كان بيحاول ينسي ان هوكبر خلاص....قصدكم تقولوا كده ان الالعاب دي احنا كبرنا عليها بما اننا عشريناتيه وخلاص مش هنلعبها تاني ..........ايه ده يعني مفيش استغمايهتاني ولا كهربا ولا اي حاجه ليه بس فوقتوني.........مش عايزة اقولكم اني بتلكك لما الاقي حد من العيال الصغيرين بتوع العيلهبيلعبوا مع بعض بروح اغلس عليهم كاني بلعب معاهم واقعد بيني وبين نفسي ابتسم واستعيد ذكريات الطفوله ..يااااااااااه انا لعبت كده وجريت هنا وضربت الواد اخويا هنا وزقيت جارتنا هنا ..اما هنا بقي عورت اختي الصغيرة ...بجد بجد كانت احلي ايام من غير هموم ولا كابه ولا مشاكل ولا مسئوليات ولا واجبات ولا اي حاجه في اي حاجه .......لعب وبس........براءة وبس ..ضحك وهزار وبس ...كانت ايام
لماذا ةهيا العاب شب المصريون ووجدوها تعيش بينهم وهيا العاب كان تعتبر بالنسبة للاجيال الماضية هى الوسيلة الوحيدة للترفية وانها جميلة وتناسب اى انسان انا مثلا احب الكرتون حبا شديدا وارى فية نفسى وما يناسب شخصيتى تماما وارى فية الصدق ماذا يعنى هذا حتى لعبة العريس والعروسة كل النساء لعبتها حتى الرجال لانهم بهم فطرة وغريزة الامومة
اه اجمل لعبه ويسلم لما الواحد بيكبر شويه ويعيش فيها اكتر يعنى يكمل فى اعدادى وثانوى نفس اللعبه ومش ححكى ليكى بقى عن الجماعه والرحلات بس الواحد فى الخر بيوصل لمبدا وهو امراءه واحده لا تكفى
وابقى سلمى لى على الحاج متوالى اقصد الحاج نور الشريف
اجمل شيء في الدنيا الطفوله لا كن الدنيا مهياش ديمه
مره حلوووووووووو الموضوووع
احلى شي في الدنيا مرحلة الطفولة
جميله
بجد فكره جميله
mooooooooooooooooooooooooh
تعته6 7خ87خغ ثصضغ 5غ فثقلبثقغ54الايبلال 54غ45يبلاقف اقيل ث5467 4اقفا قسفاسي
....بصراحه لعبة عريس وعروسه حلوه بشكل رهيب لدرجه متتخيلهاش لكن فكر انك باللعبه دبتغضب
الله واهلك واهل العروسه