هذه حلّتي !

ثم تنهض من مقعدها بحركة عنيفة و تبدأ في الرقص و هنا يترك المخرج مقعده

رجب سعد-ولاد البلد:

قبل ما تقروا الموضوع وتقولوا إيه علاقته بالتوقيت أحب أعرفكم إننا لسنا في عيد الكحك ولا اللحمة ولكن، بم إن رمضان قرب والاستعدادات على ودنه في دنيا الفن والفنانين قلنا نقدم لكم قصة وصلتنا ع الميل و"هذه حلتي"

- أكشن !

- سيداتي آنساتي سادتي .. أطفالي و شيوخي الأعزاء .. مساء الخير .. كل سنة و أنتم طيبين بمناسبة العيد السعيد .. و بصراحة كده مش قادرة أسكت و لازم أقول النصيحة المعتادة و هي إن مش لازم تأكلوا كحك كتير و …

يأتي صوت أحد الفنيين واضحًا:

- اللحمة يا مدام .. العيد ده عيد اللحمة !!

و تتابع المذيعة – الجميلة الرشيقة الأنيقة إللي ما حصلتش لأ و إيه كمان بنت إعلامي كبير – حديثها الشيق و إبتسامتها من الودن للودن :

- أديكوا سمعتوا معايا .. مصور ظريف .. مش كده .. ما علينا .. إحنا النهارده ها نقدم برنامج جديد خالص .. خالص مالص .. طبعا قاعدين تضربوا أخماس في أسداس و بتسألوا عن البرنامج الغريب ده اللي اسمه ( هذه حلّتي ) ..

لا يا حبايب قلبي .. ده مش برنامج طبيخ .. ده برنامج عن الفن و أصحابه و لياليه الأنس .. طبعا بتقولوا دلوقت و إيه علاقة الفن بالحلل .. أنا بصراحة مش عارفة إيه الجهل ده ، الناس بره وصلت للقمر و المريخ و إحنا هنا بنسأل عن علاقة الفن بالحلل .. لكن أعمل إيه ماقدرش أزعل جمهوري الحبيب مني ، هاقول لكم و أمري لله …

ثم أخذت تلوح بيديها في الهواء و ترسم أشكالاً في الفراغ و هي تشرح نظرية ( الحلة النسبية ) قائلة :

- إحنا طبعًا كلنا عارفين الحلة .. تمام .. متخيلين معايا .. مية مية .. الحلة بنحط فيها إيه .. بنحط طبيخ .. و الطبيخ ده عبارة عن خلطة .. و الخلطة دي بيدخل في تكوينها حاجات كتيرة قوي إيشي رز و إيشي مرقة .. و علشان الظريف ما يزعلش فيه برضه لحمة ..

و الفن كمان كده .. عبارة عن خلطة فيها حاجات كتير قوي .. فلوس و شهرة و ستات و الذي منه و إحنا هنا الحلة الوحيدة اللي ها تقدم لك ده كله و تعرفك سر الخلطة، برنامجنا برنامج جماهيري ، برنامجنا برنامج شبابي ، برنامجنا هو البرنامج الوحيد الحاصل على تصريح من وزارة الصحة..

و الآن مفاجأة البرنامج، معانا الفنانة اللي ما حصلتش و مش ها تحصل .. الفنانة التي تحمل ضمير الأمة، الفنانة التي رفضت الذهاب إلى إسرائيل و نصَبت على متعهد حفلاتهم في 100 ألف جنية و كله خدمة للبلد !، الفنانة الفاضلة ( سوزي )...تصفيق حاد

المذيعة - أهلا و سهلا بيكي ..

سوزي- أهلا بيكي يا حبيبتي .. وأهلا بجمهوري الحبيب ..

المذيعة- فنانتنا الكبيرة احنا كلنا عارفين ( سوزي ) الفنانة و حافظين تاريخها هزّة هزّة و نقطة نقطة .. و نفسنا دلوقت نعرف حاجة عن (سوزي ) الإنسانة .. يعني مثلا إزاي اخترتي زوج حضرتك ؟

سوزي- بناء على توجيهات حديقة الحيوان .... نياهاهاهاه ..

المذيعة- ده أكيد يا فندم .. بس إزاي اتعرفتوا على بعض و حبيتوا بعض و اتجوزتوا بعض ..

سوزي- لهذا قصة ..

المذيعة- احكي يا شهرزاد ..

سوزي- كنت قاعدة على القهوة المفضلة عندي أستمع إلى أغنية رائعة أذكر منها "في ناس كتير عقلها هوَّى ... بقوا بيخافوا م السلعوة ... سلعوة عوة عوتها " .. ساعتها قام واحد بَقف من اللي بيدعوا الثقافة و إمتلاك الذوق السليم و قعد يـِصَـيـَّح في القَعدة و مكانش في حد قادر يلمُه .. و خلاص كنت ها قوم له .. لكن سبقني فارس الأحلام ..

