انتقل إلى المحتوى
أرشيف عشريناتفبراير ٢٠٠٤ – مارس ٢٠١٠

ترزية القوانين.. وقانون الظلم

ولاد البلدقراءة في ٥ د

في أزهي عصور الحرية وأجمل أيام الديمقراطية وألذ أوقات الزهزهة والشفافية التي نحياها أصبحت كل أيامنا سوداء.. الثلاثاء الأسود بتاع البورصة.. الخميس الأسود بتاع الاستفتاء.. الأربعاء الأسود بتاع المدونين.. مش عارف البياض راح فين ؟!

12/06/2006

محمد نصر الدين - ولاد البلد:

"القانون" كلمة كبيرة، الكلام عنها كثير، كل يوم محاولة إقرار قانون مش عارف إيه.. إلغاء قانون مش عارف مين.. وتعديلات علي قانون مش عارف ليه..

ووسط كل هذا الكم من التعديلات في "النسيج" القانوني للبلد برزت إلى الوجود مهنة جديدة.. ترزي القوانين.. تتلخص مهمته في تفصيل قوانين علي "كيف كيف" الزبون.. ولكن يبدو أن "الجماعة بتوعنا" لم يكتفوا بتفصيل قوانين "لخدمة أغراضهم".. بل أنهم وضعوا قانوناً جديدا للظلم، وكله علي حسب طلب الزبون!!

ولكي نتأكد تعالوا ننظر إلى هذه النماذج ونحكم.

أسود.. والله يرحم

في أزهي عصور الحرية وأجمل أيام الديمقراطية وألذ أوقات الزهزهة والشفافية التي نحياها أصبحت كل أيامنا سوداء.. الثلاثاء الأسود بتاع البورصة.. الخميس الأسود بتاع الاستفتاء.. الأربعاء الأسود بتاع المدونين.. مش عارف البياض راح فين ؟!

المهم.. في أحد أيامنا، السوداء بكل تأكيد وقعت محرقة مسرح بني سويف الشهيرة، حد لسه فاكرها،.. أيوه اللي راح ضحيتها حوالي 50 فناناً و مبدعاً من مثقفي هذا الوطن بينهم مشاهير كبار مثل مدحت أبو بكر و حازم شحاته وغيرهم.. وشباب صغير عاشق للمسرح لم يتجاوز عمره السبعة عشر عاماً!!

صدرت التقارير التي تعودنا عليها دوما عن سوء التعامل مع الحادث.. وسيارات الميكروباص التي كانت تنقل الضحايا إلى المستشفيات.. ومخالفة المسرح، وأغلبية مسارح الدولة لمواصفات الأمان.. وطبعاً محاولة تقليدية من السلطات لتلبيس القضية في مخرج العرض (الذي لقى حتفه في المسرحية)!!

وأمام ضغوطات المثقفين ومطالبتهم بمحاسبة المسئولين عن الحادث، قام الوزير الفنان الدكتور فاروق حسنى بمسرحية هزلية أخرى بتقدمه باستقالته الوهمية وكأن القضية كلها في استقالته لا في محاسبته.. وكأنما محاسبة الوزراء كفر لا سمح الله !

لتفاجئنا جميعاً القيادة السياسية برفض الاستقالة!!

ليس هذا فقط بل تقديم عدداً من (الموظفين)، أي منفذي السياسات وليس واضعيها، إلى المحاكمة ليصدر الحكم بحبس ثمانية منهم لمدة عشر سنوات مع الشغل و كفالة 10 ألاف جنيه!!

و"تلبسهم" التهمة التي من المعروف لنا جميعا إنها مجرد تدبيسه يعني حماية للرأس الكبيرة

2 فبراير.. السواد كله!!

لست بحاجة إلى أن أذكرك بأن هذا اليوم الأسود هو اليوم الذي غرقت فيه العبارة "السلام 98" ولا إنها كانت تنقل ما يزيد على ألف شخص كانوا عائدين إلى أهاليهم بـ"تحويشة" العمر وأحياناً بالسيارة و كلهم أبتعلتهم أسماك القرش.. فأنت تعلم القصة جيداً وتعلم أن السفينة كانت تحمل علم بنما و أن عمرها الافتراضي انتهى منذ 16 عاماً و إنه سبق لها الغرق من قبل قبالة سواحل زيبروك ببلجيكا عام 1987!!

