ما تيجوا نشقلب التاريخ
وشرخ الزمن – لو كنت متعرفوش – هو ببساطة ثقب أسود كبير في الزمن يخليك تروح الزمن اللي إنت عايزه وقت ما تحب.. طيب لو افترضنا (مثلا مثلا يعني) إن الشرخ ده كان موجود..
أميرة قاسم - ولآد البلد:
قاعد في أوضتك في البيت، مسهم شوية وعليك "سهم الله" زي ما بيقولوا، عمال تتأمل الحيطة اللي قدامك.. وتلاحظ لأول مرة إن فيها شرخ كبير، رغم إنكم لسه ناقلين العمارة الجديدة دي من سنة... تقترب من الشرخ.. تقترب أكثر.. تجد نفسك تنسحب داخله.. اصله طلع.. شرخ الزمن!
وشرخ الزمن – لو كنت متعرفوش – هو ببساطة ثقب أسود كبير في الزمن يخليك تروح الزمن اللي إنت عايزه وقت ما تحب.. طيب لو افترضنا (مثلا مثلا يعني) إن الشرخ ده كان موجود.. يا ترى حضرتك تحب تروح على فين.. !
الحلم ...قاااائد
زمن الرسول.. حلم رااااائع، ناس كتير ببتقول مش كنت بس اتولد في جواره.. مش كنت أتولد في زمنه، علا عبد القادر مثلا كان نفسها تكون في زمن الرسول، لأننا في حياتنا مفتقدين إحساسنا بالقائد إلى نثق فيه وإن عمره ما "هيودينا في داهية"!.
دينا سماحة بتحلم نفس الحلم بس مش عشان القائد.. عشان هي متأكدة إن إيمانها كان هيكون أقوي ساعتها وهي شايفة الرسول.. أما بقي الأخت بسنت أسامه فهي شايفة إنها لو كانت في عصر الرسول كانت أكيد هتدخل الجنة لأن وجوده في حياتها هيديها قوة ودفعة إنها تكون أكثر التزاما، واستيعابها للدين كان هيبقي أفضل، بدل ما أحنا عاملين نسمع فتاوى علي الفضائيات مالهاش أساس..
حلم الوجود في زمن الرسول موجود عند الكبير قبل الصغير في مجتمعاتنا، والسبب هو إننا أصلا فاقدين القدرة على التغيير، وحتى لو عندنا قدرة.. تلاقينا فاقدين الثقة في قدرتنا.. على العموم ده مش رأيي لوحدي.. ده رأي بسام أحمد.. واللي قال ببساطة.. أنا عايز أفضل موجود في زمني.. ولو لقيت شرخ الزمن.. هقفله!
لكن أمام رأي بسام يوجد رأي آخر، يقول ببساطة.. وليه نقفل الشرخ لما ممكن نستفيد منه في تحسين أوضاعنا.. وإحنا أصلا كل مصايبنا سببها أخطاء حصلت قبل كدة.. تعالوا نشوف الشباب قالوا إيه..
المحبوس ..يحلم بثورة
أحمد شاكر كان نفسه يكون موجود في سنة 52، أول خاطر هييجي في بالك إنه كان عايز يشوف الثورة، لكن الحقيقة أحمد كان حابب يكون موجود لسبب تاني.. وهو إنه يمنع الثورة بنفسه..
أحمد بيقول إنه شايف من وجهة نظره إن الثورة هي السبب في كل الفساد الموجود، لإنها هي السبب في الحكم العسكري، وإن رغم فساد الملك إلا إنه في الأول والآخر مكنش ظابط، وكان بيحس بهموم المواطنين..!
عايز أروح المنصة!
لولا اغتيال السادات مكنش ده حالنا!!
أمنية إمام سلامة إنه كان يبقي موجود في فترة السادات، وفي يوم اغتياله بالتحديد، ويموت بداله عشان الراجل بس ياخد فرصته في إنه يحقق الحاجات اللي كان عاوز يعملها (ومش عشان سواد عيون السادات)، وأهو أرحم من حالنا دلوقتي، وصاحبنا إلى أخذ فرص كتيييييرة أوى، ومعملش حاجة.
