في المترو.. غلابة وبيرزقوا!!
تجمع ثلاث من العساكر وقفوا على أحد الأرصفة يمازحون بعضهم البعض، بينما كان ثلاث تلاميذ يمرحون في نهاية الرصيف الثاني... ولكن على " قضبان المترو"!!
12/06/2006
هاجر صلاح – ولاد البلد:
"عارفين الست اللي إيدها محروقة.. لمت منكم علي قلبها قد كده!!"
هكذا رد احد الأطفال المتسولين في مترو الأنفاق عندما نهرته مجموعة من السيدات وأمرنه بالنزول فلم يجد وسيلة للدفاع عن نفسه إلا طريقة "علي وعلي أعدائي" الشهيرة.. فقام بفضح "أم ايد محروقة" والتي يبدو أن الحكاية ماشية معاها تمام، وتمكنت من خداع عدد غير قليل من رواد المترو..
مشاهد عديدة و متكررة يلاحظها كل من اعتاد على ركوب المترو، وأنا أحدهم، يستفزهم الباعة الجائلين وهم يقتحمون العربات وخصوصا أوقات الذروة ويزاحمونا بكل "رزالة" و وبرود.. والواحد يادوبك واقف على رجل واحدة.. ويا سلام بقى لو كان البائع راجل بشنبات في عربة السيدات وفي الوقت ده، صباح الرزالة!!
المترو يمضي من محطة لأخرى، وإحنا في الوضع السخيف ده، تقع عيني في كل محطة على العساكر اللي بيقفوا في المحطات، وأبقى نفسي اسأل كل واحد فيهم سؤال بريء: "حضرتك واقف بتعمل ايه؟" أو " إنتي إشتغلي إيه؟"، بالطبع لن يرد ويقول "سواقة يا هانم".
وفعلا قررت، بكل شجاعة، التوجه لهؤلاء العساكر، بعد أن تأكدت أنهم مش أمن مركزي زي بتوع المظاهرات، ومواجهتهم بكل السلبيات والفوضى الموجودة من عدم التزام الركاب بأبواب الصعود والنزول والعبور من رصيف لاخر على قضبان المترو ومشاغبات تلاميذ المدارس وطبع المشكلة الأزلية الخاصة بالمتسولين والباعة..
مبيحصلش
أول عسكري قابلته كان في محطة دار السلام، وطبعا نفى تماما ما أتحدث عنه فالباعة الجائلون يتم الإمساك بهم وتغريمهم وهناك شدة في التعامل معهم.. كله تمام يافندم.. والأمن مستتب..
المهم.. في أثناء الحوار، جاء المترو فقطع العسكري حديثه معي واقترب من القطار يتفقده ليثبت لي قيامه بعمله محاولا العثور على أي مخالفة، وبالفعل عثر على إحدى البائعات، من حظها الأسود، وأخذها معه واختفوا..
قلت "يا حرام أكيد هيعملها محضر وأنا السبب" إلا أنني عندما هممت بركوب المترو التالي وجدت البائعة تركب معي وتستأنف عملها، وهو ما يعني عدم اتخاذ أي إجراء معها وهو ما تأكدت منه بعد أن سألت الفتاة كيف خرجت من "المطب ده" فقالت إنها أخذت في البكاء أمام العسكري فتركها على ألا تعيد الكرة!! يعني الموضوع كله كان "تمثيلية"!!
غلابة يا هانم
العسكري الثاني كان بمحطة مار جرجس وقد تحدث بصراحة معلنا تعاطفه مع الباعة والشحاذين خاصة وإنهم "بيصعبوا" عليه عندما يبدءون في سرد قصصهم المأساوية فيتركوهم في النهاية، ويعلق قائلا: "بصراحة هم غلابة و بيسترزقوا".
وصادف أن تواجد بجوارنا أحد زملاؤه الذي يبدو أنه كان "رامي ودنه معانا" كما أنه من منظره كان يبدوا أنه من غير المؤمنين بمبدأ "دول غلابة"، فنفى ذلك التعاطف بشدة وأكد على أن شرطة المترو لا تترك أي من هؤلاء الباعة دون أن تغرمه وتقيد له قضية، "وكله ماشي حسب التعليمات حضرتك".
وطالما إن كله "تمام" فقد تركت موضوع الباعة وسألتهم عن هؤلاء الذين يسيرون على قضبان المترو أو يمسكون الأبواب، اللي مكلفة البلد الشيء الفلاني، ويمنعون غلقها لحين صعود أكبر عدد من الركاب، وحدوث ذلك أمام أعينهم دون منعه
كان الرد هو : الضحك!! وكأنهم يريدون القول :نعم ذلك يحدث بس إحنا بنكبر!!