ناهيك عن محاولتهم تحميل قبطان السفينة ( الذي لقي حتفه هو الآخر) مسئولية الحادث!!

ولست بحاجة إلى أن أخبرك أن ممدوح إسماعيل لم يُعدم أو يحصل على "تأبيدة" كما كنت تتصور أو "تتوهم" أو كما صورت لك نفسك المريضة..وإنما سمحوا له بالخروج من الوطن معززاً مكرماً، ويمكن فتحوا له صالة كبار الزوار يستريح فيها علي لما الطيارة تجهز).. ثم أصدر النائب العام قرار ضبط وإحضار له!!

المعوض.....ربنا!!

نسيبنا من ده كله منهم لله هما الاثنين، خلينا فى الأهالي المنكوبين.. هل استكفوا بقتل أولادهم والأهالي هتصرف التعويضات تعويضاتهم ؟؟ لأ طبعاً.. أمال قانون الظلم راح فين ؟!

تقدر اتفاقية أثينا التعويضات في هذه الحالة بحوالي 300 ألف دولار أمريكي لكل متوفى، يعنى حوالي مليون ونص أهيف مصري، بينما ممدوح بيه كان رافض تسديد أكثر من 150 ألف جنيه مصري لأسرة كل ضحية! بعد إلحاح من قبل الحكومة وعطف كرم بالغ رفعهم لـ300 ألف فعلاً.. بس جنيه مش دولار!!

وبحسبة بسيطة من الأنباء التي تناثرت من كبرى الصحف ووكالات الأنباء العالمية التي تفيد بأنه سيحصل على ما يقرب من 50 مليون دولار وفى رواية أخرى 400 مليون من إحدى شركات التأمين البريطانية.. ودول بأه يطلعوا حولي 2 مليار بالجنيه البني بتاعنا!!

يعنى لو قلنا 2 مليار تخصم منهم الـ330 مليون اللي الحكومة قالت عليهم للضحايا يتفضل للراجل حاولي مليار ونص.. وشوية فكة!

يعنى الراجل برضه كسبان !

خلاصة الكلام، العبد لله اكتشف أن الناس دى مش بتلعب ولا بتخرق القوانين، أعوذ بالله من الخرق، الناس دى شغالة بالقانون.. قانون الظلم، وتقريبا ده قانون بيحاول أحد الترزية تفصيله حاليا..

ويبدو أن هذا القانون سيكون في صف ممدوح إسماعيل.. ممدوح الذي تم تعيينه في مجلس الشورى بقرار من الرئيس.. والسيد فاروق حسنى واصلين قوى وقريبين من إلى فوق.. علشان كده لا الأول إتحاكم بعد تسببه فى قتل 1000 بنى آدم، ده غير إنه هياخد فلوس كمان، ولا الثاني إتحاكم ولا حتى اتقبلت استقالته بعد المحرقة اللي هو المسئول الأول عنها..

قانون الظلم يبيح لضحايا أي حادث إرهابي من الأجانب أن يأخذ تعويضاته "على داير المليم" وبالعملة الصعبة كمان، ده غير حفلات الورد و التأبين اللهم لا حسد،.. بينما أهالي العبارة "يأخذوا" عصاية الأمن المركزي على ظهرهم عندما يتظاهروا من أجل حقوقهم!!

إنتا لسه بتسأل ليه.. عشان دول أجانب و دول مصريين..

وعلشان القانون المصري للظلم لا يسري علي غير المصريين مثله مثل باقي القوانين المصرية.

• وطني المسرطن.. في معهد الأورام

• بصراحة.. شكله غبي!!

• مصر والصين. سلامات!!

• شائعة التأييد الأمريكي.. للتوريث!!

الأقسام

تعليقات القرّاء

تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.

