حبيبي أصله....ثورجى

ولما يخرج في المظاهرة تحط إيدها على قلبها، ممكن يخدوه

04/06/2006

منى سليم ـ ولاد البلد:

والعرق يتصبب من وجهه .. يلقى نظرة على المخبر.. يبتعد عن دوشة المظاهرة .. ويتجه للأمام .. للأمام كمان .. هنا .. هه..عندي أنا ..

ويقف يسال :(تقبلى تتجوزينى؟).

فيلم أو حلم جميل يراود خيال أغلب الجميلات من بنات المحروسة..ولأنه موسم مظاهرات وضرب وحريات .. يبقى محتاجين نحكى شوية عن اللي بيحبوا المظاهرات واللي في المظاهرات.

من بعيد

وعلى غرار قصيدة نزار قباني شئون صغيرة، تبقى حياة وشكل الولد الثورجى، والتي تبدأ غالباً من داخل الجامعة هي الشغل الشاغل للكثيرات.

فهن يتابعونه ويرصدن تحركاته ويتبادلن الأخبار ويألفن القصص ويتخيلن مواقف طويلة، (فالآنسة مهوووسة بالواد صاحب المبادئ).

تتابعه عندما يقف ويرد على الدكتور بجرأة:"مش من حق حضرتك تمنع دخولي المحاضرة" (وممكن طبعاً تكون قلة أدب أو سفسطة من غير معرفة لكن مراية الحب عامية).

وتتابعه وهو في المعرض يكلم عشرة في صوت واحد، ويقول في صوت واحد برضه: "مصر إسرائيل أمريكا ولاد الكلب"، وهى لا تفهم ولا تهتم بشيء من كل هذا فكل ما يشغلها إنها قلها زاد علي صوت البيه وخايفة لصوته يروح ما يرجعش..!.

ولما يخرج في المظاهرة تحط إيدها على قلبها، ممكن يخدوه وتقول في سرها: "كفاية بقى هو أنت هاتفضل كده على طول مجنون ( وكأنهم عشرة عمر)."

ولما تكون اللمة جامعة وبتغنى لمصر بتسرح هي.. يقول ياسمرا تضحك (وكأن الكلام عنها مش عن واحدة غلبانة اسمها مصر)، يقول بهية تشك أنه على علاقة بواحد تانية.. ولو قال كل يوم بحبك أكتر من اللى فات تغمض عنيها وتحلم.

لقطة من قريب

ولأننا في مصر المحروسة فالأحلام مش دايماً بتدوم، ولأن هناك دائماً خطوة يجب أن يتخذها أحد، غالباً ما تتقدم أحدى الفتيات وتنزل الحلبة .. حلبة السياسة.

لنجد أنفسنا نطبق الثنائية الشهيرة الحب والحرب، بنات كتير مرت بالتجربة.. وكأي شيء مرة صابت ومرة خابت .. ويمكن التانية أكتر شوية..

إحساس حلو وراح

"إحساس حلو وراح"هذا هو تعليق إحدى الفتيات بعد أن انتهت قصتها مع واحد من إياهم من ذوي الصوت العالي في المظاهرات، وقالت: "الفكرة بالنسبة لي كانت غريبة ومحيرة لكنى كنت سعيدة، فهو من بعيد يفعل كل الأشياء التي أحبها، يدافع عن مبادئ ومحبوب من الجميع، وقلت هو ده اللى هيدينى الأمان، وحياته مختلفة ومعاه هاعمل كل حاجة مجنونة بفكر فيها."

وتكمل: "لكن الحقيقة أن الموضوع طلع جنان أكتر من اللازم، فمن ناحية هو عايش دور الشيوعي في كل حاجة ما عدا السياسة، فحياته أوروبية بشكل كامل، ولما قربت منه هو وصحابه بتوع المظاهرات حسيت إني في لعبة، وإنهم كلهم عندهم مشكلة أساسية أنهم بيحبوا التمثيل والظهور مش أكتر، ففضلت أن أبعد قبل ما تقع كل حاجة ولكن لا أنكر أنه كان إنسان طيب، بس ما ينفعش، هو مش عارف ينفع نفسه فماحدش هينفعه ولا هينتفع به".

