اللي اتغرب!
لكن على رأي محمد هنيدي في همام في أمستردام.. (دي الغربة صعبة، واصل، وحشاني يا مصر، واصل)..
06/06/2006
آه يا لاللي.. يا عيني يا لاللي.. ع اللي اتغرب راح ولا جالي..
حين سمعت هذه الأغنية للمرة الأولى، لم أكن أعرف أن إعجابي بها ستكون نتيجته أن أعيش كلماتها لحظة بلحظة منذ عشرة أيام، ولمدة أسبوع آخر قادم..
لم أكن أعلم أني سأتغرب دون أن تغادر قدمي أرض المحروسة..
ورغم أني سافرت إلى قنا طوال أربع سنوات ماضية، إلا أنها المرة الأولى التي أشعر فيها بالغربة..
ربما لأن السنوات السابقة لم أتغرب عن أشياء تحظى بنفس أهمية الأشياء التي أتغرب عنها هذا العام..
فأنا الآن، متغرب عن أبي وأمي وبيتي، وعن ولاد البلد وعن خطيبتي، وعن عبد الخالق ثروت واعتصاماته، وعن مكتبي "الصغنن" في عشرينات، وخناقاتي اليومية مع هبة على الجهاز..
وربما لأن الجو هنا لم يكن أبدا بمثل هذه الحرارة، ولأن جسمي لم يكن قبل ذلك بمثل هذه البدانة، وأن الحرارة والبدانة جعلاني أشعر فجأة إني "غريب عن روحي" والعرق النازل سيول من جبهتي ومن كل مسامة (مفرد مسام) في جسمي يجعلني أشعر من البلل أني.. عملتها على روحي!
لم أكن أتخيل أن أقابل إسماعيل وعمرو ووليد وهيثم وعيد ومراد.. وكلهم موجودين في هذه المدينة منذ أكثر من شهرين، ومشاعر الغربة تملأهم.. ولأن الغربة معدية، فقد انتقلت هذه المشاعر كلها لي بعد أن قضيت معهم أول ليلة نحكي فيها عن القاهرة وعن الأشياء الحلوة التي تركناها فيها..
ورغم أن تلك الأشياء ليست على هذا القدر من الحلاوة، لكن عادة البني آدم اللي مش هيتشتريها، أن يجعل من كل الأشياء التي تركها قبل سفره حلوة وبتنقط سكر!
هيثم ومراد يحكون عن الأقصر، وعيد عن المنيا، وعمرو وإسماعيل ووليد عن همنا المشترك.. القاهرة..
وأنا اسمعهم كلهم، وأدون حكاياتهم، وأنسى حكاياتي..
لقد اجتهدوا فعلا في أن يجعلوا غربتهم "الداخلية" بسيطة وهينة وسهلة، أجهزة كومبيوتر، أغاني، أفلام، دي في دي، هزار وتهريج، كاميرا تسجل كل ما يفعلونه، صحبة حلوة ولمة ظريفة، نكت عمال على بطال، انترنت كافية مجاور للـ"شات" مع الأصحاب..
لكن على رأي محمد هنيدي في "همام في أمستردام".. ( دي الغربة صعبة، واصل، وحشاني يا مصر، واصل)..
لكن همام كانت حالته أحسن كتير، لأنه في أمستردام بجوها وخروجاتها وموتسيكلاتها وبناتها، وكلها أشياء ترجمها هنيدي أيضا في أغنيته.. "تعرف هولندا وبنات هولندا"..
لكن في قنا، فإن أجمل خروجه ممكن تخرجها هي زيارة عم علي بتاع الفول، وطبق فول بالسمنة، ومتشبعش، فتضرب واحد كمان بالزيت والطحينة والخل والليمون والبصل.. وألف سلامة على معدة سيادتك والقولون!
سينما قنا، باعتبارها مكان ترفيهي، يعرض حاليا فيلم انتهى عرضه (الفاشل) في القاهرة من شهرين، اسمه "بالعربي "سيندرلا"، بطولة العملاق حسن حسني، واللولبية.. بوسي سمير..!
