صباحك زى جامعتك
"البلد دي اللي يشوفها من فوق غير اللي يشوفها من تحت"..
فتحي نزفل - طيور الظلام
محذرا من أعداء الحرية ومحاولاتهم
صباح الخير على صفاء.. وأنت بتزعقلها بكل نرفزة"أديني العصير يا صفاء "بعد محاضرة حرقت دمك ونشفت ريقك
دينا سماحة - ولاد البلد:
صباح الخير
على الطلبة والطلبات في الجامعات
على الولاد وكل البنات
وهما منطورين على السلاليم والسكاشن والمدرجات
على كورنيش الجامعة وشارع بين السرايات
وأيام الامتحانات.. تشوفهم محتاسين بيصورا ملازم في المكتبات
صباح الخير
على الحبيبة في شوراع الجامعة والقاعدة الحلوة واللمة
وتكمل القاعده برا.. على المسلة
وما تحلى الجامعة من غير أسوراها
وبيبانها العالية اللي بتقفل قدام طلابها في المظاهرات
صباح الخير
على دكاترة الجامعة وهما واقفين بيطالبوا بحقوقهم
في مسيرة ولا اعتصام ..بعد حبس زمايلهم
يقف الطالب منهم مستغرب ويقول في نفسه "طب إحنا نعمل إيه؟؟""
والأمن طبعا واقف من بعيد.. بيراقب
واخد باله من كل حركة من كل واحد.. حاضر أو حتى غايب
صباح الخير
على الكليات والأقسام.. بما فيها المعيدين والمعيدات
اللي بيدوا دروس ويقوموا بأحلى واجب مع الطلاب في أيام الزنقات
صباح الخير
على المناهج اللي مش معروفه.. على الكتب اللي لازم تشتريها
وماتخدش منها غير فصل أو فصلين من عشر فصول
وتسقط لو ماجبتش كتاب أو حتى عدلت على أستاذك فى الكلام
ده غير الواسطة والمحسوبية في امتحانات القبول
صباح الخير
على كليتي ..كلية الإعلام
قسم الصحافة.. قسم الغلابة والمطحونين
تلاقيهم طول السنه شاقينين...
أبحاث.. تكاليف.. ندوات.. محاضرات.. تدريب.. صوت جامعة..شغاليين
صباح الخير
على محاضرة روشه لماجى الحلوانى
ونظرة حازمة من أشرف صالح
وندوة مملة وطويلة لليلى عبد المجيد
ووصلة حماس وشوية تهزيق من عواطف عبد الرحمن
صباح الخير
على عم مبروك وهو واقف قدام المدرج
وهو بيضحلك وأنت داخل محاضرة لسامي عبد العزيز
أو حتى سامي الشريف
صباح الخير
على أيمن.. حارسنا وحامينا
يجيلك وأنت جوا يقولك لو سمحت كرنيهك وينسى انك طالب جوا كليتك
بيحضر كل حفله وكل ندوة ..ضيف عزيز علينا
صباح الخير
على صفاء.. وأنت بتزعقلها بكل نرفزة
"أديني العصير يا صفاء "بعد محاضرة حرقت دمك ونشفت ريقك
أو تروحلها مش فايق ومش شايف قدام.. وتقولها وأنت النوم مسيطر عليك
"واحد كابتشينو يا صفاء"
صباح الخير
على أمناء المكتبة اللي بتشوفهم في التيرم الواحد
تلت أو أربع مرات.. في كل مرة تعمل بحث
وهما يقولولك ماتلمسش كتاب.. ماتروحش للرفوف
مع إنها مكتبة بس بردو مش مسموحلك تدور على كتاب
صباح الخير
على المناهج الغريبة والأبحاث والتكاليف الكتيرة
وتشوف مين ينجدك معيد أو حتى معيدة
عندك سهير أو عثمان يقبولك ببتسامة جميلة
أو بقى تروح للباز وهو قاعد بيكلمك حاطط رجل على رجل
صباح الخير
على حرقة الدم والأعصاب
في امتحانات الميد تيرم والفينال
على الليالي الطويلة والسهر والوقوف في السقعا
لتصوير الملازم والمحاضرات
تلاقى الطالب منهم شعره شاب
صباح الخير
على قسم إذاعة وعلاقات
على الصحاب والأنتميات
والسنيمات والفسح والخروجات
وعلى حواديت البنات والقصص والحكايات
والطناش والتنفيض للحياة
وعلى الحوارت اللي ما بتخلصش بين الولاد والبنات
عدد التعليقات : 22
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
حلو اوى يا دينا ...
