عن عادل.. الذي ينظف الحمامات.. ومرتبه بالدولار!
تتذكر أنك في القاهرة.. التي هي عاصمة مصر.. التي هي دولة ثالثة من العالم الثالث.. التي هي فيها 80 مليون نسمة.. منهم 9 مليون عاطل..
14/07/2006
في طريق رجوعك من الساحل الشمالي، ولأن بيتك ليس فيه طعام لأنك غادرته منذ أسبوع، ستكون في حاجة بالتأكيد إلى التسوق لدقائق، تشتري فيها ما تحتاجه لوجبة الغذاء.. خصوصا وأنك عدت في منتصف النهار.. أي أنك في شوق لوجبة غداء سريعة ومشبعة!
ولأنك تجلس في السيارة عينك على الطريق منذ ما يزيد عن الثلاث ساعات.. فستكون في حاجة لأن تجيب نداء الطبيعة وتدخل الحمام لتريح نفسك وجسدك الذي أرهقه الجلوس في الشمس كل هذه المدة..
بجوار بوابة بداية الطريق من القاهرة إلى الأسكندرية، وأنت خارج من البوابة في طريقك للقاهرة، ستجد على شمالك مبنى من طابقين.. عليه لوحة ضخمة جدا، مضاءة بالنيون والليزر.. ومكتوب عليها.. كارفور!
في كارفور.. ستشتري ما تحتاجه.. وفي الحمامات الملحقة به ستلبي نداء الطبيعة..
كل هذا طبيعي..
تدخل الحمام.. تقضي حاجتك.. وتخرج..
غير الطبيعي هو الشخص الذي قف في الحمام ليقول لك مساء الخير يا أستاذ ويناولك قطعة مناديل صغيرة وينتظر منك نص جنية فكة.. وطبعا تكون حجتك أنت جاهزة بإنك.. معكش فكة!
هذه المرة لن يطلب منك شيئا.. ولن يعير لوجودك أي اهتمام.. وسيستمر في مسح الأرضية.. ويهتم بتلميع الزجاج.. وكأنك مش موجود أصلا!
ركز في ملامحه.. اقترب منه.. دقق النظر...
تتذكر أنك في القاهرة.. التي هي عاصمة مصر.. التي هي دولة ثالثة من العالم الثالث.. التي هي فيها 80 مليون نسمة.. منهم 9 مليون عاطل..
كل هذه الأشياء تجعلك تدقق أكثر.. وتكتشف الكارثة.. الباشا اللي بيمسح الإزاز.. في كارفور.. اللي جنب بوابة الكارتة شمال.. في الحمام الرجالي.. سيريلانكي!!
- "يو اسبيك أربيك؟؟"..
- أيوة..
- أنت من الهند.. صح؟
- لا من فضلك.. أنا من سيريلانكا!!
- وبتعمل إيه هنا يا أخ؟
- بشتغل في الحمامات..
- طيب أنت بتشتغل هنا من أمتى؟؟
- من شهر واحد..
- وأنت لوحدك هنا.؟
- لا إحنا أربعة من سيريلانكا.. اتنين مشيوا لإن المرتب معجبهمش.. وفضلت أنا وواحد تاني..
- أنت بتقبض كام..؟
- 100-120 دولار.. حوالي 750 جنية!!
- طيب أنتوا ليه فكرتوا تيجوا تشتغلوا في مصر رغم إنها دولة فقيرة وفيها بطالة وشبابها نفسهم مش شغالين؟؟
- أنا لقيت فرصة عمل محترمة، وأنا مجتش وأنا عاطل.. أنا جيت لإني عرفت إن في شغل ليا.. يعني ظبطت الشغل قبل ما آجي..
- أنت اسمك ايه صحيح؟
- عادل..
- يعني مسلم.. طيب ممكن آخد صورة!؟
- ممكن طبعا..
جهزت الموبايل، وأخذت الصورة.. وفي اللحظة التي فكرت فيها أن أطلب منه أن أأخذ له صورة وهو يمسح الحمامات ويؤدي عمله.. دخل علينا شخص آخر، ببدلة وكرافتة.. إنه الأستاذ محمد.. مدير الشيفت الليلي في الإشراف على الخدمات (أمثال عادل)..
شاهدني وأنا أصوره.. أقترب في حذر.. وسألني إنت بتعمل إيه يا حضرت!!