ولأن قنا أهل كرم، فالسينما كريمة بطبعها، فهي تضع فيلمين في بروجرام واحد، الأول وعرفته، والثاني اسمه الدمار الرهيب، بطولة ممثلين معرفتش اقرأ اسمهم من على الأفيش، لأن الفيلم تقريبا إنتاج سنة 80!
بالنسبة للفسح، فتقدر تقول إن المكان المناسب للفسحة في قنا هو الكورنيش، وده تقريبا نسخة قريبة جدا من كورنيش المعادي، لكنه أوسع، وفااااااااااااااااضي!
بالنسبة للأكل، فأولا أنت محتاج تعمل Delete لكل المطاعم اللي تعرفها في حياتك، كوك دور، كنتاكي، العامودي، حضر موت، آخر ساعة.. هنا تقدر تاكل في "الشيف" أو في "أبو سرور"، وده طبعا بجانب عم علي المذكور من فقرتين فوق!
طيب، بما إن سينما مفيش، فسح مفيش، أكل مفيش، يبقى هتقعد فين.. في الشقة يا بطل!
حاليا أنا قاعد في الدور الأول الشقة اللي على اليمين وأنت طالع على السلم في عمارة مشهورة جدا في قنا، واسمها.. العمارة الخضرا!
هي اسمها كده، فصاحبها الحاج "مبارك" – هو برضه اسمه كده – لم يجد اسم أفضل للعمارة غير اللون الذي تم دهان العمارة به.. الأخضر..
وطبعا عمارة من الخارج خضرا، يبقى أكيد من جوة.. حمرا أكيد.. زي البطيخة.. ومعاها بذر أسود.. والطلبة تقريبا هما البذر ده.. يادي القرف!
عايز أحكيلك عن يوم في الشقة، بس مش عارف ابدأ منين..
خليني ابدأ من النوم..
فقرة النوم هنا بتبدأ الساعة 6 صباحا، بعد صلاة الفجر ومذاكرة ساعة، وساعة عند عم علي لأكل الفول الخطير، والنوم بعدها... والذي يستمر في الأحوال الطبيعية حتى الساعة 3 عصرا، وفي الموجات الحارة حتى السادسة مساء.. وفي حالات نادرة فإن عمرو وأنا قد تمتد ساعات نومنا للثامنة.. والسبب أننا أصلا ننام صباحا في وقت متأخر..
استيقاظ، صلاة للفروض التي فاتتك أثناء نومك.. و.. شد الهمة ونبدأ مذاكرة..
بمجرد أن تبدأ المذاكرة، تبدأ معتدتك في المطالبة بحقها الدستوري في وجبة هنية تكفي ميه، بعد أن أنجزت مهمتها وهضمت طبق عم علي بتاع الفول...
لموا فلوس، واعملوا "ميز"، وده مصطلح يتم إطلاقه على الفلوس التي تم جمعها لشراء طعام للجميع، وغالبا يكون الطعام شوية جبنه ولانشون، وطبق كبير فيه كيس الفول أبو جنيه الذي تم شراءه من عند مين يا ترى .. برافو.. من عند عم "علي" بتاع الفول.. أشكرك على ذكائك!
طبعا لو كانت الحالة المادية ميسورة، فإن الأكل في أي مطعم من المطاعم المذكورة سيكون هو البديل، لو عند أبو السرور فالنصيحة التي يقولها لك صديقك هي أن تطلب وجبة كاملة وتختم بأيس كريم من المحل المجاور له..
أما لو في “الشيف”، فكل الساندويتشات التي تحبها، وابتعد عن الفطائر والبيتزا لأنها لا تغني ولا تسمن من جوع، وحلي بأجمل وأطعم وأحلى كنافة بالقشدة.. وقول آه يا بطني من التخمة..!
دقات منتصف الليل هي البداية الحقيقية للمذاكرة، وغالبا يدخل البيت في حالة سكون، ويبدأ المعسكر كله في المذاكرة، وتمشي في الشقة تلاقي كل الأحبة اثنين اثنين..
