بعض كلام!!
لن نتردد في تقديم الضباط المتورطين في جرائم التعذيب إلي المحاكمة!
06/07/2006
أحمد فؤاد نجم – المصري اليوم
لن نتردد في تقديم الضباط المتورطين في جرائم التعذيب إلي المحاكمة!
طبعاً سيادتك حتقول بينك وبين نفسيتك - الله يا كوفي قول كمان يا عنان حقولك
- كوفي مين؟
حتقولي
- كوفي عنان
ومن خلال الصد والرد بيني وبين سيادتك ح أفهم انك تصورت إن اللي هبد التصريح الشديد ده هو كوفي عنان أمين عام لجنة الأمم المتحدة.. ما هو كلام كبير ويخض لكن أحب أطمنك يا باشا إن ده كلام وزير داخليتنا إحنا هنا!!
- هو اللي قال كده؟
وأنت اللي بتسأل أروح قايل لك
- أيوه يا سيدي هو اللي قال كده حتى بالأمارة كان حاضر القعدة السيد فتحي سرور الرئيس الأبدي للمحروس الننوس مجلس الشعب سيد قراره محمد سيد قراره
- طب وقال إيه تاني؟ دانت بتسأل
- حيقول إيه تاني ما كبيره كفاية قوي
- لأ مش كفاية لازم تنقل الصورة بأمانة يا محترم دا حضرتك اللي بتقول لي كده، أقوم أنا حاكك في قفايا واقعد أتذكر أتذكر أتذكر - هو قال إيه ياد يا فاجومي؟ قال إيه ياد يا فاجومي! أيوه قالك ما معناه "إن إحنا - هما يعني - سبنالكو السايب في السايب علي أساس إنكم حتفهموا" ما فهمتوش تطلعولي ع الكباري زي القرود وتنامولي في الشوارع زي العيال وتدبدبوا برجليكم وتعطلوا حركة السير وتوقفوا حال خلق الله وآخر المتمة تعتدوا علي رجال الشرطة الأبرار يا خي دا بعدكم.
- طب فين بقي عبارة التعذيب؟
- ما هو بيقول لك "لن نتردد" عايز تنهب؟
- طب ومحمد الشرقاوي اللي هتكوا عرضه بعد ما صفوه جسدياً وفي الشارع مش دا برضه تبع التعذيب؟
- والله دي مسألة فيها نظر والاختلاف في الرأي لا يفسد للود عطية - من للود عطية دا انت حتبتدي تهجي؟
هنا فقط فارت الدماء في عروقي وصعدت إلي نخاشيشي الأفكار السوداء وهتفت صارخاً في وجهه
- طب اهو مش محمد الشرقاوي بتاعك اللي أنت عامله ضحية بريئة أتهف استمرار حبس تاني خلي المظاهرات تنفعه بقي.
- فقال مذهولا
- طب والطبيب الشرعي قال إيه؟
- إذا كان الطبيب الشرعي ماكشفش عليه
- طب ودا يرضي ربنا
- الله أعلم أنت بقي حتعترض وتدخل نفسك في سكة تانية خالص فخلينا هنا الله لا يسيئك
- طب قول أنا (...) وأنا أسيبك
- لأ قول أنت الأول
- أقولك لا تقول ولا أقول كل فول كل فول وفي هذا يقول شاعر العرب الأعظم أبو الطيب المتنبي ومن نكد الدنيا علي الحر أن يري عدوا له ما من صداقته بد.
• حصريا لـ"ولاد البلد".. ماكسيموس: بلاش توقعني في الأمريكان
• جواب تنسيق.. بالحزب الوطني!!
"الحلوة في مشوار وصاحبها على نار"
كلام مكتوب على شباك ميكروباص، بيمشي في صفط اللبن.. وبيروح الجامعة
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
سيبك منهم يا عم أحمد .. إنته أكبر منهم كلهم والله .. كفاياك أن الغلابه بيحبوك .. طيب ودول كفايه ؟؟ ما هم كل مصر يا أبو النجوم .. http://ibnbahya.blogspot.com/