فطستيني ع نفسي من الضحك ...ومن الحزن ..
عاوزة اقرالك تاني يا دندوووون
ما اروعك
وما
اروع الكلمات
صباحك عسل
استمري يا دينا
طبعا يا دندون انتى عارفة رأيي ، بس بجد حبيت اقولك مبروك انك رجعتى تكتبى ، لا و راجعة بقوة
حلوة جدا يا دينا... قلتي كل حاجة حارقة دمي...
الصوره جامده
معبلره فيها
قوه
وضعف
الموضوع هايل ولذيذ وبجد دمه خفيف
المقال كويس بس الصورة ديه وحشة اوي وبتعبر اد ايه احنا اصبحنا دولة امنية ودولة ترويع بجد لو ممكن تغيروها لانها تنرفز شكراً.
جيتي على الجرح خدي دول كمان
صباح الخير على اقسام الاعلام اللي منها قسم اعلام عين شمس " اللي اتخرجت انا منه"
صباح الخير على سوزان القلليني اللي هبطت بالبارشوت من مدرس مغمور في اعلام القاهرة لهوب هو بهوب رئيس قسم اعلام عين شمس
صباح الخير عليها برضه وهيه بتنزل في التيرو الواحد اكتر من 15 كتاب للاربع فرق في القسم في كل التخصصات بس للاسف على ايامي مكنتش لسه نزلت كتب في العربي
تلاقي كتابها بكراسه عملي فاشله معفنه بس علشان تتاكد انك اشتريت
عناوين الكتب تضحك - كيفيه الكتبه الكتاب الاول - للراديو وبعدين التليفزيون وبعدين الاخراج الصحفي والعلاقات العامه - وبعدين التصوير وبعدين العملي كله كله مدرسة كشكول
صباح الخير على الابعدية بتاعتها على الفساد الواضح اوي من غير تستر
صباح الخير على زملائي المتسلقين اصحاب المهام الصعبة واحيانا المستحيله شله الهانم
صباح الخير برضه على الساعي بتاع مكتبها اللي فاكر نفسه سفير النوايا الحسنة
صباح الخير على الذكريات والمواجع اللي قلبتيها علينا وصباحكو سكر
اية الحلاوة دى هوه دة اللى حاصل فعلا فى البلد اليومين دوللللللللللللللللللل
شكرا يا دينا انتى قولتى اللى بيحصل فى جامعتك اقولك انا بقى على اللى بيحصل فى جامعتى بعيد عن الصياعه والسرمحه مع الولاد اللى بتحصل فى اى مكان دلوقتى احب اقولك عن المساؤى اللى بنشوفها اولا مفيش دكاتره بتدخل تشرح حاجه،ثانيا مستوى التعليم زباله يعنى قلته احسن وده لان مفيش مؤهلات لكده يعنى مدرجات معفنه والميكريفونات بايظه يدوب الدكتور يوشوش نفسه،ثالثا الدكاتره ما بيصدقوا نبقى لسه فى اول السنه الدكتور يلاقى حد بيعمل دوشه يقول خلاص المنهج مشروح وغيره وغيره بس عايزه اعرف هيستفيدوا ايه لما يسقطونا؟؟يا رب ارحمنا من ظلم الدكاتره وقرفهم
بجد انا حاسس بكل كلمه قولتيها
انا في كليه هندسه و عارف المعاناه دي كلها و ربنا يخلصنا منها علي خير
يا حواراتك يا دينا, ميه ميه, سخرية مريرة عن واقعنا الجامعي في صياغة جامدة!!