- أنا صحفي من موقع عشرينات.. وكنت بعمل تحقيق عن العمال الأجانب في مصر..
- وهتقول إيه في التحقيق ده..
- مش هقول والله يا بيه.. أنا بس مستغرب شوية إن مصر فيها اجانب من الهند وجنوب شرق أسيا.. وبيشتغلوا في مهن معاونة.. يعني أكيد في مصريين يرضوا يشتغلوا نفس الشغلانة بالمرتب المغري اللي هو بيقبضه!!
- عندك حق.. بس عادل عنده خبرة كويسة في المجال، وإحنا مش بنجيب أي حد..
شكرته علنا.. ولعنته سرا.. هو وعادل والخبرة.. يا ولاد الـ(...).. هي مصر لاقية تاكل عشان تأكل غيرها..
استفزتني الكلمات التالية.. "فرصة عمل – 100دولار – خبرة – مجال".. حاسس إني في لندن..
يلا.. أنا عملت اللي عليا.. ومحبتش أشتم في الموضوع.. لكن هنتظر آرائكم في الموضوع.. في التعليقات طبعا.. واللي هيشتم.. هنحذف تعليقه..
البراء أشرف.. مراسلكم من حمامات كارفور الرجالي..
* ملحوظة:
فكرت إني أشوف كدة الحمام الحريمي فيه سيرلانكيات ولا لأ.. بس قلقت شوية.. لإن حجة إني صحفي عايز يعمل تحقيق مش هتكون مقنعة قوي!!
عدد التعليقات : 42
• أهل الفن.. نظرة فابتسامة فطلاق!!
• شيخ الأزهر.. وابن المغتصبة!!
• شرقاوي..بره الزنزانة
• كلنا شيعيون.. من أجل لبنان!!
"الحلوة في مشوار وصاحبها على نار"
كلام مكتوب على شباك ميكروباص، بيمشي في صفط اللبن.. وبيروح الجامعة
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
انت زعلان ليه انت متعرفش ان الوساخة الى عندنا معدناش قادرين ننظفها علشان كدة
بنستعين بناس تانية تساعدنا فى تنظيف
هذه القذارة والعفن الى احنا فيه واهو ناس بتسافر علشان النفط وناس بتسافر علشان الوساخة .
الحقيقة، مش عارف اعمل ايه
اضحك على نفسي واتفشخر ادام الناس وابررلهم الموقف بإن بلدنا ما ترضلناش إننا نمسح الحمامات
ولا اعيط على الشباب اللي مش لاقي يشتغل، ومستعد حتى يمسح جزم، وفي الآخر يجيبولنا عمالة من بره
حسبي الله ونعم الوكيل
دا مش قر دا حسد بس
سيبك انت قال اية فى اتنين مشيوا علشان المرتب ما عجبهمش اما حاجه تكسف صحيح طيب دا حتى الكلام أخدوعطامش قفش كده يعنى ممكن تزعق شوية يقوموا يزودوك علشان ما نعملش مشاكل مع دول اجنبية ويبقى لينا اعداء............ وعجبى
في بلاد بره مايرضاش يتقاضى أجر زي ده في يوم، هو ما إيه اللي حدفه على مصر يعني؟ بلاد الخليج مفيهاش وسع خلاص؟ وبعدين يابراء الواد شغال شغلة شريفة يعني لابيبيع كيف ولامخدرات ولا شغال في أعوذ بالله دعارة ولا حرامي. خليه يترزق إن كان عاجبه هنا فيه كم واحد عاطل أو مش عاطل يقبل شغلة زي دي؟ مع إن كل العمل شريف عدا مايماسرة محاسيب الحكومة من الحزب الوطني من النهب العام والخيانة ونشر الرذيلة والموبقات.
أخويل براء ممكن تدلنى على مكان المدير علشان ابعت له cv بتاعى
و انا متيقلى بعد 5 سنين كلية ممكن اقبل فى الشغلانة دى
انا من دلوقت هذاكر انجليزى و كمبيوتر و هشترى بدلة..............علشان
المقابلة الشخصية
يا لهوى................غطينى و صوتى يا أما
والله اعرف واحد صاحبنا عنده 32 سنه ودارس هندسه وبيشتغل بعقد بخمسه جنيه فى اليوم هم الخمسه جنيه دول يعملولهم اد ايه بالدولار لا كويس اهو داخل على دولار فى اليوم هو هاينهب
والنبى يا بتاع ال c v ابقى قولى رايح امته عشان اجى معاك امسك الحمام الحريمى
انا معايا ليسانس حقوق
ممكن انفع في الشغلانة ديه
بس انا مش معايا واسطة
ربنا ينتقم منك يا مبارك يا حقير
الأخ الفاضل كاتب المقال تحية طيبة و بعد . . .