أنا وصاحبتي ده بعدك

بنت تانية، تحكى بعد تجربة لها في الإنضمام لأحد الحركات السياسية فتقول:"كنت عايزه أعرف الناس دى ممكن تعمل إيه، وكان نفسي ألاقى حاجة، لكن كل اللى خرجت به إن كل ثورجى من البهوات بيحاول يرسم على كل بنت جديدة ومتوقع بالطبع أنها متيمة جاهزة."

وتضيف :"واحد منهم حكى لى قصة طويلة عن اعتقاله ومشاكله مع أهله اللى قلقانين عليه ونفسهم ربنا يرزقه باللي تقف معاه، وتتحمل الهم اللى هو فيه وتكون مقتنعة بحياته وكانت النتيجة أني خلصت القصة قبل ما تبتدى لألف سبب وسبب، أهمها أنه بتاع كلام .. ولكن اللى فيه داء..وانتووا عارفين الباقي."

"كل ده ماشي لكن اللي يغيظ بقى إنه قابل صاحبتي وقال لها نفس الحاجات وهى طبعاً كانت عارفة كل القصة وفضلت تتفرج عليه وتضحك في سرها وتيجى تحكيلى، وبقينا كل مرة نشوفه نضحك أوى..

وكلام مها لسه مخلصش فتقول:"اللي أنيل من كده وكده إننا كنا في مؤتمر ووقف .. الله يكسفه يهتف مش لمصر ولا الإسلام ولا العروبة ولا حتى لحكومة، البيه كان بيهتف هتاف واحد لزعيم الحركة اللى شبهه انه زى النيل والسد، وماحدش يلومه لأنه بياكل من وراه عيش."

ثورجيه بجد

وطبعا المواقف والقصص السابقة ليست كل القصص فحتما الدنيا مختلفة من واحد للتاني والقصة الجاية مختلفة عن اللي فات لأنها نجحت والحمد لله، ويمكن كان نجاحها أنها ناتجة عن اصطناع وبتحترم خصوصية كل علاقة..

وهي حكاية أستاذة "نعمات" أمينة المرأة في حزب العمل وزوجها هو الأستاذ"محمد السخاوى" القيادي بالحزب أيضا وتعالوا أعرفوا الحدوته....

فقد جمعهم الاشتراك في تنظيم الطليعة العربية في السبعينات، ودخل الأستاذ محمد المعتقل هو وأستاذه المفكر القومي "عصمت سيف الدولة"، والصدفة ساقتها في زيارة لأستاذها وصديق الكفاح وفي الزيارة الثانية لبسوا الدبل اللى اشتراها الأستاذ لهم...!

وبرغم استمرار زواجهم أكثر من 25 عام واستمرار عملهم سوياً في السياسة والعشرة الطيبة اللى مرسومة على وجوههم، إلا ان الواقع لم يعطيهم كل أحلامهم..

خيال امرأة

سمعت الحكاوي .. وقلت سواء القصة انتهت نهاية حلوة ولا .. فالمسافة بين الواقع والخيال واسعة.

وتذكرت قصة فيلم الباب المفتوح، كانت تحكى عن قصة حب رقيقة بين الولد الثورجى والبنت المصرية التقليدية جداً، و بعد الفيلم ما خلص قلت ده أكيد خيال واحدة ست.

والكلام كان صح، من تأليف لطيفة الزيات، وبعد كتير قريت السيرة الذاتية بتاعتها، وقالت فيها:"أنها كتبت الفيلم وهى بتستعد لإجراءات الطلاق من الأخ اللى كانت فاكراه زى البطل، فحاولت وفى عز ألمها ترسم الصورة من جديد، لكن المرة دى لواحد مش موجود وبعد أن اكتشفت الحياة أصبحت مستحيلة و ساعة توقيع عقد الانفصال جرى ما جرى في الفيلم.

وفي عز أزمة المعارضة وظهور هتيفة ومتظاهرين والثورجيه التي صنعتهم الحكومة بتعذيبها وسحلها ومعتقلاتها أصبح لدينا الآن ثورجيه أكثر هه..قلتي إيه؟

تحبي واحد عادي ولا واحد ثورجي؟

• يا بخت "الفنان" اللي الوزير منصبه!

• فاروق حسني رأي ولا تصريح!

• مبارك.. عقبال كل دورة!

• حماة المستقبل.. الجزء الثاني!