إيه يا بنتي ده ؟؟
طيب أنا أعمل إيه اللي كنت خلاص داخلها وغيرت رأيي يوم كتابة الرغبات رغم إني كنت جايب مجموعها ....
ودلوقتي أهه مرت السنين ..وأديني رابعة حاسبات ومعلومات وربنا يكرمني في المشروع ....
مممم ... يعني رأيك أقول لبنت عمي الصغيرة تغير رأيها وبلاش منها ؟؟؟؟
يلا عموما ربنا بيكتب لناالخير دايما
وبرضه ...
لا للتمديد ... لا لتتوريث ... نعم لتعديل الدستور المصري
mohamedmat@hotmail.com
جميل يا دندوشة.... واقع مؤلم بس ساخر و أول مرة أخد بالي أنه بالمرارة دي...بس خلي بالك أنه بكرة أحسن بينل بإذن الله ..
بس في مشهد ناقص
شباب شباب شباب
اجتمااااااااااااااااااااااااااااااع
صباخ الخير على وردة اسمها دندون , هايل هايل ..ربنا يخليكي لطلبة الصحافة الغلبنين اللى خدتلهم حقوقهم ..اصلنا الغلابة المطحونين
قلت اللى كلنا نفسنا نقوله , وحستتينا بالمثل القائل ناس هايصة وناس لايصة ,وأكيد إنننا الليصين .
وتمنسشي تسلملي على الإعلام
يا عينى عليكى يا صفاء ..اتشهرت اكتر من محمد ابو تريكة.
انا عارفها باخد منها شاى سكر زيادة ومولتو صغير.....
بس بصراحة صفاء ايه..............صاروخ
can you tell me !
لست مصرية0000 انا سعودية
اشارككم المعاناة ولكن تزيد
فعلى الرغم من صعوبة المناهج وغلاء الكتب التي اشتريها احيانا بما يفوق التسعين ريالا0
ولكن كل شيء يمكن تحملة امام مشكلة عويصة وهي
ان من يدرسنامن جنسيات سودانية ومصرية
بعضهم (وضعوا تحت بعضهم مائة وخمسين خط )لا يدركون من تخصصهم الذي يحملون فيه شهادات عليا ادنى شيء والفضائح تتجلى واضحة اذا كان القسم لغة انجليزية لا وكمان ادب
اتمنى تفهموني ايش السبب؟؟؟؟
عندما تدرسني استاذة(ماجستير ادب انجليزي)ولا تعرف ان كانت oxenمفردا ام جمعاوللاسف هي مصرية
ولدينا الكثير من هذه الحالات
(لا وعاملين فيها ابو العريف مايعطون علامات
ويقولون اننا مانفهم)
مع اني ادركت شيء من موضوع دكتوراة للبيع في منتداكم
ولكن ارجو التوضيح؟؟؟
عيب كده الموضوع مسروق من بلال فضل وده نصه:
صباحك زي وشك يا مصر..جميل وحزين
يوم فى حياة مواطن حقيقى
بقلم : بلال فضل
صباح الخير
يا مصر ..
صباح الخير
على الناس المرهقين من عناء الحياة
والدايرين في الساقية اللي منصوبة لهم من سبعة الاف سنة ..
الناس اللي عايشة اليوم بيومه .. كل أملها يعدي من غير اي خساير ..
مابتفكرش في بكره عشان ماتتقهرش ...
مابتفكرش في النهارده علشان ماتتنقطش ..
صباح الخير
على ضحكة عالية في قهوة شايها مايتشربش ..
على شاب بيقوم لست كبيرة في الاتوبيس ..
على كوباية شاي باللبن وحتة بقسماط بعد صلاة الفجر جنب السيدة نفيسة ..