أثار مقالك شجوني و حزني و أنا أثق أنه أثار العديد من علامات الأستفهام في ذهن القراء. طبعا لن نتحدث عن الطيور المهاجرة اللي هم المصريين من ذوي الكفائات الذين لم نعيرهم أي أهتمام عندما كانوا بمصر و سد أصحاب الضمائر التالفة الأبواب أمامهم في الحصول علي فرصة عمل شريفة تتناسب مع مؤهلاتهم و قدراتهم. لأنه كما يبدو أن الجماعة أصحاب الضمائر التالفة من أرباب الأعمال أو المسئولين عن توظيف أولادنا و أخوتنا بالحكومة و القطاع العام يرون أن أولادنا غير مؤهلين بالشكل الكافي و قد تسأل ماذا ينقص أولادنا المتعلمين حتي يتأهلوا لتولي الأعمال و سأقول لك أنه ينقصهم ان يفتحوا دماغهم و يهرشوا جيوبهم أو يبحثوا عن واسطة و هذه كلها مفاتيح الجنة المرتقبة التي قد تقودهم الي مرتب لا يتجاوز ثلاثمائة جنيه.
و بالطبع الأخ السريلانكي يحمل مؤهلات أعلي من أولادنا ، أعتقد أنه ربما يكون أحد القلائل الحاصلين علي دكتوراه تنظيف المراحيض من أحد الجامعات النظيفة
و مع كامل أحترامي له و للجماعة اللي مشغلينه أقول ، أننا نقتل الأمل بداخل أولادنا بأيدينا و حرام علينا أن نقوم بجلب أجانب لتنظيف المراحيض في حين أن أولادنا موجودين و حاصلين علي مؤهلات عليا و منهم الحاصلين علي دراسات عليا و يجلسون بالمنازل و علي المقاهي في أنتظار الفرج.
المثل الشعبي يقول " الزيت إن إحتاجه البيت يحرم علي الجامع " و ذلك للدلة علي أنتفاع أصحاب الشأن بما لهم طالما كانوا الأولي به و في هذا المقام هم أولادنا الذين يحرمون من العدالة في الحصول علي فرصة عمل بينما تتاح ذات الفرصة للأجانب بدون داعي.
ومن الغريب أن عقدة الخواجة توغلت بداخلنا لدرجة إحضار عامل لتنظيف المراحيض من دولة أخري.
لي صديق دكتور بالج
اقرأ بقية التعليق ..
عقد مجلس برلمان المصطبة جلسته الأسبوعية لمناقشة طلب إحاطة من العضو الغلبان حول التصريحات الوردية بالمستقبل الباهر.
الرئيس: حضرات الأعضاء معروض علي حضراتكم طلب مناقشة التصريحات الأخيرة اللي بيطلقها المسئولون ابتداء من رئيس الحكومة وانتهاء برئيس القرية واللي كلها تدور حول تشغيل العاطلين حسب برنامج سيادة الرئيس الانتخابي.
العضو الفلفوس: حضرات الزملاء موضوع تشغيل العاطلين أصبح موضة اليومين دول وآخر قنبلة ألقاها في هذا المجال سيدي أمين أباظة وزير الزراعة اللي قال فيه:
إن الوزارة ستصلح مليون فدان وده حايوفر فرصة عمل لحوالي نص مليون مواطن حسب برنامج سيادة الرئيس الانتخابي، وفي الواقع الموضوع واسع قوي لأن سيدي أمين لم يحدد الوقت اللي حا يتم فيه استصلاح المليون فدان وعلي كل حال الراجل معذور لأن دي من الدعاية اللي بيقوم بيها حزب الحكومة ورجاله.
العضو زعيط: يا عالم كفاية ضحك علينا وخلاص فاض بينا الكيل وشبعنا وعود ابتداء من شد الحزام ومروراً بتكليفات سيادة الوزير وتوجيهات سيادة الوزير وأتباعه وهلم جرة.