أتفرج يا سلام
المحطة التالية كانت السيدة زينب وهناك إكتفيت "بالفرجة" على تجمع ثلاث من العساكر وقفوا على أحد الأرصفة يمازحون بعضهم البعض، بينما كان ثلاث تلاميذ يمرحون في نهاية الرصيف الثاني... ولكن على " قضبان المترو"!! وبعد كده يستغربوا لما المصايب تحصل!!
المحطة الأخيرة في رحلتي كانت مع أحد العساكر في سعد زغلول، هذا العسكري يرى أن موضوع الباعة الجائلين صعب السيطرة عليه لأنهم يتخفون أثناء وقوف القطار في المحطات، فلا يشك بهم احد ويبدؤون البيع عند تحرك المترو وبالتالي يصعب ملاحظتهم والإمساك بهم، ومع ذلك يتم يوميا الإمساك بأحدهم وتغريمه.
وعند سؤاله عن سبب عودتهم رغم تغريمهم كل مرة، على حد قوله، فجوابه كان: "الله أعلم"!! ثم قال: "إنتي عايزة تطلعي الشرطة غلطانة وخلاص؟؟"
وهنا ركبت لمترو "وعلي البيت عدل" وأثناء رحلة العودة كان السؤال الذي يثور في عقلي كلما رأيت أحد هؤلاء الباعة يصعد إلي المترو أو ينزل منه هو "هل بالفعل هل الناس خطأ ويجب منعهم، أم لا؟".
هل العيب فيهم ولا العيب في الحكومة اللي مش عارفة تشغلهم في حاجة أحسن من كده ولا حتى عارفة تمنعهم من دخول المترو.. العيب فيهم ولا هما علي حق وأي شغلانة أحسن من الإجرام حتى لو كانت الشغلانة دي في ناس بتقول عليها "شحاتة".
العيب في مين؟؟ ومين اللي صح ومين اللي غلط؟؟..
عدد التعليقات : 13
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
والله موضوع واقعى جداااا وفعلا حاجة تزهق
وتقرف وتضايق وكل حاجة يعنى مش كفاية القرف اللى بنشوفة من العربات
حضارة متأخرة
مضت السنون سريعة الجريان لاخير في الإذعـــــان للطغيانِ ِ.
أيقودنا أهل السفاهة للــــردى فنعيش في القبلات والأحضان ِ.
وبزعمهم أن الحضارة هـــكذا كـلا ورب الـطــور والـفـرقــان ِ.
فترى الشباب تحطمت آمالهم حتى غدوا من عصبة الشيطانِ ِ.
لافرق بين محمد أو جرجسَ هما في الخلاعة والهوى مثلان ِ.
وبناتنا بعد الغــفـاف بــــديننا بِـعْـنَ الـحَيَـــــاءَ بأزهدِ الأثمان ِ
وانتي مالك يا هبة . يعني الناس تموت من الجوع ولا تسرق ..
روحي اسالي حكومتك الاول فين حق العيال الشقيانة دي في التعليم والرعاية الصحية والضمان الاجتماعي .. بدل القرف اللي انتي كتباه ده..
وأنا مع أي غلبان بيجري ورا لقمه العيش ..
يعنى هى الغلابه بتوع المترو بس . الغلابه كتير وفى كل حته والشحاتين اكتر من الهم على القلب وشعارهم شحات لكل مواطنواهم غلابه بيشحتوا من غلابه وكله ماشى والاخ بتاع الضمان وان الدوله توفر لهم معاشات وكده احب اقوله انت بتهرج ولا ايه انت فى مصر الحكومه مش فاضيه للكلام الفاضى ده كفايه انهم هما كمان غلابه وبيشحتوا من امريكا
الا قوليلي انتى اشتغلتي قبل كدة فى كلمتنا؟؟ ولا تشابه اسامي؟
والله العساكر والضباط زى قلتهم فى البلد كل واحد منهم فرحان بالبدله ال لبسها ورايح جى "يقول العسكرى راح العسكرى جى " وهكذا حاجه تخنق الناس والله طيب كان فى مشاجرة فى الشارع امام الاقسم ونروح للعساكر الوقفين على الباب حوش الناس هتموت "يقول وانا مالى مينوب المسلك ألا تقطيع ملابسه " شوف البجاحه حاجه تقرف **==
الظاهر ان اللي كتب المقال مركبش قطارات قبل كده000 كان اكتشف ان اللي بيحصل في المترو ده قمه الشياكه!!!!!!