وعند سؤال أحد العالمين ببواطن أمور المذاكرة (مش أنا طبعا) عن سر ظاهرة المذاكرة الثنائية أفاد بالآتي..
كل واحد بيذاكر مع زميله اللي بيشاركه عاداته المذاكريه..
عمرو بيحب السكون أو القرآن أو حلقات رأفت الهجان، إذن يذاكر مع نفسه لأن لا أحد يشاركه عادته، هيثم ومراد يحبون الصمت والتركيز، عندهم غرفتهم، أما عيد، فلأنه يحب الطراوة، فلديه البلكونة ليجلس فيها مع من يحب الطراوة هو الآخر..
أما إسماعيل، فيحب أن يذاكر بجوار جهازه، ومعه وليد زميله في الدفعة..
طبعا السؤال الذي يطرح نفسه، والذي أسمع بعضكم يهمس به خوفا على مشاعري، هو عني أنا، بذاكر مع مين..
الحقيقة يا أصحابي .. (على طريقة بكار)، أنا بذاكر مع عمرو لما يكون مشغل رأفت الهجان، وبذاكر مع وليد لما يكون بيلعب جيم، وبذاكر مع هيثم ومراد.. لما أكون صاحي.. وكلمة واحدة زيادة في الموضوع ده.. هزعل جدا!
فقرة المذاكرة تنتهي (في غير أيام الامتحانات) قبل الفجر بدقائق، وبعد الصلاة تتم مباحثات سريعة بشأن الفدائي الذي سينزل البلد لعربية فول عم علي ليأتي بالمؤن التي غالبا ما يتم طلبها من كل شقق العمارة والعمارة المجاورة أيضا.. وبعد تجميع الفلوس نقضي ساعة في انتظار رجوعه.. ونأكل.. وننااااااااااااااااام!
وصفة سريعة جدا، واستعراض مخل (بالآداب) لشقة طلبة فيها 6 سراير، و6 ترابيزات، و7 بني أدمين، بيناموا في وقت واحد، ولأن عمرو هو السابع فتلاقيه بيسيب كل السراير وييجي ينام جنبي مدعيا (كذبا وزورا وبهتانا) إني أرفع واحد في الشقة!
نتيجة كذبة عمرو خسرنا في الأيام السابقة عدد 3 ألواح سرير (ملة سرير بالبلدي)، وبقيت أنا وعمرو بنحاول نقنع اتنين تانيين غيرنا في الشقة إنهم أرفع اتنين موجودين وإنهم يتأخروا شوية والسرير ياخد من الحبابيب ألف!
طولت عليكم..
حقكم عليا، لكن الكتابة وحشاني جدا وأنا في قنا عمال أكتب عن نظريات الإتصال، ودور الإتصال الشخصي في تغيير الاتجاهات النفسية والعصبية بالعباسية، والنظم السياسية الحاكمة للإعلام في القرن الأفريقي قبل الميلاد.. وأشياء من هذا القبيل وهذه القبيلة..
على العموم في جاليري صور كبير فيه صور خطيرة ونادرة من داخل الشقة اللي جنب السلم في العمارة الخضرا الدور الأول أول بلكونة..
وفي كمان كليب لبعض الأحداث الهامة التي مرت في تاريخ هذه الشقة.. وإدعولي أرجع بالسلامة، وأنجح، وأحول من قنا لآداب الخرطوم، لإنهم بيقولوا إن الجو هناك ألطف من هنا.. وأهي تبقى غربة بجد.. وآآآآآآآآآآآآآآآآآه.. يا لاللي!
شاهد معنا اللي اتغرب
عدد التعليقات : 32
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
حاجة غريبه قوي مش لاقيين حاجة تكتبوها ماتكتبوش..انتوا هتشتغلونا و الا ايه
رغم اني متغرب زيك بالظبط لكن انت قدرت تعبر عن كل اللي انا حاسس بيه وانت جوه مصر وانا متغرب برة من سنين
موضوع حلو قوي والاغنية احلى والصور هايلة
10/10
masr wldah
ايه التالق دا لاه شغل عالي بجد ,الملف عالي ماشي يا عشرينات ... شكلها حتق في النفوخ بتاع انا وافتح بلج عن الشباب المتغرب حكايات بردو ... وعليكم با اسماعيل البيلبيسي .