مكانش راكب حصان ولا حتى جحش صغير إنما كان لابس مركوب إيه .. ميه ميه .. نزل بيه على دماغ البقف لحد ما شلفطُه .. بعدها اتجهت له و أنا مبهورة و أخذت أعبر له عن اعجابي الشديد بيه و بمركوبه العظيم .. قَعدني جنبه و طلب لي حاجة ساقعة و قعد يشرح لي رأيه – الذي يتفق مع رأيي – في الأغنية و أشاد جدًا بمعانيها السامية و الراقية التي لا يفهمها سوى الصفوة فقط من البقر .. أقصد البشر .. و كلمني عن نفسه كتير و عن أمه اللي ماتت و عن إنه شاب مثقف و حنون و متربي و متواضع و عنده 100 مليون جنيه في البنك .. و ساعتها حبيته و اتجوزته !

المذيعة- يا سلام على الحب و حلاوة الحب .. هو لسه في حب بالطعامة دي .. إيشي خيال يا ناس .. و دلوقت يا مدام عايزاكي تكلميني عن طفولتك و إزاي اكتشفتي الفنانة جواكي !

سوزي- أنا طفولتي كانت طفولة معذبة .. ماهو الفنان لازم يتعذب و يتبهدل و يطلع تاريـخـه علشان يبقى فنان حقيقي و يحس بالناس و بآلامهم .. ده غير إن أنا اتربيت – أي والله اتربيت – في بيئة فنية .. بابا كان كابتن كورة قديم – ماهو الكورة فن برضه – و عمل دكتوراة في الكورة الشراب عند الفراعنة .. أما ماما بقى فهي دي الشغل كله .. هي دي البهاريز اللي أثرت فيَّ بجد .. ماما كانت راقصة باليه و كانت أول راقصة باليه تحيي الأفراح و الليالي الملاح .. كانوا بيطلبوا منها دايما تقدم لهم رقصة بحيرة الجدع !

المذيعة- جدع ايه يا هانم ؟! .. اسمها البجع !

سوزي- زي ما بتقولي كده يا حبيبتي .. أما إزاي اكتشفت الفنانة جوايا .. في يوم بعد ما رجعت من المدرسة و اتغديت و عملت الواجب جت ماما وأخدتني و روحنا عند الجيران .. كان عندهم سُبوع .. و أول ما سمعت دقة الهون مقدرتش أمسك نفسي و لقيت الفن بيطلع لوحده ..

ثم تسكت ( سوزي ) فجأه و ينتابها التوتر و هي تتابع :

إيه ده ؟! .. إيه اللي بيحصل ده ؟! .. ده وقته .. مش قادرة يا ناس .. مش قادرة يا عالم .. في حبة فن مش قادرين يستنوا ...

ثم تنهض من مقعدها بحركة عنيفة , و تبدأ في الرقص , و هنا يترك المخرج مقعده , و ينضم إليها في منتهى الحماس , و هو يمسك طبلة صغيرة مستندًا إلى إحدى ركبتيه , و أخذ يطبل لـ ( سوزي ) بجنون وهنا تبدأ المذيعة في التصفيق .. و بعد أن تُنهي ( سوزي ) الوصلة تعود إلى مقعدها و هي تلتقط أنفاسها , و تثني عليها المذيعة :

المذيعة- أحسنت يا مدام ..

سوزي- Thank You ..

ترررن ترررن ..... ترررن ترررن ...

المذيعة- الظاهر يا مدام ( سوزي) إن المعجبين بدأوا يتصلوا بينا..

صوت ع التليفون- ألو ألو ..

يأتي صوت طفل صغير يقول :ألو .. سامعين ؟! .. سامعين كويس ؟!

ترد عليه ( سوزي ) في أمومة و حنان :" أيوه يا حبيب قلبي .. سامعينك ..

يأتيهم الصوت مرة أخرى :"ماااااااااااء .."، ثم تغلق السماعة في صوت واضح ...

وهنا تنقذ المذيعة الموقف في ذكاء :"معذرة لهذا العطل الفني .."

و تتابع الحوار الشيق :

- و بالنسبة لأصدقائك في الوسط الفني !

تهم ( سوزي ) بالرد إلا أن المذيعة تشير لها بيدها و هي تقول :"يا ريت نأجل الإجابة بعد الإتصال الهاتفي .. ألو .. ألو .."

يأتيهم صوت رجل يقول :ألو .. ألو ..