العضو معيط: أنا عاوز أقول إن الناس اللي بتقول هذا الكلام يا إما ناس ساذجة أو فكرين إن إحنا ناس عبيطة وعاوز أقول للمرة المليون إن إحنا ناس بتفهم وما عدش الكلام ده يخش علي عقولنا وكفاية تهريج.
العضو النمرود: يا إخواني دي فلسفة إعلامية سياسية بمعني إنهم يفضلوا يكرروا الكلام ده لغاية ما الناس تصدقه ودي اسمها تصاريح حقن بنج والناس تفضل عايشة علي هذا الأمل.
العضو نطاط الحيط: يا زملائي إحنا في دولة التوجيهات والتكليفات وأخيراً برامج انتخابات وديل التعلب فات فات علي ديله سبع لفات.
الرئيس: يحال الموضوع إلي لجنة الوعود الوردية.
مبارك
سارق بلدنا
واكل خيرنا
معطل شبابنا
عميل لاعدائنا
صحيح
منجس من يومه.
يعني مش مقنعة خالص ان واحد يشتغل في حمامات ب 120 دولار...صعبة أوي دي..
هذه أرزاق يوزعها الرزاق سبحانه وتعالى
مثل هذه الآراء تقال الآن عن العمالة المصرية التي تملأ الدول العربية
وهناك أصوات تتعالى في هذه البلاد بحتمية رجوع هذه العمالة إلى أوطانها بحجة ان ولاد البلد أولى بالعمل فيها
للاستاذ اللى قال ان العماله فى الخليج بتعانى من نفس المشكله
يا استاذى العماله اللى فى الخليج هى اللى عملت الخليج من الستينيات
يعنى الخليج كان صحرا فالمصريين راح هناك اشتغلوا و طلع عينيهم و بقى الخليج زى مانت شايف دلوقتى
كمان المصريين اللى بيشتغلوا هناك يا محترم مرتباتهم لا تقارن باصغر موظف من اهل البلد
ناهيك عن التفرقه فى المعامله اللى بينالها المصرى من كل- الاخوه الاشقاء - العرب
انما المحاسب فى مصر لم بيتخرج مابياخدش 750 بتاعة الاخ السيريلانكى - صاحب الخبره فى مسح الحمامات -
و حسبنا الله و نعم الوكسل فى اللى رخص العماله المصريه فى الداخل و الخارج
ياجماعة انا ببكي دم على لبنان واللي بيحصل فيها ماسمعتوش بيان مبارك ولا مش هاممكم احنا استطعمنا طعم الذل وبقت الكرامة بالنسبة لينا مصيبة مش عايزنها ادعوا معايا الله ينصر حسن نصر الله والمجاهدين والجيش اللبناني قولوا آمين ولاتنسوهم من الدعاء يااخوتي
الاخ الكويتى احب اقوله كلمة واحدة
الله يسمحك على كل اللى قولته فى حقنا دلوقتى
ماقلت المصري حمار بن بغل بن جاحد نعمة وخنزير؟ ترى ماقصرت بوشعيب عافاك! إسمع ود الكراتين ومادري شلون، حنا الأمريكان وغير الأمريكان نستأجرهم ونقولهم تعالوا يجون ركض ويقولون"يس سير أني أوردز؟". لما نستغنى عنهم ترى نفنشهم ونبعتهم ديارهم. لكن الأن محتاجين لوجودهم، لكن شنوا حاجتكم إنتوا للأمريكان ولإسرائيل؟ بلادكم ما كلها قواعد أمريكية إسرائيلية؟ همه يجرون وراكم وإلا إنتم ياخير أجناد الأرض؟ شايف حكومتكم تبوس بساطيلهم بكل ثانية، وحكومتكم أكبر حامي لحدود إسرائيل وهي معرص وقواد التطبيع مو الكويت. الكويت ملو سالفة مع العرب حنا لا نريد العرب وإن تبون وتريدون ولا الإسلام. مصري+تبجح=نفاق. حرروا بلدكم أولا من اليهود الحاكمينكم أبناء عاهرات مجوس.
انتوا يهود العرب ما بتسوا شي غير انكم خنازير للامريكان, انت يا قزم العرب بتغلط في فلسطين يا خسيسس يا عميل
شو الكويتيات الشاذات ما بتسوي معهم شيء يا كلب, ولا الرجال الشواذ الكويتة
فلسطين ستحرر يا قزم ودولة مصر الشقيقة ستظل قوة العرب يا قزم الاقزام
قــزم+عمـيـل= الكــويت
حبيب قلبي الفلسطيني؟ سيب الجعر ده يفضفض مين عارف كان راكبه إيه أو مين؟ مهو قال مش عايزين الإسلام يبقى إيه لزوم الكلام.
