أمي.. نداء محبة

أمي برضه هي اللي جادت بزهرة عمرها في البيت الثالث، وهي نفسها التي عندها أسمى الشيم في البيت الرابع..

21/03/2006

أمـي نـــداء محبـــة

بل إن كل الحــب أم

أمي عطـــــــاء زاخر

في فيضه بحر خضم

ضحت لأجلى بالهنا

وتحملت عني الألم

جادت بزهرة عمرها

من غير ضيق أو سأم

لم تنتظر مني الجزاء

وهذه أسمى الشيم

أٌمــــاه يرعــــاك الذي

خلق البرية من عدم

والله العظيم والله العظيم دي قصيدة مقررة من أكتر من عشرين سنة على طلاب وطالبات مدارس مصر كلها.. وخصوصا سنة تالتة ابتدائي.. يعني بالكتير كان عندنا وقتها 10 سنين..

متضحكش أرجوك، فقط إرجع لفوق ودقق في المعاني السامية اللي في القصيدة..

الأم.. الست الطيبة الحنينة الجميلة التي تسكن قلوبنا وعقولنا وأرواحنا.. فجأة تبقى نداء محبة، بل والأدهى أن يصير كل حب له نداء هو في حد ذاته أم برضه..

نفس الأم في البيت التاني تتحول فجأة إلى عطاء زاخر، طيب بالله عليك، إنت عمرك لاحظت على أمك الطيبة الحنونة أي علامات للـ"زاخر" دي.. وياريته يكون زاخر فقط، بل تتحول المشكلة إلى مأساة في الشطر الثاني من البيت، وده بقى بيقول.. في فيضه بحر خضم.. يا سلام .. أهو ده اللي ناقص..

أمي برضه هي اللي جادت بزهرة عمرها في البيت الثالث، وهي نفسها التي عندها أسمى الشيم في البيت الرابع.. وأخيرا بدل ما أقولها ربنا يخليكي .. أجد نفسي أقول لها فجأة.. يرعاكي الذي خلق البرية من عدم..

وأنا في ثالثة ابتدائي، ولما قررت علينا القصيدة دي، كانت كلمة "أمي" هي الكلمة الوحيدة التي أعرفها في القصيدة كلها، لكن الحقيقة القصيدة كان ليها أثر بالغ إن علاقتي بأمي تهتز بعد ماأعرف إنها فيها كل الحاجات اللي مش مفهومة دي..

ده مثال.. مجرد مثال.. للتعليم المصري، ودوره العظيم في تعليم الأطفال.. القصيدة دي مكنتش هلاقيها لولا مي كامل زميلتنا في ولاد البلد، والغريب إنها كانت حفظاها كلها عن ظهر قلب، وده لإنها كانت بتدخل بيها مسابقات إلقاء الشعر.. والأدهى والأمر.. إنها كانت بتفوز.. سبحانه..

أيضا من مجلة جود نيوز سينما، وفي عدد مارس 2006 وجدنا كاريكاتير عن تطور صورة الأم في السينما المصرية.. تعالوا شوفوه معانا..