أغرب تعليق كان من محمد سماحه اللى كان بيحلم إنه يتولد قبل تاريخ ميلاده إن شاء الله حتى بيوم واحد، لسبب إن سنة تجنيده حددوا المواليد من 23-5 لحد آخر السنة، وهو مولود يوم 23 بالتحديد، محمد يضيف "أهو أنا مثلا لو كنت اتولدت قبل تاريخ ميلادي بيوم، كان أتغير مجري حياتي، يعني لا كنت دخلت الجيش، ووفرت 3 سنين من عمري في إنى احضر نفسي للجواز"...
وإنت بقى.. هتسد شرخ الحيطة.. ولا هتروح زمن النبي.. ولا رايح على على فين؟!
• التطور الطبيعي.. للحوارات الساقعة!
• علاء إخواني.. والأتوبيس إسرائيلي!
• اللي شبكنا...يخلصنا.!
• التيارات الإسلامية.. وحوار الأقباط
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
أحلى تعليق عاجبني بتاع محمد سماحة...
الموضوع حلو!
موضوع مترقع يا اميرة وزى العسل؟؟؟
بس بجد سؤال حلو اوى..طول عمرنا بنتفرج على الافلام الاجنبيه ويجيبولناالات اختراق الزمن وهما بقى بينقلونا على مزاجهم يا ما يودونا للماضى بتاعم اللى هو الكاو بوى!! او زمن مارلين منرو العظيمة!! ...او يا اما بقى يخدونا لمستقبلهم اللى شافيين انه فيه انهم هايبقوا اسياد الكون ده وان هما اللى هاينقذوا العالم من كل حاجه وانهم تقريبا اللى عايشين لوحدهم على كوكب الارض !!..حاجه غريبه والله... ما علينا نخلينا فى موضوعنا انا شايفه بقى انه كل واحد فينا فعلا ممكن يكون له راى فى حكاية الزمن والتاريخ ده ..انا عن نفسى نفسى اقعد ادخل واخرج فى التاريخ زى منا عايزة وكل ماتحصل حاجه وحشه التاريخ بيذكرها لينا كمسلمين او عرب او مصريين اروح للزمن ده واغيرها وامسحها على طول وكأن شيئاً لم يكن ..والله ياريت تبقى حاجه جميله اوى ..واخدها بالمرة قياسه معجبنيش الزمن ده اغير ..يا سلااااااام ياريت بجد
موضوع جامد جدا يا أميرة ولو إن كان ممكن تزودي ناس اكتر من كده كان حيبأه اكتر حلاوة وع ذلك موضوع تحفة وفكرته جامدة جدا جدا جدا.
انا راى مختلف تماما حيث اننى اختار هذا الزمن الذى ولدت فيه وراضيه عنه جدا، مش بس انى عارفه ان ربنا مقسم لكل واحد نصيبه وانه مهما اتظلم من الناس والحكام فهو ياخذ حقه كامل سواء فى الدنيا او فى الاخره،لا كمان ع الرغم من الظلم الى بنشوفه فى كل وقت من كل مسؤول الا ان ربنا بيضع لنا الكثير من الاشياء التى تلهمنا الصبر زى الشباب الذى نراه يبذل كل ما بوسعه ليحسن حال مجتمعه وكذلك محاولات القضاه الان، ع الرغم انى عارفه انهم مش هيخدوا حقهم لكننى اعتقد ان الوقت هيجى الى نعيش فيه فى حياه بجد( كريمه)،اما عمن ياملون لو كانوا موجوديين فى عصر النبى فمن منا لايريد ان يتمتع برؤيه الحبيب(ص)، المشكله بس ان الحياه مكنتش هتبقى حلوه اوى زى مهما متوقعيين لانهم من الممكن ان يكونوا من الكفار،ولو كانوا هيسلموا مع الرسول فلا تنسوا ان الرسول(ص)تعرض لايذاءء شديد جدا جدا جدا فمن الممكن ان يتخلوا عنه فى ذلك الوقت ولا يصبروا مثل ما نحن صبريين الان وختاما ان شاء الله كل المحاولات التى تحدث هذه الايام ستغير وان لم نشهد هذا التغيير فسيشهده غيرنا ولا مانع من ذلك
أولا السلام عليكم يا شباب.
بجد دي أول مرة أدخل الموقع ده و بجد أكثر من رائع .