الكلام ليك إنت وللوطنيين المصرين: إنهي "مصرودولة مصر الشقيقة ستظل قوة العرب !" اللي بتقصدها حضرتك؟ مصر السادات-مبارك ولا مصر الشعب؟ مصر الرسمية أقولها لك لاتختلف عمالة وقذارة وتآمر عن الكويت..وكل ماذكره صاحبنا عن شرائهم لمبارك وعصمت عبد المجيد للأسف صحيح جدا، وأزيد كمان لولا تآمر وخيانة النظام المصري بالذات لما حدتث حروب الخليج ولا دمر العراق. ومصر الرسمية ضد الإنتفاضة وضد قيام دولة فلسطينية كاملة السيادة وإن كنت لغاية النهارده لاتعلم هذا فمشكلتك يعني.
للفلسطيني
بســــ الله ـــــم
اولا قبل ما اتكلم فى اي حاجه انا برفض الموقف دا ان ناس تانيه ملهاش حق فى البلد دي قدنا ويستفيدو بالخير بتاعها
بس ممكن اقول حاجه احنا عملنا ايه للبلد علشان ندور على شغل والاه نقول بطاله يا جماعه حرام عليكو قبل ما تقول الريس بيعمل والريس بيسوى شوف انتا بتعمل ايه اتحدى اي واحد فى مصر مش بينفض للفساد ولويقول لا للفساد بس لو شاف مصلحته فى الفساد مش حيقول لا دي الحقيقه والازم نحسبها كده اذا كان اللى من بلاد الهند والسند لاقى عمل هنا احنا يا ولاد البلد مش لاقينى يبقه العيب مش فى مبارك والاه العيب فى مصر العيب فينا احنا اننا دايما بندور على حقوقنا ونسين ان لينا واجبات لازم نعملها يا جماعه اتمنه ان كل واحد يقوم يتكلم مع نفسه يشوف ايه اللى عمله للبلد علشان تديله ايه نفكر شويه
وحكايه عادل دي خير دليل على ان البلد فيها شغل يعنى بالعقل اللى اخر الدنيا ييجى يشتغل هنا واللى فى البلد مش لاقى يا ريت نحسبها صح
واحب اقول انى مش مع عمل عادل بس مع ان الموضوع دا ميتكررشى مره ثانيه
بشكركم جدااا
اقل ما يقال كلمه حمدي احمد في القاهره تلاتين ااااااااااااااااه يا بلد
بعد ماقرأت التحقيق الصحفي عن الإكتشاف المزهل شعرت للحظة انه لايوجد لدينا بطالة وإننا قد أصبحنا من الدول الغنية وسرعان مارجعت الي الحقيقة المرة عندما تذكرت اعداد البطالة واعداد اللذين أجبروا علي تقديم استقالاتهم بعد التخصيص وصدق المثل القائل عريان الـ...ز يحب التأميز ويقول طريق الخمارة فين
وآآآآآآآآآآآآآآآآآآآآه يابلد
بصراحة ادارة كارفور عندهم حق يا جماعة احنا فراعنة و مش بتوع شغل الا في الزنقة فقط يا جماعة عمرك ما تدخل محل وجبات سريعة و تلاقي الحمام نضيف 100% الا وقت الصبح و وقت تغيير الشفت فقط لان البية المسئول عن النظافة مشغول بالتهريج مع الكاشير او بمحاولة استجداء اي بقشيش شوفوا الشوارع في مصر بمنتهي القذارة لان البهوات الكناسين مصريين علي عدم العمل الاجنب العربيات اللي بتركن علشان ياخذوا اي بقشيش يا جماعة احنا عايزين نتربي علي حب الشغل للشغل فقط حتي البلد لما مسكها شوية عساكر لم يكن عندهم اصل او فصل خربوها لان كل همهم البقشيش من العرب و ماما امريكا.و اوعي حد يقولي شهادات عاليا او واطية لان احنا بجد عندنا بطالة مقننعة بسبب فساد نظام التعليم اللي وضعة اللي ما ينسمي
كل واحد ******* عامل فيها دكتور وعمال يتكلم اكنه حيجيب الديب من ديله
يا ريت كل واحد يشوف حلول عمليه وواقعية للبطالة مش كلام علي الفاضي
الشباب خلاص جاب اخر ومش ناقص كلام ما له فايدة