  1. شاعر كُتب في
    جميل
    حلو الموضوع يا محمد
  2. أمير كُتب في
    حسني باع مصر
    سمعنا إن الريس كتب مصر لأبنه جمال بيع و شرا بعقد بيع ابتدائي..وأن إجراءات إعداد عقد البيع النهائي ماشيه علي قدم و ساق ... و سوف يتم توثيق البيع في مكتب التوثيق النموزجي بمجلس الشعب الموقر ( الشهير بسيد قراره ) .. حصل و لا محصلش لسه؟؟؟ أظنه حصل ...أفيدونا أفادكم الله.
  3. ابو شريف كُتب في
    مطلوب مقصدار
    في ظل الاحداث المتلاحقة حاليا سوف يتم الاعلان قريبا عن وظيفة شاغرة بمجلس الشعب سابقاً ( سيد قراره حالياً ) يكون قادرا علي قص ولزق قانون كل ساعة بشرط أن تكون الثقوب واضحة جدا للحكومة الذكية وأبيض أمام الشعب المصري وسوف يتم تحديد نسبة العمولة طبقاً للقانون الذي سوف يتم تفصيله وأهميته ، وسوف يتم تقديم الطلبات علي العنوان التالي : -
    كوبري القبة - رئاسة الإمبراطورية المباركية - حسني مبارك
    أو علي العنوان الدائم للإمبراطور : -
    شرم الشيخ - منتجع أم سمسم
    حسبي الله ونعم الوكيل فيكوا يابعدا
  4. امه الله كُتب في
    حسبنا الله و نعم الوكيل
    السلام عليكم و رحمه الله و بركاته
    اوعى حد يفتكر ان اللي اتسبب في موت الف بني ادم او عدد اقل غرقا او حرقاعملته دي هاتعدي كده.
    لأ لأ لأ
    اذا كان المسئول عن البلد ميعرفش العدل
    فالمسئول عن الكون كله اسمه العدل
    ربنا مش هايسيبه
    اذا كانت الحكومه هربته هو وامثاله من اللي بيظلموا و بياكلوا حقوق الناس
    هيروح فين من ربنا؟؟
    هايهرب؟؟؟
    كده كده هايقابل ربنا غصب عنه و لوحده و يبقى يخلى "حد" ينفعه
    و ياريته كان اخد عقابه في الدنيا كان هايخف عنه شويه من بتاع الاخره بس هوه ما حسبهاش صح لا هوه و لا اللى هربوه لانهم شالوا معاه الوزر بتاعه و اهالى الضحايا بقولهم ان النبى عليه الصلاه و الاتم قال ان الغريق شهيد و ان الحريق شهيد فموتاكم ان شاء الله شهداء الان" احياء عند ربهم يرزقون " و اللي ظلم مش هاتعدي بسيطه كده لأ
    هو حد عارف هو حاسس بايه دلوقتي؟؟
    دي القلوب بايد ربنايمكن يكون دلوقتي بيتعذب باي حاجه
    اللي عايزه اقوله كمان لاهالى الضحايا
    ان الدنيا كده كده هانسيبها بعد ايام او شهور او حتى سنين و انتم اولادكم و اخواتكم سابوها في ميعادهم اللي ربنا كاتبهلهم بس سابوها باذن الله شهدا و ده شرف
    ربنا يصبركم و يا رب يفرج كرب المكروبين اجمعين
    و حسبنا الله و نعم الوكيل و جزاكم الله خيرا
  5. mafrws كُتب في
    amyn
    الله ينتقم منك يا مبارك ويورينا فيك يوم اشوفك كده زي شارون حي ميت واشوف جمال في المعتقل وسوزان في سجن النساء آآآآآآآآمييييييييييييييييييييييييييييييييييينييييي
  6. عيل ضايع كُتب في
    ياعيش مبارك حبيب الملايييييييييييييين
    ياعيش مبارك اه شردنا وبعناوخلاص بس احنا حمير مش فاهمين حاجه مهى ده ياجماعه بلده جنسيه مبارك مصرى وجنسيه السبعين مليون عبيد والحمدلله ان مبارك باع البلد مش لغرب بعها لجمال وسوزان وشيخ البلد صفوت العميل والعجل الشازلى شيخ الغفر
    ارحمنونا ياولاد الكلب ياعجول ياظلمه
العودة إلى الأعلى