أما لو جينا نقلب التاريخ بصراحة هاكون طماع شوية لأني عايز أكون موجود من بدء الخليقة و للأبد مش علشان أنا باحب الحياة للدرجة دي بس كنت عايز أشوف حاجات كتير و أغير حاجات كتير يعني مثلا كنت هانصح أبونا آدم ميخرجناش من الجنة بدل النار اللي احنا عايشيين فيها حاليا و كنت أشوف الأنبياء بعد أبونا آدم علشان أرسخ إيماني و أساندهم لأنهم قدوة لينا احنا مفتقدينا الوقتي و كنت عايز أشوف الفراعنة و أحافظ على علمهم اللي لو شافوا تخلفناالوقتي كانوا تبرأوا مناو كنت عايز أشوف رسولنا الحبيب و أتعلم يعني ايه قائد و إمام و سياسي و اجتماعي كل ده في شخص واحد و أقول للأجيال اللي تيجي ازاي اجتمعت كل الصفات دي في رجل واحد بدل ما احنا بنشوف قادتناالله يسامحهم على اللي بيعملوه فينا و مفيش حد منهم فيه أي صفة من الصفات دي و كنت عايز أشوف كل الحضارات الأخرى اللي كانت في بدايتها أيام ما كانوا بينقلوا علمهم منا و همه فين الوقتي و احنا فيين و كنت عايز أشوف الثورة المباركة و ضباطها الأشرار معلهش قصدي الأحرار و أنصح كل اللي مشى وراهم و أقول له بلاش دول بيضحكوا علينا و كل كلامهم كذب بس يا خسارة ماكانش حد هيصدقني وقتها و بعدين أشوف زمن السادات و أقابله بس تعرفوا كنت بجد و الله هاحترمه جدا لأنه راجل وطني و مكنتش هاخليهم يغتالوه عارفين ليه مش علشان أنا باحبه قوي لأ ده لأني مكنتش عايز النائب بتاعه يعمل فينا اللي بيعمله ده و كنت هافكره بالآخرة هههههههه ( تصوروا أنا عايز أعيش من أيام أبونا آدم ) و عايز أفكر حبيبنا بالاخرة بس ده مش تناقض لأني كنت عايز كده بس عارف ان فيه آخره بس الظاهر هو ناسي الآخرة دي خالص .
مجلة شباب عشرين مجلة جديدة على الانترنت www.shabab20.com
طب واللي معندوش شرخ .
ممكن الواحد يعمل لنفسة شرخ يعني يعمل لنفسة الحياة اللي نفسة يعشها في العصر اللي احنا عيشين فيه دة
والعمل يا معلم فسواني (يعوض عليك ربنا)
بصراحه انا فكرت في حاجات كتير بس أول حاجه خطرت علي بالي اني اكون سنه 48 بالتحديد عشان أمنع بأي شكل صفقه الاسلحه الفاسده اللي أدت لهزيمه الوطن العربي وعلي فكره لو كان العرب انتصروا في حرب 48 كان اتغير مجري التاريخ تماما ومكانتش اسرائيل تقدر تتحكم فينا ولا حصلت حرب 73 وكان جالنا ناس مخلصه تحكم البلد وقامت دوله اسلاميه ومكانش فيه موقع اسمه عشرينات لانه مكانش هيلاقي حاجه يكتبها لان البلد كانت هتبقي في أحسن حال
فكرة رائعة وأسلوب تناول متميز لكن يفتقر إلي تعدد الآراء نوعا ما بالإضافة إلي وجود فقرة غير مترابطة منطقيا هي التالية:
حلم الوجود في زمن الرسول موجود عند الكبير قبل الصغير في مجتمعاتنا، والسبب هو إننا أصلا فاقدين القدرة على التغيير، وحتى لو عندنا قدرة.. تلاقينا فاقدين الثقة في قدرتنا.. على العموم ده مش رأيي لوحدي.. ده رأي بسام أحمد.. واللي قال ببساطة.. أنا عايز أفضل موجود في زمني.. ولو لقيت شرخ الزمن.. هقفله!
حسب الفقرة يفترض ان يكون راي بسام هو انه يريد العيش في زمن الرسول للسبب المذكور وليس انه سيقفل شرخ الزمن.
عموما أفضل العيش في زمن صلاح الدين لأن أوضاع الأمة الإسلامية في هذه الفترة كانت شبيهة بأوضاعها الحالية ونجح صلاح الدين في تحقيق حلم الوحدة والنهضة بعد عناء، وددت أن أعيش زمنه بجواره لأستلهم تفاصيل نجاحه وأطبقها علي واقعي المحبط عله يتغير.