خمس نقلات ... كش ملك !

دايما في الشطرنج بنحاول نحافظ علي الملك ودايما بيموت الملك

فادي اسكندر-ولاد البلد:

الشطرنج ..... لعبة الذكاء ... الحرب الوهمية .

دايما في الشطرنج بنحاول نحافظ علي الملك ودايما بيموت الملك

ملك وملك ... ابيض وأسود ... فائز ومهزوم ... مقاتل ومتخاذل

النقلة الاولي :

العساكر ........

دولا مين ودولا مين

دولا ولاد الفلاحين

احمد عسكري الأمن المركزي اللي كان واقف ضمن الكردون الضخم قدام محكمة باب الخلق وبيسألنا انتوا هنا ليه؟ وكان متعاطف معانا وبيوعدني انه بعد 3 اشهر بعد ما يخلص مدة خدمتة هايجي معانا ويقف ويتحاصر من زمايلة ويتضرب لأنه مصدقنا وأما سألتة ليه قالي عشان انتوا جدعان كلكوا علي بعض واقفين 30 واحد وهما خايفين منكوا كده ...

هو ده احمد اللي كان بيطلب مني أعيد أغاني معينة عجبتة وحسها وكان بيرددها معايا، هو نفسه اللي أما عطشنا جابلنا مية عشان نشرب ومخافش .

قدام احمد كان واقف عسكري تاني بلغ عن احمد أنه بيكلمنا وجابلنا مية وأختفي احمد بس العجيب رد فعل باقي زمايلة اللي رفضوا يتكلموا معاه وزعقوا فية ورفضوا حتي اقتسام المياه الموزعه عليهم معاه .

عسكري عربية الترحيلات عم ممدوح الراجل الطيب اللي قعد يعتذر لي طوال الطريق لأننا متكلبشين ومش بأيدة انه يفكنا أو يشيل الغمامه من علي عنينا وقالي وأنا نازل خليك راجل ومتخفش .

عساكر سجن طرة اللي مكانوش فاهمين ليه احنا محبوسين ومش عارفين يتعاملوا معانا ازاي ومع ذالك كانوا بيقفوا يسمعونا واحنا بنغني ويبتسموا وبعضهم يردد معانا .

النقلة الثانية :

الفيل ....

إقلع غماك يا تور و ارفض تلف

إكسر تروس الساقية و اشتم و تف

قال: بس خطوة كمان ... و خطوة كمان...

يا أوصل نهاية السكة يا البير يجف

عجبي !

ضباط الاعتقال والسحل والضرب وضباط السجون .

نوعين مختلفين ....... منهم من كان يقف يلعنا لأننا نرفض الانصياع لأوامره بالانصراف ويهدد ويتوعد ومنهم من كان يعاملنا بلطف ومحبة وخوف..

منهم الضابط المسؤول عن اعتقالي الذي أعطي الأمر بالاعتقال وهددنا وسرق متعلقاتنا الشخصية وأعطي أوامره بتكتيفنا وتغمية أعيننا ومن بعده استلم المهمة ضابط بقسم السيدة وأخذ في التنكيل بنا وتهديدنا ومنع المياه عننا ومنعنا من الحركة لمدة سبع ساعات مروا علينا سنوات طويلة ونحن واقفين مطاطي الرؤس بسبب طريقة ربطنا ولا ندري ماذا سيحدث لنا ووقتها عرفت الفرق بين زعيم كان يقول ( ارفع رأسك يااخي .. لقد انتهي عهد الظلم والاستباد ) ورئيس يحاول أن يكسر رقبة كل من يرفع رأسه .

ومنهم ضابط التحقيق بجابر ابن حيان الذي دخلت عليه وأنا مغمي العينين ولم يقل لي سوي نهارك اسود ..

ومنهم ضابط سجن الخليفة الذي اعتذر لنا عن كل الاهانات التي تعرضنا لها ولم يكن له يد فيها , الذي حاول توفير الراحة لنا في خلال ال 24 ساعه التي أمضيتها بسجن الترحيلات، الذي دعاني للهتاف عند خروجي للترحيل علي طرة .

ضابط بسجن طرة الذي كان يطمئن علينا يوميا ويحاول تلبية كل طلباتنا وكنت اراه يوبخ مخبرين المباحث علي الطريقة السيئة التي يعاملون بها المساجين .

النقلة الثالثة :

الحصان .......

ياما صادفت صحاب و ما صاحبتهمش

و كاسات خمور و شراب و ما شربتهمش

أندم علي الفرص اللي انا سبتهم

و الا علي الفرص اللي ما سبتهمش

عجبي !!

أصدقائي اللي سألوا عني وحسيت بحبهم وقفوا معايا وبعتولي واللي عرفت إن منهم من بكي أما اختفيت في جابر بن حيان ومحدش عرف أنا فين ومنهم من جاء لزيارتي ومنهم من جاء لزيارة اهلي ومنهم من كتب لي في منتدي الكرامة .

منهم محمد علي اللي كان معايا من أول دقيقة لأخر دقيقة رغم امتحاناته وأبكاني ما كتبة وما ارسلة لي وأنا في طرة .