ربنا يستر ومايتحاولشى هذا الاسترزاق بالاكراة بعد كدة
ربنا يستر ومايتحولشي هذا الاسترزاق بالاكراة في ظل غياب الحكومه
يعنى هى جات على المترو يا ستى انظر حولك انا عموما ما عنديش مترو فى بلدنا الحمد لله بس باركب تاكسيات وكل مااركب اتشاكل مع السواق مره عايز يركب معايا 3 وانا نبقى اربعه عشان يعنى يسترزق يا ابنى ما انا هاديك اجرة المشوار لا بس عشان الناس الي مش لاقيه تركب طب يا بابا تركبهم فوقى؟؟؟؟ ومره واحده يقف فى وسط شارع مزدحم جدااااا ويقف علىالشمال وعايزنى انزل ويقولى ما يهمكيش يا ابله كأنى خايفه على بابا عربيته مش خايفه على عمرى ومره تانيه عشان بتاع التاكسي بيقولي فيها ايه لما امشى مخالف فىالشارع يعنى هو مين بيمشي صح وبعدين مالها المواصلات ماهى فل الفل اهي
انظر حولك يا سيدى امصال الفراخ اتاخرت وجت بايظه والفراخ الى فى البلد ماتت كلها واصحابها ولعوا واحنا معاهم
صاحب العباره كلفت القصه وبقت زى الفل
شرم الشيخ بتتباع المتر ب خمسه جينه والى ما يشترى يتفرج
تمثليات بتتعمل على قفانا طول النهار من التنميه والاقتصاد الحر والديموقراطيه ويل يا ويل
البورصه بتتضرب لحساب البهوات ويلموا فلوس المضاربين الصغيرين الغلابه ويقولوا واحنا مالنا ما انتم الى بعتم وانتم الى اشتريتم
والبلد بايعاناااااااااااا بندفع دم قلبنا لشركات الجوال اغلى من اى بلد عشان الحكومه اتفقت مع الشركات دى على مص دم الشعب
انظر حول يااخى تلاقى مولد وصاحبه غايب وتلاقى الطوفان وكل من السلطه شايل على كتفه مقطف وبيقول شيل عبى خلص قبل ما تتهد على دماغنا خليها تتهد على دماغ الشعب وعلى راي محمد صبحى قنبله ؟؟؟ ارميها على الشعب ارميها على الشعب
المتسولون والباعه الجائلين نتيجه طبيعيه لفساد مجتمع كامل من اول حكومته لافراده لمثقفينه الخرساء لاطفاله الى اهاليهم بطلوا يربوهم وبقى اهم من تربيتهم تأمين موبايل لكل عيل عشان يبقى يطمن عليه وهو
اقرأ بقية التعليق ..
اللي حضرتك مش عارفاه إن الحكومه دايما بتعمل على مصلحة هذه الفئة الكادحة من الشعب وبتشجعهم وبتساعدهم لأنها ببساطة بتشجع المشروعات الصغيرة اللي منها
1- بياع الخضار اللي واقف في نص الشارع وسدادد الطريق وحمارة مالي الأرض تحته "لا مؤاخذه خـــرى" وما حدش عارف يكلمه ولو تجرأتي وكلمتيه زي ما عملتي مع العساكر ساعتها هو اللي هيطلب لك البوليس.
2- بياعين الأنابيب والعيش والسكر .... اللي ممكن يمنعوا السلع المهمة دي عشان بعد كده يغلوا اسعارها أو يبيعوها في السوق السودا زي تذاكر الدورة الأفريقية.
3- عربيات شغالة بدون نمر ومكسره وهلكانه وسايقها بلطجي أو مسجل خطر كل دا مش مهم دي مسؤولية اللي يركب معاهم.... !!! وفوق كده الحكومة مش بترضى تدفعهم ضرايب غير الفرده بتاعة الأمناء اللي بيقابلوهم وكمان سايباهم ياكلوا عيش ويخنقونا بالدخان الاسود اللي طالع من المواتير المفوته
أخيرا الكلام دا مش إشاعه ولا هزار ..وده حصل معايا شخصيا عندما توصلت عن طريق الصدفة لواسطة كبيره جدا في وزارة البيئة وأنا باحكي لأحد أصدقائي عن تضرري الشديد من المطعم الشيك قوى أسفل عمارتنا ووقعت في عرض هذا المسئول وقلت النهارده بس أقدر أنام من غير دخان وأصحى من غير ما اسمع صوت مفرمة الطعمية ولا ريحة الممبار المتعفن جدا ... المهم رد علي المسؤول وقال لي أنا ممكن أهوشه ودي ممكن أنا أتئذي فيها لأنه بصراحة دا مشروع صغير والحكومه بتشجع على المشروعات الصغيرة ومانعه منعا باتا إن أيا منها يتقفل ولو ليوم واحد
بصراحة الحكومه معاها حق!!!!!!!!!!!!!!!!!!!!!!!!!!!!!!!!!!!!1
أحب أن أعبر عن استيائي من الحكومة المصرية الظالمة التي حطمت آمال الشباب وأرجو أن تتوجهوا بالدعاء عليها بعد كل صلاة
هذه مجموعة من الشباب لديهم مشكلة وهي أنهم لا يجدون زوجات مناسبات ومن يجد حلا فعليه أن يتصل بهم على 045 5210048
وهم الدكتور الصافي النجار - الأستاذ أسماعيل السيد - الأستاذ أيهم هنداوي - الأستاذ أشرف دومة.وشكرا.