عماد أديب يستغيث.. بـ"ألاء"!!
قدم قبل أيام، المحسود علي نضاله، مصطفي بكري رئيس تحرير جريدة الأسبوع المصرية استجوابا في مجلس الشعب بنكهة مانشيتاته الحمراء الصارخة المستغيثة المنذرة بالخطر الوشيك التي طالما تصدرت الصفحة الأولي لصحيفته منذ صدورها قبل تسع سنوات تقريبا..
الاستجواب
13/07/2006
أحمد الدريني – ولاد البلد:
قدم قبل أيام، المحسود علي نضاله، مصطفي بكري رئيس تحرير جريدة الأسبوع المصرية استجوابا في مجلس الشعب بنكهة مانشيتاته الحمراء الصارخة المستغيثة المنذرة بالخطر الوشيك التي طالما تصدرت الصفحة الأولي لصحيفته منذ صدورها قبل تسع سنوات تقريبا..
الاستجواب غير المفهوم الذي قدمه بكري يطالب بحذف مشاهد من فيلم "عمارة يعقوبيان" تحت دعوي خدش هذه المشاهد للحياء العام ويقصد مشاهد الشذوذ الجنسي في الفيلم التي وصفها بـ"الدنسة"!!
وتحرك حوالي 112 نائب في مجلس الشعب لإدانة الفيلم والمطالبة بحذف المشاهد التي تناولت علاقة الشذوذ بين بعض أبطال الفيلم في حركة عنترية من إياها للحفاظ علي ثوابت وقيم وتقاليد المجتمع المصري المتدين النظيف الشريف المكر المفر المقبل المدبر معا كجلمود صخر..!!
ورفض أمس أحمد أبو طالب رئيس لجنة الثقافة والإعلام بمجلس الشعب مصادرة الفيلم لأن الفيلم لم يتجاوز قيم وعادات المجتمع المصري (أيوة القيم اياها)!!
وعرضت صحيفة نهضة مصر اليومية، المملوكة لشركة جود نيوز لصاحبها عماد الدين أديب منتج الفيلم، تقريرا بارزا في صفحتها الأولي اليوم يشيد بقرار البرلمان المصري بعدم المساس بالفيلم تحت عنوان"انتصار حرية الإبداع",وأفردت الصحيفة في صفحتيها الرابعة والخامسة شهادات لكتاب وسياسيين يهاجمون بشراسة فكرة المنع والمصادرة.
الملاحظ أن صحيفة عماد الدين أديب أدارت الأزمة علي نحو دعائي واضح مغلف بأجواء البروباجندا الأمريكاني، حيث أفردت في صفحتيها الرابعة والخامسة تحقيقا عن تاريخ المصادرات والحذف مع السينما المصرية منذ أفلام "لاشين" و"البريء" و"المهاجر"، واستعانت الصحيفة في التحقيق بآراء حقوقيين وسياسيين كلها تصب في خانة إدانة محاولة عرقلة الفيلم المعجزة الفاضح الكاشف للفساد والمفسدين واحد واحد..نفاااار نفر!!
وأكدت الصحيفة علي تميز الفيلم ودوره في (كشف) و(تعرية) الفساد والفاسدين، وأشارت إلي أصل الفيلم رواية علاء الأسواني التي حققت أعلي المبيعات في مصر في الفترة الأخيرة في مصر عبر أكثر من 10 طبعات للراوية فضلا عن ترجمتها لأربع لغات أجنبية، وتطرقت إلي حصول مخرج الفيلم مروان وحيد حامد علي جائزة أفضل مخرج شاب في مهرجان "ترابيكا بنيوورك" ضمن 350 عملا سينمائيا عرضت في المهرجان المذكور.
وأفردت صفحتها قبل الأخيرة كاملة للدعاية للفيلم من باب بقي عايزين يصادروا الفيلم اللي.. واللي.. واللي..!!
وعلي القارئ استنتاج كل هذه اللي واللي واللي!!
وبكثير من المواربة يقصدون الشائع من أن الرواية تصور شخصيات سياسية شهيرة في مصر وتفضح تورطها في صفقات فاسدة (كمال الفولي) وتشير في الوقت ذاته إلي منظومة حكومية متراتبة في الفساد، ولا نغفل الحديث عن فضح مشاهير الشواذ في مصر، حاولت نهضة مصر تمرير هذا كله من بعيد لبعيد كده!!
