سعيد يعني Happy
كانت هذه هي القصيدة التي تذكرتها عندما شعرت بأنني لست الوحيدة الـ"مش Happy "، قد يكون السبب غير معروف ولكننا اشتركنا جميعا في صفة واحدة
06/07/2006
Happy""، كلمة من ضمن تلك الكلمات التي درسناها في الصف الأول الإعدادي وكانت السنة الأولى التي ندرس فيها الانجليزي (مدارس حكومة بقى)، وإيمانا منى بأننا شباب نساي فسأذكركم بمعناها وفقا للقاموس "Happy" تعني "سعيد" وهي صفة تفيد الفرح والسعادة والابتهاج.
سعيد يعني"Happy" لم أفكر في معناها من قبل إلا بوصفها مجرد كلمة في لغة أخرى تعبر عن معنى السعادة في لغتنا ألام، ولكن هناك من فكر في معنى مختلف لهذه الكلمة في اللغتين معا وهو الشاعر المصري "عمر نجم" في ديوانه "يا نخل لو تنحني"..
كانت المرة الأولى التي أعرف فيها اسمه أو أقرأ له في معرض الكتاب الماضي ولم يكن الموضوع مكلف بالمرة لأني وجدت الكتاب في عرض ولا عروض مساحيق الغسيل من خلال مكتبة الأسرة التي تعطيك الحق في امتلاك 20 كتاب بخمسة جنيهات فقط (يا بلاش) واحسبها أنت.
كان اسم الديوان (يا نخل لو تنحني) جديد ومفيد ومعبر أمسكته بيدي وقررت أن أضمه إلى أخواته الـ19، واليكم هذه القصيدة:
أنا مش هابي!
أنا مش نبي..
لكني بسعى عشان أكون..
يا دوب بشر..
من يوم ما ع الدنيا وعيت..
وأنا مش سعيد..
وكان مدرس الانجليزي في الصعيد..
راجل كشر..
وكان يقول..
يا عيال.. سعيد يعنيHappy
فنقول وراه..
الكلمة تخرج من حلوقنا ع الشفاه..
ولا عمرها دخلت قلوب..
أنا مش نبي..
لكن في ليلة..
من بنات ليلي الطويل الغيهبي..
شفت الرسول..
الأمي طه ابن مكة اليعربي..
البدر يومها في السما..
كان مكتمل..
فارد جناحه ع النجوم..
حِبين..
مفيش بينهم كلام غير القٌبل..
أما الرسول..
فكأنه في يوم هجرته..
لمدينته زاحف بالجمل..
اللي حمل..
على السنام أغلى البشر..
وكان تهامي وكان قمر..
أجمل ما شفته في المنام..
وجهه المليح..
من جبهته..
كان الندا طارح سنا..
حلفته بالحبشي بلال..
وندهته ساعة الآدان..
قلة حنان..
يرتوي منها العطش فوق الجبال..
وأحلى غنا..
حلفته بعيسى المسيح..
أن يستريح إلى جواري لحظة..
كي يستريح..
قلبي المتيم والدبيح..
من عبيره ميت سنه..
صحيت عيوني وارتجفت بارتعاش..
-ولو أني لسه في المنام-
ورجعت من تاني جنين..
وكأنه في لحظة ما عاش..
إلا بريء..
ملهوش طريق غير الحنين..
لملمت روحي بالانكماش..
ورا الحيطان الضيقين..
اللي بتسندها النواية..
ومعرشينها بالصفيح..
أجمل ما شفته في المنام..
وجهه المليح..
وبعزم ما في ناديت..
يا سيــــــدي..
أنا هويت هذا الوطن..
ملقتشي فيه تمن الكفن..
لما انتهيت..
يا سيدي يا مصطفى..
العدل م الدنيا اختفى..
وأنا مش سعيد..
أنا مش Happy..
والكلمة ِدي انجليزي..
باختصار يعني روم..
يا سيدي يا مصطفى..
بعد ما غاصوا في العلن..
وفي الخفا..
وصلوا لِحرام النوم..
واستخبوا..
في المراتب وفي نسيج الألحفة..
وإحنا عبيد..