مش تنسوا ان مصر بها 9 مليون عاطل
يعني في انهيار وفساد وواسطة وكوسة في كل حاجة في البلد الوسخة ديه
لا للفساد..لا للتوريث.. لا لمبارك
السلام عليكم الشباب عاوز يشتغل مدير على مكتب وبنت حلوة ومرتب كبير وعربيه وشقة جاهزه من كله ونسى انه كله ده مش هاييجى غير بتعب ومجهود وقبل ده كله لازم نصرة الله ونصرة رسوله الكريم ص عايزين نعيش كويس عايزين ننصر فلسطين ولبنان والدين الاسلامى لازم ننصرالله الصحابه كانو بياخشوالله فكان الناس بتخشاهم وشكرا
الناس اللى جابوا عادل العيب مش عليهم العيب على الناس اللى جابو الشركات الاوروبية علشان ينظفوا البلد من القمامةوفى الاخر طلعت شركات غير متخصصة فى التنظيف ورفع المخلفات بس عادل متخصص يعنى لو ادو المرتب دة لحد خريج جمعة هيرفض!!!!!!!!
أولا : أعتذر للإطالة
ثانيا: إحنا معندناش بطالة إحنا عندنا حاجات ثانية كثير وكلامى مش نظرى كلامى عملى 100%
منذ سنوات و أنا بأعمل إعلانات أطلب عمال وشباب يتعلم حرفة ويأخذ 300 جنيه يتم زيادة راتبه بمجرد إتقانه للعمل .. وجدنا أن معظم الشباب لا يرغب فى التعليم ويفضل أن يكون فرد أمن مثلا يجلس بجوار الباب طول النهار أو الليل أو يفضل عمل على مكتب.
هذه مشكلة العاملين فى الصناعة فى بلدنا.
شبابنا مستعجل دون أى مؤهلات أو خبرة وبعد حصوله على العمل يبحث عن المبررات لعدم إجادته أو إضاعة الوقت .
النموذج المطروح أمامكم وهو (عادل) بالتأكيد لأصحاب العمل أرخص من العامل المصرى لأن التجربة المصرية تقول أن العامل المصرى أرخص لكن داخل مصر أدؤه أقل بلإضافة لإحتياجنا لملاحظ لكل عدد صغير من العمال ومشرف لكل مجموعة ملاحظين وكومنادة للمشرفين ورئيس وردية ........ كفاية كده .. الخلاصة إحنا عايزين شباب جاد وحاسس بالمسئولية وعارف أن تفريغ دماغ شبابنا هدف ومطلب غربى وبالتبعية أصبح مطلب قومى ...
الجاد فى العمل يترك وسيلة إتصال حتى أكون أول الجادين فى محاولة تفعيل دور هذا الموقع بوجود حللول للقضايا المثارة,
لا عيب فيما حصل ولكن العيب فينا مين يرضى يعمل فى تنظيف الحمامات وكارفور ادارة فرنسية ومشهورة بالظبط والربط ولا مجال لمعلش فيها لذا فالاخوة الاسويين مشهورين بحاضر ونعم ونحن اولاد فرعون مشهورين بمعلش ولمؤخذة يا باشا . فلا وجه مقارنة لهذه الاعمال الهامشية ولكن بتانسبة للمعاش الشهرى تفتكر كام حياخذ هذا الاسيوى غير ذلك لانه يحسبها بالعملة بتاعته المهم لكى الله يا مصر مبارك .
العمل عبادة ومن الاخر كدة لو واحد مصرى مش هيرضى يشتغل الشغلانه دى احنا مش فالحين غير أننا نشتغل فى الزفت برة
وكمان الاخ عادل مهما كانت جنسيته فهومسلم وكمان سا شباب انا لما شفت الصورة عيطت
أنتوا مش حاسيين بمقدار الحزن اللى فى الصورة ولا ايه
متنسوس انه متغرب وبيمسح حمامات علشان ياكل عيش
ياجدعان ركزوا فى الحزن اللى عنيه وشوفوا مقاله زى دى ممكن تخرب بيته
الاخ اللى كاتب المقاله ميرضاش ان حد يشهر بواحد من أهله بالشكل دة
والايام دول
هم يبكي و هم يضحك كويس انه لقي شغل و بالدولار كمان بس يخساره مفيش دولار الا بنظافة الحمامات
هو بجد بياخد 100 دولار بس!!!