ترد عليه المذيعة :" أيوه يافندم سامعينك ..

المتصل- أنا عندي سؤال لمدام ( سوزي ) ..

ترد عليه ( سوزي ) : إتفضل ..

المتصل- هو بصراحة سؤال محرج شويه ..

(سوزي ) :"قول يا بابا ما تتكسفش .. خليك بجح !

تشجع الرجل و هو يقول :" بصراحة يا مدام بيكون إيه شعور زوج سيادتك و إنتي لا مؤاخذة يعني مع راجل تاني و الناس بتتفرج عليكوا ؟! "

ثم يغلق السماعة بسرعة ..

هنا يبدو الحرج على وجه المذيعة إلا أن (سوزي ) تأخذ الأمور ببساطة قائلة :"كويس إنك أثرت النقطة دي، والسؤال ده على فكرة بيواجهني كتير، بصراحة التفكير ده هو اللي جايبنا ورا المفروض يا جماعة نكبر دماغنا من الحاجات دي بقى و نشوف الناس بره عايشه إزاي .. هو مافيش حد بيتفرج على القمر الأوروبي ولا إيه ؟!

وتكمل" و بعدين من ناحية جوزي .. فهو راجل جينتل و أخلاقه رياضية و مُقدِّر إن الفن رسالة، و عارف إني بتعب قوي في تقديم الرسالة دي و توصيلها للناس ! "

هنا تعود المذيعة لإستكمال الحوار قائلة :" كنا بنتكلم عن أصدقائك في الو ...

ترررن ترررن ..... ترررن ترررن ...

تبتسم المذيعة وهي تقول : "الظاهر إن معجبينك كتير قوي يا مدام ..

سوزي- خمسة و خميسة !

المتصل 2- ألو .. ألو ..

ترد المذيعة :"أيوه يافندم يا ريت تعرفنا بحضرتك ..

طنطاوي- أنا ( طنطاوي ) مصري مقيم بفرنسا و عايز أعبر عن إعجابي الشديد بالمدام و ردها الدبلوماسي و أحب أقول لها إني باموت فيها ..

هنا تبتسم ( سوزي) و ترد عليه :"ميرسي يا روحي ..

- يا هانم إحنا كلنا هنا عايزينك تيجي تتفسحي عندنا يومين و ها نشتري لك هدية كده على ما قـُسُم .. حاجة كده مش قد المقام .. شقة في الشانزليزيه ..

سوزي- و إيه كمان ؟!

طنطاوي- و عربية ..

سوزي- و إيه كمان ؟!

طنطاوي- و .. و سواق عليها .. و ها تعملي شوبينج زي ما أنت عايزه !

سوزي- و إيه كمان ؟!

وفجأة اترزعت السماعة بغضب شدشد كليك !!

وهنا ابتسمت المذيعة مرة أخرى في ذكاء قائلة : معذرة للعطل الفني ..

ثم تستكمل الحوار قائلة :للأسف يا مدام وقت البرنامج قرب ينتهي .. بس قبل ما نختم نحب نعرف إيه آخر أعمالك الفنية ؟

سوزي- فيه مسلسل جديد بنتوقع إنه ها يكسر الدنيا و باقوم فيه بدور ما أعتقدش إن حد عمله قبل كده و هو مسلسل تاريخي بأمثل فيه لأول مرة باللغة العربية الفسحه، اسمه... اسمه .. آه .. ( معزة في خطر ) ..

المذيعة- و يا ترى دورك إيه في المسلسل يا مدام ؟!

سوزي- المعزة طبعا .. ده غير إن أنا مسافرة دلوقتي على ( منغوليا ) علشان أستلم جايزة النخلة الذهبية و أنا اشترطت عليهم إنهم يقدموني باسم الفنانة المصرية و كمان يعزفوا السلام الوطني المصري .. و كله علشان البلد ..

ثم انخرطت في بكاء حار أثار شفقة المذيعة التي ربتّت على ظهرها و هي تقول : و إحنا كمان يا( سوزي ) عايزينك تعرفي إن مصر معاكي ..

و فجأة يظهر عدد من الشباب و الفتيات التفوا في دائرة حول ( سوزي ) و أخذوا يغنون في ابتهاج

مصر معاك ... مش ناسياك ...

روح و أتغرب ... شـَرَّق غـَرَّب ...

مهما تكون في نهاية الكون ...

في نهاية الكووووووون .

ومفيش حاجة تتقال بعد كل ده غير إن كل واحد يخلي باله من حلته وطبخته....

عدد التعليقات : 18

• رائحة البحر.. والحب!

• محارب ضد.. الفساد!

• لحوم العيد!