لا عاد عمر..
ولا عاد لنا ابن الوليد..
إحنا عبيد..
وسيدنا مش هو الإله..
سيدنا قابض ع الوريد..
قتل النشيد..
ورفعنا صوره من جديد..
تتباهى بيها الأغلفة..
ومعدشي لينا غير سنان..
لو تنفتح.. منها تبان..
معدة وخاوية من زمان..
مشتاقة طحن الأرغفة..
أنا مش نبي..
لكني بسعى عشان أكون..
وإزاي
حاكون..
والدم
مالي
الأرصفة؟!
* الاربعاء24 أغسطس 1988
كانت هذه هي القصيدة التي تذكرتها عندما شعرت بأنني لست الوحيدة الـ"مش Happy "، قد يكون السبب غير معروف ولكننا اشتركنا جميعا في صفة واحدة عبر عنها عمر نجم (الذي رحل عن دنيانا عام 95 دون أن يشعر به أحد) بطريقته الخاصة...
الصدفة وحدها جعلتني أقرأ على باب عمارتنا جملة مكتوبة بالطباشير، وواضح أنها من بقايا لعب أطفال العمارة.. الجملة تقول..
"if yoy want to be happy..
شد اللحاف.. وصلي ع النبي.."
عمر نجم في قصيدته، جمع بين الـ"Happy" والـ"نبي".. حتى قبل أن يفكر أطفال العمارة في اللعب..
شوية فلسفة.. مرت في عقلي.. وأنا على سلم العمارة.. في نفس اليوم الذي قرأت فيه القصيدة وأنتم... ماذا تعرفون عن الـ"Happy".؟
• حصريا لـ"ولاد البلد".. ماكسيموس: بلاش توقعني في الأمريكان
• جواب تنسيق.. بالحزب الوطني!!
"الحلوة في مشوار وصاحبها على نار"
كلام مكتوب على شباك ميكروباص، بيمشي في صفط اللبن.. وبيروح الجامعة
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
يا سلام يا دعاء موضع جميل
بس نصية تبعدى عن الموضيع النكد شوية
خليكى انتى لوحدك على جنب
مانتى عارفة كفاية النكد اللى عايشينة طول النهار
حاول ان تضع ابتسامة على شفء الغير
حتى تبتسم لك الحياة (ونقول دة لسة عايش)
عصوم
مشرف منتدى الترفية
بموقع مكتوب دوت كوم
essam_ahmed_844@hotmail.com
مقالة رائعة .....وقصيدة أكثر من رائعة
أنا فعلا مش Happy و للاسف المقالة دى قلبت عليا المواجع و وصلت لحقيقة كنت بحاول أخفيها ورا إبتسامتى و هيه إن أقوى عجز هو العجز عن الاحساس بالسعادة و ده فعلا إحساس قاتل لأنك بتكون زى المسجون جواه فلا أصحاب بيخففوا عنك الاحساس و لا رحلات و لا فسح و لا تغيير جو ممكن يبعد عنك الشعور ده و المصيبة الاكبر إحساسك إن مفيش شئ مادى او معنوى هوه اللى مسببلك الشعور ده و يبقى كده إنتا حطيت رجليك على اول طريق الاكتئاب
لعمر نجم قصائد ودواوين وأخرى وهذه القصيدة ليست رائعته الوحيدة وان كانت الأقرب الى قلب العبد لله ، فهناك قصيدة شيش وباب وقصيدة وعدودة للفرح التي أهداها الى أطفال الحجارة في فلسطين العربية بالاضافة الى ديوان صدر بعد وفاته وحمل اسم "تغريبة عمر نجم"
حلوة يابت , بس عايزه اضيف حاجه هي غم شويه بس حضفها
الحته بتاعت جائنا البيان التالي لما هنيدي بيسال
الراجل اللي بيسلك البلوعه, هابي نيو ير عليك " يعني سنه جديدة سعاتك"
ازبهل كدا وفي الاااااخر الفيلم قاله happy new year
وكله تمام ياباشا,مشهد متكرررر كتير,ونا ياختي لما ازهق من الكتاب اقول If you want to be happy
سك الكتاب وصلي ع النبي