جواب تنسيق.. بالحزب الوطني!!
ولا هو ببساطة بينافس الإخوان وبيلعب في ملعبهم.. خصوصا أن الحزب الوطني معندوش سيطرة غير علي ملعب مجلس الشعب.. وإستاد القاهرة الدولي لو أراد!!
19/07/2006
محمد نصر الدين – ولاد البلد:
"الحزب الوطني الديمقراطي" من منا لا يعرفه.. حزب الرئيس وابن الرئيس وأصحاب وحبايب أبن الرئيس.. الحزب الحاكم في بلاد المحروسة.. هذا الحزب الذي كاد أن يتفضح "فضيحة مش عارف مين يوم طلوعه علي المعاش" في الانتخابات البرلمانية الأخيرة لولا مجموعة ولاد الحلال من النواب المستقلين الذين لم يصبحوا مستقلين".
هذا الحزب يبدو أنه أدرك فجأة أن شعبيته في التدني، إذا كان له شعبية من الأصل" فقرر في الفترة الأخيرة أن يقوم بتنشيط الحياة في محاولات للحصول علي قاعدة جماهيرية بين الشباب"، كان أخرها عقد ورشة عمل في مركز إعداد القادة في حلوان لأعضاء اتحاد الطلبة من جامعة القاهرة، وكانت المحاولة الأخيرة للقيام بنفس الدور ولكن هذه المرة علي طريقة توصيل الطلبات للمنازل "الديليفيري".
ففي يوم السبت الماضي والأهالي كلها مستغرقة في الدعاء لربنا عشان يكرم ولادهم في النتيجة اللي هتطلع بالليل علي الانترنت، فوجئوا بالبوسطجى ينادي عليهم يقول: "بوسطة... جواب من مكتب التنسيق!!
إيه الحكاية ؟!
مكتب تنسيق ؟! جواب من وزارة التعليم ؟! أيوة بس النتيجة لسه هتطلع بالليل و أكيد أكيد أن التنسيق مش دلوقتى ! أمال فى ايه ؟!
الظرف مكتوب عليه وزارة التعليم العالى ووزارة الدولة للتنمية الإدارية برنامج الحكومة الإلكترونية (وأموت أنا بقى فى الحكومة الإلكترونية!!).
فتحنا الجواب، عشان نلاقى جواه منشور إعلانى لخدمة التنسيق عن طريق الانترنت مع عرض لمميزاته وريح نفسك ووفر ثمن الاستمارة وأكتب رغباتك وإنتا قاعد في البيت زى الباشا والرقم السري الخاص بيك قلنا كتر خير الحكومة (وبالذات الإلكترونية)!
إنما بقى..
لقينا كارت دعاية كبير ومطبوع على ورق فخم وبالألوان للحزب الوطني الديمقراطي!!
بيعمل إيه هنا ؟!
الله.. الحزب الوطني بيعمل إيه هنا ؟
يعنى مش مكفيه إعلاناته اللى فى كل مكان شوارع وإذاعة وتلفزيون وفضائيات وأغنية الأمور لؤى بتاعة "شباب النيل قوام بينا!" وكمان هيطل علينا بطلعته البهية فى جواب التنسيق أو ما قبل التنسيق.
و طبعاً نفس الأسلوب الخطابي الممل علي شاكلة "يا شباب مصر أنتم شباب المستقبل" و"مصر ولادة" و"احرصوا على أن تكون أرقى الأمم"، طب م تحرصوا انتو الأول!، إلي أخر موضوعات التعبير الرديئة المحفوظة التي "خنقت" الطلاب في أوراق إجاباتهم قبل شهر تقريبا.
هو مش مكفيه تجنيد.. قصدي ضم الشباب إليه من جوه الجامعة، كمان عايز يستلقطهم من قبل ما يخشوا!! يعنى "بيحليِ" العملية فس نظرهم من دلوقتى ؟!
ويا ترى عايزهم في إيه ؟ هل عايزهم يبقوا "عصافير*" قصدي حمائم المستقبل ولا إيه بالضبط ؟!
بأى حق؟!
لكن السؤال الأهم الذى يطرح نفسه هنا هو بأى حق يقوم الحزب الوطنى بتوزيع كروت دعائية فى جوابات رسمية للدولة ؟!
يعنى تأكيد واضح و صريح على الخلط المتعمد بين الحزب و الدولة مهما أنكرا!! وهل يا تري اختراق المنازل عن طريق الخدمات الاجتماعية مثل تلك المتعلقة بشؤون الدراسة يمثل حالة من "الصحصة" من جانب الحزب الوطني أم أنها "أولويات الإصلاح" التي أعلن عنها الحزب الوطني قبل عامين في شعاره المبهم "الفكر الجديد وأولويات الإصلاح"..
ولا هو ببساطة بينافس الإخوان وبيلعب في ملعبهم.. خصوصا أن الحزب الوطني معندوش سيطرة غير علي ملعب مجلس الشعب.. وإستاد القاهرة الدولي لو أراد!!
وطبعاً ستخرج علينا الردود التقليدية بحجة أن هذه الخدمة "مدفوعة الأجر" ومتاحة للجميع وكله في النور وليخسأ الخاسئون ويصمت الشامتون!
لكن أسئلتنا لن تنتهي، فإذا كانت هذه خدمة مدفوعة الأجر ومن حق "الجميع" الحصول عليها، فهل فعلاً ستسمح الدولة بأى حزب أو أى "جهة" لتقوم بإرسال كروت دعاية فى الجوابات؟!
كارت.. كفاية!
يعنى هل ممكن تفتح الجواب فى يوم وتلاقى فيه الكارت الأصفر المميز بتاع كفاية وتحت منه "لا للتمديد لا للتوريث" و على ضهر الكارت مكتوب "عزيزى الطالب أن مصر أمانة بين أيديك فلا تتركها للفاسدين وأصحاب المصالح، وبمجرد دخولك الجامعة نرحب بك فى حركة كفاية"!
أو نلاقى المصحف والسيفين الشعار المميز للإخوان وتحت منه دعوة للانضمام للإخوان! أو صورة كبيرة لعبد الناصر ودعاية للتيار الناصري!
طبعاً كل ده كلام فى كلام، والدولة كلها بكامل إمكانياتها مسخرة لأجل حزب واحد بدون أى ذرة من العدالة أو زى ما قال الكاتب مجدي مهنا مصر الرسمية ليست محايدة!
*(العصافير لمن لا يدري هو الاسم الحركي للبصاصين أو الطلبة الجواسيس الذين يبلغون عن الطلبة أصحاب النشاط السياسي في الجامعة في مقابل مادي أو الحصول علي تسهيلات من مكتب أمن الدولة في الجامعة).
شاهد صورة الخطاب والأعلان المرفق به
• أهل الفن.. نظرة فابتسامة فطلاق!!
• شيخ الأزهر.. وابن المغتصبة!!
• شرقاوي..بره الزنزانة
• كلنا شيعيون.. من أجل لبنان!!
"الحلوة في مشوار وصاحبها على نار"
كلام مكتوب على شباك ميكروباص، بيمشي في صفط اللبن.. وبيروح الجامعة
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
محمد باشا نصـر . . .
موضوع كويس ( مش عاوز أقول لذيذ ) كالعاااادة
و إلى الأمام دائمًا
الوطني ديما معاك !!!!!!!!
أنا متهيألى لو نائب حويط وصله الموضوع ده ممكن يناقشه فى مجلس الشعب لأنها فعلا بقت مسخرة