أسلوب إدارة "جودنيوز" لحملة الدفاع عن الفيلم طور الموضوع من كونه دفاع عن هجوم ضد الفيلم إلي دعاية مضادة روجت للفيلم بشيء من المهارة, حتى وان كان في صحيفة محدودة الانتشار كنهضة مصر.
الطريف أن الصحيفة أكدت في صفحتها قبل الأخيرة التي أفردتها لبيان خاص من أسرة فيلم "عمارة يعقوبيان" أنها تثق في الرئيس حسني مبارك الذي أنصف الطالبة ألاء، صاحبة أشهر موضوع تعبير في مصر، وأقر حقها في التعبير عن رأيها وأن الرجل لن يقبل بالمساس بحرية التعبير والإبداع!!
يعني الراجل يا جماعة الذي أنصف ألاء اللي عندها 15 سنة مش هينصف الناس اللي صرفت علي فيلمها 20 مليون جنيه وفق رواية عماد أديب محاور الريس وإعلامي المرحلة المفضل لسيادته!!
عدد التعليقات : 13
• أهل الفن.. نظرة فابتسامة فطلاق!!
• شيخ الأزهر.. وابن المغتصبة!!
• شرقاوي..بره الزنزانة
• كلنا شيعيون.. من أجل لبنان!!
"الحلوة في مشوار وصاحبها على نار"
كلام مكتوب على شباك ميكروباص، بيمشي في صفط اللبن.. وبيروح الجامعة
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
وانا مع النواب في طلب حذف المشاهد دي ....
لأنها بمنتهي الصراحة ملهاش أي لازمة .... وخادشة فعلا لكل عادتنا وتقاليدنا ... ده غير ديننا .. اللي هو الأساس ...
ومش معني إنه في أفلام كانت أكتر من كده مشاهدها .... يبقي ده حلو خالص وجميل جدا وغير متجاوز ... والنغمة دي ....
وبعدين أنا مش شايف اي سببب يخلي " الأستاذ " أحمد يتكلم بالسخرية دي عن النواب ولا عن الطلب ذاته .... لأنه طلب مشروع جدا ومفهوش أي حاجة ....
وبرضه مش حاسكت ...
لا للتمديد ... لا للتوريث ... نعم لتعديل الدستور المصري
mohamedmat@hotmail.com
أعتقد أنه من غير المنطقى على الإطلاق أن يهلل مصطفى بكرى و يعلو صوته دفاعا عن حرية الصحافة ، ثم يقدمفى اليوم التالى استجواب يطالب فيه بمصادرة أو قطع مشاهد من فيلم أجازته الجهات المختصة ... أليست الصحافة و السينما يقعان تحت بند حرية التعبير... حتى و إن اعتبر السيد النائب المحترم أن الفيلم سىء فيجب ألا يصدر منه طلب حذف مشاهد لإنه ببساطة يمكن أن يعتبرها تحت بند مفيش حلاوة"حرية صحافة " من غير نار" أفلام وحaة و قليلة الأدب!!!!"... و ربنا يخليلنا بقى أtلام لخمة راس و الغواص و فرقة 16 إجرام و الأفلام التقيلة دى....
ملاحظة أخيرة:- يبدو أن النائب مصطفى بكرى ماشى بنظام اليوم بيومه ... يعنى هو ليس مسئولا عما قاله أمس و لن يكون مسئولا غدا عما قاله اليوم... ما علينا....
أرجو قراءة ردى فى مدونتى وتناول الموضوع بالمنطق وبشىء من الموضوعية ....
http://withoutway.info/?p=29
فى إنتظاركم
انا مش عارف ليه الضجة المفتعلة دي على الفيلم ده
الفيلم مش قد الضجة اللي معمولة عليه ابدا الفيلم مجرد فيلم عادي جدا ويعاني مشاكل كتير في القصة والإخراج .
لكن إحنا اللي شعب ممكن ينط في اي حاجة ويتعلق فيها
راي بقي شوفوا كريم دا بيفهم في السيما, وكتب عن الفيلم قبل كدا كلام جامد جدا ومئلست عليه متزعلش , ومتقفه مع راي الكابتن ماجد" بجد ماشيه " في ضجه جامده فعلا كل اما اروح حته يعقوبان يعقوبان . انا مشفتش الفيلم صراحه , بس بالعقل كدا انتو بتشفو مناظر خارجه مش شرط في يعقوبان وبس اجنبي ....