الكلام جميل بس حسيت انه ملخبط شويه
الكليب هو اللي جميل والشباب شكلهم ولاد حلال اوي خصوصا عمرو
هههههههههههههههههههههههههههههههههههههههههههههههههههههههههههههههه
ايه ده !!!!!!!!!!!!!!!!!!!!!!!
لذيذ جدا يا براء كالعادة، بس اوعى تعجبك القعدة هناك وتبقى مراسل ولاد البلد في قنا.
بس بالمناسبة الناس عندك، عندهم فكرة عن القضاة والتوريث والتزوير والمدونين ولا ايه الاخبار
يا جماعة بجدانا عشت ظروف و يمكن أصعب شوية من دى . بس يا جماعة حلو الكلام ده و بجد عاوز المزيكا بتاعتكم دى لو تقدرو تعملو دونلود ليها لى المستخدميبقه تمام اوى .طبعاًغريب ان الواحد لما بيبقه فى بلدو بيشتم فيها و يلعن بس بجد فى الغربة بتحس بقيمة بلدك أوى . نفسى اتكلم و اقول حاجات عن الغربة بس مش هطول . ميه ميه يا رجاله كملوا القصة دى بقه .ربنا يعنكم
اة صحيح نسيت أقلكم أنا كنت فى السودان و كنت عايش عيشة فله فى مدينة الخرطوم العظيمة و ساكن فى حتة إسمها الكلاكلة ( قال الكلاكلة قال ) . بجد يا جدعان حلو الحوار انا بسمع الكليب كتير أغنية بجد حلوة.
مسخرة يا براء .. موضوع لذيذ واسلوب كتابتك عجبتني
اولا المقال تحفة
ثانيا انا كنت فاكرة ان البنات بس اللي عيشتهم متبهدلة ومتلخبطة بالشكل ده ........
ياه هي خلصت الايام ديه بس بجد وحشاني
وحشني الميز والفول ولم الفلوس والسهر والرغي والسنيما اللي ب5 جنيه الفيلمين برضه
والنوم والكشري والمطاعم ايام العز
والكورنيش الفسحة الوحيدة حتي موضوع الفرد الزيادة ومين ينام جني مين وتكسير ملل السرير والخناقات علي مين حينزل يجيب الاكل ومين حيروق ومين حيغسل ومين حيعمل المواعين
كانك بتحكي عن اسوان والله وعن غربتي فيها................ياه والله كانت ايام حلوة ومقدرش انساها
واذا كان الناس تعرف هناك ايه??????? في الغالب انا عن نفسي مكنتش اعرف حاجة خاااااااااااااالص معندناش تليفزيون والراديو بهدلة وفي الغالب ارساله ضعيف
يعني كنا مقطوعين عن العالم وده في حال اغلب الطلبة المتغربين اللي اعرفهم
الغربة صعبة أكيد
بس يعني متكبروش الموضوع أنت متغربين في وسط مصريين ومسلمين لأربع خمس سنوات وبتشوفواأهلكم في الأجازات
طبعا واضح إن براء بيتغرب لعدة أيام فقط - أيام الامتحانات
فعادي مشوا اموركم وتعايشوا مع الواقع أنتوا لسه شباب
أمال هتعملوا إيه في الجيش
حلو كالعاده يا براء
بس غربه ايه يا ابنى طيب سيب الحكايه دى لهبهوب
الغربه جوه الوطن ارحم بكتير من الغربه اللى برا الوطن اللى بتحس فيها ان الناس فعلا حواليك زى ما قالو الاصدقاء الوجوه من تلج و عيون من ازاز
اما انت وسط الوشوش السمرا و الضحكه البيضا و الشهامه الصعيديه الاصيله و تقول غربه
على راى شاعر زميلنا ف الخليج قال ع البلد اللى فيها و اللى هى السعوديه ف قصيده البلد دى زى حطب الفرن ناشفه
يلعن الغربه و سوادها
و انا من يوم ما اصحابى راحو واحد ورا التانى و اتغربو و اخرهم نهى اللى مش عارفه اراضيها فين بقول البلد دى احسن من غيرها
و بقول للجميع الجهل ف الوطن غربه و العلم ف الغربه وطن
مش كده يا هبهوب
احة عليكوا
جامدة جدا يا براء,عجبتنى أوى و صعبتوا عليه,الله يسامح مكتب التنسيق
الي تغرب عن وطنة اتخرب ومعدش ينفع لأي حاجة
دهابن كلب وحقير وسافل كل شخص يترك بلده وبره كمان جحش
غي مبالغة في الوضع كده أصل الغربة صعبة بس فيها شيويت حاجات حلوة أصل الواحد هناك بتعرف على ناس تانين وعدات تانية بس حسب الشخص أصل في ناس بحبو الغربة أوي وفي ناس تانين يكرهو يخرجو برا حارتهو
تعجبني مذكرات البراء وبالذات وهو في قنا وايام المذاكرة وبتوع البنزينه و الخ ...
