صفقات اللاعيبة.. والكلب الحيران!!

يفضل اللاعبين الذين خاضوا تجارب الفشل الكروي في الاحتراف ويكون الخير خيرين لو كان مبيلعبش في فرقته (ملحوظة الشباب والصاعدين يمتنعون).

06/06/2006

إبراهيم فايق – ولاد البلد:

يبدو أن الكورة في مصر حالفة لتعلمنا العفة والطهارة.. صفقات بالملايين يهدرها مسئولو الأندية بشكل يجيب تربنة وتخلف فوري.. وهي هي الدائرة المغلقة علينا من 10 سنين 12 لاعب -ده لو افترضنا أصلا أنهم لعيبه- في مصر و 14 نادي لا 14 ايه قول 5 أندية بيبدلوهم زي ما بيبدل الواحد...

المهم.. هذه مجموعة من الطلبات الكروية للأندية المصرية الممتازة وأهل القمة لموسم 2006 -2007، صحيح هي ماتنشرتش بس إحنا جبناها حصريا علشان تشفوها براحتكم.. على أساس إن اللي يعيش يا ما يشوف واللي يعيش أكتر يشوف اكتر وأكتر.

أولا: مطلوب لاعب فردة شمال لديه قدرات خارقة على حرق دم الجماهير لا يشترط سن معين، الشرط الوحيد أن اللاعب لابد ألا يكون وصل لمرحلة الكهولة، يعني شيخوخة شغال "على حسب الحالة".

يفضل اللاعبين الذين خاضوا تجارب الفشل الكروي في الاحتراف الخارجي والداخلي سواء ويكون الخير خيرين لو كان مبيلعبش في فرقته (ملحوظة الشباب والصاعدين يمتنعون(.

ثانيا: مطلوب مهاجم أخرق لا يشق له غبار لايسمع ولا يرى.. غير جون الخصم 120 ساعة جري سعة 2 هدف في 50 مباراة ياريت يكون برأسين.. ثلاثة يبقى حاجة أخر تمام يشترط فيه الميزة الجديدة بتاعت "إحراز الأهداف من الخلف وهو عامل نفسه مش واخد باله" بالاضافة إلى أن يكون فشل في الاحتراف ولم يلمس كرة طوال فترة احترافه الهدافين يمتنعون.. ويفضل اللاعبين الكسر والمصابين.

ثالثا: مطلوب عقد عمل مش إحتراف لحارس مرمى.. إمكانيات عالية.. حصالة 90 جون في الـ5 مباريات، له دور فعال في اللقاءات الكبرى ومن الممكن أن تصفه بأنه اللاعب رقم 12 للفريق المنافس.. يدفع لأجله من 10 إلى 15 مليون فقط علشان حالته مش قد كده..

(ملحوظة): من الممكن تبديله بثلاث اربع لاعبين مع دفع الفارق لصالحه طبعا.. يشترط رئيس نادي لايتشاءم.

رابعا: مطلوب مدافع يكون ماضي في ناد تاني علشان نعمله خناقة ونخده والدنيا تولع كده والدوري يسخن من قبل ما يبدأ.

خامسا: مطلوب خمسة لاعبين من الفريق المنافس في أي مركز نكاية فيه والشراء لأعلى سعر.

الكلب الحيران

العالم كله بطل يلعب الكلب الحيران لأنهم إكتشفوا إن الكلب حيوان ذكي ومفيش داع نصمه بالوصمة العار دي لكن في مصر هنا لازلنا نعشق الكلب الحيران ونطبقها حتى الثمالة ولإننا شعب مش أي حاجة وبنفهم في الكفت عملنا إختراع جديد عبارة عن خليط مركب يمزج ما بين الكلب الحيران والكراسي الموسيقية!!

قولي ازاي الكلام ده علشان اجاوبك؟؟

قولتلي ازاي.. طيب خد عندك.

معناه ايه انك تصبح الصبح تقرأ ان طارق السعيد جدد للزمالك ومش رايح الأهلي بعدين يقول لك جرنان تاني وعلى مسئوليته السعيد في الأهلي.. ينام الأهلاوية متنكدين علشان السعيد راح عندهم والزمالكاوية يعملوا أفراح وليالي ملاح..

تصبح الصبح تاني تلاقي الحال إتبدل اللاعب ينفي الكلام ويؤكد استمراره في ناديه تسأل مسئولي الأهلي يقولوا بنبرة الأرننة احنا منعرفش حاجة عن الكلام ده وخد عندك ثلاث اربع أسابيع عقبال أما تعرف الحقيقة ده بعد ان تكون الاندية المصرية المحترمة بسطتك ولعبت سعادتك وسعادتي الكلب الحيران خد بالك دون مراعاة ان الناس بره بقت بتحترم الكلاب

امال فين الكراسي الموسيقية؟

قولتلي بقى فين الكراسي الموسيقية دي بقى اللي سعادتك كنت بتتفرج عليها واللاعيب بيتنطط من هنا لهنا وانت تايه زي العيل الضغير مش عارف هو هيروح فين أي نعم هو اللي كان بيلعبها مع الـ11 الباقين،واللي هيفضلوا يلعبوا لحد شهر أغسطس.

بس متنكرش انك عمرك ما شوفت "شو" أجمد من كده يعني بتلعب الكلب الحيران وبتتفرج على الكراسي الموسيقية بالذمة تلاقي الكلام ده عند أي حد، دي حاجة كده ولا أليس في بلاد العجائب، وحاوريني يا طيطة.

شوف كل اللي فات ده كوم وحال اللاعيبين المزري ده كوم تاني.. يعني عارف لو بعد الكلام ده كله بتشوف كرة عدلة ولاعيبه مستواها يفرح أقولك ماشي.. لكن للأسف كل اللاعيبة في مصر انتهت صلاحيتها من ستة سنين، إلا من رحم ربي.

هما 10.. 12 لعيب عامليين يتنقلوا في نوادي مصر كلها من الأهلي للزمالك ومن الزمالك للاهلي ولما علاقته تخرب مع الأثنين يدورلوا على سبوبة طرية في نادي بترول ولا نادي أسمنت وحظه حلو التليفونات أنه مطلعش الممتاز علشان ميتلقحوش عليه.

الغريب والعجيب ان أسعار اللاعيبة اللي الكل عارف انهم خلصوا وفلسوا كورة من زمان بيتوزنوا بالملايين ومش عاوز اضرب امثلة علشان كده هيبقى الدوري شرك بس سلملي على مدحت عبد الهادي اللي هيموت ويروح بتروجيت وجدو حسام حسن اللي المصري بقى مش بيمثل طموحاته في الفترة القادمة!! يانهار اسود..

ومرتضى منصور اللي دفع 14 مليون في لعيب مصاب وبقية الفرقة مش عارفة تأخذ فلوسها وبالمرة بقى سلملي على عدلي القيعي اللي اشترى التروماي الموسم اللي فات ولحد دلوقتي مش عارف يشيل الصدأ اللي علي عمرو سماكة ومحمد عبد الله وأكوتي..

ومش عاوز حد يظلمه يمكن الزمبلك عطل ولا حاجة بعد ما أشتروهم وسلملي على طارق السعيد وصديق اللي ركبهم هتنشف من برد دكة البدلاء في عز الصيف.. مش عارف خايف من كتر السلامات أنسى نفسي وأونون والكاوتش يدخل في السياسة وأسلم على حسني م.. إيه عبد ربه..!

عدد التعليقات : 165

• هنا يرقد أجمل المصريين

• السواركة.. مانديلا العرب

• رباعية في المئوية الأهلاوية

• مائة عام.. أهلي!