يعني تعددت الرؤيه والجريمه واحده
فبلاش هرش مخ مع احترامي لريك يا محمد.
مش فاهم ليه كاتبالموضوع المحترم بيسخرمن مصطفى بكرى و النواب اللي طالبوا بحذف المشهد..هو لا مؤاخذة الجهات المعنية اللي سمحت بعرض الفيلم بدون حذف مش جهات نظيفة أو محترمة .انتو بتتكلموا على 11 دقيقة شذوووووووووووذ
هي دي حرية و لا قذارة من منتجين الفيلم ومخرجه و اللي اشتركوا فيه؟
بالمناسبة كتيرمن اللي دخلو الفيلم اكدوا انه ممل ومفيهوش ترابط بين الاشخاص و لا ذروة احداث ..يعني مفيش قصة اصلا و الفيلم باختصار بيتعرض بالكامل في في الاعلان
يا سلام على الحرية والابداع لما ييجي سي عادل امام اللي بلغ من العمر ارذله و هو فاهم نفسه شاب و بيصورمشاهد ساخنة في الفراش ..و ايه حريةالابداع دي لما نعرض مشاهد الشذوذ
يا جماعة لو عايزيين تكشفوا الفساد ..ميتعرضش الموضوع بالتلذذ اللي بيعرضه بيه اصحاب الابدااااع المزعوم
جرت عادة السينما المصرية انه عندما تنجح فكرة فيلم ما ان يتم تناولها في اكثر من عشرين او ثلاثين فيلم ... تخيلوا لو فكرت المخرجة العبقرية ايناس الدغيدي في اخراج فيلم مشابه لعمارة يعقوبيان وكانت البطلة فيه الهام شاهين وفيفي عبده ويسرا وروبي وغيرهن بالإضافة الي الشباب من الجيل الصاعد واقترح ان يشترك في الفيلم الوزير الفنان فاروق حسني علي ان يقوم بدوره الحقيقي في الحياة لمزيد من الواقعية ... تخيلوا الفيلم ممكن يكون ايه ولو حد طلب حزف المشاهد الخارجة تفتكروا ح يتبقى حاجة من الفيلم القادم
ربنا يستر
يا اخوانا دول 20000000 جنيه انتو بتهرجو لازم تحصل الضجه دى على الفيلم حتى يثير الفضول الجماهير وتذهب لمشاهدة الفيلم ومن ثم يغطى تكاليفه ثم يجنى الثمار يعنى الناس دى تشتغل لوجه الله والوطن لا سامح الله دا احنا مفتريين بشكل لاحول ولا قوة الا بالله وحسبنا الله ونعم الوكيل
أنا شايفة إن صناع الفيلم دول جاهلين بدينهم اللي مكتوب في البطاقة ..المفروض يعرفو يعني ايه مسلم ..بدل ما هم عاملين يتفزلكو و يعملو فيها مثقفين و هم مش عارفين القرآن بيقول ايه ؟ ..خليهم يبدعو و ربنا لما يسألهم عن الفساد ده ..يقولو أصلنا كنا بنبدع ..عادي ..
كان نفسى اعيش فى بلد جميلة عندها قيم واخلاق وصح وغلط وتطور واقتصاد وتاريخ قديم ومستقبل جميل وماضى مبهر ولا اقصد الفراعنة انا لم اكن اعيش فى ذالك الوقت ولاكن منذ 25 سنة لا ولم اعرف او اسمع عن شىء جديد مشرف نستطيع ان نفتخر بة داخل مصر شىء حديث التعليم بايظ الاقتاد تعبان السينيما ههههههههههههه خيبة الشعب جاهل بجد احنا اهم مشاكلنا ان معظم الشعب جاهل ياريت اللى موجود معانا من الاعضاء يقول وجهة نظرو فى ان معظم الشعب بتاعنا جاهل وممكن اكون انا من ضمن الجهالة احنا لازم نختلف مع بعض ولا نتفق ولا نعلم ما هو الصح للجميع ولاكن نعلم الصح لنا فقط انا بجد بكرة مصر جدااااااا جدااااااااا جداااااا مصر بجد بقة قاسية علينا جدااا مش هى دى الحياة اللى كان نفسى اعيشها ليا وليكم يا ريت الرد بعقل من غير اختلاف من اجل الاختلاف
اذا لم تستحى فافعل ما شئت
وكان الرد فى المدروس من سيادته.
والله يابنى هى تجربة لو نجحت ها نعممها