على قهوة في الحسين مبيعديش عليها حسن بشندي ..
على سينما زحمة والضحك طالع من القلب للركب ..
على سور الأزبكية وكتبه المعتقة ..
على عشاق فقرا مش لاقيين شقة محافظة فبيخطفوا الفرحة متداريين في صخور الكورنيش ورا شجر النيل ..
على صوت الشيخ السيد متولي وهو بيقرا سورة يوسف وبيخلينا نعيط على سيدنا يعقوب اللي ابيضت عيناه من الحزن ..
صباح الخير
على كل الناس اللي بتشقى عشان تجيب اللقمة من بق الاسد ومراته ..
على عربيات الكبده والسجق لحمة الفقير ..
وعربيات الدوم تفاح الفقير ..
وعربيات السوبيا خمرة الفقير ..
على طبق الكشري وخللي العدس ورد زياده وغرقان في الدقة ..
على فطاطري الحسين اللي سمى نفسه بيتزا الحسين فباظ من ساعتها ..
على العدوي بتاع ميدان الجيش يعني أحلى رصة فول وطعمية بمستلزماتها وبرخص التراب ..
على أفران العيش في اسكندرية ..
على البلكونات اللي مافيهاش كراكيب ولا بصل ولا توم ..
فيها كرسيين وكوبايتين شاي وبصة رضا وأهة شوق ..
على كل صالة بتلم الناس اللي مش عارفة تتلم على نفسها ..
على كل نكته قبيحة تتقال بصوت عال
اقرأ بقية التعليق ..
صباح الخير يامصر؟
صح النوم يامصر؟
إلى متى نظل قيد هذا التعبير
إلى متى نظل مكتوفي الأيدي
محمد خسن غنيم
هو فعلا كلام جميل وزي الفل ويمخمخ في النافوخ
لكن عايز اسأل سؤال
هو في في مصر كليات, أقصد تعليم أقصد أي حاجة؟!
أفيدونا أفادكم الله :(
لا طبعا لا تعليم ولا حاجة
ارد على سؤالك وابي رد على سؤالي المطروح سابقا
ولا مافيه شجاعة!!
حلوووووووة
اجمل تعليق جامعي هي الواقع
بدا كمان
احما
ايه الجيش ده كله اللي واقف علي الباب انتوا داخلين تمتحنوا ولا داخلين حرب ههههههههه وعجبني قوي قوي شعرك يا دينا ربنا يكون في عونا وعونكم
الاستاذ بتاع تعليق صباح الخير على المواضيع الملطوشه..احب اقول لحضرتك ان الموضوع مش ملطوش ولا حاجه ولا حتى مسروق ..واحب اوضح لحضرتك ان الفكره دى فعلا جاتلى من الموضوع اللى كتبه بلال فضل
صباحك زى وشك يا مصر جميل و حزين هوفعلا لما قريته قررت انى اكتب عننا احنا الطلبة وعن حال الجامعة وعن كليتى..هى حاجه اسمها مطارحةانك ترد على حد بنفس الاسلوب والطريقه بس بفكرة جديده..وده اللى انا عملته استوحيت الاسلوب من بلال فضل وكتبت الفكره عن الطلاب والجامعة والكليه.. وعلى فكره تقريبا اللى معظم اللى علقوا على الموضوع قرءوا مقال بلال فضل قبل التعليق على موضوعى ...ده للتوضيح فقط
شــاركـنــا الحــلم .. والتـحـــدى
شــارك مـعـنـا......
شــارك مـعـنـا......
http://forum.amrkhaled.net/showthread.php?t=43620
صباح الخير على دينا والمفروض تبقى يعقوب صنوع / ابو نظاره
نصك حلو يا دينا انا اعجبت بيكى والله وبصراحتك ويا ريت كل الطلبه وبالأخص المصريين زيك بس مشكلتنا ان احنا جبناء , والجبن صفه من صفات الضعفاء