لو شفت تاني يا براء شوف معاه تصريح عمل ؟
و مصيبة لو معاه و ان كان المرتب ده بيقول معاه.
اصل اللي انا اعرفه عن تصاريح عمل الاجانب في مصر ان لا يكون يوجد مصريين لديهم الخبرة في هذا المجال و بالتالى من الممكن الاستعانة بخبير اجنبي لفترة من الزمن حتى تتوفر هذه الخبرة للمصريين
و الخبير في حالتنا ديه هو الدكتور عادل خبير الحمامات.
عوض عليا عوض الصابرين يارب
لا بجد حاجة تفرح الله اكبر بجد مافيش فايدة قاعدين بتشتموا فى بعض لا حاجة تفرح يا جماعة لازم تعرفوا انى شعب مصر شعب اصيل وبعدين انتوا ليه تردوا على الاخ ابوشعيب وتركبوا نفسكوا ذنوب ليه يعنى لما واحد يتكلم قوله الله يسامحك لانى مصر اساسا مش محتاجة حد يتكلم عنها لانى مصر عندها تاريخ وحضارة ومصر الفن ومصرام الدنيا حتى لو كانت ضايعة دلوقتى لكن مصرهترجع بعدين محدش يغلط فى مصر لانها اكتر دولة ذكرت فى القران يعنى مصر ارض مباركة زى ارض فلسطين والسعوديةوكل الناس بتحب مصر والناس بتجيلنا من اخر الدنيا علشان يشوفوا الحضارة الفرعونية ومصر هى ارض الامن والامان وجنود مصر خير اجناد الارض يعنى مصر مش محتاجة حد يتكلم عنها لا نها معروفة جدا وبصراحة انا لو لم اكن مصرية لودت ان اكون مصرية على راى مصطفى كامل واناعايزة اعلق على الموضوع المدير بيقول عادل من الخبراء اسال سؤال هو مسح الحمام وتلميع الزجاج محتاج خبرة لا بجد حاجة تفرح
يا جماعة الحمامات لا تليق ببريستيج المواطن المصري خاصة انه حمام افرنجي طالما في "كارفور" وليس بلدي !
مش عارف أحنا ليه بنتشاتم الكويتى والمصرى والفلسطينى ولو دورنا على الحقائق حتلاقى أن الموقف الرسمى حاجة مختلفة تماما عن الموقف الشعبى والدليل المظاهرات اللى مالية البلد.
ياعم الاخ الكويتى مصر اللى بتتكلم عنها دى غير مصر الشعب الصامد الساكت المغلوب على أمره والمكبل بقانون الطوارىء،واكيد الكويت اللى بيتكلم عنها أخويا المصرى هى الكويت بس الجانب الرسمى الممثل فى الحكومة،وماتنساش أن كان فيه اخوة شرفاء فى الكويت هاجموا بعض الوحدات العسكرية الامريكية وكانوا لرافضين للوجود الاجنبى على ارض الكويت.
وفلسطين الحقيقية مش فلسطين أبو مازن ودحلان وشعث لا طبعا .
المهم بلاش ناكل فى بعض علشان الدنيا كلها نازلة فينا اكل فمش ناقصة كمان ناكل أحنا فى بعضنا.
ومتهيألى نفوق أحسن فى الاخر كلنا عرب والدائرة علينا علينا علينا
بصراحة شئ مو غريب عليا لانه يلي بصير عندكم بمصر بصير عندنا متله واكتر بفلسطين ال يفضلوا الغرب على اهل البلد وكل دة ارضاء مش للعامل او الشخص بحد ذاته دة علشان المصالح الي بين الرؤساء الخونة وربنا ينتقم من اولاد الحرام
أنت لما رديت على الأخ الكويتي وهو عبارة عن شخص واحدغير مهذب من ملايين الشعب الخليجي الي بحب مصر , بألفاض جارحة وعبارات مالهاش داعي , لو بس رديت علية وقلت له الله يسامحك وكل واحد يعرف مقدار نفسة كان أحسن ومحدش هيزعل ولاحجرح الشعب الخليجي البطل الذي عاش سنوات يصارع الطبيعة عشان يلاقي شىء يعيش به .