يارب رجع كل مغترب لارضه
ووفق جميع من في الامتحانات
This reminded me of my university years and post-university life. I lived mostly the same as u Baraa(By the way I know most of ur teachers in Quena). But now i am in a more difficult GhORBA studying in the United States. I learned now that to be among your friends and in your country is a great NE3ma. Quena is a good city and its people are so kind. U r not in GHORBA Baraa. At least you can share others the same habits. In the west, you are looked at as alien when you behave and speak differently. thank God on this NE3ma and thanks for reminding me with the FOOL, the MEEZ, and this stuff. Your style is really cool.
كدت تبكيني براء
علي فكره انا اتفاجئت بأن صورتي موجوده في الكليب والصوره ده تقريبا من اربع سنين بس انا معجب جدا بالفكره وبصورتي انا ههههههههههههههههههههه
وكمان الواد الروش مراد واسماعيل باشا و وليد نجم حلوان وعيد خط الصعيد الروش
وبهدي الكليب ده لخالتوو بكينام وعمي شادي ونسايبي في اسيوط ولكل شبااااب الاسكندريه عروسه البحر المتوسط وعلي فكره الواحد يتغرب في اسكندريه احسن من اي بلد في الصعيد ومش هيحس بالغربه ....باي يابراااء
انا من قنا والعيال دى اصحابى وعيشين احسن عيشه وبذات مراد وجوجو دول زيور نساء بس حلوين طحن وبذات مراد وجوجو وهيثم مع تحيات القلب الطيب----- الحنان والحب
بدل الكلام الفاضي ده
ملاقيش عندكوا شغلانة
عاطـــــــل مـؤهـل جــامـعـي
بت متشتغلينيش والله يا جدعان ما في حاجه علي الايميل بت انتي يا بت بلاش تخبطي في الحلل انتي كمان . مصيبه لتكوني بتبعتيها لحد تاني علي اساس انها انا يا خراشي بت انت يا بت, منك لله يا نوفا وعلي راي سويت اشوف فيكي مسلسل 60 حلقه والمخرج يموت ومش عارفين النهايه.مش بس خلاص .
دي مش غربة
مفهوم الغربة مش البعد عن الاهل و الاصحاب مفهوم الغربة العيش مع الفقر بدون مال
وكما قال الإمام علي رضى الله عنه و ارضاه
المال في الغربة وطن و الفقر غربة في الوطن
محمد حسن غنيم
مصري
متغرب من أجل لقمة العيش
دبي 2006
موضوع تافه تافهههههههههههههههههههههههههه
يا ريت يكون المستوي زي السابق وعموما شكرا
عقبال ماتخش الجيش و تعرف ان اللى انت فيه نعــــــــــــــــمة كبيرة
كلنا غرباء في مصر الدنيا ماشية بالمقلوب ، اللي معاه واسطة أو فلوس يعدي واللي معهوش ما يلزموش .