بيسان اللي كتبتلي جواب مطول افرحني كثيرا واحزني أكثر .

ومنهم حسام وعلاء ومي وعمرو ودينا وووووووووووو .

وصحاب السجن اللي كنت طول الوقت اعرفهم معرفه سطحية ومش مهتم اني اتعرف عليهم من قرب لكن فجأه بتكتشف إنهم رجالة جدا .

"شرقاوي" اللي كان بيسهر بالليل عشان يطمن إننا نايمين كويس وكان علي استعداد دايما انه يدافع عن أي حد فينا باستماته .

"احمد دروبي" الإنسان الجميل الذي صمد طوال شهر رغم مرضه ورغم خوفنا الشديد وقلقنا علية.

"علاء سيف" الشاب الطموح الذي يحب زوجته ويحب الحياه ويؤمن بأفكارة .

"احمد ماهر" الشاب الضاحك الذي تحمل هزارنا معاه طول فترة الاعتقال

أكتئابي أنا وشرقاوي بعد سماعنا بقرار الإفراج لان باقي الأصدقاء مازالوا في سجون مبارك .

وفرحهم بخروجنا وتريقتهم علي حزننا .

أصدقاء نضال ... أصدقاء بجد

النقلة الرابعة :

الطابية .........

محبوس يا طير الحق

قفصك حديد ولعين

قضبانه لا بتنطق

ولا تفهم المساجين

قضبانه لا بتعرف

ولا تفهم الإنسان

ولا الحديد ينزف لو تنزف الأوطان

الأماكن اللي بتحكمها قوانين ولوائح متعرفش يعني ايه انسان، قسم السيدة زينب بمبناه الضخم المحاط بالمتاريس .

سجن ترحيلات الخليفة المبني الغريب اللي فيه الظالم والمظلوم اللي شفت فيه مئات من الشباب المرحل من طابا ودهب بعد التفجيرات بدون ان يكون لهم أي ذنب سوي انهم فقراء وليس لهم نفوذ .

سجن طرة تحقيق اللي فية من قضي 6 و 7 سنوات ومازال قيد التحقيق واللي فية المظلومين اكثر كثيرا من الظالمين اللي فية 50 شخص في زنزانه واحده نصيب كل واحد حوالي 25 سم ينام وياكل ويشرب ويقعد عليهم اللي منتشر فية الأمراض الجلدية بشكل مفزع ، اللي فيه زنازين بها دش وزنازين بها الكوز , زنازين ممنوعين يسمعوا الراديو وزنازين بها ستالايت ,

اللي شفت فيه ازاي ممكن موظف يتحول لمتهم لأنه كشف فساد مديره , وشفت فيه ازاي ممكن الراجل ينكسر عشان سيجارة ، وفية من يعمل كخادم مقابل علبة من السجائر يوميا وفيه لغة خاصة بالمساجين وازاي هما قادرين يخلقوا عالمهم الخاص .

مبني مباحث امن الدولة بجابر بن حيان ... مبني كئيب في شارع كئيب الأدوار اللي تحت الأرض أكثر كثيرا مما يظهر فوقها .

النقلة الخامسة والأخيرة :

كش ملك .....

يا طير يا عالي في الســــــما طظ فيك

ما تفتكرشي ربنا مصطــــــــــــــــفيك

برضـــــــــــك بتاكل دود و للطين تعًًًًودً

تمـــــــــص فيه يا حلو .. و يمص فيك

عجبي !!!

تهم لطيفة ومثيرة للسخرية منها اهانة الرئيس وتعطيل المرور وكأن آلاف العساكر ومئات العربات المصفحة التي تجوب القاهرة ليلا نهارا لا تعطل المرور وكأن موكب الرئيس لا يشل المرور وكأن وكأن .

سمعتها فضحكت وحزنت علي وكيل النيابة الذي تلاها علي ولم افهم لماذا يقبل أن يهين نفسة بتلك الطريقة لماذا يقبل ان يقول لي عندما سألته أنا خدت 15 يوم ولا 45 يوم انه يقولي والله ماعرفش مستني التعليمات .

بس في نفس الوقت فرحت لأني تأكدت ان النهاية قريبه جدا جدا ومن الممكن ان تأتي علي يد العساكر او أي قطع اخري علي رقعة الشطرنج .

وكيل نيابة امن الدولة سألني هاترد ولا ممتنع فقولت ممتنع وسألته أي هي الهتافات التي بها اهانة للرئيس فردد هتافات ليس لها معني تقريبا فسألته مرة اخري هل يسقط مبارك هتاف به إهانه فقال لا

فقلت :

يسقط يسقط ... حسني مبارك

عمر السجن ماغير فكرة ... وعمر القهر ما أخر بكرة

عدد التعليقات : 14

• يا جمال.. جيل المستقبل!

• مات فؤاد المهندس صامتا.. فرحلت معه ابتسامة مصر

• عن جلسة المواطنة والديمقراطية!

• 3 أفلام حسمت موقفها!